Marautaka na iSolisoli ni iDola ni Matabete

Mai vei Peresitedi Russell M. Nelson

Peresitedi ni Lotu i Jisu Karisito ni Yalododonu Edaidai

Na idola ni matabete e vakatulewataka na kena vakayagataki na matabete ni Kalou me kauta mai na nona inaki na Turaga me vakalougatataki oira kece era ciqoma na kosipeli vakalesui mai.

Kemuni na taciqu kei na ganequ, nikua edua na siga guiguilecavi dredre vei Peresitedi Dallin H. Oaks kei au. Ena 40 yabaki sa oti, ena ika 7 Epereli, 1984, keirau kacivi kina Kuoramu ni Apositolo Le Tinikarua. Keirau marautaka na veisoqoni yadua kei na veisoqoni kece ni koniferedi raraba mai na gauna oya, vaka kina o koya qo. Eda sa vakalougatataki tale ena veisovaraki tabu ni Yalotabu. Au nuitaka nio ni na vulica vakawasoma na itukutuku ni koniferedi oqo ena vei vula muri mai.

Na gauna au sucu kina, e ono ga na valetabu e veiqaravi tiko ena Lotu—yadua e St. George, Logan, Manti, kei Salt Lake City, Utah; vaka kina mai Cardson, Alberta, Canada; kei Laie, Hawaii. E rua na valetabu e veiqaravi vakalekaleka ga mai Kirtland, Ohio, kei Nauvoo, Illinois. Ni toso yani na Lotu kina Ra, oira na Yalododonu era vakasaurarataki mera biuta tu mai na rua na valetabu.

Na valetabu e Nauvoo era vakama na dauvakacaca. E qai tara vou tale ka vakatabua o President Gordon B. Hinckley. Na Valetabu e Kirtland era vakacacani mai vei ira na meca ni Lotu. E muri e ratou qai mai taura na Valetabu e Kirtland na Soqosoqo i Karisito, ka ratou taukena tu me vica na yabaki.

Ena vula sa oti keitou kacivaka ni Na Lotu i Jisu Karisito ni Yalododonu Edaidai esa volia tale na Valetabu e Kirtland, oka kina e vica na yavu makawa kilai levu mai Nauvoo. Keitou vakavinavinakataka vakalevu na yalovinaka kei na duavata ni veitalanoa kei ira na iliuliu ni Soqosoqo i Karisito e rawa kina na veidinadinati oqo.

Na Valetabu e Kirtland e vakaibalebale vakalevu ena kena Vakalesui mai na kosiplei i Jisu Karisito. E vica na veika e yaco sa parofisaitaki oti ena vica na udolu na yabaki ka bibi ena Lotu vakalesui mai na Turaga me vakayacora kina na kena inaki ena ivakata-otioti ni gauna.

Na ka e bibi kina na veika oqo ni yaco ena Sigatabu ni Siganimate, ena ika 3 Epereli, 1836. Na siga oya, e vuqa na veisiko lagilagi erau sotava o Josefa Simici kei Oliver Cowdery. Matai, e rairai mai na Turaga o Jisu Karisito. E vola na Parofita ni iVakabula “e vaka na yameyame ni bukawaqa na yaloka ni matana, sa vulavula sara na drauniuluna me vaka na uca cevata; ia na iserau ni kena irairai sa uasivi cake mai na rarama ni matanisiga; a rorogo ni domona e vaka na vadugu ni wai.”

Ena nona veisiko qo, e vakadeitaka na Turaga na Kena ituvaki. A tukuna, “Koi Au na ivakatekivu kei na ivakataotioti; o Au sa bula, sai Au tale ga sa vakamatei; raica koi Au na nomudou dautataro vei Tamada.”

A tukuna o Jisu Karisito ni sa ciqoma o Koya na valetabu me Nona vale ka yalataka na veika totoka oqo: “Au na vakatakilai au vei ira na noqu tamata ena loloma cecere kina vale oqo.”

Na iyalayala totoka oqo era okati kina na valetabu vakatabui kece nikua. Au sureti iko mo vakasamataka na ibalebale ni nona iyalyala na Turaga kina nomu bula.

Ni oti nona rairai mai na iVakabula, e rairai mai o Mosese. E vakadeitaka o Mosese vei Josefa Simici na idola ni vakasoqoni vata mai i Isireli kei na vakalesui ni yavusa lewe tini.

Ni oti na rairai oqo, “Sa rairai mai ko Iliesa, ka mai solia na lewa kei na kaukauwa ni itabagauna vakosipeli i Eparama, vei Josefa.

