Karasapene Kosonned Riau Keieu Laud koa
Atail koahiek en idawehn Sises Krais pahsan atail kehlail oh manaman en momourki keieu oh keriau en kosonned kan ni pahrek oh loaloapwoatieng ira koaros.
Mehn Kapehse
Ni ansou me ngehi oh Lesa, ahi pwoud, kin seiloak seli pohn sampah wia pwukoah kan, se kin ahniki peren laud pwehki ansou mwahu en tuhwong kumwail nan kapokon laud oh tikitik kan. Amwail loaloapwoat en doadoahk ong Kauno kin kakehlakaikitada oh kin wia kadehdepen rongamwahu en Sises Krais wet. Se kin pwurala nimwato mwurin ehu ehu seiloak oh se kin medewemedewe ma se kin kihong kumwail uwen laud me duwehte me se kin alehdi sang kumwail.
Ni ansou en seiloak, e kin sohte itar ansou mwahu ong sen kak mwemweitseli. Ahpw, ansou me kak, kin mie ahi ansou kis en wia mehkot me I inenen pereniki. I kin pereniki palien arkitekter oh pilahnepen ihmw oh dahme I inenen perenki iei me pid piris kan. I kin pwuriamweiki piris tenek kan. Ma Rainbow Bridge nan Tokyo, Tsing Ma Bridge nan Hong Kong, Tower Bridge nan London, de mehteikan me I kilangehr, I kin pwuriamweiki uwen loalokong en tohn doadoahk me kak wiahda soangen apwal en kauwada piris pwukat. Piris kan kin waikitailla nan wasah kan me kitail sohte kak lella ie. (Mwohn ahi pahn doula, I tehkada me sang ansou me padahk wet kaunopadahr, ehu aksiden laud me pid piris wiawiher nan Baltimore. Kitail pahtoukihla irail akan me melahr oh kiheng irail peneinei en me melahr kan atail limpoak.)
Piris Langalang Kaselel Ehu
Me keren, ni ahi towehda ehu tiepene nan California, I pil pwurehngehr daulih piris en Golden Gate, me kin wia ehu doadoahk en entinihr me keieun kopwuriamwei pohn sampah. Piris kalaimwun wet kapatapene uwen kaselel en mwomwen ah wiawihdaho, kahrepe me e wiawihkihda, oh uwen loalokong de semen en irail kan me wiahda. E wia lapalahn piris tenek kaidehn mehn mwamwahl ehu me mie dahwer kei ni ehu ehu pali, me utuhtkihda lepelepen uhr kan. Dahwer kalaimwun kan me kolokol toutou laud, me pwarapwar pohnangin sehdo iei me tepin wiawihda. Uhr riau pwukat patpene kolokol toutouen sahl meteh kan me mih powe oh pah, me kolokol ahlen sdohsahu pahnangi. Uwen kopwuriamwei en kehlail en kolokol toutou en piriso—uwen kehlail en dahwero—iei manaman me kohsang ni loalokong en aramas me pilahnehda koadoahkepen piriso.
Distrik en Piris en Golden Gate.
Kilel kan en piris wet ni ansou me e wihwiawio wia kadehde duwen kosonned en pelien doadoahk wet. Ehu ehu palien kolopen piris ieu kin ale utuht sang dahwer kan, ni koaros ara konekpene.
Getty Images/Underwood Archives
Ni ansou me e pahn nek, ni dahwer riauo tengedier nan ara wasa oh uhr kan angkehdier pohn poahson en takai koaskoasuk kei, met e wia kilel en kehlail oh lingan.
Rahn wet I men lukei kumwail en kilang mwomwen piris wet—me ah dahwer riau koa wiawihda pohn poahson kehlail ehu—sang ni iroir en rongamwahu ehu.
Ni linganen maraihn en sapwellimen Sises Krais minisdri, erein ansou me kitail kahdaniki Wihk Sarawi, Parisih men me wia loahier men ahpw kalalapakehr rehn Sounkomouro iren peidek ehu me e leme me e pahn kakete apwal en sapeng: “Maing Sounpadahk, mehnia kosonned nan pelien kosonnedo me keieu kesempwal?” Loahiero ahpw, “kasongosong ih” oh raparapahki pasepeng me pahn sang nan palien kosonned, ni eh songosng pitihedi, ahpw alehdier pasapeng mehlel, sarawi, lelepek ehu sang Sises Krais.
“Sises ahpw sapengki, Ke pahn poakohng Kauno omw Koht, sang loalomw unsek, sang ni ngenohmw unsek, sang ni omw lamalam unsek koaros.
