Tehnpas Sarawi Kan, iei Tehnpas en Kauno kei me mie Wasa Tohto Pohn Sampah
Ni amwail pahn kohlahng Sapwellime tehnpas sarawi ni amwail warohng oh loalopwoat ong sapwellime tehnpas sarawi, kumwail pahn alehdi Sapwellime manaman.
Ke sohte iang kaselelki mahsen akan en koul me kitail apwetehn koulkio? “I pahn Kakehlailih iuk, sewese iuk ken kak uhda … Uhkihda me pwungo, pwe koht en kupwre.” Kauno ketin wie kangkakehlaka Sapwellime Souleng kan sang me pwulopwul lel me mah ni arail kin kohdohng nan Tehnpese sarawi. Sang Kinshasa lel Zollikofen lel Fukuoka lel Oakland, me pwulopwul kan, sang pein arail pilipil, wie kadkadire nan wasahn pepdais en tehnpas sarawi kan. Mahso, pali laud en tohn doadoahk en tehnpas sarawi kin moangepwet—ahpw met solahr. Misineri malipilipdahr kan, misineri en papah kan, oh misinieri me pwurodohr kan mihmiseli wasa koaros. Wasa koaros pohn sampah, mie pepehm ieu me wie lalaudla me wie kahkahrei kitaillahng ni tehnpas en Kauno.
Sounpar ehu samwalahro, emen kempoakapahn aht peneinei, me sounpar 95 [duweisek limau], me kin mihmi ni palimese en United States, me alehkiher padahk sang misineri kan erein sounpar 70 [isihsek], ndahiengehr nah serepeino, “I men iang uhk kohla nan tehnpas sarawi.”
Nah serepeino ahpw sapengkiher, “Eri, Ino, keieu ke anahne pepdaisla mahs.“
“Mwahu,” e sapengkiher, “na I men pepdaisla.” Liho pepdaislahr. Rahn ekei mwuri, lih menet ni wahu doulongehr wasahn pepdais en nan tehnpas sarawi. Oh sounpwong ehu samwa samwalahro, lih menet pidolong nan tehnpas sarawi oh alehdier pein ah endaumen oh katengeteng. “Eripit oh manaman en Koht pahn pweida; oh kihsang irepen sampah ong nanleng.”
Mie pak me komw medemedewe dahme kahrehda Kauno mahsanihongehr Sapwellime Soukohp en ansouwet en kadirehkihla sampah tehnpas sarawi kan? Dahme kahrehda, nan ansou kiset, E ketikihongehr kapai rehn Sapwellime aramas en inou kan pwe sang ni arail meiroang sarawi kan, sapwellimen Kauno tehnpas sarawi epwiki kei en kak koukouda?
Menseng wet, Preseden Oaks kasalehiong kitailehr kilel en tehnpas sarawihkan me kokoudahr pohn sampah. Me keren ngehi oh Kathy kohla Philippine. Medewe mwekid kapwuriamwei wet: Tehnpas Sarawi en Manila kasarawihlahr nan pahr 1984 [kid duwepwiki welihsek pahieu]. E lelehr sounpar 26 [rieisek wenou] mwohn keriauen tehnpas sarawi ah kanekneklahr nan Kahnimw en Cebu, nan pahr 2010 [riekid eisek]. Met, mwurin sounpar 14, mie tehnpas sarawi 11 me wie koukouda, pilipilahn, de kaunopongehr kasarawi. Sang paliepeng lel palier: Laoag, Tuguegarao, Santiago, Urdaneta, Alabang, Naga, Tacloban City, Iloilo, Bacolod, Cagayan de Oro, oh Davao. Mehd kapwuriamwei kilikilang sapwellimen Koht doahdoahk kaselel kan!
Wasa koaros pohn sampah, tehnpas sarawi en Koht akan wie kerekerendohng kitailehr. Dahme nan atail rahnakat ki?
Imwin Rahn akan
Kauno ketin kaparkinkitailehr me ni imwin rahn akan, nanpwungsuwed en wehi kan pahn mie, aramas pahn roporop ong pein irail, soahng koaros [pahn] pingida, sawehwe pahn mie, oh arail mohngiong kan [pahn] pitihraildi. Mehlel kitail kilkilangehr mohngiong kan en aramas akan wie luluwetala: kasongosong en sampah, ngilen kasongosong kan me wia mehn kerempw, pohnsehsehla epwelpen palingehn, pwangahkihda wia doadoahk en iangahng en Krais. Mwein mie me kumwail poakpoake me kumwail nsensuwedkilahr pwehki mie ansou ehu me e kosoia ah pwoson Sises Krais, kadehde duwen Pwuhk en Mormon, oh kin nanantihong iang kauwada wein Koht, ahpw mwuri sohpeisangehr, mehlel ansouwet, sang dahme e kamehlele oh mihmilahr likin mwomwohdisoh. Ahi kaweid ong kumwail iei kumwail dehr sohla ahniki koapwoaroapwoar! Soahng koaros pahn mwahu! Pwe sohte mehkot me sohte kak pahn Koht.
