Inou Sarawihkan oh Pwukoah kan
Mwomwohdiso en Sises Krais wet dehdehki ah wia mwomwohdiso ehu me kasalehda kesempwal en wiahda inou sarawihkan ong Koht.
“Ia mwomwen amwail Mwomwohdiso ah wekisang ahn mehteikan?“ Ahi pasapeng ong kalelapak kesempwal wet wekilahr ni ahi koahieklahr oh Mwomwohdisoh ah keirdahr. Ni ahi ipwidiengehr nan Utah nan pahr 1932 [kid duwepwiki silihsek riau], tohtohn tohn atail Mwomwohdiso mihmi ni towe meh 700,000 [isilopw], pali tohto mih nan Utah oh sdeid me karanih kan. Nan ansouo, atail tehnpas sarawi mehte 7. Rahnwet tohn Mwomwohdiso en Sises Krais en Souleng en imwin rahn akan tohtohsang 17 million [rar eisek isuh] nan wehi 170 [epwiki isihsek]. Ni ehu en Ehpreilo , atail tehnpas sarawi 189 [epwiki welihsek duwau] me kasarawilahr nan wehi tohto oh meh 146 [epwiki pahisek wenou] me mihmi nan dakehn pilipilahn oh wiewiawi. I ahnekidahr pepehm ehu ien kosoia kahrepen tehnpas sarawi pwukat oh poadoapoad oh pwukoahn inou sarawi kan nan atail kaudek. Met pahn patehngete padahk kan me tiengehr mwowe.
I.
Inou sarawi iei inou ehu en kapwaiada pwukoah kan. Ahn emen emen inou inenen kesempwal ong epwelpen ahn emen emen mour oh ong wiepen mwekmwekid en kousoan. Madamadau wet nan ansou wet mie me uhwong. Kisin pwihn ehu me kasaledahr arail uhwong koaosandi en pwihn kaukaun kan oh kehlailki me emen emen aramas anahne saledeksang soangen kainepwihkan me kin katikala en emen emen saledek. Ahpw kitail esehier sang irair en pahr ngeder kan me kitail kin meiroangkihla ekei pein atail saledek pwehn alehdi kamwahu kan en koukousoan nan koausoan kan me soandier. Soangen mehn inapwihdi pwukat ong ahn emen emen saledek kan poahsoanda pohn inou kan de inou sarawihkan, me kasansaladahr de kosoiepe wiawiher.
Iet ekei karasepen wiepen pwukoah kan en inou nan atail kousoan kan: (1) sounkopwung kan, (2) palien sounpei, (3) tohn doadoahken palien imwen wini, oh (4) tohn apwalih kisiniei. Koaros me iang patehng soangen palien doadoahk pwukat kin wiahda inou—pak tohto kin mie inou me wiawidahr—en wia arail pwukoah me koasoandier kan. Met pil duwehte ong neitail misineri full time kan. Arail likou kan de neim dahk kan wia mehn kasalehda me mehmen me doadoahngkio mihmi pahn inou ehu oh eri mie ah pwukoahn padahk oh papah oh anahne en utuhtda nan pelien pwukoahn papaho. Ehu kahrepe iei en kataman ong me doadoahngki kan arail pwukoahn inou kan. Sohte mehkot kopwuriamwei ni arail likou kan de kilel akan, ihte e wia mehn ketemenpen pwukoah kesempwal kan me irail me kin doadoahngki kan ahneki. Met pil mehlel ong kilel kan en rihng kan ong inoun pwopwoud oh kopwopwoud oh arail pwukoahn kehsehki irail me kilang kan de katamanohng me doadoahngkio duwen arail pwukoah kan ong arail inou.
II.
Dahme I indahier duwen inou kan ahr wia poahsoan en koasoandi en ahn emen emen mour kan pil dokehte mehlel inou kan en pelien lamalam. Poahsoan oh poadoapoad en pelien lamalam tohto oh anahn akan poahsoanda pohn inousarawih kan. Ni karasepe, inou en Eipraam inenen kesempwal ong pelien lamalam kehlail tohto. E kasalehda madamadau sarawi en sapwellimen Koht inou kan ong Sapwellime seri kan. Kadehde Mering pak tohto kin kosoia sapwellimen Koht inou sarawi ong Eipraam oh kadaudoke kan.
Nan keioun pali nan Pwuhk en Mormon, me intingdahr nan mwehi en Kadehde Mering, ni sansal kasaledahr pwukoahn inou kan nan poadoapoad oh kaudek en mehn Israel. Nihpai koasoia me ahn mehn Isrehl nting kan en mwehio wia “iei rekord en mehn Suhs akan, me audaudkihda sapwellimen Kauno inou sarawih kan, me e ketin wiahiongehr peneinei en Israel.“ Pwuhk kan en Nihpai pil pak tohto kosoia inou en Eipraamoh ong Israel ni ah wia “sapwellimen Kauno aramas en inou sarawih kei.“ Wiepen inihnouiong Koht de sounkaweid en pelien lamalam kan pil kileldier nan Pwuhk en Mormon nting kan me pid Nihpai, Sosep nan Isip, Nahnmwarki Pensamin, Alma, oh Kapdin Moronai.
