Sapwellimen Koht koasoandi iei en Kapwureiukedo Reh
Soahng koaros me pid pilahn en Sahmo ong Sapwellime seri kan wiawidahr pwehn kapwurehdo kitail koaros Reh.
I men kapingki amwail kapakap kan ni ansou me I tapiadahr wiepen pwukoah wet, sang Preseden Nelson, en wia pwukoahn Wahnpoaron men ong Kaun Sises Krais. Mwein komw kak medewe uwen pepehm en karakarahk me i ahnekihdahro, oh e wiahier ansou en wekila laud ehu oh ansou en kasawih pein ngehi. E wia mwekid inenen kesempwal ehu en papah atail Sounkomour o, nan pwukoah sohte lipilipil, oh pil patehng kumwail nan ehukiwei rohng mwahu en Sapwellime rongamwahu en koapwoaroapwoar.
Palilahsang mwo, mie lepin kahs ehu me mwurin emen Wahnpoaron kapw men mie nohno men me pwuriamweilahr. Ih sohte ese ma mehlel mie soangen koasoai wet, ahpw nan irair wet, e kakete mie. I ese me mendahte an ai pwoudo nohno solahr mih reht e sohte katikala ah pwuriamweio.
Sounpwong kei samwalahr o, ansou me ngehi oh ai pwoud mwemweitih ehu wasa pwehki pwukoah kan en Mwomwohdiso, I pirida mwadang ehu mensengo oh kilengieila likin aht hotel o, Nan ahl me kin direki sidohsahn wasaho, I kilangada me irail perehlahr ahlo oh pwolihs men me kesihker wasaho oh kin kapwurehla sidohsa kan ni arail kin lel wasaho. Ni tapio, sidohsa malaulau me kin tangala pohn ahlo oh kin kapwurupwur. Ahpw mwurin ansou ehu sidohsa kan tohtolahr, lain kan tepidahr reireila.
Sang ni wenihmw tok o powe, ih kilang pwolihso ah mwomwen pereniki eh kak doadoahngki ah manaman en ritingedi mwekimwekid en traffic oh kapwurehla aramas akan. Ahpw ni mehlel, e mwomwen tapihadahr ehu soahng en mwekid, likamwete e pahn tapiada wia sokosok en kahlek ehu, ni ansou me ehu sidohsa kin kohdohngehr wasa me ritilahu. Ma aramas emen kin lingeringer kihda ritidi en ahlo, pwolihs o kin sohte mwomwen men sawas de pil poakeirail la. E kin itik te moangehu oh idilahng pali teio.
Kompokepahi ko, iengei sounpapah kan me kin seiseilok nan mour wet sapwellimen Samatail pilahn kaselel, mehlel Sapwellime pilahn me keieu “kaselel” me kounopadahr pwehn kapwureikumwaildo, kaidehn en pohnsehseikumwaila. Sohte aramas emen kauwadahr wasahn perehre ieu de mihmi wasaho pwe en kin kapwurei kumwail oh kadarkumwail la pali teio. Ni mehlel, e sohte kin wiawi ni duwe met. Koht kin ketin nanantihong sewsewese iuk. E “ketin kupwurki Sapwellime seri koaros en pilada pwuralahng Reh,” oh E kin doadoahngki soahng koaros pwehn kapwureiukedo.
Samatail o ketin kaunda Kapikipikdahn sampah wet me kahrepe iei en kounopada ansou mwahu ong komwi oh ngehi en ahneki ansou mwahu en kamwahula nan mour wet, ansou mwahu en doadoahngki saledek en pilipil me Koht-ketikihong kitail en pilada Ih, pwehn esehla kekeirida, wiahda sapwung kan, en koluhla, en poakohng Koht oh mehn impwomw kan, oh en ehu rahn pwurala Reh.
