Mahsen kan Kesempwal
Mahsen akan kin kasaleikitailda. Re kin kasalehda atail madamadau, pepehm, oh mwekid kan, me mwahu de suwed.
Riei ohl, lih akan, oh kempoakepahi kan koaros nan sampah, I men wauneki pokon lap wet ni ahi pahn koasoi mwohmwail, me tohto wia tohn atail Mwomwohdiso oh ekei wia kempoakepahtail oh ekei kapwehng rong padahk kan en kapokon lap wet. Ai kasomwosomw!
Padahk kan me kasaladahr sang wasakiset pwiliwei ni mahsen kei. E pwilwei ni mahsen en wai oh kawehwediong kereniong soangsoangen mahsen epwiki samwa. Ansou koaros wiepehu kin duwepenehte. Mahsen kan. Oh mahsen kan inenen kesempwal. Mweidohngie pwe ien pwurehng kapwurehiong. Mahsen kan kesempwal!
Irail me poahsoanehda mwomwen atail ehupene; irail wia kasalepen dahme kitail kamehlele kan, atail koasoandi kan, oh atail pilipil kan. Ekei pak kitail kin lokaia; pak teikan kitail kin rong. Mahsen akan kin kasaleikitailda. Irail kin kasalehda atail madamadau, pepehm, oh mwekid kan, me mwahu de suwed.
Mehlel, ekei pak kitail sohte kin medewe atail koasoi, mwadangete kosoia, oh atail mahsen kan pil kin kamedek. Ansou me kitail ndahier, kitail sohte kak kapwure. Irail kak kawehla, kaloke, kesehdi, de pil kahlwalahng nan mwekid kahpwal akan. E kak katoutouihkitailla.
Ni ansouohte, mahsen akan kak wia mehn kasarawih pweida, kak kihong kitail koapworopwor oh wia kakehlapatail. Irail kak kamwakid kitailda en pilehu medewe, pwurehng tepda, oh kainene atail wiewia. Mahsen kan kak ritingadahng atail madmadau kan me mehlelo.
Ihme kahrehda, keieu oh keieu kesempwal, Sapwellimen Kauno mahsen kan me kesempwal.
Nan Pwuhk en Mormon, soukohp Alma oh sapwellime aramas akan nan Amerika mahso lelehng diren mahwen laud ong irail kan me sohte kin kamehlele mahsen en Koht, kakeluwakihala arail mohngiong kan, oh sohte kin kamehlele arail koasondih kan. Me pwoson ko kakete pei, ahpw Alma padahngki, “Oh met, pwehki padahk en mahseno kak kaweidki aramas akan en wiahda me pwung—ehi e kin wekidala en aramas akan madmadau kehlail sang kedlahso, de sohte lipilipil mehkot me wiawihongehr irail—ihme kahrehda Alma medemedewe me irail anahne doadoahngki kamwahu pen mahsen en Koht.”
“Mahsen en Koht” lapasang mahsen teikan kan koaros. E mihmiher sang ni Kepikipikdahn sampah ansou me Kauno ketin mahsenih: “Marain en miehla: oh marain ahpw pwarada.”
Sounkomouro masanih mepwukat nan Kadehde Mering: “Nanleng oh sampah pahn sohrala, ahpw ahi mahsen kan sohte pahn sohrala.”
Oh met: “Mehmen me poakohng ie, pahn kapwaiada ahi mahsen akan: oh Semeio pahn poakong ih, oh se pahn ketidohng reh, oh kihong ih ah wasahn kousoan.”
Oh sang rehn Mery, Inen Sises mie kadehde karakarahk wet: “Kilang iet sapwellimen Kauno ladu; kupwuromwi en pweida rehi nin duwen sapwellimomwi mahsen.”
Atail kamehlele oh poadidiong mahsen en Koht pahn kakaranihkitail ong Ih. President Russell M. Nelson inoukidahr, “Ma kumwail pahn onopki Sapwellime mahsen kan, amwail kak en men duwehla Ih pahn laudla.”
Kitail sou men wiahla, duen koulo ah mahsenih, “alehda kapai laud oh sarawihla—laud, rasehng, Sounkomouro”?
I medewehla duwen pwutak pwulopwul Joseph Smith ni ah kelepwidi oh rongorong mahsen kan sang Semeo Nanleng: “[Joseph,] Met iei Sapwellimei Iehros Kempoake. Rong Ih!”
Kitail kin “rong Ih” sang mahsen akan nan pwuhk sarawi, ahpw kitail kin mweidohng mahsen akan en mihmihte nan tehn pwuhko de kitail kin pohnese me E ketin mahmahsenihong kitail? Kitail kin wekila?
Kitail kin “rong Ih” sang nan pein atail kaudiahl kan oh pepehm kan sang rehn Ngehn Sarawi, sang pasapeng kan en atail kapakap, oh ansou kan me Sises Krais kelehpw, sang ni manaman en Sapwellime Tomwo, kak ketin pwokada atail katoutou kan, ketikihong kitail mahk oh meleilei, oh pwoalehkinkitaildi “sapwellime limpoako.”