Ansoun kapingiping oh sohpwoson wet nan sampah me kokohpdahr, Kauno ketin inoukiher me pahn mie aramas en inou kei, aramas ekei me kaskasik Sapwellime ketidosapahl; aramas ekei me kin mihmi nan wasa sarawi kan oh sohte mwekidsang. E ketin mahsaniher duwen aramas pwung kei me sosoik kasongosong kan en tepelo, me kin kangkakehlaka arail pwoson, kin medewe wehin Koht, oh likih ni unsek arail Sounkomour Sises Krais.
Dahme kahrehda ansou wet Kauno wie ketketkihdo Sapwellime tehnpas sarawi epwiki kei kerendohng kitail? Ehu kahrepe pwehki kahpwal oh sawehwe me mie nan sampah, E inoukihdahr me E pahn kakehlailih oh kapaiada Sapwellime Souleng en inou kan, oh Sapwellime inou kan tepier pweipweida!
Inou kan sang nan Tehnpas Sarawi en Kirtland
Ia mwomwen tehnpas sarawi pwukat ahr kak kakehlaka, kaloaloamwahuih, oh sinsile kitail? Pasapengo mih nan en Sosep Smith ah kapakap en pekipeko ni kasarawi en Tehnpas Sarawi en Kirtland o. Nan tehnpas wet me souleng ko koulkiher, “Sen koul oh weriwer iang sounpei en Kaun nanleng.” Sounkomouro pein pwaradahr, oh soukohp en mahs ako pil pwurodohr, pwehn kapwurehdo kih kan en prihsduhd ong rongamwahu kapwurpwurdohu.
Erein irair sarawio nan tehnpas sarawi en Kirtland, Soukohpo kapakapki souleng kan en kak ahniki manaman en Koht, me mwaren Sises Krais pahn mih pohrail, me Sapwellime tohnleng kan pahn ieiang irail, oh me irail en keirda nan Krais oh alehda Ngehn Sarawio ni unsek. Kapakap kehlail pwukat pweidahr nan atail mour ni atail kin kaudok nan tehnpas en Kauno ni pwoson.
Perehrehkihda Mour Pwung
Nan Sapwellime tehnpas, kitail kin alehda manaman en nanleng ni mehlel. Atail pwoson Sises Krais oh atail limpoak ong Ih kasansaladahr oh kakehlaildahr. Kitail esehla ihs kitail sang palingehn oh kahrepe kan en mour. Ni atail kin ahniki pwoson, kitail kapaikidahr perehresang kasongosong oh mehn kerempw kan. Kitail kin kehn limpoak en Sounkomouro ni Ah ketin doareikitail sang nan atail kahpwal akan, pahtou oh mohngiong ohla kan. Kitail kin kakehlailkidahr manaman en Koht.
Mware Pohtail
Nan Sapwellime Tehnpas sarawi, kitail kin alehda mware ni unsek. Ni atail pepdaislahr, kitail kin kasalehda atail kamehlele Ih oh uwen atail men kapwaiada Sapwellime kosonned akan. Nan tehnpas sarawi, kitail kin kasalehda sang ni atail wiahda inou sarawi kan me kitail pahn idawehn Ih kohkohlahte.
Me pwulopwul kan en Mwomwohdiso wet inenen mwahu. Nan sampah apwal wet, irail kin alehieng pohrail mwaren Krais. Nan Heber City, Utah, mihting ieu wiawi pwehn koasoiahda koasoandien tehnpas sarawi me re pilpilahnehr en kauwada. Me pwulopwul meh silipwiki pokonpene nan park ehu me karanih wasahn mihtingo pwehn utungada pilahn en tehnpas sarawio. Emen pwutak pwulopwul, koskosoiong sounkaweid kei en kopwerment nan mihting ieu, ni komwad kawehwehdahr, “I pilipilahne ien kak kapwopwoud nan tehnpas sarawiet. [Tehnpas sarawio pahn sewese] ie ien ahniki mour mwakelekel.” Emen karasahiong tehnpas sarawi me e wia kilelepen marain oh koapwoaropwoar. Me pwulopwul kan en Mwomwohdiso wasa koaros nan sampah kin kasalehda uwen arail men alehda mwaren Sises Krais.
Tohnleng kan Rehtail
Nan tehnpas sarawi en Kirtland, soukohp Sosep Smith kapakapkiher me tohnleng kan [pahn] ieiang [Sapwellime Souleng kan]. Weliweliandi atail keinek kan nan tehnpas sarawi kin kiheng kitail kadehde mehlel me mour pahn doudoulahte palio kahdengo.
Pali laud en soahng kan kitail kin lelohng nan tehnpas sarawi me nohn sarawi ong kitail en ehukihda, ahpw mehkei kitail kak ehukihda. Sounpar pahisek samwalahro, ni aht kin mihmi nan Florida, ngehi Kathy seiloaklahngehr tehnpas sarawi en Atlanta, Georgia. Ni soutik en Niesil, Mei 9, 1984 [kid duwepwiki welihsek pahieu], ni aht kaimwsekala sesin en nan tehnpas sarawio, emen soundoadoahko keido limwahi oh peidek rehi ma mie ahi ansou en iang pil ehu tiahk sarawi. Eden aramas me I weliandio ekis ehusoahng. Ede Eleazer Cercy.
