Soahng Koaros Ong Kamwahupatail
Nan erein ahnsou oh kohkohlahte, kahrepen Kepikipik oh koasoandi kan en Koht iei pwehn kihpene soahng koaros ong kamwahupatail.
Rahnwet iei Epreil 6, Iei rahn me Sises Krais ketin kapwurehdo Sapwellime Mwomwohdiso en imwin- rahn akan—oh kisehn sounpwung en Ihster, ahnsou me kitail ni popohl kadehdehki mour unsek en Sises Krais, sapwellime tomwo, oh Iasada kaselelo.
Soai en China pwoat tepkihda nein ohl emen pwutak emen ah diar oahs kaselel emen.
“Ia uwen paiamwahu,” mehn imperailko ahpw inda.
“Kitail nek kilang,” ohlo ahpw indahla.
Eri pwutako ahpw pwupwisang pohn oahso oh ohlahr palinwereo me sohte kak mwahula.
“Ia uwen paisuwed,” mehn mperailko ahpw inda.
“Kitail nek kilang,” ohlo ahpw indahla.
Pwihn en alehda sounpei ehu kohdo ahpw sohte wahda nah pwutak ohlahu.
“Ia uwen paiamwahu,” mehn mperailko ahpw inda.
“Kitail nek kilang,” ohlo ahpw indahla.
Sampah me kin wie wekiwekidek wet, saruwaru, sohte kak soandi mwahu, ekei pak kin paiamwahu, oh—palilaud en ahnsou kin—mie paisuwed. Ahpw, nan sampah wet me diren kasongosong, “kitail ese me irail kan me poakohng Koht oh pil paekerohng nin duwen kupwure, re kin ale kamwahuparail sang reh.” Oh ni mehlel, ni atail pahn alu inen kohwei oh tamataman atail inou sarawih kan, “soahng koaros pahn doadoahkpene ong kamwahupamwail.”
Soahng koaros ong kamwahupatail.
Ehu inou kaselel! Koapwoaroapwoar en soanamwahu sang Pein Koht! Sang ni ahl en manaman ehu, kahrepen kepikipik oh lingan en Koht iei en ese ni tapi oh ni imwi, pwehn wadohng kitail soahng koaros me mwahu ong kitail, oh en kasarawihala oh sarawihla sang ni mahkepen oh tomwpen Sises Krais.
Tomwpen Sises Krais kak kahluwaikitail oh doarei kitail sang nan dihp. Ahpw Sises Krais pil wehwehki mehlel atail medek koaros, kansensuwed kan, soumwahu kan, pahtou kan, mweipeseng kan. Ni ereihn ahnsou oh kohkohlahte, pwehki Ah ketin powehdier mehla oh ehl mehkoaros kak pwungila. E kin ketin sewese kamwahuihala me soansuwedla oh me soukoapwoaroapwoarlahr kan, kamwahuihala me lingeringer oh me tohrohrpesengehr kan, kaloalamwahuih me sangat oh mwahuki kelekelehpw kan, kakehlailih me saruwaru oh sohte unsek kan, oh wahdo manaman kan me Koht kelehpw kak wia.
Kitail koulki halleluijah oh weriweriki hosanna! Sang manaman soutik oh wiewia mwahu, nin duwen Sapwelimen Koht plahn en popohl soahng koaros kak doadoahkpene ong kamwauhpetail. KItail kak sohpai mour ni koapwoaroapwoar oh sohte masak.
Ni atail pahn peihn kelehpwla, kitail mweihn pahn sohte kak ese dahme mwahu ong peihn kitail. Ni ansou me “I kin pilada peihn ngehi,” I pil kin ni ansouohte pilada peihn wasa I kak idie, ahi kaluwet kan, soh itar akan. Ni imwilaho, pwehn wia dahme keioun mwahu, kitail anahne kitail en mwahu. Pwehki sohte me mwahu palahsang Koht, kitail rapahki kitail en unsekla rehn Sises Krais. Ihte me kitail kak wiahla pein kitail me mehlel, pein kitail me keioun mwahu pahn sang ni atail pahn kesehla pali uduk oh wiahla seri men mwohn Koht.