A qai rairai mai o Ilaijia na parofita. Nona rairai mai e vakayacora kina na veika e yalataka o Malakai ni bera na iKarua ni Lesumai, na Turaga ena talai Ilaijia “me vagolea na lomadra na qase vei ira na gone, kei na lomadra na gone vei ira na nodra qase.” E vakadeitaka o Ilaijia na idola ni kaukauwa ni veivauci vei Josefa Simici.

Na ka e duidui kina ni vakalesui mai na idola oqo ivuravura vei ratou na italai mai lomalagi ena veidusimaki ni Turaga e sega ni vakamacala taki rawa. Na idola ni matabete e oka kina na lewa kei na kaukauwa ni mataveilutaki. Na idola ni matabete e vakatulewataka na kena vakayagataki na matabete ni Kalou me kauta mai na nona inaki na Turaga me vakalougatataki oira kece era ciqoma na kosipeli vakalesui mai i Jisu Karisito.

E bibi meda kila ni bera na kena tauyavutaki na Lotu, era mai era mai vakadeitaka na italai mai lomalagi na Matabete vaka Eroni kei na Melekisateki vei Josefa Simici ka solia vei koya na idola ni matabete ruarua. Na idola oqo e solia na dodonu vei Josefa Simici me tauyavutaka kina na Lotu ena 1830.

Ena 1836 ena Valetabu e Kirtland, na vakadeitaki ni tolu na ikuri ni idola oqo—vakatokai na, idola ni vakasokomuni Isireli, na idola ni kosipeli i Eparama, kei na idola ni kaukauwa ni veivauci—e bibi. Na idola oqo e solia na dodonu vei Josefa Simici—kei ira kece na Peresitedi ni Lotu era sosomitaki koya—mera vakasokomuni Isireli ena yasa ruarua ni ilati, me vakalougatataki ira na luvena ni veiyalayalati ena veivakalougataki i Eparama, me vakadeitaka ka vauca na cakacakatabu vakalotu ni matabete kei na veiyalayalati, ka me vauci na matavuvale me tawamudu. Na kaukauwa ni idola ni matabete oqo e tawavakaiyalayala ka vakasakiti.

Vakasamataka ena duidui vakacava na nomu bula ke sega ni vakalesui mai na idola ni matabete ivuravura. Ke sega na idola ni matabete, ena sega ni rawa nio vakalougatataki ena kaukau ni Kalou. Ke sega na idola ni matabete, na Lotu e na qarava ga eso na ivakavuvuli kei na veivuke ni bula raraba ka sega ni levu tale. Ke sega na idola ni matabete, ena sega ni rawa nida ciqoma na cakacaka vakalotu kei na veiyalaylati e vauci keda vata me tawamudu ka vakatarai keda meda bula kei na Kalou.

Na idola ni matabete na vuna e duidui kina Na Lotu i Jisu Karisito ni Yalododonu Edaidai kei na vei soqosoqo tale eso i vuravura. Vuqa na matalotu e rawa ni cakava na nomu bula me vinaka ena bula oqo. Ia e sega ni dua tale na matalotu e rawa ni cakava me vakarautaka na nomu bula ni oti na mate.

Na idola ni matabete e solia vei keda na dodonu meda solia kece na veivakalougatataki sa yalataki oti vei Eparama vei ira kece na turaga kei na marama era maroroya-na veiyalayalati. Na cakacaka ni valetabu e vakatara na veivakalougataki cecere qo vei ira kece na luve ni Kalou, se na vanua cava se gauna cava era bula kina, se bula tiko. Meda marautaka ni sa vakalesui tale mai na idola ni matabete i vuravura!

Au sureti iko mo vakasamataka vakavinaka na tolu na itukutuku oqo:

Na vakasokumuni i Isireli e ivakadinadina ni lomani keda kece na Luvena na Kalou ena veivanua kece.
Na kosipeli i Eparama e ikuri ni vakadinadina ni loloma ni Kalou vei keda kece na Luvena ena veivanua kece. E sureta na tamata kecega me lako mai Vua—“na tamata loaloa kei na tamata vulavula, bobula kei na galala, tagane kei na yalewa; … kecega e tautauvata ena mata ni Kalou.”
Na kaukauwa ni veivauci e cecere ka ivakadinadina ni nona loloma na Kalou vei ira kece na Luvena e veivanua ka vinakati ira vakayadua kece mera digitaka mera lesu tale Vua.

Na idola ni matabete e vakalesui mai vua na Parofita o Josefa Simici e vakatara vei ira kece na tagane kei na yalewa era maroroa na veiyalayalati mera marautaka na nodra dui bula yadua vakayalo. Oqo tale, e vuqa na veika vinaka eda rawa ni vulica mai ena itukutuku tabu ni Valetabu e Kirtland.