Mandahsang rahno, tehnpas sarawio inenen direkihla souleng kan. Ni ahi wie kaukaunop en iang keriau en tiahk sarawi en rahno, I alehdi eden ohl me I pahn welidandio. Me kopwuriamwei, ahd me I pahn weliano iei ahd me i weliandier ninsoutiko, iei Eleazer Cercy. I kehnehr Ngehn en Kauno ni endaumeno ah imwiseklaho. Mwurin souwaso, ni aht mihmihte nan tehnpas sarawio, Kathy kilangadahr kempoakepahn ah peneinei lih mah emen, Sister Dolly Fernandez, me ansouwet kin koukousoan nan Atlanta. Pwehki sohte ohl sang nan ah peneineiko, liho pekihda rehi ma I kak iang tiahk sarawi en katengtengpene en ah pahpa ohng ah pahpa oh nohno kahlap. I inenen kapingkiheng.
Ni ahi kelepwikihdi ni pehi sarawio ong tiahk sarawi wet, I pilehu rongada eden ohlo me tengedier nan moangeiet, me wia ah pahpao, iei Eleazer Cercy. I inenen kamehlele me mwurin mour wet, I pahn tuhwong oh pwoalehdi ohl emen me kahdaniki Eleazer Cercy nan mour wet.
Pali laud en soahng koaros me kitail kin esehla nan tehnpas sarawi kin wahdo popohl meleilei oh kaudiahl laudsang soahngen mwekid kapwuriamwei kan. Ahpw ahniki koapwoaroapwoar: tohnleng kan kin ieiang kitail!
Unsek en Ngehn Sarawi.
Ni atail kin ale kasarawi en wiahla towe mehlel kei kitail kin alehda kisakis en Ngehn Sarawi. Ni atail kin ale kamadipw sarawi nan ehu ehu wihk pwehn kataman atail Sounkomouro, kitail kin alehdi inou me Sapwellime Ngehno pahn ieieng kitail ansou koaros. Ni atail kin pwarek tehnpas en Kauno ni mohngiong impahi, wasa me keieun sarawi pohn sampah, kitail kin keirda rehn Kauno oh alehda Ngehn Sarawio ni unsek. Sang ni manaman en Ngehn Sarawio, kitail audaudkihdahr meleilei oh popohl oh koapwoaroapwoar laud. Kitail kin alehda kakehlapatail pwe kitail en wiwiahte Sapwellime tohnpadahk mendahte ma kitail sohte mihmi wasa sarawihkan.
Preseden Russell M. Nelson pakairkidahr: “Atail Sounkomour oh Soundoar, Sises Krais, pahn ketin kasalehda ekei Sapwellime manaman kapwuriamwei kan sang met lao ansou me E pahn ketdo sapahl. Kitail pahn kilang kilel kaselel kan me wia kasalepen me Koht Sahm oh … Sises Krais … kin kakaun Mwomwohdiso wet ni lingan oh klohri.” Kadirehkihla sampah tehnpas en Kauno kan wia doadoahk kesempwal oh wia kilel en mwekid kapwuriamwei ieu.
Kempoakepahi kan, ma kitail kak ahpw saikinte katohtowehla atail kohla ni tehnpas sarawi, kitail en rapahkihda ansou en kalapw kohla kaudek nan Sapwellimen Kauno tehnpas. Kitail kapakapki tehnpas sarawi kan me pakairdahr, me sahpw kan en kak pweipweida, kopwerment kan en mweidada koasoandi kan, me tohn doadoahk kan pahn kilang kalaudlahn arail koahiek kan, oh kasarawihkan en karehda mweimwei sang nanleng oh pwaredohn tohnleng kan.
Inou Kan
Tehnpas sarawi iei tehnpas en Kauno ni mehlel. I inoukihong kumwail me ni amwail pahn kohdo ni amwail warong oh ni kapakap nan Sapwellime tehnpas sarawi, kumwail pahn alehda Sapwellime manaman, Sapwellime mwahr pahn mihmi rehmwail, Sapwellime tohngleng kan pahn ieieng kumwail, oh kumwail pahn keirda sang kapai en Ngehn Sarawio.
Kauno ketin inoukidahr, Koaros me pwilikihdi diparail kan oh kohdo rehi, oh eker edeie, oh peikiong ngileie, oh kapwaiada ahi kosonned akan, pahn kak kilang meseie oh ese me Ngehi met. Mie wiepe tohto wekpeseng kei me kitail kak kilangki sihlangin Krais, oh sohte ehu wasa mwahusang nan Sapwellime tehnpas sarawi.
Nan rahn en pingiping oh kamwoaroang wet, I kadehdehki me ehu ehu tehnpas sarawi wia Sapwellime tehnpas me pahn doarekitail, sinsileikitail, oh kaunop kitailda ong rahn kapereno ansou me, Sises Krais iangahki Sapwellime tohnleng kan, pahn Ketido ni lingan, manaman, oh kilohri lapalap. Ni mwaren Sises Krais, ahmen.