Ola e Tusa ai ma Ou Avanoa
Aoao i auala o le a faataga ai e sauniga o le perisitua ma folafolaga o feagaiga le mana o le Atua ia tafe atu i lou olaga.
Talu ai nei na maua ai e lo’u toalua o Greg, se āūga [o se ma’i] o le a manaomia ai se taotoga tele ma ni masina o togafitiga o le kimo. E pei o le toatele o outou o e na feagai ma se tulaga faapea, sa vave lava ona matou amata tatalo mo le fesoasoani a le lagi ma le mana o le Atua. O le Aso Sa ina ua mavae le taotoga o Greg, sa momoli atu ai le faamanatuga i le matou potu i le falema’i.
I lenei tulaga, sa na’o a’u na taliaina le faamanatuga. E tasi le fasi falaoa. Tasi le ipu vai. I le lotu, e masani ona taula’i atu lo’u mafaufau i le faiga ia oo atu i tagata le faamanatuga—o le tapenaga, le faamanuiaina, ma le tufaina. Ae i lena aoauli, sa ou mafaufau loloto ai i le meaalofa o le mana o le Atua lea e maua e ala mai i le sauniga paia lava ia ma le folafolaga o le feagaiga na ou osia a o ou ’aia lena fasi falaoa ma inu lena ipu vai. Sa o se taimi lenei sa ou manaomia ai le mana mai le lagi. I le ogatotonu o le tele o le lototiga, vaivai, ma le lē mautonu, sa ou manatunatu ai i lenei meaalofa lea o le a faataga ai a’u ona utuvai mai i le mana mai ia te Ia lea sa ou matuai manaomiaina lava. O le tagofia o le faamanatuga o le a faateleina ai le ma mafutaga ma le Agaga o le Alii, e mafai ai ona ou utuvai mai i le meaalofa o le mana o le Atua, e aofia ai le auaunaga a agelu ma le malosi gafatia o le Faaola e faatoilalo ai [lenei tofotofoga].
Ou te manatu ou te lei iloaina muamua ma le manino tele faapenei, e le gata ina taua lē e faatautaia le sauniga—ae o mea ua folafola mai e le sauniga ma la tatou folafolaga o le feagaiga e matala mai ai, e alagatatau foi i ai le gauai atu o o tatou taulaiga. O sauniga o le perisitua ma folafolaga o feagaiga, e faataga ai le Atua e faapaia i tatou ma galueaina mea ofoofogia i o tatou olaga. Ae faapefea ona tupu lenei mea?
Muamua, ina ia mafai ona faaalia mai e se sauniga le mana o le Atua i o tatou olaga, e ao ona faia i le pule mai le Alo o le Atua. E taua lava le faiga o le faatinoga ia oo atu ai i tagata. Na tuuina atu e le Tama ia Iesu Keriso ia ki ma le pule e vaavaia ai le faatinoga o Ona sauniga o le perisitua. I lalo o Lana taitaiga, i totonu o le faatulagaga o Lana perisitua, ua faauuina ai atalii o le Atua e tutu e suitulaga i le Alo o le Atua.
Lona lua, e lē na ona tatou faia o ni folafolaga o feagaiga—e ao ona tatou tausia. I le tele o sauniga o le talalelei, tatou te osia ai feagaiga paia ma le Atua; ua Ia folafola mai e faamanuia i tatou pe a tatou tausia na feagaiga. O tatou iloa, o le tuufaatasiga o sauniga o le perisitua faatasi ma le tausia o folafolaga o feagaiga lea e mafai ai ona tatou utuvai mai le mana o le Atua?
I lena aoauli, sa ou mafaufau ai, pe o a’u, o se afafine o le feagaiga a le Atua, o o’u malamalama atoa i le ala e maua ai le meaalofa o le mana o le Atua e ala i sauniga o le perisitua, ma pe o o’u iloa moni le ala e galue ai le mana o le Atua i totonu ia te a’u.
I le 2019 na tuuina mai ai se valaaulia faaperofeta i tamaitai o le Ekalesia, e aoao ai i matou i le ala e maua ai le mana o le Faaola i o matou olaga. Na valaaulia i tatou e Peresitene Russell M. Nelson e suesue le Mataupu Faavae ma Feagaiga, o se faaaliga na tuuina mai ia Ema Samita i Harmony, Pennsylvania. O le taliaina o lena valaaulia ua suia ai lo’u olaga.
