Momouriki Padahk en Krais me Manaman oh Lingan Kohkohlahte
I lukehieng uhk ken momouriki padahk en Krais kohkohlahte, kapwkapwurehieng ansou koaros, oh inengien ansou koaros oh sowesehda mehtei kan.
Sounpar kei samwalahro, ngehi, ai pwoud, Ruth, oh nait serepein, Ashley iangih pil ekei duhris dake kayak kei nan Hawaii nan United States. Kayak iei mehn dakadak en nan pihl ehu me duwehte wahr me aramas pahn kin mwohd sohpaih mwowehu oh doadoahngki padil me pali-riau oh kin sei mahs apali ah mwuri pil apali. Pilahno iei me se pahn seila ni kisin deke riau likin Oahu oh pil pwur. I koapwoaroapwoarkihla, pwe ni ei pwulopwulo, I kin dake kayak kote leh kan nan nahna kei. Ahniki pohnmwahso sohte kin pweida, apwe ia?
Nait sounkaweido padahkiheng kiht dahme se pahn wia oh kasalehieng kiht kayak en nansed me se pahn dake. Re wekisang me I kin dake mahs ko. I pahn mwohd pohn kayako, kaidehn loalen kayako. Ni ai doudahng pohn kayako, tawin paliwereiet ekis elehdahsang uwen me I kin ahno, oh I sohte nohn soanamwahu nan pihlo.
Ni aht tepdao, I kin pitipit en sei sang Ruth oh Ashley. Mwurin ansou kis a I tihenglahr oh dohsang ira. Mendahte ai ekis kalahki uwen wuk en ai seiseio, I uhdi ngehi awih ira en lella rehi. Lapalahn ilok ieu—soangen laude, mwein centimeter 13—e lelte ni keilen werei kayako eri wekidiedieng nansedo. Ni ansou me I wekidada kayako oh nantihieng pwurehng douda powe, Ruth oh Ashley daulih ie, I sohla kak pwurehng seiki wen ai nget. I saikinte pwureng esingekda mwahu ah pil ehu ilok, me udahn laud—, laudsang centimeter 20—lel werei kayako oh pwurehng wekidiehdi. Mwurin ai pwurehng wekidada kayako, I ngetida oh perkihda pwe I de sohte kak pwurehng douda powe.
Soun kaweido kilangada ai kahpwalo ih eri seido oh koledi werei kayako, pwe ien doudahng powe. Ni ansou me e kilang me I saik kak sei pwehki ai ngeto, e pirehieng sahl ehu ni werei kayako oh tep sei luklukeie kohla. Ekis keieng, I pwurehng esingekda mwahu pwurehng pein wie seisei kohla. E mweidala sahlo, ngehi sohla anahne sawas oh pein lella ni keioun dekeo. Ni aht lella mwo, udahn I pwangada oh uldahla pohn pihko.
Mwurin aht pwihno ah koamwoalehr, sounkaweido ngiltikitikihdohngie oh nda, “Mr. Renlund, ma ke pahn seiseite kohla, nihnihdek kohla, ke pahn mwamwahute kohla.” I idawehn ah kaweido ni aht sei kohla ni keriaun dekehu oh pwurehng pwuralahng wasa se tepsangiehu. Pak riau, sounkaweido seido limwahi oh ndahngie me wie mwamwahute. Ilok me pil laudsang mehn mwowehko kin lel ni keilen weirei kayako, apw I sohte wekidekdi.
Ai kin wie seiseiki kayako, kin kahrehieng ei nihnihdek kohla mwahu, oh kin katikala angin ilok me kin lel ni keilen werei kayako. Wiepe wet pil kin doadoahk ong momour en palingenitail. E kin keperehng kitail ma kitail kin wawaila apw mehlel ni atail kin uhdi. Ma kitail pahn kin nantihieng pwe palingenitail en kin “wie seisei” kohlahng Sounkomouro, e kin mwahu ong kitail pwe mour soutuk ong kitail kin peian atail pwoson Ih.
Angin kehkehlaila en palingenitail kin wiawihda sang ni “atail kin ansou koaros kaskasamwoh sapwellimen Krais padahk ki erein ansou reirei.” Ni atail kin wia met, President Russell M. Nelson padahngki, me e kin wiahda “kakehlailahn palingehn me kin angin.” Ni mehlel, Irehkan nan Sapwellimen Krais padahk—me iangahki pwoson Kaun Sises Krais, koluhla, pepdais pwe kitail en pidelongehng nan inou ong Kauno, alehda kisakis en Ngehn Sarawi, oh dadaur lel ni imwisohte wia mehkot kei me kitail pahn kin wia pak ehute eri nek. Apw mehlel, “dadaur lel ni imwi” kaidehkin ehu dake tohrohr nan Sapwellimen Krais padahk—me kitail en kin kanekehlahte tepin ire pahieuohte eri kitail katengeikitaildi, kehpene ngihtail kat, oh awih kitail en mehla. Soh, dadaur lel ni imwi iei kitail en kin kapwkapwurehieng oh kamwkamwahuihkitailla nan ire teiko nan Sapwellimen Krais padahk, me pahn kahrehda “kakehlailahn palingehn me kin angin” me President Nelson kawehwedahro.