Keriau, mahsen en soukohp kan kesempwal.
Soukohp akan kadehdehki duen Sises Krais Ah sarawi. Irail padahngki Sapwellime rongamwahuo oh kasalehiong aramas koaros Sapwellime limpoak. I men wia ahi kadehde me atail soukohp ieias, Presiden Russell M. Nelson, kin karonge oh padahngki mahsen en Kauno.
Presiden Nelson e kin koasoane mwahu mahmahsen akan. E ketin masanih, “Mihmihte pohn ahl en inouo,” Kopwurpwurpene mehn Isrehl,” Kauno ketin powehdier,” Wiahda piris en esehla,” Kapingki,” Kalaudehla pwoson Sises Krais,” Pwukoahki ahmw kadehde,” oh “Wiahla soun kameleilei.”
Me keieu keren, e peki kitail en “medewe wein Koht.” “Ansou me kumwail kin sohpeihong kahpwal,” e mahsenih, “medewe wein Koht! Ansou kumwail lelohng kasongosong kan, medewe wein Koht! Ansou me mour oh kempokepahmwail kan kin kaluwetei kumwailla, medewe wein Koht! Ni ansou me emen aramas kin mwadang en mehla, medewe wehin Koht!Ansou me amwail mour kin toutoula, medewe wein Koht! … Ni ahmw pahn medewe wein Koht, ahmw mohngiong pahn wie wekwekidekla, … ke pahn kilang kasongsong oh kahpwal akan nan ehu marain kapw, … [oh] ahmw pwoson pahn laudla.”
“Ni ansou me kitail kin medewe wein Koht, kitail kin kilang “soahng kan nin duwen pein irail, oh … dahme irail udahn pahn wiahla.” Nan sampah wet diren katoutou en sawehwe oh uhpene, kitail koaros anahne soahngen madamadau wet.
Elder George Albert Smith, mwohn e wiahla Presiden en Mwomwohdiso Wet, Koasoia duwen utuht ong soukohp oh karonge sapwellime mahsen. E mahsenih: “Utuht me kitail kihla ni ansou kitail kauwada pehtail akan … iei pwukoah sarawi ieu. … Met wehwehki … me kitail pahn kesihnenda mpe; kitail pahn kapakapki; … oh kitail pahn nantihong kapwaiada sapwellime kaweid kan me Kauno kin kasalehiong.” Pil ehu kawehwe, kitail pahn nantihong kapwaiada ahn soukohp kan mahsen akan.
Ni ahi wia emen sang nan meh [ehk limen]15 soukohp, soun kairoir, oh sounalehdi kaudiahl kan me utuhtda aio sang tohn Mwomwohdisoht pwon, I men ehukiong kumwail soahng ieu me I esehla duwen utungada soukohp oh kolokol sapwellime mahsen akan. Ong ie e rasehng soukohp Seikop, me ketihtihki, “I rongehr kapitihen Kauno mahsanihong ie mahsen pwukat.”
Oakotohpe samwalahro ngehi oh ahi pwoud, Melanie, se kohla Bangkok, Thailand ni ahi wie kaukaunop pwe I pahn kasarawih tehnpas sarawi [ke epwiki welihsek limau]185 en Mwomwohdiso wet. Ong ie, pwukoah wet kopwuriamwei oh kahktikitik. Met wia tepin tehnpas sarawi nan peninsula en pali eir en pali mese en Eisia. Wiepen tehnpaso me inenen kaselel—e posoke weneu, kengkeng- me duwau, “katengtengdi mwahu” pwe e wia tehnpas en Kauno. Sounpwong kei I medemedewe kasarawio. Dahme kameleileihedi pali ngeni oh ahi madamadau iei me wehi oh tehnpaso koasoandier nan pehn soukohp oh wahnparon kan. Presiden Thomas S. Monson me pakirkihda tehnpas sarawio oh Presiden Nelson me kasarawih.
I kaunopadahr kapakap en kasarawio sounpwong kei mwowe. Mahsen sarawihko kawehwehdi nan lokaia [eisek riau]12. Se onopadahr. De I wiahki me se onopadahr.
Nihpwongo mwohn kasarawio I pirikihda pepehm sohte soan oh karuwaru me pid kapakap en kasarawio. I song en pwilikihdi pepehmo, I medewe me kapakapo soanehr. Ahpw Ngehno sohte kohkohlahsangie. I pehmadahr me mie mahsen me luluhwe, eri sang ni koasondi en Koht mahsen pwukat kohdo ni kaudiahl, oh I ahpw kapatahiengehr mahsenko kerenlahng ni imwin kapakapo: “Kitail medewe wein Koht, mweidohng Ngehno en kaweid atail mour, oh nantihong wia soun kameleilei ansou koaros.” Kauno katkatamankinie ien rong mahsen kan en atail soukohp ieias: “Medewe wein Koht,” “Mweidohng Ngehno en pweida,” oh “nantihong wia soun kameleilei.” Mahsen en soukohp akan kin kesempwal ong Kauno oh kitail.