III.
Ni ansou en Kopwurpwurdo en rongamwahu unsek en Sises Krais ah lelehr, Koht ketin malipehier emen soukohp, Sosep Smith. Kitail sohte ese ni unsek soahng kan me tohnleng Moronai kaskuhihkiher soukohp pwulopwul menet. Kitail ese me e indahngehr Sosep me “mie sapwellimen Koht doadoahk ong [ih] en wia“ oh me “Rongamwahu soutik unseko“ anahne en kopwurpwurdo, me iangahki “inou kan me wiawiongehr pahpa en mahso ko.“ Kitail pil ese me pwuhk sarawihkan me mwahnakapw Sosep wadekehr—mwohnte ah alehdier kaweid en tapihada ehu mwomwohdiso—iei padahk kan me pid inou sarawih kan me e wie kawehweh nan Pwuhk en Mormon. Pwuhk en Mormon iei poahsoan keiou nan Kapwurpwurdohn rongamwahu unseko, me iangahki sapwellimen Koht koasoandi ong Sapwellime seri kan, oh Pwuhk en Mormon pil audaudki mehn sawas akan ong inou sarawi kan.
Pwehki ah wehwehki Pwuhk Sarawi, Sosep mweinte esehier pwuhk en Ipru sapwellimen Sounkomouro kosoandi en “wiahda ehu inou sarawi kapw ong peneinei en Israel oh ong peneinei en Suda.“ Mehn Ipru kan pil kawehwedi me Sises “me wia weliepen inou kapwo.“ Me kesempwal, soaipen nan pwuhk sarawi ong sapwellimen Sises misin pohn sampah kahdanki “Kadehde Kapw,“ me duwehte “Inou Srawi Kapw.“
Inou sarawih me wia poahsoan en padahk en Kopwurpwurdohn rongamwahu wet. Met sansalehr me mepwukat me pahn wia tepin kahk me Kauno ketin kaweidki Soukohpo en wia pwe en kauwekihda Sapwellime Mwomwohdiso. Ni ansou me Pwuhk en Mormon wiawidahr, Kauno ketin kaweidehr koukoudahn Sapwellime Mwomwohdiso kopwurpwurdohu, me pahn kahdanki Mwomwohdiso en Sises Krais en Souleng en Imwin rahn akan. Kaudiahl me alahldier nan Epreil 1830 [kid welipwiki silihsek] kaweidki aramas akan “me re pahn alahlda sang ni pepdais nan sapwellime mwomwohdiso“ mwurin arail “kadehde“ (me wehwehki en kadehdehki ni mehlel) “me irail mehlel en koluhkihla diparail kan, oh inangih alehiong irail mwaren Sises Krais, ni arail ngoangki papah ih lel ni imwio.“
Kaudiahlohte kaweidki me Mwomwohdiso “pahn kin kalapw tuhpene pwehn alehda pilawa oh wain [pihl] pwehn wia ketemenpen Kaun Sises.“ Kesempwalpen tiahk sarawi wet sansal nan lokaiahkan me kileledier ong eldero de prihsd me pahn wia kasarawio. E kin ketin kapaiada kasalepen pilawahu ong “war koaros me pahn patohwan tungoale … , pwe en wia … kadehdehiong komwi, Maing Koht Sahm Soutuk, me pein irail men patohwan ale mwaren sapwelimomwi Iehroso, oh patohwan tamatamanki ih ahnsou koaros oh kapwaiada sapwellime kosonned akan me E ketkihong irailehr.“
Pwukoah keioun kesempwal en inou kan pwurehngehr kasansalada nan kasalada me Kauno ketin wiahier ong tepin wiawihdahn Sapwellime kaudiahl kan. Kauno ketin mahsaniher me E ketin malipehier Sosep Smith pwehki tohn sampah “salongasangehr sapwellime tiahk sarawihkan, oh kauwelahr sapwellime inou sarawi soutiko.“ Kaudiahl wet pil kawehwehda me Sapwellime kosonned akan wiawihdahr “pwe sapwellimei inou soutiko en kak wiawihda.“
Rahnwet kitail wehwehkilahr mwahu pwukoahn inou sarawi kan nan Mwomwohdiso kopwurpwurdohu oh kaudek en towe kan. Preseden Gordon B. HInckley wiahier oaralap en wiepen atail pepdaisla oh alialehda kamadipw sarawi nan ehu ehu wihk: “Towe koaros en mwomwohdiso wet me pidelongehr nan pihl en pepdais wialahr kisehn pwihn en inou sarawi ehu. Ansou koaros me kitail kin alehda kamadipw sarawi en sapwellimen Kauno kamadipw en komwurumwuro, kitail kin kakapwa inouo.“
Sounpadahk tohto nan kapokon lap wet katkataman kin kitail me Preseden Russell M. Nelson kin kalapw koasoia me plahn en komouro iei “ahl en Inou sarawi“ me pahn “kapwureikitailahng rehn [Koht]“ oh “iei mwomwen atail pahn ehuong Koht.“ E padahngki kesempwal en inousarawi kan en tiahk sarawi kan nan tehnpas sarawi oh kangoangehkin kitail en kilang imwilao sang tapio oh en “medewe wein Koht.“
IV.
