Afifio Mai Ia i Le Ekalesia o le Olioli
Ona o le soifua togiola ma le misiona a lo tatou Faaola, o Iesu Keriso, ua mafai ai—ma e ao ai lava—ona avea i tatou ma tagata sili ona fiafia i le lalolagi!
Na papatisoina a’u i Le Ekalesia a Iesu Keriso o le Au Paia o Aso e Gata Ai i le aso na sosoo ma le Aso Kerisimasi o le 1987, ua toeitiiti 37 tausaga ua mavae. Sa o se aso moni matagofie lena i lo’u olaga, ma i la’u malaga e faavavau, ma ou te faafetai loloto mo uo sa saunia le ala ma aumaia a’u i vai o lena fanaufouina.
Pe o lou papatisoga o ananafi po o tausaga e tele ua mavae, pe tou te faapotopoto i se faletele o le Ekalesia e toatele ni uarota e i ai, po o lalo o se fale atolau, pe o e taliaina le faamanatuga e faamanatu ai le Faaola i Tai po o Suahili, ou te fia fai atu ia te outou, afifio mai ia i le ekalesia o le olioli! Afifio mai ia i le ekalesia o le olioli!
O Le Ekalesia o le Olioli
Ona o le fuafuaga alofa a lo tatou Tama Faalelagi mo Lana fanau taitoatasi, ma ona o le soifua togiola ma le misiona a lo tatou Faaola, o Iesu Keriso, ua mafai ai ona tatou—ma e ao ai lava ona avea i tatou ma tagata e sili ona fiafia i le lalolagi! Tusa lava foi pe fesasaa’i i o tatou luga afā o le olaga i se lalolagi e tele ina pagatia, e mafai lava ona tatou atia’e se lagona faatupula’ia ma mausali o le olioli ma se toafilemu i totonu ona o lo tatou faamoemoe ia Keriso ma lo tatou malamalama i lo tatou lava tulaga i le fuafuaga matagofie o le fiafia.
Na saunoa le Aposetolo sinia a le Alii, o Peresitene Russell M. Nelson, e uiga i le olioli e maua mai se olaga e faatotonugalemu ia Iesu Keriso, i le toetoe o lauga uma lava na ia tuuina mai talu ona avea ma Peresitene o le Ekalesia. Sa ia aoteleina faapuupuu e faapea: “E oo mai le olioli mai ia te Ia ma ona o Ia. … Mo le Au Paia o Aso e Gata Ai, o Iesu Keriso o le olioli lea!”
O i tatou o tagata o le Ekalesia a Iesu Keriso. O i tatou o tagata o le ekalesia o le olioli! Ma e leai se isi mea e tatau ona sili ona manino ai lo tatou olioli o se nuu nai lo le taimi tatou te faapotopoto faatasi ai i Sapati taitasi i a tatou sauniga faamanatuga e tapuai i le faapogai o le olioli uma! O iina tatou te faapotopoto ai ma aiga o la tatou uarota ma paranesi e faamanatu le faamanatuga o le Talisuaga a le Alii, lo tatou laveaiina mai le agasala ma le oti, ma le alofa tunoa mamana o le Faaola! O iina tatou te o mai ai ia maua le olioli, malutaga, faamagaloga, faafetai, ma le avea ma ni ō lea e maua e ala ia Iesu Keriso!
Pe o le agaga lea o le olioli faatasi ia Keriso o le mea lea tou te maua? Pe o le mea lea tou te aumaia? Atonu e te manatu e leai sau feau tele i lea mea, pe atonu ua na ona e masani lava i mea sa masani ona fai. Ae e mafai ona tatou tofu sao, e le afaina pe o le a lo tatou matutua po o o tatou valaauga, i le faia o a tatou sauniga faamanatuga ia faatumulia i le olioli, taulai ia Keriso, talileleia o isi i le mea e mafai ai, ae ao lava ona faia ma se agaga o le migao e tumu i le olioli.
Migao e Tumu i le Olioli
Migao e tumu i leOlioli ? “Se mea moni lena mea?” atonu e te fesili ai. Ioe, e moni! E loloto lo tatou alolofa, faamamalu, ma faaaloalo i lo tatou Atua, ma e tafe mai lo tatou migao mai se agaga e olioli i le alofa tele, alofamutimutivale, ma le faaolataga o Keriso! O lea migao e tumu i le olioli i le Alii, e ao ona avea ma uiga o a tatou sauniga paia o le faamanatuga.
Peitai, o le toatele, o le migao e na o le pau lea o lona faauigaina: mau o le piilima, punonou o tatou ulu, moeiini, ma fifilemu—mo se taimi umi! Atonu o se ala lea e fesoasoani e aoao ai fanau laiti tiotio, ae a o tatou tuputupu a’e ma aoao, ia tatou iloa o le migao e matuai tele atu isi mea nai lo lenei. Pe o le tulaga lena e tatau ona tatou i ai pe ana faapea o loo tatou i ai ma le Faaola? E leai, aua “i [Lona] afioaga o i ai le atoaga o le olioli”!