E ketin kadaredohr Sapwellime Iehros pohn sampah pwupwilahr wet pwe en kak momouriki unsek en paliwar oh esehla mwomwen aramas, en wiahda karasaras ong Sapwellime seri kan en idawehn, oh en kematala oh doarehla. Sapwellimen Krais kisakis en tomwo kihsang mehn perehre kan koaros ong mehlahn paliwar oh pali ngehn me pahn kak katohrei kitail sang atail wasahn kousoan poatoapoat.
Soahng koaros me pid pilahn en Sahmo ong Sapwellime seri kan wiawidahr pwehn kapwurehdo kitail koaros Reh.
Dahme Sapwellimen Koht meninkeder kan, Sapwellime soukohp akan, kahdaneki pilahn wet nan pwuhk sarawi Kapwurupwurdohu? Irail kin kahdaneki pilahn en doarehla, pilahn en kupwur kalahngan, pilahn en peren, oh pilahn en komour, me iei ong kitail koaros, “sang ni intahn noai Iehros o.”
Kahrepen sapwellimen Sahmo pilahn kaselel en peren wet iei atail peren, wasaht, ansou wet, oh kohkohlahte. Kaidehn en perehsang kumwail amwail peren oh kihong kumwail pwunod oh masepwehk.
Koasoandi en sapwellimen Sahmo pilahn en doarehla wet iei mehlel doarepemwail, amwail maiauda sang ni lokolok kan oh pwoulahn Sises Krais, kasaledeksang katoutoupen dihp oh mehla. Kaidehn en mweidohng kumwail en duhduwe.
Kahrepen pilahn en mahk sang rehn Sahmo iei en ketkihong kumwail mahk ni amwail pahn pwurehng sohpeila Reh oh wauneki amwail inou en loalapwoat ong Ih. Kaidehn en soikala mahk oh kihong kitail weirek oh pahtou.
Kupwuren Samatail Nanleng pilahn en komour iei mehlel komourpetail nan lingan en wein selesdiel ni atail pahn alehdi atail “kadehde en Sises” oh kihda palingenitail unsek ong Ih. Kaidehn en kihdi kumwail liki.
Met wehwehki soahng koaros mwahu me doke mwomwen atail wie momour? Me mwomwen atail pahn doadoahngki atail mehn pilipil sohte wiahda mehkot? Me kitail pahn kak alehda de pwilikihda kosonned akan en Koht? Soh, ni mehlelo soh. Ni mehlel ehu sapwellimen Sises luhk me e kin ketin kapwurehiong oh pekipek kan ansou me e wiewia Sapwellime doadoahk nan mour wet iei kitail en wekila oh koluhla oh kohdo Reh. Poahsoan me sohte sansal nan Sapwellime padahk kan ong kesempwalki momourki kosonned akan en mour wet wia ahl ehu ong keirdahn paliwar, ong wekilahn pwoson Krais, ong wekila laud en mohngiong.
Koht ketin kupwurki kitail en kamwahuihala unsek atail poakohng pein kitail oh atail pohmwahso kan en sorahla, kausala ahnepen aramas, ong kitail en “kohwei, oh ke dehr pwurehng wiahda dihp.”
Ma kitail kamehlele me kahrepen pilahn en Sahmo iei en komour kitail la, kapit kitaila, kalaudehla mahk ong kitail, oh wahdong kitail peren, ia kahrepen Iehros o me elehda pilahn wet en pweida?
Iehros o pein padahkiong kitail: “Pwe ih kohdihdo sang nanleng pwe I en kapwaiada kupwur en Ih me ketin kadariehdo, a kaidehn pwe I en wia nsenei.”
Koasoandi en Sises duwehte koasoandi en Sahm limpoako! E ketin kupwurki wiahda en kak mwahu ong koaros Sapwellimen Sahmo seri kan en alehdi kaimwseklahn koasoandi en pilahn wet—me iei mour soutuk Rehra. Sohte emen me sohte pahn iang alehdi keirda sarawi wet.