“Ih met kosonned me keieu lapalap oh kesempwal.” Rongorong atail karasepen piriso, iei met keieu en dahwero!
“A me keriaun kesempwal me rasehngete met, iei: ‘Ke pahn poakohng mehn mpomw duwen omw kin poakohng pein uhk.” Iei met me wia keriau en dahwero!
“Sang ni kosonned riau pwukat me wia poahsoan en palien kosonned koaros oh soukohp akan.” Dipwisou teikan me wiahda piriso!
Kitail tehk mwahuih mahs ehu ehu kosonned laud riau wet, me sansalehr oh wadlikialahr sang nan Sapwellimen Sises Krais pasapengo. Ni amwail pahn wia met, mweidehng kilel en lapalahn piris tenek kaselel en en mihmi nan amwail madamadau kan.
Poakoahng Kauno
Me keieu, poakoahng Kauno ni loalomw unsek, ni ngenomw unsek, oh ni madamadau unsek.
Nan pasapeng wet, Sises Krais ketin katikala kesempwalpen kosonned me kin doadoahk nan padahk sarawih kan en nan Kadehde Mering. Pwehn poakohng Kauno pahn tepsang nan amwail mohngiong—pein kumwail unsek. Kauno ketin peki me kumwail en ahniki limpoak sang nan ngenimwail unsek—palingenimwail unsek me kasarawialahr—oh keimwsekla, en ahniki limpoak nan amwail madamadau koaros—amwail loalokong oh weweh mwahu. Limpoak ong Koht sohte mie imwi de idih. E poatoapoat oh kohkohlahte.
Ong ie, doadoahngki keieu en kosonned laudo kin kak ekei pak wiahte mehn iren madamadau ahpw sohte kak wiawi, pil kak apwal en kapwaiada. Kaping laudki, ni ei kin medewe mwahu sapwellimen Sises mahsen kan, kosonned wet kak wehweh mwahula: “Ma kumwail poakoahng ie, a kumwail en kapwaiada ei kosonned akan.” Met I kak wia. I kak poakoahng Samatail Nanleng oh Sises Krais, me uhd elehiong kapakap, onopki iren pwuhk sarawi kan, oh kaudek nan tehnpas sarawi. Kitail poakoahng Sahmo oh Ieroso sang atail pwaihn meiroang en eisekis-ehu, wauniki rahn en Sapad, momourki mour mwahu oh mour mwakelekel, oh peihk.
Poakoahng Kauno ansou koaros kin tepsang ni kisin wiewia mwahu, ideidawehn kohwei pohn ahl en inouo: ong aramas pwulopwul kan, doadoahngki palien mihdia pwehn kak sewesehda ahpw kaidehn en kauwehla; kohkohlasang kamadipwo, wasahn kasdo, de kemwekid kan me sohte pwungehng atail mwekid pil kin kak apwal; kasalehda wahu ong me sarawih kan.
Medewe mwahu duwen karasaras kehmpoake wet. E wia Rahn Sarawihn kaisihsol ehu me ngehi oh Vance leteletehr ni wenihmw en ihmw tikitik, sakanakan ehu. Kiht oh dihken teikan nan aht pwihno kasik lepin lokaia pwukat, “Menlau pidelong,” sang ni ngilamwahu ehu me peido sang nan wenihmwo ni ngoren mehn Sehmen. Sister Muellar wia emen lihohdi nan aht wardo nan pwungen mehkei me seiloak dohsangehr ehu sahpw. E sohte kak kohdo ritingada wenihmwo, pwehki e maskun. Ni aht sokolong nan ihmwo me ekis rotoroto, e kasamwoh kin kit peidek kei ni kadek: Ia edamwail kan? “Ia iramwail?” Kumwail poakohng Kauno? Se sapengehr oh ehukihongehr me se kodohn alehdi ah meiroangen kaisihsol. Mendahte aht pwulopwulo, mwomwen irair me e mihmi loalehu inenen sansal ong kit, oh ah pasapeng me direki pwosono inenen kehmpoake: “I pwilikihdiong sent eisek ieu pohn kauntero nimensengo. I inenen kapingki ahi kak pwain ahi meiroangen kaisihsol. Kumwail kak menlau kihong nan enpelop en oh audehda nei risiht en meiroangen kaisihsol en? Ah limpoak ong Kauno kakehlakadahr aht pwoson ansou koaros se kohkohsangehr imwehu.