Ia, o le toatele o tatou o lenei suiga i a tatou tapuaiga faamanatuga o le a moomia ona faata’ita’i.
Na o le Auai ma le Tapuai Moni
Tatou te le faapotopoto i le Sapati e na ona auai i le sauniga faamanatuga ma maka ese mai le lisi. Tatou te potopoto faatasi e tapuai. E tele lava le eseesega o ia mea e lua. Ina ia auai o lona uiga ia nofo ai. Ae ia tapuai o le vivii a’e lea ma le loto i ai ma faamanū atu i lo tatou Atua i se ala e faaliliu ai i tatou!
I Luga o le Tulaga ma i le Potopotoga
Afai tatou te faapotopoto ina ia faamanatuina le Faaola ma le togiola o Ia na mafai ai, e ao ona atagia mai i o tatou foliga lo tatou olioli ma le lotofaafetai! Sa faamatala e Elder F. Enzio Busche se tala i le taimi a o avea o ia ma peresitene o se paranesi, ma sa tilotilo atu se tamaitiiti ia te ia i luga o le tulaga ma fesili leotele atu, “O le a le mea a le la tamaloa foliga pāū e fai i luga i o?” O i latou e nonofo i luga o le tulaga—le aufailauga, o ta’ita’i, aufaipese—ma i latou e faapotopoto i le potopotoga e fesootai atu le tasi i le isi i lenei “susū mai i le ekalesia o le olioli” e ala i o latou foliga vaaia!
Usuina o Viiga
A o tatou pepese, pe o tatou aufaatasi ea e vivii atu i lo tatou Atua ma le Tupu, tusa lava po o le a le tulaga o o tatou leo, pe na ona tatou memumemuina upu po o le lē pepese foi? O loo tusia i le mau e faapea “o le pese a le amiotonu o se tatalo lea i le [Atua]” e fiafia i ai Lona agaga. Ia, tatou pepese! Ma vivii atu ia te Ia!
Lauga ma Molimau
Tatou te faatotonugalemu a tatou lauga ma molimau i le Tama Faalelagi ma Iesu Keriso ma fua o le ola ma le lotomaualalo i la La’ua talalelei, o fua e “sili ona suamalie i mea suamalie uma.” Ona tatou “taumamafa [moni lea] … seia oo ina [tatou] maoona, o le a [tatou] le fia aai, pe … fia feinu ai,” ma māmā a tatou avega e ala i le olioli o le Alo.
O Le Faamanatuga
O le itu mamalu e taulai i ai a tatou tapuaiga o le faamanuiaina ma le taliaina o le faamanatuga lava ia, o le areto ma le vai e suitulaga i le meaalofa togiola a lo tatou Alii ma le faamoemoega atoa o lo tatou potopoto ai. “O se taimi paia lenei o le toefaafouina faaleagaga” pe a tatou molimau atu ua tatou naunau e tauave i o tatou luga le suafa o Iesu Keriso ma toe osia le feagaiga e manatua pea le Faaola ma tausi i Ana poloaiga.
I nisi o mafuaaga o le olaga, atonu tatou te faalatalata atu i le faamanatuga ma ni loto ua mamafa ma ni avega lofituina. O isi taimi, tatou te o mai e leai ni avega mai gaogaosa ma faalavelave. A o tatou faalogologo ma le toto’a i le faamanuiaga o le areto ma le vai ma taumamafa i na faatusa paia, tatou te lagona le manao e manatunatu i le taulaga a le Faaola, o Ona puapuaga i Ketesemane, o Lona mafatia i luga o le satauro, ma faanoanoaga ma tiga na Ia onosaia mo i tatou. O le mea lena e mapu ai o tatou agaga, a o tatou faafesootai atu o tatou mafatiaga i Ona [mafatiaga]. O isi taimi, o le a tatou lagona ai le taumanatunatu ma le maofa e faafetai i le maoae o le “olioli matagofie”i le mea na faia e le meaalofa maoae a Iesu i o tatou olaga ma i o tatou faavavau! O le a tatou olioli mo mea o le a oo mai—lo tatou toe faatasiga faapelepele ma lo tatou Tama pele ma le Faaola toetu.
Atonu ua tatou masani i le manatu faapea o le faamoemoega o le faamanatuga o le nofo i le nofoa ma mafaufau i na o ala uma na tatou faaletonu ai i le aluga o le vaiaso. Ae tatou faaliliuina lena faiga i le mea e tatau ona fai. I le taaligoligoa o le siomaga o le faamanatuga, e mafai ona tatou manatunatu loloto i le tele o mea na tatou vaai o tulimatai pea lava pea e le Alii i tatou i Lona alofa matagofie i lena vaiaso! E mafai ona tatou tomanatu i le uiga o le “iloaina le olioli o le salamo i aso taitasi.” E mafai ona tatou momoli le faafetai mo taimi na ulufale mai ai le Faaola i a tatou tauiviga ma olioliga ma taimi na tatou lagona ai Lona alofatunoa, faamagaloga, ma le mana na tuuina mai ai le malosi ia i tatou e faatoilalo o tatou faigata ma tauave a tatou avega ma le onosai ma le fiafia.
