“O A’u Lenei”
O le alofa mama o Keriso—e iloga i le faamaoni a’ia’i i le finagalo paia—e tumau ma faaauau pea ona tumau.
O le aso Sapati lenei, ma ua tatou potopoto e talanoa e uiga ia Keriso ma le faasatauroina o Ia. Ua ou iloa o loo soifua lo’u Faaola.
Manatu i lenei vaaiga mai le vaiaso mulimuli o le soifuaga o Iesu i le olaga nei. Sa potopoto se motu o tagata, e aofia ai ma fitafita Roma sa faaauupegaina i tao ma suluga pelu. Sa ta’imua ai taitai mai faitaulaga sili, o ē sa i ai sulu i lima, o lenei vaega naunautai sa le’i o atu e faatoilalo se aai. O le po lea sa latou sailia ai le tagata e toatasi, o se tagata e le’i tauaveina lava se auupega, pe a’otauina faafitafita, pe na auai i se taua faaletino i se taimi o Lona soifuaga atoa.
A o latalata atu fitafita, i se taumafaiga e puipuia Ona soo, sa la’a atu ai Iesu ma faapea atu, “O ai tou te sailia” Sa latou tali atu, “O Iesu le Nasareta.” Sa fetalai atu Iesu, “O A’u lenei. … [Ina ua] … ia fai atu ia te i latou, o A’u lenei, [na] solomuli … i latou, ua pauu foi i le eleele.”
Ia te a’u la, o se tasi lea o laina e sili ona o’otia i tusitusiga paia uma. E ese mai isi mea uma, o loo ta’usa’o mai ai lava ia te a’u e faapea, na o le i ai lava i le mea o afio ai le Alo o le Atua—le Ieova silisili o le Feagaiga Tuai ma le Leoleo Mamoe Lelei o le Feagaiga Fou, o le e le’i tago lava i se auupega o soo se ituaiga—e faapea na o le faalogo lava i le siufofoga o lenei Malutaga mai le Afa, lenei Alii o le Filemu, ua lava lea e faatautevateva ai le fili ma pauu ai, ma faafaula’i ai lava i latou i se faaputuga, ma latou moomoo ai sa sili pe a na totofi i latou e tiute i le umukuka i lena po.
E na o ni nai aso na muamua atu, ina ua Ia ulufale atu faatupu i le aai, “ona vevesi ai lea o le aai uma,” fai mai le mau, ma fesili, “O ai ea lenei?” E mafai ona ou mafaufau faapea “O ai ea lenei?” o le fesili lea na fesili ai nei na fitafita fememea’i!
O le tali i lena fesili sa le mafai ona i ai i Ona foliga, aua sa valoia e Isaia i le fitu seneturi na muamua atu e faapea “ua leai sona aulelei po o se manaia; ma a tatou vaai ia te ia e leai sona lalelei tatou te mananao ai ia te ia.” E mautinoa sa le’i i ai lava i Sana teugala’ei, po o se tamaoaiga patino tele, aua sa le’i i ai uma na mea ia te Ia. Sa le’i mafai ona i ai mai ni ana aoaoga faapolofesa i sunako sa i ai, aua e leai ni faamaoniga faapea sa Ia a’oga ai i se tasi o na mea, e ui o Lona talavou sa mafai ona Ia faafememea’iina ia tusiupu ma loia atamamai sa i ai, ma faaofoina ai i latou i Lana mataupu “e faapei o se ua i ai le pule.”
Mai lena aoaoga i totonu o le malumalu e oo atu i Lona ulufale manumalo atu i Ierusalema ma lenei pueina faapagota mulimuli ma le le tonu, sa masani ona tuuina ai Iesu i tulaga faigata, e masani ona faaseseina lea sa Ia manumalo ai i taimi uma-manumalo e leai so tatou faamatalaga sei vagana ai le DNA faalelagi.
