Perenkihda Kisakis en Kih kan en Prihsduhd

Sang Preseden Russell M. Nelson

Preseden en Mwomwohdiso en Sises Krais en Souleng en Imwin-rahn Akan

Kih kan en Prihsduhd kin katanga duwen prihsduhd en Koht ah pahn kin doadoahk pwe en kapwaiada kupwuren Koht oh kapaiada koaros me pahn alehda rongamwahu kapwurupwurdohu.

Rieiko, rahnwet wia rahn kesempwal ehu ong ngehi oh Presiden Dallin H. Oaks. Sounpareh 40, sang Epreil 7, 1984, ansou me se alehdi kapwukoah sen towehla Pwihn en Wahnpoaron Ehk-riemeno. Se kin ahniki kaping oh peren nan ehu ehu kapokon oh kapokon lap koaros sangete ni tapio leledohng met. Kitail pwurengehr paieki pepehm en Ngehno me inenen laud. I koapwoaroapwoarki me kin onohnopki padahk pwukat nan sounpwung me pahn wadedo kan.

Ni ansou me I ipwidi, tehnpas sarawi me wie doadoahk meh wenou nan Mwomwohdisoht—e kin meh ehu nan ehu ehu wasa pwukat: Saint George, Logan, Manti, oh Salt Lake City, Utah; pil iangahki nan Cardston, Alberta, Canada; oh Laie, Hawaii. Meh riau me mwowehsang mehka me wie doadoahngki lepin ansou kis nan Kirtland, Ohio, oh Nauvoo, Illinois. Ni ansou me Mwomwohdisoht mwekidla palikapi, Soulengko lipadahsang mwo oh kohkohsang tehnpas sarawi riauo.

Tehnpas sarawi en Nauvoo ohla pwehki aramas isikada. E pwurehng kokouda oh mwuhr Presedend Gordon B. Hinckley ahpw kasarawiala. Irail kan me kin uhweng Mwomwohdisoht kamwamwahliala tehnpas sarawi en Kirtland. Mwurihsang mwo ah Community en Christ apw uhd ahnekihla, oh kohkohwahki sounpar tohto.

Nan Sounpwung nekiero, se pakairkihda me Mwomwohdiso en Sises Krais en Souleng en Imwin-rahn Akan pwainda Tehnpas Sarawi en Kirtland, oh pil iangahki wasa poadoapoad kesempwal kei nan Nauvoo. Se kapingki mehlel koaskoasoipene me mwahu oh pahrek me wiawi nan pwungen kiht oh kaun akan en Community en Christ me elehieng wehwepene wet.

Tehnpas Sarawi en Kirtland.

Tehnpas sarawi en Kirtland inenen kesempwal oh weksang mehteikan nan Kopwurupwurdohn rongamwahu en Sises Krais. Soahng kei me wiawi mwo mih nan kokohp en sounpar kid kei samwalahrko oh kesempwalehng Sapwellimen Kauno Mwomwohdisoht en kak kapwaiada doadoahk en imwin-rahn akan.

Me keiou kesempwalo wiawi ni Rahn Sarawi en Ihster, nan Epreil 3, 1836. Rahno, irek en pwaredo kapwuriamwei kei wiawi ong Joseph Smith oh Oliver Cowdery. Keiou, Kaun Sises Krais ketin pwarehng ira. Soukohpo intingiedi duwen Sounkomouro oh nda me “Sihlangih kan duwehte umwpwul en kisiniei; piten tapwi kan pwetepwet duwehte sino; sihlangih marain sang marain en ketipin; oh kepitie duwehte lapake.”

Ni pwaredo wet, Kauno kamehlelehieng ira duwen ihs Ih. E mahsanih, “Ngehi me tapi oh imwi; ngehi me ieias, ngehi me kamakamalahr; ngehi me wia weliapamwail rehn Sahmo.”

Sises Krais mahsaniheng ira me e ketin kupwurehier tehnpas sarawio en wia Tehnpese oh masahniheng ira inou kaselel wet: “E pahn ketin kasalehieng Sapwellime aramas akan duwen Ih nan tehnpaso.”