Repeatedly wehwehki me kitail en kapwkapwurehieng atail momourki ire kan en Sapwellimen Krais padahk nan atail mour. Iteratively wehwehki kitail en kin ekis mwamwahula nan ansou koaros me kitail kapwurehieng. Mendahte atail kin kapwkapwurehieng irehkan, kitail sohte kin wie piripirselihte apw sohte mwokimwokid kohla mwowe. Ahpw, ansou koaros me kitail kapwkapwurehieng kitail kin karaniala Sises Krais.
Angin mehkot kin anahne marahra oh en doke wasahkis. Ma I pitipit en sei kohla wasa sapwung, e pahn mie angin ai seiseio me kehlail, apw I sohte pahn lella wasa me I men lellahngiehu. Pil duwehte met, nan mour, kitail anahne “sei” kolahng Sounkomouro pwe kitail en lella Reh.
Atail pwoson Sises Krais kin anahne ale ketihnepe rahn koaros. E kin ale ketihnepe ni atail kin kapakap rahn koaros, wadek pwuhk sarawi kan rahn koaros, tamataman duwen kalahngan en Koht rahn koaros, koluhla rahn koaros, oh idawehn kaweid en Ngehn Sarawi rahn koaros. Duwehte ah sohte kin mwahu ong paliweretail kitail en sohte mwonge lel Rahn Sarawi kital apw wiahkintehieu kangala iten wihko pwon, e sohte mwahu ohng palingenitail kitail en kalopiheng kakehlepen atail kadehde en kin wiawi rahn ehute nan wihk ehu.
Ni atail kin pein pwukoahki atail kadehde kan,angin palingenitail eh kin ekis ekis kehkehlaillo kahrehieng atail ahnekihla pwoson me poasoankihda Sises Krais, oh Sapwellime padahk kin poasoanehda soahng koaros nan atail mour. Angin palingenitail pil kin kehlailla ni atail kin natiheng kapwaiada Sapwellimen Koht kosonned akan oh kin koluhla. Koluhla wia mehn popohl ehu oh kin kahrehieng atail kak keirda sang atail sapwung kan, me iei ih mwomwen atail kin keirda soutuk. E udahn pahn mie pak me kitail pahn kin wekidedi weretail kayak kan oh mihla nan wasa loal. Pwehki koluhla, kitail kak pilehu douda oh seisei kohla, oh sohte katepen pak depe me kitail pahn pwupwidi. Ihme kesempwal iei kitail en dehr kalopiala atail seiloak.
Pil ehu iren Sapwellimen Krais padahk iei pepdais, me iangahki pepdaiski pilh oh, sang ni kasarawio, pepdais en Ngehn Sarawi. Mendahte pepdais ah kin pak ehute, kitail kin kapwkapwurehieng atail inou en pepdais ni atail kin ale kamadipw sarawi. Kamadipw sarawi sohte kin weliandi pepdais, apw e kin kakonepene iren Sapwellimen Krais padahk—me iei pwoson oh koluhla—ong alahldi en Ngehn Sarawio. Ni atail kin mehlelieng ale kamadipw sarawi, kitail kin luke Ngehn Sarawio ong nan atail mour, duwehte ni atail pepdaisla oh kasarawihlahu. Ni atail kin kapwaida inou me sansal nan kapakap kan en kamadipw sarawio, Ngehn Sarawi kin wiahla iengetail.
Ni Ngehn Sarawio ah kin lipwanla nan atail mour, kitail kin ekis ekis kekeirda oh ekis ekis duduwehla Krais. Loaletail kin wekila. Atail kin kehieng wiahda me suwed kin luwetala. Atail kin kehieng wia me mwahu kin kehlailla kitail kin men “wiwiahte me mwahu ansou koaros.” Oh met kin elehieng kitail en ale manaman en nanleng me anahn ong atail pahn dadaur lel ni imwio. Atail pwoson kin laudla, oh kitail pil kin onopehng kitail en pwurehng kalaude angin palingenitail.