Nanmwariki Pensamin inoukiongehr manaman laud ong irail kan me idawehn keieu en kosonned laudo. “I men kumwail en kin teneki irair en kapai oh popohl en irail kan me kin dadaur kosonned akan. Irail kapaiakidahr ni mehkoaros, ong ni pwaliwar oh pali ngehn; oh ma irail kin kolokolete arail loaloapwoat lao lel ni imwi irail pahn kohla nanleng ni irair en popohl soutuk.”
Poakoahng Kauno pahn kahluwaikitailahng nan peren soutuk!
Poakoahng Mehn Mpemwail kan
Sises ahpw pil mahsanih, “Oh me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.” Iei met me wia keriau en dahwer en piriso.
Wasaht Sises me wia piris en atail en kak kilangdahla nanleng, oh poakoahng Kauno, ong kitail en kak kilengwei inen pohn sampah, kitail en poakoahng iengatail aramas akan. Pali koaros doadoahkpene. Poakoahng Kauno sohte pahn unsek ma kitail pahn pohnsehsehla mehn mpetail kan. Limpoak wet me tepsang loale kohla liki iangahki sapwellimen Koht seri koaros sohte lipilipil ma lih de ohl, songen pwihn da me irail kin patehng, irail mehn ia, ma lih lih de ohl ohl, palien mwohni, sounpar, de palien tiahk. Kitail kin rapahki irail kan me ahneki medek oh me kin solahr arail koapwoaroapwoar, me kin solahr men patehng aramas, pwehki “koaros duwepene rehn Koht.” Kitail kin “sewese me luwet akan, pwokada pehrail kan me kin mwotoudi, kakehlailiada pwukie luwet akan.”
Medewe mwahu met: Brother Evans pwuriamweila ni ansou me e alehdi pepehm en kawuhdi were sdohsa oh letelet ni wenihmw en peneinei ehu me e sehse. Ni ansou me lihodih men me nainiki seri [ehk] 10 ahpw ritingada wenihmwo, ni ansouohte e kak kehn arail kahpwal akan oh anahn en sawas laud me irail ahniki. Keieu en anahn me irail ahnekio mengei, iei litopw ong nimwarailo, me elehda pahr ekei en sawas en papah ong paliwar oh palingehn ong peneinei wet.
Lih me diren kaping menet ahpw mwuhr intingiada duwen kempoakepah menet me pekederdohng ih: “Ke doadoahngkilahr palilaud en amw mour pwe ken kin pwarek kiht me sohte katepeh ka. Ia uwen ai men rong soahng kan me Kauno pahn ketin mahsanihkiong uhk ni ansou me E pahn ketin kapwulewei Sapwellime kalahngan ong wen mwahu me ke wiahier ong palien sawas en mwohni oh palingehn, ong aramas akan me kowehte oh Ih me mwahngih. Kalahngan en ahmw kapaikihtda ong ni soahng tohto, ong misinerih kan me ke pil sewese. … I kin kalapw medemedewe ma Kauno piluhkada sang nan pwungen irail akan, de ma ihte kowe me kin rong.”
En poakoahng mehn mpomw e iangahki wiewiahn Krais en ahniki kadek oh sawas en tohnmetei. Kumwail pahn kak kesehla lolsuwed kan, mahkehng imwin tihti kan, kasamwo oh papah mehn mpomwail kan, oh sewese me mah kan? Emenemen kumwail pahn ahniki ineng en kauwada amwail dahwer en limpoak ong mehn mpomwail kan.
Preseden Russell M. Nelson padahngki me: “Kieng sawas rehn mehteikan—kin nantieng en kin kak nsenohki mehteikan laud de me pahn laudsang atail kin insenohki pein kitail—pwe iei ih atail popohl. Ahpw mehlel … ni ansou me e sohte kin mengei oh ansou me kitail kin tohnmeteikihla atail nsenamwahu. Momourki keriau en kosonned laudo iei kih en wiahla tohnpadahk mehlel en Sises Krais.”