Inou kesempwal wet pil ong tehnpas sarawi koaros me kasarawiher nan rahn pwukat. I lukeikumwail en medemedewe wewehn Sapwellimen Kauno inou wet ong emen emen kumwail.

Mwurin Sounkomouro ah ketin pwarehng irao, Moses uhd pwarehng ira. Moses kiheng Joseph Smith kih kan en kapokonepene Isrehl oh kapwurupwurdohn kadaudok eiseko.

Mwurin pwaredo wet, “Elias pwarehng ira, kiheng Joseph mwehi en rongamwahu en Eipraam.”

Mwuhr soukohp Elaisa pwarehng ira. Ah pwarehng irao kapwaiada en Malakai inouo me mwohn Ketdo Keriauo, Kauno pahn ketin kadaredo Elaisa pwe “E pahn pwurehng kapwurepene sahm akan oh nahi kan.” Elaisa eri kiheng pohn Joseph Smith kih kan en manaman en katengetengpene.

Sohte koasoai kak kasalehda uwen kesempwalpen kih pwukat ah kapwurupwurdohng sampah sang rehn tohnleng silimeno pahn kaweid en Kauno. Kih kan en prihsduhd kolokol mweimwei oh manaman en presidensi. Kih kan en prihsduhd kin katanga duwen prihsduhd en Koht ah pahn kin doadoahk pwe en kapwaiada kupwuren Koht oh kapaiada koaros me pahn alehda kapwurupwurdohn rongamwahu en Sises Krais.

E kesempwal ien kasalehda me mwohn koasoansoandi en Mwomwohdisoht, tohnleng kan kihengehr pohn Joseph Smith Prihsduhd en Aaron oh Melkisedek oh pil kiheng kih kan en prihsduhd riauo reh. Kih pwukat kiheng Joseph Smith mweimwei en koasoanehdi Mwomwohdisoht nan pahr 1830.

Eri nan tehnpas sarawi en Kirtland nan pahr 1836, kapwurupwurdohki kih kapatapat siluh pwukat—me iei, kih kan ong kapokonpenehn Isrehl, Kih kan ong rongamwahu en Eipraam, kih kan ong manaman en katengetengpene—mie anahnepe. Kih pwukat kamanahieng Joseph Smith—oh Presiden en Sapwellimen Kauno Mwomwohdsoht kan koaros kohdo—en kapokonepene Isrehl nan pali riau en kahdengo koaros, kapaiahkihda seri en inou koaros kapai en Eipraam kan, kiheng kilelen kamanaman pohn tiahk sarawi en prihsduhdo oh inou kan, oh katengepen peneinei kan kohkohlahte. Manaman en kih en prihsduhd pwukat sohte imwi oh inenen kaselel.

Medewe mahs ia pahn duen amw mour ah pahn wekisang met ma kih en prihsduhd pwukat sohte kapwurupwurdohng sampah. Ma sohte kih en prihsduhd kan, ke sohte pahn kak alehdi kisakis en manaman en Koht . Ma sohte kih en prihsduhd kan, Mwomwohdisoht kak wiahte pwihn en padahk oh apwalih de sewese mehteikan apw sohte pahn nohn sipele mwo. Ma sohte kih en prihsduhd kan, sohte rehtail me pahn kak alehdi tiahk sarawi oh inou kan me anahn pwe kitail en kak ketengetengpene rehn atail peneinei kohkohlahte pwe kitail en kak ehu rahn mour rehn Koht.

Kih en Prihsduhd kan kahrehieng Mwomwohdiso en Sises Krais en Souleng en Imwin-rahn akan ah wekisang pwihn teikan pohn sampah. Diren pwihn teikan kak oh kahrehieng amw mour ah kin mwahula nan mour wet. Apw sohte rehn pwihn teikan me kak oh pahn wia mehkot ong amw mour mwurin mehla.

Kih en prihsduhd kan kiheng kitail mweimwei en kapawehng kapai kan me inoupe wiawihong Eipraam ong ohl oh lih koaros me kin momourki inou kan. Doadoahk en nan tehnpas sarawi kin kahrehieng kapai kaselel pwukat ah kak lelong Sapwellimen Koht seri koaros sohte lipilipil wasa de iahd re momour pohn sampah. Kitail perenda pwe kih en prihsduhd kan pwurehngehr mih pohn sampah!