Ae i lalo o le talafaasolopito e toatele ua faafaigofieina, e oo lava ina manatu faatauvaa i lo tatou faatusa ia te Ia ma Lana molimau pe o ai o Ia. Ua latou faaitiitia Lana amiotonu i le na o le le faautauta, o Lana faamasinoga tonu i le na o le ita, Lona alofa mutimutivale i le na o le tuufau. E tatau ona tatou faaeteete i soo se ituaiga faauigaga faigofie o Ia, ia e faigofie ai ona le amanaiaina aoaoga ia tatou te le fiafia ai. O lenei “faauigaina” e moni lava e tusa ai ma Lona uiga mama silisili, Lona alofa.
I le taimi o Lana misiona i le olaga nei, sa aoao mai i e Iesu e faapea, e lua lava poloaiga sili. O lea sa aoao atu i lenei konafesi ma o le a faavavau lava ona aoao atu: “Alofa atu i le Alii lou Atua [ma] alofa atu i lou tuaoi faapei o oe lava ia te oe.” Afai e ao ona tatou mulimuli faamaoni i le Faaola i nei tulafono taua ma le le matuueseeseina, e ao la ona tatou taofimau i le mea sa Ia fetalai moni ai. Ma o le mea moni na Ia fetalai ai o le, “Afai tou te alolofa mai ia te a’u, tausi a’u poloaiga.” I lena lava tauafiafi e tasi, sa Ia fetalai ai e tatau ona tatou “fealofani, e pei ona Ou alofa atu ia te outou.”
I na mau, o fasifuaitau agavaa e faamatala ai le alofa moni faaKeriso—o nisi taimi e faasino i le alofa mama—e matuai taua lava.
O a mea latou te faauigaina? Na faapefea ona alofa Iesu?
Muamua, sa Ia alofa ma “[Lona] loto atoa, manatu atoa, mafaufau atoa ma le malosi atoa,” ma maua ai e Ia le gafatia e faamalolo ai tiga matuitui ma folafola atu mea moni sili ona faigata. I se aotelega, o Ia o lē e mafai ona faatautaia le alofatunoa ma taulagi pea le mea moni i le taimi lava lea. E pei ona ta’ua e Liae i lana faamanuiaga o lona atalii o Iakopo, “O le a oo mai ai le togiola talu le Mesia Paia; aua ua tumu o ia i le alofa tunoa ma le upumoni.” O Lona alofa ua mafai ai ona maua se opo faamalosiau pe a manaomia ma se ipu oona e tatau ona inuina. O lea tatou te taumafai ai e alolofa—ma o tatou loto atoa, manatu atoa, mafaufau ma le malosi atoa—aua o le ala lena e alofa mai ai o Ia ia i tatou.
O le uiga lona lua o le alofa mama paia o Iesu o Lona usiusitai lea i afioga uma na tulei mai i le fofoga o le Atua, ma faaogatusa i taimi uma Lona finagalo ma amioga a Lona Tama Faalelagi.
Ina ua taunuu o Ia i le Lalolagi i Sisifo ina ua mavae Lona Toetu, sa fetalai atu Keriso ia sa Nifae: “Faauta, o Au o Iesu Keriso. … Ua ou inu i lena ipu oona lea na tuuina mai e le Tamā ia te au, … ma ua ou faamamaluina le finagalo o le Tama … mai lava i le amataga.”
Mai le anoanoai o auala na mafai ona Ia faailoa mai ai o Ia lava, sa faia e Iesu e ala i le tautino mai o Lona usiusitai i le finagalo o le Tama—e ui e le’i leva i le taimi o Lona matua’i manaomia o le fesoasoani, sa lagona ai e lenei Alo Pele e Toatasi o le Atua le matua’i tuulafoaiina e Lona Tama. O le alofa mama o Keriso—e iloga i le faamaoni a’ia’i i le finagalo paia—e tumau ma e faaauau pea ona tumau, e le na o aso faigofie ma toamalie ae faapea foi i aso e sili ona pogisa ma faigata.
O Iesu o “se tagata faanoanoa” ua fai mai ai le mau. Ua masani foi ma le faanoanoa, lē lavā, lē fiafia, ma le matua’i tuulafoaiina. I nei taimi ma taimi uma lava, e le uma le alofa o Iesu ma e faapena foi Lona Tama. I le i ai o sea alofa ua matua—le ituaiga alofa e fai ma faaa’oa’o, faamalosi, ma foai atu—o le a le uma foi lo tatou alofa.