Angin palingehn kin sowese kitail en wiada pil ekei inou ong Koht nan tehnpesen Kauno. Inou me tohto kin kahrehieng atail kin karaniala Krais oh kakehla pwukepwuk en nan pwungen kitail oh Ih. Inou pwukat kin kalaudehla atail kin kak ale Sapwellime manaman. I men en sansal, me inou en pepdais kan oh nan tehnpas sarawi kan, sohte kin pein kihda manaman de angi. Manaman kin sang rehn Kaun Sises Krais oh Samatail Nanleng. Alahldahn oh kepweipweidahn inou kan kin elehda elen Sapwellimara manaman ong nan atail mour. Ni atail pahn kin momourki inou pwukat, kitail pahn ehu rahn sohsohkihdi koaros me Samatail Nanleng sapwellimanki. Angin palingenitail me kin sang atail kin momourki Sapwellimen Krais padahk sohte kin saunehngete ain atail kin wekieng dokedoketail soutuk, apw e pil kin kainengihkinkitail en sowese mehteikan ni wiepe me mwahu kan.
Medewe mahs duen sounkaweido ah soweseiehda mwurin werei kayako ah wekidekdio. E sohte mihte wasa doh apw peidekihdo peidek me sohte katepe, me duwehte, “Mr. Renlund, dahme ke wiewia nan seden?” E sohte seido oh lipwoareie, oh nda, “Mr. Renlund, ke sohte pahn mih nan kahpwal wet ma paliweremwen ekis kehlailsang men.” E sohte tep lukehsang werei kayako ni ai nannantihengete doudahng powe.” Oh e sohte panawihie nan pwungen mehteiko. Ihme e wia, e kihengie sawas me I anahneo ansou me I anahneo. E kihengie kaweid ansou me I kak alehda. E seido oh lel limwai pwe en kangongeie.
Ni atail kin apwalih mehteikan, kitail sohte kin idek peidek me sohte katepe de ndahieng irail mehkot me re esehier. Palilaud en aramas me mih nan kahpwal ese me irail mih nan kahpwal. Kitail dehr kin kadeik; atail kadeik sohte kin soweseirail or oh sohte me peki, oh pak tohto e kin sang atail sawehwe.
Karasahieng mehteikan pein kitail kak kahrehieng atail kin wiahda sapwung keper kan, apw mehlel ma kitail kin wiahkihla me kitail mwahusang irail kan me mih nan kahpwal. Met rasehng amw kereniengehr duhla nan pihl me mihter oh kilikilang iengomw me pahn duhlahr nan pihl me mihter 4 kowe apw medewe me e dipansang uhk, kowe apw uhd nsensenamwahuki. Pwe ni mehlelelo, kitail koaros mie pein atail kahpwal de luwet. Sohte emen rehtail kak pein koadoahkehda komour. Kitail sohte kak. Seikop, nan Pwuhk en Mormon, padahngki, “oh tamataman, mwurin [atail] kompoakepahki Koht, kumwail en ese me ihte sang ni kalahngan en Koht me [kitail] kak komourla.” Kitail koaros anahne Sapwellimen Sounkomouro tomw poatoapoat, kaidehkin kisehte.
Kitail wahda atail ese lamalam koaros oh atail limpoak unsek ni atail kin patpatehng mehteikan. Irail akan me mih nan kahpwal “anahne kehn limpoak mehlel en Sises Krais pahn sansal nan [atail] lokaia oh wiewia kan.” Ni atail kin apwalih mehteikan, kitail en kangoange irail oh sowese irail. Menda ma irail sohte men ale kitail, kitail nantiheng sawaski uwen me irail pahn mweidada. Sounkomouro padahngki, me “ong soangen aramas wet kumwail pahn uhsehla sowese; pwe kumwail sohte ese ma re sou pahn pwurodo oh koluhla, oh kohdo rehi nan mohngiong mehlel, oh I pahn kamaiauirailda; oh kumwail me pahn wia elen sowese wairaildohng komourla.” En Sounkomouro pwukoah iei me kamwauiala. Atail pwukoah iei limpoak—ahneki limpoak oh wia sawas ni mwohmw ehu me aramas pahn men karanihkihla Sises Krais. Met iei ehu wahn angin palingehn me idipek me kin sang Sapwellimen Krais padahk.
I lukehieng uhk ken momouriki padahk en Krais ansou koaros, kapwkapwurehieng ansou koaros, oh inengieng ansou koaros oh sowesehda mehteikan. I kadehdehki me Sapwellimen Krais padahk wia pwurien Sapwellimen Samatail Nanleng pilahn; pwe, ni mehlelo, Sapwellime padahko. Ni atail kin doadoahngki atail pwoson Sises Krais oh Sapwellime Tomwo, kitail kin nihnihdek mwahu kohwei nan elen inouo oh kin inangih sowese mehteikan en mehlelki arail idawehn Sises Krais. Kitail kak wiahla Sapwellime nan wein Samatail Nanleng, me iei imwilahn momourki Sapwellimen Krais padahk ni mehlel. Ni mwaren Sises Krais, ahmen.