Met I pahn kosoia inou kan en tehnpas sarawi. Pwehn kapwaiada ah pwukoahn kapwurehdo sapwellimen Sises Krais rongamwahu unseko, Soukohp Sosep Smith doadoahngki pali laud en imwin ah mour kawkaweid koukoudahn tehnpas sarawi ehu nan Nauvoo, Illinois. Sang ih Kauno ketin kasaledahr mahsen sarawi kan, padahk, oh inou kan ong irail kan me pahn welian ih pwe irail en doadoahngki nan tehnpas sarawihkan. Wasahu aramas akan me alehdier arail endaumen-iei pahn kaskuhlkiher sapwellimen Koht pilahn en komour oh luhk ohng en wiahda inou sarawihkan. Irail koa me mehlel ong arail inou sarawihkan alehdier inou en mour soutik, me “mehkoaros arail“ oh irail “pahn kousoanla rehn Koht oh sapwellime Krais kohkohlahte.“
Tiahk sarawi kan en endaumen nan Tehnpas Sarawi en Nauvoo wiawiher mwohnte paionihr en mahsko ahr pwopwokilahr oh tapihadahr arail seiloak ong nahna kan en Pali Epeng. Mie kadehde tohto rehtail sang paionihr koa me manaman me irail alehdier sang arail katengei irail ong Krais sang ni arail endaumen kan nan Tehnpas Sarawi en Nauvoo kihong irailehr kehl en kaimwsekala arail seiloako oh wiahda arail mour nan Pali Epeng.
Aramas akan me alehdier endaumen nan ehu tehnpas sarawi ahneki pwukoahn likawih karmend en tehnpas sarawi, likou ehu me sohte sansal pwehki e kin mih pahn likou en liki. E kin katamanohng memper kan me alehdier endaumen ong arail inou sarawihkan me irail wiadahr oh kapai kan inoupe wiawi ong irailehr nan tehnpas sarawi. Pwehn alehdi kahrepe sarawi pwukat, kitail alehdier kaweid en likawih karmend en tehnpas sarawi erein, ihte ma mie kahrepe mwahu kan. Pwehki inou sarawihkan sohte kin ahneki ehu rahn en komoal, emen en kihsang ah karmend kan kak kasalehda me e soikala ah pwukoah kan oh kapai kan me doke. Me weksang, aramas akan me loalapwoatehng likawih arail karmend kan oh momourki arail inou kan en tehnpas sarawi kasalehda arail wia tohnpadahk en Kaun Sises Krais kei.
Mwomwohdiso en Sises Krais en Souleng en Imwin Rahn-akan wie kaukauwada tehnpas sarawi kan nan sampah pwon. Pwukoahn tehnpas sarawi iei en kapaiada sapwellimen Koht serihn inou kan ni arail pahn kaudek nan tehnpas sarawi oh iangahki pwukoah sarawi kan oh manaman kan oh kapai kan en ehuong Krais irail kin alehdi sang ni inou sarawi.
Mwomwohdiso en Sises Krais wet dehdehki ah wia mwomwohdiso ieu me kin kasalehda kesempwal en wiahda inou sarawih kan ong Koht. Inou sarawi kan wia kisehn ehu ehu tiahk sarawi en komourla oh kesepwilda me Mwomwohdiso kopwurpwurdo wet kin sawaski. Tiahk sarawi oh inou en pepdais me patehng kan wia anahn kesempwal kei ong pidelong nan wein selesdiel. Tiahk sarawihkan en tehnpas sarawi oh inou sarawihkan me patehngete wia anahn kesempwal ong kesepwilda nan wehin selesdiel, me iei mour soutik, “me keieun laud nan sapwellimen Koht kisakis kan koaros.“ Met iei ih me Mwomwohdiso en Sises Krais en Souleng en Imwin-rahn akan kin kadoahke.
I kadehde Sises Krais, me wia tapwin Mwomwohdisoh, oh me kin ketkiong kapai kan pohn irail koaros me kolokol arail inou sarawih kan. Ni mwaren Sises Krais, ahmen.