O lea la, afai o nisi taimi o le tele o lou taumafai atili, o le tele foi lena o le faigata e foliga mai e oo i ai; afai, e faapei ona e taumafai e galue i ou tapulaa ma ou vaivaiga, e te maua se tasi po o se mea ua naunau e luitauina lou faatuatua; afai, e te galue tuuto, ae o lena lava e i ai taimi e lofituina ai oe i le fefe, manatua sa faapena foi mo nisi o tagata sili ona faatuatua ma maoae i vaitau uma. Ia manatua foi o loo i ai se malosiaga i le atulaulau o loo taumafai malosi e tetee atu i mea lelei uma e te taumafai e fai.
O lea la, i le taimi o le tamaoaiga faapea foi le mativa, i le taimi o le faaviivii patino faapea foi faitioga lautele, i le taimi o elemene paia o le Toefuataiga faapea foi nai vaivaiga faaletagata soifua ia o le a avea pea o se vaega lēmaalofia o le olaga, tatou te tumau i le ala ma le Ekalesia moni a Keriso. Aisea? Ona, e faapei o lo tatou Togiola, ua uma ona tatou lesitala i le semesa atoa—ua le faaiuina i sina suega puupuu muamua faalauiloa ae ia oo atu i le suega faaiu. O le mea e olioli ai i lenei mea, ua uma ona aumai e le Pulea’oga ia i tatou uma tusi e maua ai tali a o le’i amataina le kosi. E le gata i lea, ua i ai se anoanoai o o tatou faiaoga e faamanatu mai ia i tatou na tali i mea masani e mapu i ai i luga o le ala. Ae, ioe, e leai ma se mea o nei mea e aoga lelei pe afai tatou te tia’i aoga.
“O ai tou te sailia?” Ma o tatou loto atoa tatou te tali atu ai, “O Iesu le Nasareta.” Pe a fetalai mai o Ia, “O A’u lenei,” tatou te tootutuli o tatou tulivae ma ta’uta’u atu i o tatou laulaufaiva o Ia o le Keriso soifua, ua na o Ia lava na togiolaina mo a tatou agasala, sa Ia tauaveina i tatou e ui i taimi tatou te manatu ai ua Ia tuulafoaiina i tatou. Pe a tatou tutu atu i Ona luma ma vaai atu i ma’ila i Ona lima ma vae ma itu, o le a amata ona tatou malamalama i le uiga ia te Ia ia tauave a tatou agasala ma ia masani i le faanoanoa, ia usiusitai atoatoa i le finagalo o Lona Tama—o nei mea uma e mai le alofa mama a’ia’i mo i tatou. Ina ia faailoa atu i isi le faatuatua, salamo, papatisoga, le meaalofa o le Agaga Paia, ma le mauaina o o tatou faamanuiaga paia i le maota o le Alii—o “mataupu faavae [autu] nei ma sauniga” lea e iu ina faaalia ai lo tatou alolofa i le Atua ma tuaoi, ma faauigaina ai ma le olioli le Ekalesia moni a Keriso.
Uso e ma tuafafine, ou te molimau atu O Le Ekalesia a Iesu Keriso o le Au Paia o Aso e Gata Ai o le auala lea ua saunia e le Atua mo lo tatou faaeaga. O le talalelei ua aoao mai [e le Ekalesia] e moni, ma o le perisitua o loo faatulafonoina [le Ekalesia] e tuusa’o mai. Ou te molimau atu o Russell M. Nelson o se perofeta a lo tatou Atua, e faapei o ē na muaimalae ia te Ia, ma ē foi o le a suitulaga ia te Ia. Ma o le a i ai se aso o lena taitaiga faaperofeta o le a ta’ita’ia ai se tupulaga e vaai i lo tatou Avefeau o le Faaolataga o afio ifo e pei o le “uila’emo … e alu a’e i sasae,” ma o le a tatou alalaga, “O Iesu le Nasareta.” Faatasi ai ma lima o loo faaloaloa mai pea lava pea ma le alofa moni, o le a Ia tali mai, “O A’u lenei” Ou te folafola atu ai nei mea faatasi ai ma le mana ma le pule faaaposetolo o Lona suafa paia, o Iesu Keriso, amene.