I le masina ua te’a, sa ou maua ai se avanoa sa le’i mafaufauina e asiasi ai i Harmony. O iina, i lalo o laau o le meipo, sa toefuatai mai ai le perisitua ia Iosefa Samita ma Oliva Kaotui. E latalata atu i na laau ia le faitotoa pito i luma o le maota o Iosefa ma Ema. I le isi itu mai le magalafu i lena maota e i ai se faamalama. Sa ou tu i lena faamalama ma mafaufau po o a ni manatu o Ema na i ai a’o vaavaai atu o ia i fafo i laau.
Ia Iulai 1830, sa 26 tausaga o Ema; sa talavou lava o ia. Sa tolu ma le afa tausaga o lana faaipoipoga. Sa maliu lana pepe tama—lana pepe muamua. O si ona tuugamau laitiiti e le mamao lava mai lona fale. O le tūtū ai i lena faamalama, sa le faigata ia te a’u ona vaaifaalemafaufau i mea atonu na tumu ai ona mafaufauga. E mautinoa lava sa popole o ia e uiga i a latou mea tautupe, e uiga i sauaga faateteleina na lamatia ai lo latou saogalemu, e uiga i lo latou lumanai. E ui i lea, sa siomia atoa o ia i le galuega a le Atua. Pe sa mafaufau foi o ia i lona tulaga i le fuafuaga, lona faamoemoega i Lona malo, ma ona gafatia i fofoga o le Atua?
Ou te manatu atonu o lea lava.
O le isi lava ituala, o le meaalofa ma ki o le pule o le perisitua a le Atua ua toefuataiina mai i le lalolagi. Sa o se taimi lenei sa manaomia moni ai e Ema le mana mai le lagi. I le ogatotonu o le tele o le lototiga, vaivai, ma le lē mautonu, ou te vaaifaalemafaufau sa mafaufau Ema e uiga i lenei meaalofa o le perisitua a le Atua, lea e mafai ona matala ai le mana mai ia te Ia lea sa matuai ona manaomiaina lava.
Ae sa le’i na ona tūtū Ema i lena faamalama ma mafaufau.
A o aoaoina le Perofeta o Iosefa i ki, tofi, sauniga, ma le ala e fesoasoani ai i le galuega o le perisitua, sa tuuina atu e le Alii lava Ia, e ala atu i Lana perofeta, se faaaliga ia Ema. Sa le o Ema-le peresitene o le Aualofa i Navu—o le faaaliga lenei na tuuina atu ia Ema e 26 tausaga le matua i Harmony. Na ala mai i le faaaliga, o le a silafia ai e Ema e uiga i le faapaiaga i totonu ma le sootaga faalefeagaiga o le a faateleina ai le gafatia o na sauniga o le perisitua ina ia taugalue i lona olaga.
Muamua, sa faamanatu atu e le Alii ia Ema e uiga i lona tulaga i Lana fuafuaga, e aofia ai o ai o ia, ma o ai e ana o ia—o se afafine i Lona malo. Sa valaaulia o ia e “savali i ala o le amiomama,” o se ala na aofia ai sauniga o le a matala ai le mana o le Atua pe a tumau faamaoni Ema i ana feagaiga.
Lona lua, i lona vaitau o le faavauvau loloto, sa tuuina mai e le Alii ia te ia le faamoemoe. Sa le gata ina i ai se nofoa pito i luma o Ema i le Toefuataiga; ae o ia sa o se tagata auai taua i le galuega ua tupu. O le a vaetofia o ia “e faamalamalama atu tusitusiga paia, ma apoapoai atu i le ekalesia” O lona taimi “o le a tuuina atu i le tusitusi, ma le aoaoina tele.” Sa tuuina atu ia Ema se matafaioi paia e fesoasoani e tapena le Au Paia e tapuai; o a latou pese i le Alii o le a taliaina o ni tatalo ma o le “a talia ma se faamanuiaga i luga o o latou ulu.”
Ma le mea mulimuli, sa faataoto mai e le Alii se faagasologa o le faapaiaga i totonu o le a faapea ona saunia ai Ema mo le faaeaga. Sa faamalamalama atu e le Alii ia te ia, “Ma vagana ai ua e faia lenei mea, o le mea ua Ou i ai, e lē mafai ona e sau i ai.”
