O Afioga a Keriso ma le Agaga Paia O Le A Taitai Atu ai i Tatou i le Mea Moni
O le iloaina o lenei fuafuaga maoae o le a fesoasoani tatou te iloa ai o tatou o fanau a le Atua ma e mafai ona tatou avea e faapei o Ia.
O le Atua o lo tatou Tama o i le Lagi. O i tatou o Ana fanau agaga, ma ua foafoaina i tatou i Lona faatusa. O le mea lea, o i tatou taitoatasi, o se atalii/afafine o le Atua, ua i ai gafatia faalelagi e avea ai e faapei o Ia.
Sa tatou nonofo faatasi ma ia o ni agaga a e tatou te lei o mai i lenei lalolagi. O le Tama Faalelagi, o lo tatou matua agaga, e alofa ia i tatou, e finagalo i le mea sili mo i tatou, ma sa sauniaina se fuafuaga mo i tatou ia maua Ana faamanuiaga silisili, o le tino ola pea ma le ola e faavavau. E tusa ai ma le fuafuaga, o i tatou, o fanau agaga, o le a tuuina mai i ai le faitalia e filifili ai Lana fuafuaga. E ala i le o mai i le lalolagi, o le a tatou tuua ai le afioaga o le Atua, galo lo tatou muai olaga, maua tino o aao ma ivi, maua lo tatou lava poto masani, ma atia’e le faatuatua. Faatasi ai ma o tatou tino o aano ma ivi, o le avea ai ma tagata natura, o le a tatou gauai atu ai i faaosoosoga, ma oo ina le mama ma taumamao mai le Atua, ma le mafai ai ona toefoi atu i Lona afioaga paia. Ona o le alofa e le i’u o le Tama Faalelagi mo i tatou, Na Ia auina mai ai Lona Alo Ulumatua, o Iesu Keriso, e avea ma o tatou Faaola. E ala i Lana taulaga, o le Togiola, na faia ai e Iesu Keriso ia mafai ona togiolaina i tatou mai a tatou agasala ma toetutu mai ma maua le ola e faavavau.
Ua matuai faafetai lava mo nei meamoni mamalu—le mea ua tatou ta’ua o le ata o le faaolataga, o Lana fuafuaga o le alofamutimutivale, po o Lana fuafuaga sili o le fiafia. O le aoaoina o nei upumoni taua na fesoasoani ia te au e iloa ai lo’u faasinomaga moni ma faamanuiaga silisili o le faaeaga ma le ola e faavavau ua saunia e le Atua mo i tatou. Na aoao mai i tatou e le perofeta o Nifae le ala: “O le mea lea, … taumamafa fiafia i afioga a Keriso; aua faauta, o afioga a Keriso o le a tau mai ai ia te outou mea uma e tatau ona outou faia.” Na ia faaopoopo mai, “Afai tou te ulu atu i le ala, ma maua le Agaga Paia, o le a faaali mai e ia ia te outou mea uma e tatau ona outou faia.” O le asō, ou te fia faasoa atu ai le ala na fesoasoani ai afioga a Keriso faapea ma le Agaga Paia ia te au e maua nei upumoni taua e aumaia ai le filemu i o’u tausaga talavou.
“O Afioga a Keriso O Le A Ta’u Mai Ai Ia Te Outou Mea Uma e Tatau Ona Outou Faia
E faapei lava ona ta’ua e Nifae i le fuaiupu tatala o le tusi o le 1 Nifae, sa “fanaua foi a’u e ni matua lelei.” Sa ou ola a’e i Nagano, Iapani, i se aiga lea sa matuai fautuaina malosi ai le faamaoni, ma’elega, ma le lotomaualalo, ma o le ogatusa ma agaifanua anamua sa matua’i mulimulita’ia atoatoa. O lo’u tama o se tagata e malosi tele faalelotu. Sa ou vaai ia te ia o tatalo i luma o fatafaitaulaga a Shinto ma Puta i taeao taitasi ma po taitasi. E ui lava ina ou le iloa po o ai sa ia tatalo i ai, ma pe o le a foi le mea sa ia tatalo ai, ae sa ou talitonu i se mea e pei o se mana e lei mavaaia o le Atua e “maoae e lavea’ia” pe fesoasoani foi ia i matou pe afai matou te tatalo ma le faamaoni.
E faapei o isi talavou, sa ou oo i le tele o faigata. Sa ou tauivi, ma mafaufau sa faaitu’au le olaga ma sa anoanoai mea lelei ma mea leaga. Sa ou lagonaina le leiloa, leai se lagona o le taitaiga i lo’u olaga. Sa foliga puupuu tele le olaga ona o le a muta pe a ou oti. O le olaga e aunoa ma le iloaina o le ata o le faaolataga sa fenumiai.