Utuhtpenehn Pali Riau
Sises ahpw doula padahngki, “Kosonned riau pwukat, iei me poahsoan en pelien kosonned koaros oh padahk en soukohp ako.” Met me inenen dehde mwahu. Mie kesempwal pen utuhtpenehn pali riau nan pwungen poakoahng Kauno oh poakoahng emen emen. Ong Piris en Golden Gate en kak doadoahk, dahwer riau koaros ahnikihte wen kehlail ehu oh kol wen toutou ehute ong sahl lapalah kan, pohn ahl en sdohsa, oh wen diren sdohsa me kin kotehla piriso. Ma sohte loalokong en aramas me kak en disaihnihda soahng wet, piriso pahn kakete sohte kak kokouda mwahu, oh pahn kak mweredi. Ong piris laud sohte lipilipil kan en kak wia dahme e wiawihdahng en wia, dahwer kan me mih ie anahne doadoahkpene pwehn kak doadoahk ni unsek mwahu. Duwehte, atail ineng en idawehn Sises Krais pahsan atail kehlail en momourki keieu oh keriau en kosonned kan ni pahrek oh loaloapwoatieng ira koaros.
Wen lalaudlahn uhpene me wihwiawi nan sampah kasalehda, me nan ahnsou kei kitail kin katiasang kilang de tamataman met. Ekei kin nantihengete en kin kapwaiada kosonned akan me kahrehda irail sohte kin kak kanangamahieng irail kan me irail kilang sohte kin mehlel. Ekei kin ahniki kahpwal en poakoahng irail kan me kin pilada en momouriki mour en likin inou sarawih kan de me pil kin sohte patehng palien lamalam kan.
Pil ehu me kin wiawi, mie ekei me kin koasoia kesempwal en poakoahng mehteikan ahpw sohte kin men alehda me kitail koaros ahniki pwukoah wet ong Koht. Ekei kin sohte men alehda audepen ireh kan koaros me mie mehkot ehu me udahn mehlel douluhl, de pwung de sapwung, oh me soahng ehute me kitail anahne iei ahniki kanengamah unsek oh wauniki pilipil en mehteikan. Sohte lipilipil me sapahrek pwukat pahn kak en kahrehda piris en palingenomw ah pahn tupwekelekel de pil pwupwidi.
Preseden Dallin H. Oaks kawewehda met ni ansou me e patohwan: “Kitail koaros en poakoahng aramas koaros, met sang ni sapwellimen Sises padahk me e karasarasiki mehn Sameria mwahuo me padahngki me aramas koaros iei mehn mpetail. Ahpw atail inengieng en kapwaiada keriau en kosonned wet sohte pahn kahrehieng kitail en manokehla keieuo, me iei poakoahng Koht ki atail mohngiong unsek, ngenitail unsek, oh lamalam unsek.”
Ni Kaimwisekala
Eri kalalapako ong emen emen kitail, ia mwomwen atail pahn kauwada pein atail piris en pwoson oh loaloapwoat—kawadahla ni inen dahwer reirei kan en piriso pwehn kak poakoahng Koht oh pil poakoahng mehn mpetail kan? Amwo, kitail udahte tep. Atail tepin pilahn akan kak mih ni mwomwen pilahn ehu me mih pohn napkin ehu de keieun piluhprind en piris me kitail men kauwada. E pahn kak en audawudkihda ekei iren mehn madamadau kan me emen men idawehn pwehn kak rapahki en kak wewehki mwahu duwen rongamwahu en Kauno de en kaukihla me e pahn katikala doadoahken kadeik mehteikan. Sohte me nohn pwulopwula de nohn mahla pwe en kak tapihada.
Ni wen ahnsou ehu, ni kapakap oh medemedewe mwahu duwen pilahn, madamadau sohte soan kan kamwahulahr. Wiewia kapw kan pahn wiahla wiewiahn rahn koaros. Tepin pilahn me wiawihda kan pahn wiahla piluhprind kaselel. Kitail kin kauwada atail piris en palingenitail ki mohngiong kan oh madamadau kan me loaloapwoat ong Samatail Nanleng oh Sapwellime Iehroso pil ong riatail ohl akan oh lih akan me kitail kin doadoahkieng, mwadongehng, oh momourieng.
Nan rahn akan me pahn kohdo, ni ansou me kumwail pahn daulih piris lang lingan lapalah kan de ma kumwail pil kilang kilel ehu, me dahwer lapalah kin mih ie, I lukei kumwail en tamanda kosonned laud riauo, me Sises Krais ketin kawewehdahr nan Kadehde Kapw. Sapwellimen Kauno kaweid kan en kak saihr kitail. Atail mongiong kan oh madamadau kan en kak sohpeidahla powe pwehn poakoahng Koht oh sohpeiei pwehn poakoahng mehn mpetail kan.
Pwe met en kak kakehlaka atail pwoson Sises Krais oh Sapwellime Tomw, ong met I kadehdehki ni mwaren Sises Krais, ahmen.