Kesiluh, oh me inenen kesempwal, iei atail koasoi kan. Kamehlele ie, soangsoangen emoji-me audelahr sampah, atail koasoi kan kesempwal.
Atail koasoi kan kak wia mehn sawas de kelingeringer, kaperen de kansensuwed, kasalehda limpoak de katorohr. Ekei pak kitail kin koasoia ni atail sohte medewe, koasoi kan kak doakoahdi oh kamedekehla wasa loal en palingenitail—oh mihmi wasao. Atail koasoi kan nan internet, texting, social media, de tweets kin pein kohkohda. Eri kanaieng dahme ke nda oh ia mwomwen ahmw pahn nda. Nan atail peneinei, mehlel ohl pwopwoud, lih pwopwoud oh serihkan, atail lokaiahkan kak kolkitailpene de katohreikitailpeseng.
Mweidohngie pwe ien kasalehda iren lokaia siluh me kitail kak doadoahngki pwehn kihsang medek sang nan kahpwal akan oh wekpeseng kan, pwokada, oh sewesehda ahn mehteikan katoutou kan:
“Kalahngan en komwi.”
“Mahkongie.”
Oh “I poakpoakeiuhk.”
Kumwail dehr kanaiedi koasoi pwukat ong ansou kesempwal de ansou kansensuwed kan. Doadoahngkin irail pak tohto oh ni mehlel, pwe irail kin kasalehda atail pepehm mwahu ong mehtei kan. Lokaia kan mwahmwahlla: kedehpa alasang wiepehu.
Kitail kak nda “kalahngan en komwi” nan elevator, wasahn peidi en sidohsa, nan market kan, nan ohpis, wasa me aramas lalainie, de mehn mpatail de kempoakepahtail. Kitail kak nda “Mahkohngie” ansou me kitail sapwungala, sohte iang mihting, manokehla rahn en ipwidi, oh kilang mehteikan me medeklahr. Kitail kak nda “I poakpoakeiuk” oh mahsen pwukat pahn kehsehki aramaso me, “I medemedewei uhk,” “I kesempwalkin uhk,” “I mihmi met pwehki kowe,” de “kowe ahi mehkoaros.”
I men ehukihda pein ahi karasaras. Ohl pwopwoud kan, rong mwahu. Riei lih akan, met pil kak sewesei kumwail. Mwohn ahi pahn alehdi kepwukoah wet nan Mwomwohdisoh, I kin seiseiloangki seli ahi kompanio. I kin kalapw sohte mih nihmwo pwe i kin seiseiloakseli pil lella wasa doh kan nan sampah. Ni imwin rahnoko koaros, sohte lipilipil wasa, ansou koaros I kin call nihmwo. Ansou me ahi pwoud, Melanie, kin pwokada delepwohno oh I kin koasoiong, aht koasokoasoipene ansou koaros kin karehiong kiht en kin nda “I poakpoakeiuk.” Rahn koaros, koasoiko kin wia mehn katengehdi palingeniet oh ahi wiewia kan; irail wia ahi mehn perehre sang kemwekid suwed kan. “Melanie, I poakpoakeiuk” wia lokaiahn koapworopwor kesempwal ehu nan pwungat.
Presiden Thomas S. Monson kin kalapw koasoia, “Mie nehkan me anahne katengehdi, pehkan me anahne kolokoldi, madamadau me anahne kakehlail, mohngihong kan anahne sair, oh palingehn kan me anahne doarehla.” Koasoia “kalahngan en komwi,” “Mahkongie,” “I poakpoakeiuk” pil kak wia mwo.
Riei ohl oh lih akan, mahsen kan kesempwal.
I inoukihda me ma kitail “kamakamadipwiki mahsen en Krais” me pahn kahluwaikitailahng komour, mahsen en atail soukohp kan me pahn kahluwa oh kakehlailih kitail, oh pein atail koasoi kan me kin koasoiahda ihs kitail oh dahme kesempwal me kitail kolokol, manaman kan en nanleng pahn widekdihong kitail. “Mahsen en Krais kan pahn padahkihong kumwail soahng koaros me kumwail pahn wia.” Kitail Sapwellime seri oh Ih me atail Koht, oh E ketin kasik me kitail pahn lokaiahki “mahsen en tohnleng kan” sang ni manaman en Ngehn Sarawi.
I poakohng Kaun Sises Krais. Ih me, nan mahsen en Soukohp Aiseia sang Pwuhk en kadehde Mering mahsenih, “Sounkaweid Kupwurokong, Koht Wasa Lapalahpie, Sahm poatopoat, Nanmwarkien Popohl.” Oh ni Wahnparon Sohn kawehwehda, pein Krais “iei Mahseno.”
Mepwukat I kadehdehki ni ahi wia Wahnparon men me malipilipihong Sapwellimen Kauno doadoahk sarawi—en kalohki Sapwellime mahsen—oh kesihnenkihda ahi wia sounkadehde tohrohr en Ih. Ni mwaren Kauno Sises Krais, amen.