E lei leva talu ona amata ona ou aoaoina le gagana Peretania i le aoga faaitumalo, sa tofu tamaiti aoga o la matou aoga ma se kopi o le Feagaiga Fou. E ui ina sa faatoa amata ona matou suesueina le faaPeretania, sa fai mai le matou faiaoga e ao ona matou suesueina le FaaPeretania e ala i le faitauina. Sa ou susueina le tusi ma faitau i ona anotusi. Sa matuai faigata ia te a’u upu o le Feagaiga Fou. Sa faapena foi le faigata o upu i le faaIapani. Peitai, sa tosina la’u vaai i se lisi o faamatalaga ma fesili o le agaga ia na aofia ai i luma tonu o le anotusi paia i lenei Tusi Paia a Kiteona—o fesili e uiga i lagona tuuatoatasi, leai o se talitonuga, o le fememea’i, feagai ma faigata o le olaga, ma isi. O aitema taitasi i luga o le lisi sa sosoo ai ma se maufaasino i fuaiupu ma itulau i le Feagaiga Fou. Sa faapitoa ona ou tosina i le fesili “Pe a oo ina e vaivai.” O le mau faasino na tata’i ai au e susue le Mataio 11:28–30, lea na faiatu ai Iesu i Ona soo:
“Ia outou o mai ia te a’u, outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te a’u; aua o a’u lē agamalu ma le loto maulalo: ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”
O le taimi muamua lea ou te manatua le faitauina o afioga a Iesu Keriso. E ui ou te le’i malamalama i upu uma na Ia fetalai ai, o Ana upu na faamafanafana ai au, siitia ai lo’u agaga, ma aumaia ai ia te au le faamoemoe. O le tele o lo’u faitauina o Ana upu, o le tele foi lea o lo’u lagonaina e tatau ona ou faata’ita’ia le mana o Ana upu. Ou te lei mauaina lava se lagona faapena e pei o lena aso. Sa ou lagonaina le alofaina tele o a’u. Sa ou lagonaina lo’u masani lelei ia Iesu Keriso.
A o faaauau pea ona ou suesue, sa ou lagonaina e pei o loo fetalai tuusa’o mai o Ia ia te a’u ina ua Ia faapea mai: “Amuia i latou o e fiaaai ma fiainu i le amiotonu; aua e maoona i latou.”
Sa faatumulia lo’u loto i Ana upu, e ui ina sa le mafai ona ou faamatalaina lelei o’u lagona i lena taimi. E ui ina sa soifua Iesu Keriso i le tele o seneturi ua mavae i se laueleele ou te le masani ai, ae sa ou manatu e mafai ona ou faatuatuaina Ana upu ma lo’u loto atoa. Sa ou moomoo e i ai se aso i le lumanai e mafai ai ona ou aoao atili e uiga ia Iesu Keriso.
“O Le A Faaali Mai e le Agaga Paia Ia Te Outou Mea Uma e Tatau Ona Outou Faia
O lena aso, na oo mai i le na o ni tausaga mulimuli ane. Sa ou feiloai i ni faifeautalai faamisiona tuuto o Le Ekalesia a Iesu Keriso o le Au Paia o Aso e Gata Ai. Ma e lei leva ae ou feiloai i se vaega toaitiiti o le Au Paia o Aso e Gata Ai agalelei ma laufofoga fiafia sa taumafai malosi e mulimuli ia Iesu Keriso. E ui ina sa fai si umi o o’u taumafai e talitonuina atoatoa i latou, ae sa oo ina ou vaaia i le talalelei toefuataiina le mea sa ou moomoo i ai ina ua ou suesueina le Feagaiga Fou—o afioga a Iesu Keriso ma le faamoemoe ma le filemu e maua mai ai.
O se aafiaga paia faapitoa o le taimi a o aoao au e faifeautalai e tatalo. Sa ou aoaoina e ao ona tatou faalani le Atua i le suafa. Pe a tatou tatalo, e tatau ona tatou tautatala mai o tatou loto, faaali atu lo tatou lotofaafetai, ma faasoa atu o tatou faamoemoega ma manaoga. E uma loa ona tatou ta’u atu na mea uma tatou te mananao e fai atu, e faaiu la tatou tatalo i le faapea atu, “I le suafa o Iesu Keriso, amene.” Tatou te faia lenei mea ona sa poloaiina i tatou e Iesu e tatalo atu i Lona suafa. O le tatalo atu i le Tama Faalelagi sa fesoasoani ia te au e iloa ai pe o ai o Ia ma la’u sootaga ma Ia—ma o a’u o Sona atalii agaga faapelepele. Sa ou aoaoina e faapea, talu ai e silafia e le Tama Faalelagi a’u ma alofa ia te au, o le a talanoa patino mai o Ia ia te au, i se tulagaese, ma i ni auala ou te malamalama ai e ala i le Agaga Paia.