Sang ni atail likih oh pwoson Koht, kasongosong kan oh kansensuwed kan kak wiahla mehn kamwahupatail. Sosep, me netilahr ong nan Isip pwehn wiahla lahdu men, mwuri ahpw kapitalahr ah peneinei oh aramas akan. En Soukohp Sosep Smith ah selidier nan Imweteng en Liberty kaskuhlihkiher me mepwukat pahn kihong ih koahiek, oh pahn wia kamwahupe. Momourkiher pwoson, kasongosong kan oh tohnmetei kan me kitail sohte pahn pein pilada pahn kak en kapai kitailda oh mehteikan ni mwohmw ehu me kitail sohte kak medewehda.
Kitail kin kalaudehla atail pwoson oh likih Koht me soahng koaros kak doadoahkpene ong kamwahupatail ni atail pahn kin marainkihla madamadau soutik; ni atail kin wehwehki atail kahpwal akan ahpw ong ni kisin ahnsou kis; kasawihada dahme kin kansensuwedih kitail kak wiahla mehn kakehlapatail; oh ese aksiden kan, mehla sohkasikpeh kan, soumwahu laud, oh kohwa soumwahu kan wia kisehn mour wet; oh kamehlele me Samatail Nanleng limpoako sohte ketkihda kahpwal akan pwehn wia mehn kalokolok de mehn kadeihk. E sohte pahn ketkiong aramas emen takai ehu ma e peki pilawa de pil sineik emen ma e peki mwahmw.
Ni ansou me kahpwal akan kin pwarada, palilaud en ahnsou kitail kin mwahuki aramas emen en kin rong kitail oh mihmi rehtail. Nan ahnsoukiso, arail pasapeng kan kak sohte sawas mwahu, mendahte ineng en kaloalamwahu me irail men sawaski. Ekei pak kitail kin men en mie emen aramas en iang kitail nan atail pahtou, medek, oh mwahiei; kitail kasalehda atail medek, pwunod, ekei pak lingeringer; oh iang kitail wehwehki me mie soahng kei me kitail sohte ese.
Ni atail pahn kin likih Koht oh Sapwellime limpoak ong kitail, mehlel pil ni ahnsou en atail kahpwal laud kan, ni imwilahuo, pahn doadoahkpene ong kamwauhpatail.
I tamanda rahn me I alehdi rohng en lepelepen aksiden en sdohsa ehu me wiawihong irail kan me I poakoahng. Nan soangen ahnsouo, nan weikek oh pwoson, ihte me kitail kak iang Sohp inda, “Kauno me ketkihong ie mehkoaros, oh met Ih me ketkihsang ie; kapinga mware.”
Nan Mwomwohdisoh nan sampah, meh 3,500 [silikid limepwiki] steik oh distrik kan oh ekei [silinen] 30,000 en ward oh prans kan me sawas ong wasahn keiru oh doarepen mour sang melimel kan. Ahpw nan peihn atail steik oh ward kan, me tohto peneinei pwoson kan oh emen emen aramas kan me kin sohpaih kahpwal laud kan, ni arail wewehkier me (sohte wehwehki ia mwomwe) soahng koaros pahn doadoahkpene ong kamwahupatail.
Nan Huddersfield, England, Brother Samuel Bridgstock ahpw dierekdahr me e ahniki kanser me mihmi ni dake pahiou mwohnte ah alehdi malipilip ong steik preseden kapw. Ni ah esehier soumwahu laud me e ahniki, e idekehr rehn ah pwoudo, Anna, dahme e anahnehki en kohlahte pwehn inderpiuh.
“Pwehki,” Sister Bridgstock ahpw indahier, “ke pahn ale malipilip en wia steik preseden.”