Nona masu o Josefa Simici ena vakatabui ni Valetabu e Kirtland e vakatavulica ni rawa ni vakaukauwataki iko kei au vakayalo na valetabu me daru sotava kina na bolebole ni bula ena vakataoitoti ni gauna oqo. Au sureti iko mo vulica na masu, e volai tu ena Vunau kei na Veiyalayalati 109. Na masu ni vakatabui, ka ciqomi ena vakatakila, e vakavulica ni valetabu e “vale ni masumasu, vale ni lolo, vale ni vakabauta, vale ni vuli, vale ni lagilagi, vale vakaivakarau, na vale ni Kalou.”

Na kena ivakarau e uasivita na ivakamacala ni valetabu. E yalayala baleta na cava e rawa ni yaco vei ira era veiqaravi ka sokalou ena nona vale na Turaga. E rawa nira sotava na isau ni nodra masu, ivakatakila yadudua, vakabauta levu, vakaukauwataki, vakalomavinakataki, vakalevutaki ni kilaka, kei vakalevutaki ni kaukauwa.

Na gauna ena valetabu ena vukei iko mo vakasama vaka silesitieli ka ciqoma na rai se ocei mada o oiko, ocei o rawa ni ucua, kei na mataqali tamata vakacava o rawa ni vakataka me tawamudu. Na sokalou vakawasoma ena valetabu ena vakalevutaka na sala o raici iko kina kei na nomu itutu ena nona ituvatuva talei na Kalou. Au yalataka vei iko oya.

E yalataki tale ga vei keda ena valetabu nida rawa ni “ciqoma na taucoko ni Yalo Tabu.” Vakasamataka na cava na ibalebale ni yalayala ni na tadola na lomalagi vei ira vakayadua era vakasaqara na dina tawamudu.

Eda dusimaki tale ga ni oira kece era sokalou ena valetabu ena tiko vei ira na kaukauwa ni Kalou kei ira na agilsoi ena “vakatawai ira.” E vakalevutaka vakacava na nomu yalodei nio kila, nio marama se turaga edaumeni o vakayaragi ena kaukauwa ni Kalou, e sega ni rawa nio bula duadua? Na yalo cava e solia vei iko mo kila ni na agilosi ena rawa ni vukei iko dina?

iOtioti, sa yalataki vei keda ni na“sega ni dua na cakacaka butobuto” ena rawai ira na sokalou ena vale ni Turaga.

Noda kila na icavacava vakayalo e rawati ena valetabu e bibi vei keda nikua.

Taciqu kei na ganequ lomani, oqo na noqu iyalayala. Ena sega ni dua naka ena vukei iko vakalevu mo tautauri matua kina itoko kaukamea mai na sokalou vakawasoma ena valetabu ena gauna kece o rawata kina. Sega ni dua na ka ena taqomaki iko vakalevu nio lako curuma na butobuto. Ena sega ni dua na ka ena vakaukauwataka na nomu ivakadinadina baleta na Turaga o Jisu Karisito kei na Nona Veisorovaki se vukei iko mo kila na nona ituvatuva maqosa na Kalou vakalevu. Ena sega ni dua na ka ena vakamalumutaka vakalevu na yalomu ena gauna dredre. Ena sega ni dua na ka ena dolava na lomalagi vakalevu. E sega!

Na valetabu sa i koya na matamata ni veivakalougataki cecere ni Kalou e maroroi tu vei keda vakayadua, na valetabu e vanua duadua ga e vuravura qo eda rawa ni ciqoma kina na veivakalougatataki kece e yalataki vei Eparama. Oqo na vuna eda cakava kina ena noda kaukauwa taucoko, ena veidusimaki ni Turaga, me vakarawarawataka na nodra ciqoma na veivakalougataki ni valetabu na lewenilotu ena Lotu. Ia, keitou marau me keitou kacivaka na ituvatuva ni kena tara na valetabu vou ena 15 na vanua oqo:

Uturoa, French Polynesia
Chihuahua, Mexico
Florianópolis, Brazil
Rosario, Argentina
Edinburgh, Scotland
Edinburgh, Scotland
Victoria, British Columbia
Yuma, Arizona
Yuma, Arizona
Des Moines, Iowa
Des Moines, Iowa
Honolulu, Hawaii
West Jordan, Utah
West Jordan, Utah
Maracaibo, Venezuela

Taciqu kei na ganequ lomani, au vakadinadinataka ni oqo Na Lotu i Jisu Karisito ni Yalododonu Edaidai. E tu me kena iliuliu o Koya. Eda sa Nona tisaipeli.

Meda marautaka na vakalesui mai ni idola ni matabete ka vakatara vei iko kei au me daru marautaka na ka kece na veivakalougatataki vakayalo eda gadreva ka bula kilikili meda ciqoma. Au vakadinadinataka ena yaca tabu i Jisu Karisito, emeni.