Afai tatou te faitau ma le toto’a i le vaega 25 tatou te maua ai se faasologa taua o loo tupu ai. O le a agai atu Ema mai le avea o se afafine i le malo e avea ma “tamaitai filifilia” i le avea ma masiofo. O sauniga o le Perisitua Arona ma le Mekisateko, faatasi ai ma le tausiga o ana folafolaga o feagaiga, o le a faateleina ai lana mafutaga ma le Agaga ma agelu, e faamalosia ai o ia e faatautaia lona olaga faatasi ma le taitaiga faalelagi. E ala mai i Lona mana paia, o le a faamalōlō ai e le Atua lona loto, faatelēina lona gafatia, ma liua o ia i le ituaiga tagata ua Ia silafia e mafai ona avea ai o ia. Ma e ala i sauniga o le Perisitua Mekisateko, “[o le a] faaalia le mana o le faale-atua” i lona olaga ma o le a tatala e le Alii le veli ina ia mafai ona ia maua le malamalama mai ia te Ia. O foligalenei o le a i ai mo le mana o le Atua e galue i totonu o i tatou.
Na aoao mai Peresitene Russell M. Nelson:
O mea uma na tutupu i [Harmony] o loo i ai ni taunuuga loloto i o tatou olaga. O le toefuataiga o le perisitua, faatasi ai ma le fautuaga a le Alii ia Ema, e mafai ona taiala ma faamanuia ai outou taitoatasi. …
“… O le mauaina o le mana o le Atua i lou olaga e manaomia ai mea lava e tasi ia na faatonuina ai e le Alii ia Ema ma [tatou] taitoatasi e fai.”
Sa i ai mea taua na tutupu i itu uma o lena faamalama i Harmony, e aofia ai le faaaliga na tuuina atu i le tamaitai filifilia o lē na valaauina e le Alii—o se faaaliga o le a faamalosi, faalototele, ma faatonu ai Ema Samita, le afafine o le Atua.
Ina ua tuuina atu se igoa ma se faamanuiaga ia Isapela le tamateine a le ma tama, sa faamanuia o ia e lona tamā i se malamalamaaga e uiga i le perisitua; ia faaauau ona ia tuputupu ae i le, ma aoao e uiga i le faamanuiaga o le a tuuina atu ai i lona olaga; ma o lona faatuatua i le perisitua o le a tuputupu ae a o faaauau ona ia ola ae i le malamalama.
E le masani ona faamanuiaina se teineitiiti laitiiti ia malamalama i le perisitua ma ia aoao i le ala e fesootai ai sauniga ma folafolaga o feagaiga o le a fesoasoani ia te ia e maua ai le mana o le Atua. Ae sa ou manatuaina Ema ma ou mafaufau ifo ai ia te au lava, Aisea e tuu ai? O lenei afafine itiiti ua i ai le gafatia e avea ai ma se tamaitai filifilia i Lona malo ma iu ai ina avea o se masiofo. E ala mai i sauniga o Lana perisitua ma le tausia o ana folafolaga o feagaiga, o le a galue ai le mana o le Atua i ā, ma e ala mai ia te ia, e fesoasoani na te faatoilalo ai soo se mea e aumaia e le olaga ma avea ai ma tamaitai ua silafia e le Atua e mafai ona avea ai o ia. O se mea lenei ou te manao ia malamalama i ai teineiti taitoatasi i le mālō.
Aoao auala o le a faataga ai e sauniga o le perisitua ma folafolaga o feagaiga le mana o le Atua ia tafe atu i lou olaga ma le aogā sili atu, e galue ai i totonu ma e ala atu ia te oe, e faamalosia ai ma faaauupegaina ai oe ia ausia lou faamoemoega ma le gafatia atoa.
Ia suesue ma le toto’a ma mafaufau loloto i sauniga o le Perisitua Arona ma le Mekisateko, i folafolaga o feagaiga tatou te osia taitasi, ma le mana o le Atua tatou te maua e ala mai i na sauniga.
Ia manatua, e le na’o lē e faatautaia le sauniga e taua; o mea e tatalaina mai e le sauniga ma lau folafolaga o feagaiga, e alagatatau ai foi le gauai atu o lou taulaiga.
O le aai ma le feinu i le areto ma le vai o se faamanatu faalevaiaso o le galue ai o Lona mana ia te oe e fesoasoani e te manumalo ai. O le laeina o le ofu o le perisitua paia o se faamanatu i aso taitasi o le galue ai o le meaalofa o Lona mana ia te oe e fesoasoani e te avea ai ma ni ō.
Tatou te tofu maua uma lava ma le meaalofa o le mana o le Atua.
I taimi uma tatou te aai ma feinu ai i le faamanatuga.
I taimi uma tatou te sopoia ai faitotoa o se malumalu.
O le faatumutumuga lenei o la’u Sapati. O le mafuaaga lea ou te faapelepele ai i lo’u pepa faataga o le malumalu.
“O lea, o ona sauniga, ua faaalia ai le mana o le faale-atua.”
Ou te molimau atu ai i lenei meaalofa i le suafa o Iesu Keriso, amene.