Ni tapio e alehdier rohng me e pahn momourkihte sounpar ehu de riau, Preseden Bridgstock (me mihmi met rahnwet) wie papahkier erein sounpar pahiou. Mie ah rahn me mwahu oh ekei me apwal. Ah steik wie sewsewehsehki pwoson laud, papah, oh kadek. E sohte mengei, ahpw ah pwoud oh peneinei kin momourki pwoson, kaping lap, oh wehwehki uwen kapahtou me irail kamehlele me e pahn wiahla popohl soutik sang ni kopwurupwurdohn Tomwpen Sises Krais.
Ni ahnsou me kitail kin nenenla, mweidala atail madamadau kan, oh ahniki wahu, kitail kak kehn uwen lingan, kahrepeho, oh popohl en inou sarawi me kitail ahniki me Kauno kin ketkihdo. Ni ahnsou kan me sarawi, E mweihn kak kasalehieng kitail mehkot laud kan en mour soutik me atail mour en ehu ehu rahn akan wia kiseh, wasa me me tikitik oh mengei kan kin doadoahkpene ong kamwahupen me kin kihwei oh me kin alehdi kan.
Repeka, neihn ai keieun misin preseden serepein, ahpw ehukihda duwen Kauno ah sapeng ah kapakap en kaloalamwahu ni ah sohte kasik me ah kapakap wia pasapengpen en emen aramas ah kapakap.
Ehu pwohngo, Repeka, me wie pahpahtouki ah nohno me apwtehn mehlaho, ahpw alehdier pepehm sansal ehu en kohla pwaihn kahs en were sdohsaho. Ni ahnsou me e lella ni wasahn kahso, e tuwohngedi lih mah men me aiahniki kahpwal en esiesingek sang lepelepen misihn en esingek ehu. Mwurin mwo, Repeka ahpw kihongehr liho neihn ah nohnohu misihn en mehn esingek me kak wisik selio. Lih menet inenen kapingki oh indahier, “Ke kapwuredohngiehier ahi saledek.” Soahng kan kin doadoahkpene ong mehkot mwahu ni ahnsou me kitail kin papah duwehte Eh kin ketin wia.
Pahpa men me ianganiki nah pwutak sounpadahk men ong pwukahn papah ahpw kawewehda, “Pwukoahn papah iei ansou me kitail kin doulahsang wia mehn mpe me kin pwarkihla kukihs ong kempoakepahrail mehlel kei, me kin keioun sapeng ngehno.” Iang wia soun inou ong Sises Krais pahn wahdo kaloalamwahu, ehupene, oh kasarawihala.
Pil ni ahnsou en kahpwal, kaunopadahn palingehn pahn kak katamankin kitail me Samatail Nanleng ketin mwahngih ahnsou me kitail keioun ahneki pepehm en anahne sawas oh kelekelehpw. Ni karasepe, peneinei ehu me neirail seri men wisikla nimwen wini mwuhr ahpw insenamwahula ni arail tamanda me Ngehn Sarawio mwenginingin ehr mwowe dahme re pahn kasik.
Ekei pak soangen mwekid laud kan en mour soutik me Kauno kin ketkihong kitail en kehn kak iangahki peneinei palio kahdengo. Lih emen diar popohl ni ah weliakapwala sang ni sapwellimen Sises Krais rongamwahu kapwurupwurdohu. Ahpw kahpwal riau inenen sairehr ah mour—kilangedier aksiden en pwoht ehu oh mehlahn ah nohnohu, me pein kihsang ah mour.
Ahpw lih menet powehdier ah kin masak nan pihl ni ah pepdaislahr sang ni koduhdieng nan pihlo. Oh ni dahme elehda rahn kaperen wet, e kadehdehier emen aramas, me weliandier ah nohnohu oh pepdaislahr nan tehnpas sarawi. “Pepdais en tehnpas sarawi kamwahuihala ahi nohnohu, oh e kasaledekeiehla,” lih menet ahpw indahier. “E wia tepin ahnsou me I kehnda meleilei mwurin ahi nohnohu ah mehlahu.”
Atail keseng en koul sarawih kan kin kihda ngilen Sapwellime inou me soahng koaros kak doadoahkpene ong kamwahupatail.