I lukehieng kumwail en medemedewe mwahu mahsen siluh pwukat:

1. Kapokonpenehn Isrehl wia kasalepen me Koht ketin poakoahng sapwellime serih kan koaros nan wasa koaros.

2. Rongamwahu en Eipraam wia kasalepe kapatapat duwen Koht ketin poakoahng sapwellime serih kan koaros nan wasa koaros. E ketin luke koaros en kohdohng reh—“me toantoal oh pwetepwet, me sensel oh saledek, ohl oh lih; … koaros duwepene rehn Koht.”

3. Manaman en katengetengpene soutuk kasalepe sarawi duwen Koht eh ketin poakoahng sapwellime serih kan koaros oh kupwuriki emen emen en pilada oh pwuralahng Reh.

Kih en prihsduhd kan kapwurupwurdohng Soukohp Joseph Smith elehieng koaros ohl oh lih me momourki inou kan en alehdi kapai sarawi kan me ong emen emen Sapwellime kan. Pil met, soahng tohto kitail kak esehla sang nan poadoapoad sarawi en Tehnpas Sarawi en Kirtland.

En Jospeh Smith kapakap en kasarawi en tehnpas sarawi en Kirtland wia mehn kasukuhl ong duwen tehnpas sarawi ah kin kakehlaka palingenitail pwe kitail en kakehng kahpwal en imwin rahn pwukat. I men kangoangei kumwail en onopki kapakap me mih nan Doctrine and Covenants section 109. Kapakap en kasarawio, me alahldi sang ni kaudiahl, padahkiheng kitail me tehnpas sarawi iei “tehnpas en kapakap, tehnpas en kaisihsol, tehnpas en pwoson, tehnpas en kasukuhl, tehnpas en lingan, tehnpas en koasoandi mwahu, oh tehnpas en Koht.”

Irekdi en kawehwe pwukat sohte kawehwehdahte tehnpas sarawi. E pil wia inoupen dahme kak wiawiheng irail akan me kin papah oh kaudok nan tehnpesen Kauno. Re kak kasik me re pahn alehdi pasapengpen arail kapakap, kaudiahl ong pein irail, kalaudlahn arail pwoson, kehl, kaloalamwahu, kalaudlahn arail wehwe, oh kalaudlahn manaman.

Amw ansou nan tehnpas sarawi pahn soweseiuk ken kak kinmadamadau mwahu oh kilangada udahn ihs kowe, ihs me ke kak wiala, oh soangen mour me ke kak ahneki kohkohlahte. Poadidi en kaudok nan tehnpas sarawi pahn kamwahuiala amw kin kilang pein kowe oh kilangada dewemw nan Sapwellimen Koht pilahn kaselelo. I inoukiheng uhk met.

Inoupe pil miehier me nan tehnpas sarawi kitail kak “alehdi unsek en Ngehn Sarawio.” Medewe mahs wehwehn inouo ong me pid nanleng ah pahn kin ritida ong koaros me mehlelki arail raparapahki mehlel soutuk kan.

Kitail pil alehdi padahk me koaros me pahn kaudok nan tehnpas sarawi pahn ahniki manaman en Koht oh tohnleng kan pahn “apwahpwalih irail.” Ia uwen ah kalaudehla amw koapwoaroapwoar ni amw ese me, ni amw wia ohl de lih me alehdier endaumen oh silasilkihdier manman en Koht, ke sohte anahne kelehpw ong mour wet? Soangen koapwoaroapwoar dah me e kiheng uhk ni amw ese me tohnleng kan udahn pahn seweseiuk.

Pwehn kaimsekala, kitail aledi inou me “sohte pwihn suwed” pahn kak powehdi irail akan me kin kaudok nan tehnpesen Kauno.

E kesempwal ong emem emen kitail rahnwet en wehwehki kamwahu kan ong palingehn me kin sang nan tehnpas sarawi.