Sa i ai se taimi sa ou matuai le iloaina moni ai lava le Agaga Paia. Sa ou le malamalama, ma mafaufau faapea na pau le mea ou te faia o le mulimuli i laasaga o le tatalo, ma ona tupu ai lea o se mea maoae. I se tasi aso, i le taimi o se lesona ma faifeautalai, sa ou laa ese ai mai le lesona e fai sina koma. Sa ou faaluafesasi pea e uiga i le mea e tatau ona ou faia i lo’u olaga pe afai e moni le talalelei toefuataiga a Iesu Keriso.
Ia ua tuu ou te toefoi i le potu sa faatalitali mai ai faifeautalai, sa ou faalogoina se leo o se tasi o faifeautalai. Sa ou faalogo i lo’u igoa. Nai lo le tatalaina o le faitotoa, sa ou faalogologo i le leo la e sau mai le isi itu o le faitotoa. Na faateia a’u. O la sa la tatalo i le Tama Faalelagi. O le tagata sa faia le tatalo sa aioi atu i le Atua ina ia faafofogaina la’u tatalo. E ui e le lelei tele lana faaIapani, ae o le faalogoina o lana tatalo ma le lotofaamaoni, na faamaluluina ai lo’u loto. Sa ou taumanatunatu pe aisea lava na la popole tele ai ia te au. Ona ou iloaina ai lea o la la’ua tatalo mo au o se ataata o le alolofa o le Tama Faalelagi ma le Faaola mo au. O lena alofa na aumaia ai ia te au le faamoemoe, ma mulimuli ane, sa ou ole atu i le Atua i le faatuatua ma le lotofaamaoni. Ina ua ou faia, sa ou maua se lagona olioli ma le toafilemu, e moni o a’u lava o se atalii o le Atua ma e i ai so’u gafatia ma se taunuuga paia. Sa goto uga ifo le ata o le faaolataga i lo’u loto.
Na saunoa Peresitene Russell M. Nelson, “O le auala e te mafaufau ai po o ai… oe e aafia … ai faaiuga uma o le a e faia.” E matua’i moni lea mea mo a’u. O le faaiuga e mulimuli i le Faaola o Iesu Keriso e ala i le papatisoina ma le mauaina o le meaalofa o le Agaga Paia na faamanuiaina ai lo’u olaga e sili atu nai lo mea na ou mafaufauina. A o tatou ulu ifo i le feagaiga o le papatisoga faatasi ma le Atua, tatou te folafola atu ua tatou loto e tauave i o tatou lava luga le suafa o Iesu Keriso, tausi poloaiga a le Atua, ma auauna atu ia te Ia mo aso uma o totoe o o tatou olaga. Ae folafola mai e lo tatou Tama Faalelagi ia i tatou e faapea, e mafai ona tatou maua pea Lona Agaga e faatasi ma i tatou—le taitaiga faifaipea mai le Agaga Paia.
Ou te valaaulia outou ia faatuatua i le savali na aoao mai e Nifae ia i tatou—e faapea, o afioga a Keriso ma le Agaga Paia o le a taitaiina ai outou i “mea uma e ao ona [outou] fai.” Mea Uma! O se meaalofa maoae lenei mai le Atua.
Uso e ma tuafafine, ou te faafetai mo le fuafuaga o le fiafia a lo tatou Tama Faalelagi. Ona e alofa o Ia ia te i tatou, sa Ia saunia ai le auala e toefoi atu ai i Lona afioaga e ala i Lona Alo Pele e Toatasi, o Iesu Keriso. O le iloaina o lenei fuafuaga maoae o le a fesoasoani tatou te iloa ai o tatou o le fanau a le Atua ma e mafai ona tatou avea e faapei o Ia. Ou te faafetai mo lenei mea moni taua. Ou te tuu atu la’u molimau o afioga a Iesu Keriso ma le Agaga Paia o le a ta’ita’i atu ai i tatou ia maua ai le ola e faavavau. Ou te iloa e moni nei mea. I le suafa paia o Iesu Keriso, amene.