Pwuhk en Mormon wia mehn kadehde ehu me kitail kak kol nan pehtail me Sises iei ih me Krais oh Koht kin ketin kapwaiada Sapwellime kokohp kan. Intingdahsang irail soukohp kelik kan me kilangedier atail ahnsou, Pwuhk en Mormon tepkihda kemwekid mehlel kan me wiawi—peneinei ehu me mie wekpeseng laud nan pwungarail. Ahpw, ni atail onopki oh medemedewe 1 Nihpai 1 oh lel Moronai 10, kitail pahn karaniala Sises Krais oh ahniki kadehde kehlail me dahme wiawiher wasahu oh pahn kak kapai kitailda wasaht oh nan ansouet.
Ni Kauno, sang Sapwellime soukohp ieias, kin wiahda tehnpas tohto en Kauno en kerenpene nan wasa tohto, kapaipen tehnpas sarawi kin doadoahkpene ong kamwahupatail. Kitail kin kohdo sang ni inou sarawi oh tiahk sarawi ong Koht Sahm oh Sises Krais oh marainkihda duwen mour soutik ong mour wet. Wiahda emen emen, ehu ehu ahd, kitail kin kiheng tohn atail peneinei kan—keinek kan—tiahk sarawi kan oh kapaipen inou kan ni sapwellimen Kauno kosoandi ong sounkomour kei pohn Nahna Saion.
Ni tehnpas sarawi kan arail kerendohng kitail nan wasa tohtoh kan, ehu tohnmetei en tehnpas sarawi me kitail kak wia iei rapahki popohl sarawi nan tehnpas en Kauno pak tohto. Pahr tohtohkei, se nekidalahr mwohni, pilahnehier, oh doadoahngkiher tohnmetei pwe sen kohla nan tehnpas sarawi. Eri met, ma ahnsou mweidada, menlau kohdo palilaud en ahnsou rehn Kauno nan Sapwellime tehnpas sarawi. Mweidohng kalapw pwarek nan tehnpas sarawi ong kaudok oh papah en wia mehn kapai, perehre, oh kangoang ong kumwail oh amwail peneinei—peneinei me kumwail ahniki de peneinei me kumwail pahn ahniki oh wiahla ehu rahn.
Oh pil, ansou me kak, menlau medewe mwahu kapai en ahneki pein amwail likou en tehnpas sarawi kan. Nohno kahlap men sang nan peneinei karakarahk ehu ahpw indahier me soahng ehu nan sampah, me e keieu mwauhki iei pein ah likou en nan tehnpas sarawih kan. Neihn nah seri pwutak ahpw indahier, “Nohno kahlap mwengininginkiher, ‘I pahn papah nan pein ahi likou en tehnpas sarawi kan, oh ni ansou me i pahn mehla, I pahn likawih ngei seridi.’” Oh ni ansouo eh lelehr, ihme e wiahier.
Ni Preseden Russell M. Nelson padahngki, “Soahng koaros me kitail kamehlele oh ehu ehu inou me Koht wiadahr ong Sapwellime aramas en inou kan wiawi nan sapwellime tehnpas sarawi.”
Nan ereihn ahnsou kohkohlahte, kahrepen kepikipikda wet oh koasondi en Koht iei pwehn kihpene soahng koaros ong kamwahupatail.
Iei met me wia sapwellimen Kauno kahrepe soutik. Iei ih peihn Sapwellime koasondi kohkohlahte. Iei ih Sapwellime inou soutik.
Ni ansou me mour kin pingida oh kahrepe sohte sansal, ni ansou me kumwail men ahniki mour mwahu ahpw sohte ese ia mwomwe, menlau kohdo rehn Samatail Koht oh Sises Krais. Kamehlele me Ira ieias, poakoahng kumwail, oh kupwurki soahng koaros en wia kamwahupamwail. I kadehdehki me Ira kupwuriki, ni sohte imwi oh kohkohlahte, ni lengileng kapai oh sarawi en Sises Krais, ahmen.