Ma kumwail pahn kalapw kehieng pwunod me kumwail pahn sohte kakehng, de me limpoak en Tomw en Krais me sohte imwi apwaliala mahkepen koaros, ahpw ke leme kowe ke sto iang, eri udahn ke sapwung. Sohte imwi wewehki sohte imwi Sohte imwi apwaliala kowe oh koaros me ke poakoahng.
Nihpai kawehwehda mehlel kaselel wet; “Soahng koaros me E ketin wia kin wiawi ong kamwahupen sampah; pwe E ketin poakohng sampah, kahrehda E ketin mweidala pein eh mour pwe aramas koaros en kak kohdo reh. Eri, sohte me E ketin irehdihsang re en alehda sapwellime komouro.”
Sounkomour o, Silepen Sihpw Mwahu o, ketila rapahki Sapwellime sihpw me salongalaho laho E diarada. E sohte “kupwurki emen en mehla.”
“Limei kat I kapahwehng kumwail , oh mehmen me pahn kohdo, ih me I pahn alehda.”
“Mie me soumwahu rehmwail? Kumwail wahdo wasah. Mie rehmwail me nehtuk, de maskun, de sikel, de sohte kak alu, de toktok, de mwoator, de salengopon, de me ahneki soahngen kahpwal sohte lipilipil? Kumwail wahdo wasah oh i pahn kamwahuirailla, pwe I poakpoakei kumwail.”
E sohte kausala lih me soumwahu en intaho, E sohte sohpeisang me tokitok o, E sohte sohpeisang lih me kamwahl o, E sohte soikala irail kan me soapwung, sohte lipilipil soangen dihp da. Oh E sohte pahn soikala kowe de koaros me ke poakohng ansou me ke pahn wahdong Ih ahmw mohngiong ohla kan oh ngehn ohla kan. Met iei kaidehnkupwure de Sapwellime koasoandi, kaidehn Sapwellime pilahn, kahrepe, ineng, de koapwoaroapwoar.
Soh, E sohte kin ketkihda mehn ritingedi oh perehre kan; E kin kamwakidasang. E sohte kin katorehiukala; E kin kasamwo iuk do reh. Sapwellime doadoahko ni unsek wiahier kasalepen kahrepe wet.
Eri ni mehlel mie Sapwellime tomwo, me inenen apwal ong kitail en wehwehki, me laudsang atail iren madamadau kan. Ahpw, met e wia iren “ahpw,” kesempwal ehu, kitail wehwehki, kak wiahki iren madamadau, me sarawio, Sapwellime tohnmetei en tomwpen dihpo me kahrepe iei en komourla.
Kahdeng en nan tehnpas sarawio teipeseng sang powe lel pah ansou me Sises ketin pwoulahr pohn lohpwuo, kasalehda mwomwen atail pahn kak pwurala rehn Samatailo teipesengehr wiahda pali riau oh ritidahr—ong koaros me pahn sohpeila Reh, koapwoaroapwoarki Ih, kihdi arail kotoutou kan Reh, oh alehda Sapwellime wisiko pohrail sang ni inou kan.
Ni koasoai tohrohr, sapwellimen Sahmo pilahn sohte pidada mehn perehre kan. E sohte wiawiher; e sohte pahn wiawi. Mie mehkot me kitail anahne wia, kosonned akan kitail anahne momourki, mehkot nan atail mour kan kitail anahne wekidala? Ei. Ahpw sang ni Sapwellime mahk. kitail kak alehdi mepwukat, kaidehn kitail sohte kak alehdi.
Met iei ih rohng mwahu o! I inenen kapingki mehlel pwukat. Sapwellimen Sahmo koasoandio, Sapwellime pilahn, Sapwellime kahrepe, Sapwelime kupwur, kupwuren Sahmo, oh Sapwellime koapwoaroapwoar koaros iei en sewese iuk, koaros en kihong uhk meleilei, koaros en waiukodo, oh me komw poakohng kan, Reh. Ong mepwukat I kadehdehki ni mwaren Sises Krais, Sapwellime Iehros, ahmen.