Ioe, tatou te manatunatu loloto ai i puapuaga ma faamasinoga le tonu na faatietie i luga o lo tatou Togiola mo a tatou agasala, ma o lena e afua ai se matuai mafaufau loloto i ai. Ae o nisi taimi tatou te mau iina—i le faatoaga, i le satauro, i totonu o le tuugamau. Ua le mafai ona tatou agai i luga atu i le olioli o le tuugamau ua matala, le faatoilaloina o le oti, ma le manumalo o Keriso i mea uma e ono taofia ai i tatou mai le mauaina o le filemu ma toefoi atu ai i lo tatou aiga faalelagi. Pe na maligi o tatou loimata o le faanoanoa po o loimata o le lotofaafetai i le taimi o le faamanatuga, ia avea lena o se mafaufauga matagofie i le tala e lelei o le meaalofa a le Tama o Lona Alo!
O Matua e I Ai Fanau e Laiti pe I Ai Manaoga Faapitoa
Ia, mo matua o tamaiti e laiti pe i ai manaoga faapitoa, e tele taimi e leai se mea e igoa o se taimi o le nonofo lelei ma se manatunatuga filemu i le taimi o le faamanatuga. Ae i ni taimi iti i le gasologa o le vaiaso, e mafai ona e aoao atu e ala i faataitaiga o le alofa, lotofaafetai, ma le olioli e te lagonaina mo, ma mai le Faaola a o e tausia pea lava pea Ana tama’i mamoe. E leai se taumafaiga i lenei tulimataiga e maimau. O loo silafia lelei oe e le Atua.
Aufono a Aiga, Uarota ma Paranesi
E faapena foi i le fale, e mafai ona tatou amata faalauleleia o tatou faamoemoe ma talitonuga mo o tatou taimi i le lotu. I fonotaga faaleaiga, e mafai ona tatou talanoaina ai pe mafai faapefea e tagata taitoatasi ona saofagā i ni auala ‘anoa e talileleia ai tagata uma i le ekalesia o le olioli! E mafai ona tatou fuafua ma talitonu ia maua se aafiaga fiafia i le lotu.
E mafai e le aufono a le uarota ma paranesi ona vaai mamao ma fatu se aganuu o le migao fiafia mo le itula o la tatou faamanatuga, faailoa ni laasaga faatino ma ni faailo vaaia e fesoasoani ai.
Olioli
E eseese foliga o le olioli mo tagata eseese. Mo nisi, o ni faafeiloai sagisagi fiafia i le faitotoa. Mo isi, atonu o se fesoasoani lē lēoa ia lagona e tagata le mafanafana e ala i le ataata ma le nofo i o latou autafa ma se lototatala ma le alofa. Mo i latou o e lagona le tuulafoaiina po o le i ai i autafa, o le mafanafana o lenei faafeiloaiga o le a taua tele. O le faaiuga lava, e mafai ona tatou fesili ifo ia i tatou lava pe mata o le a se ituaiga itula o le faamanatuga e finagalo ai le Faaola. O le a Sona finagalo i le auala e faafeiloa’ia, vaaia, faafailelei, ma alofaina ai Lana fanau taitoatasi? O le a Sona finagalo i o tatou lagona pe a tatou o mai e faafou e ala i le manatuaina ma tapuai atu ia te Ia?
Faaiuga
I le amataga o la’u malaga o le faatuatua, o le olioli ia Iesu Keriso o le mea sili muamua lea na ou mauaina, ma sa suia ai lo’u lalolagi. Afai e te lei mauaina lenei olioli, oso loa i luga o lenei tulimataiga. O se valaaulia lenei ia maua le meaalofa o le filemu, malamalama, ma le olioli a le Faaola—ia olioli i ai, ia mafaufau i ai, ma ia fiafia ai, i Sapati taitasi.
O loo faaalia e Amona i le Tusi a Mamona ia lagona o lo’u loto ina ua ia fai mai:
“O lenei pe le ua i ai ea ia te i tatou se pogai tatou te olioli ai? Ioe, ou te fai atu ia te outou, e lei i ai lava [ni tagata] na i ai se pogai tele naua latou te olioli ai e pei o i tatou, talu mai le amataga o le lalolagi; ioe, ma ua soona tele lava loʼu olioli, ua oo lava i le mitamita i loʼu Atua; ona ua ia te ia le mana uma, ma le poto uma, ma le malamalama uma; ua silafia e ia mea uma, ma o ia o se Tagata alofa mutimutivale, e oo i le olataga, o i latou o e e salamo ma talitonu i lona suafa.
“O lenei afai o le mitamitavale lea, o le a faapea lava ona ou mitamita; ona o loʼu ola ma loʼu sulu lea, … o loʼu olioli ma la’u faafetai sili.”
Afifio mai ia i le ekalesia o le olioli! I le suafa o Iesu Keriso, amene.