Rieiko, iet me I pahn inoukiheng kumwailen. Sohte mehkot me kak kakehlakaamwail kolokol reil meteo me pahn mwahu sang amwail pahn kin kaudok nan tehnpas sarawi uwen ansou koaros me kumwail kak. Sohte mehkot me mwausang me pahn pere kumwail nan pwoik rotorot en sampah. Sohte mehkot me mwahusang, me kak utungada amwail kadehdepen Kaun Sises Krais oh Sapwellime Tomwo de seweseiuk wehwehki Sapwellimen Koht pilahn kaselelo laudsang. Sohte mehkot me mwahusang, me pahn laudsang kansenamwahuih palingenimwail nan ansou en lokolok. Sohte mehkot me mwahusang me pahn laudsang me kak ritingada wenihmw en nanleng. Sohte!

Tehnpas sarawi wiawenihmw en Sapwellimen Koht kapai me keiou mwahu kan ong emen emen kitail, pwe tehnpas sarawi iei ihte wasa pohn sampah me kitail kak alehdi koaroskapai kan me Kauno ketin inoukiheng Eipraam. Ih kahrepen aht wiewia uwen aht kak koaros, pahn kaweid en Kauno, pwe kapai en nan tehnpas sarawi en kak kerenwehng tohn Mwomwohdisoht. Pwehki met, se men pakairkihda me se pahn kawada tehnpas sarawi kapw kei nan ehu ehu wasa 15 pwukat:

• Uturoa, French Polynesia

• Chihuahua, Mexico

• Florianopolis, Brazil

• Rosario, Argentina

• Edinburgh, Scotland

• Brisbane, Australia palieir

• Victoria, British Columbia

• Yuma, Arizona

• Houston, Texas palieir

• Des Moines, Iowa

• Cincinnati, Ohio

• Honolulu, Hawaii

• West Jordan, Utah

• Lehi, Utah

• Maracaibo, Venezuala

Riei ohl oh lihoko, I kadehdehda me met iei Mwomwohdiso en Sises Krais en Souleng en Imwin-rahn Akan. Iei Ih me wia tapwi. Kitail wia Sapwellime sounpapah kei.

Kitail perenkihda kih en prihsduhd kan me elehieng kitail koaroskapai sarawi kan me kitail inengieng oh warehng alehdi. I kadehde mepwukat ni mwahr sarawi en Sises Krais, ahmen.

Ire kan

1. I doudahng nan sehr en Pwihn en Ehk-riemeno me tehnda sang ni mehla en Elder LeGrand Richards nan Senweri 11, 1983. Elder Oaks doudahng nan me tehnda sang ni mehla en Mark E. Petersen nan Senweri 11, 1984

2. Septempe 9, 1924.

3. President Gordon B. Hinckley wia kasarawi en tehnpas sarawi en Nauvoo Illinois me pwurehng kokoudao nan Suhn 27, 2002, ni 158 en ketemenpen kamakamala en Joseph oh Hyrum Smith.

4. Wihkte ehu mwurin soukohp Joseph Smith kasarawiala tehnpas sarawi en Kirtland.

5. Doctrine and Covenants 110:3.

6. Doctrine and Covenants 110:4

7. Doctrine and Covenants 110:7

8. Kilang Doctrine and Covenants 110:11.

9. Doctrine and Covenants 110:12. Met iei kepweipweidahn inou me Kauno ketin wiahieng Eipraam sounpar kid kei samwalahro (kilang Senesis 18:18; 1 Nihpai 15:18).

10. Kilang Moses 5:5–6.

11. Kilang Doctrine and Covenants 110:13–16.

12. Kilang Doctrine and Covenants 13; 27:7–8, 12.

13. Kilang Doctrine and Covenants 20:1–4.

14. Ni ansou me Kauno mahsaniheng Joseph Smith me irair en ansou wet wia ansou ehu me “sohte mehkot pahn kolkoldi” (Doctrine and Covenants 121:28), met pwehki kih en prihsuhd pwukat kapwurupwurdohngehr sampah.

15. Kilang Doctrine and Covenants 95:8; 109:22.

16. Kilang Doctrine and Covenants 132:45–46.

17. 2 Nihpai 26:33; mie ire kapatapat.

18. Doctrine and Covenants 109:8.

19. Doctrine and Covenants 109:15.

20. Doctrine and Covenants 109:22

21. Kilang Doctrine and Covenants 109:24–26.

22. Wehwehki mahsen en Koht

23. Kilang Doctrine and Covenants 110:12132:29–30