O Le Olioli i Lo Tatou Togiola
O le alofa ma le mana o Iesu Keriso e mafai ai ona laveai i tatou taitoatasi mai a tatou measese, vaivaiga, ma agasala ma fesoasoani ia avea ai i tatou ma ni tagata sili atu.
Pe tusa o le 10 tausaga talu ai, sa uunaia ai a’u e vali se atatosi o le Faaola. E ui o a’u o se tagata tusiata, ae sa ou lagonaina lava si lofituina. O le a faapefea ona ou valiina se atatosi o Iesu Keriso e maua lelei ai Lona Agaga? O fea na tatau ona ou amata ai? A o fea foi ou te maua ai se taimi?
E ui lava i a’u fesili, ae sa tonu ia te a’u e agai i luma ma talitonu o le a fesoasoani mai le Alii ia te a’u. Ae sa tatau ona ou gaoioi pea ae tuu mea e mafai ona fai ia te Ia. Sa ou tatalo, manatunatu loloto, sailiili, ma tusifaataitai, ma sa faamanuiaina i le mauaina o le fesoasoani ma punaoa. Ma o se mea sa o se iepa’u malō pa’epa’e ua amata ona avea ma se mea e sili atu.
Sa le’i faigofie le faagasologa. O nisi taimi sa le’i foliga mai i le mea sa ou faamoemoeina. O nisi taimi sa i ai ni tosi ma ni ‘aitia musuia. Ma o le tele o taimi, sa tatau ona ou taumafai ma taumafai ma taumafai pea.
Ina ua ou mafaufau ua i’u ina mae’a le atavali suauu ma ua mago, sa amata ona ou faaaogaina se vanisi kilia e puipuia ai mai le palapala ma le pefu. A o ou faia lena mea, sa ou vaaia le lauulu i le vali ua amata ona sui, ua nini, ma ua matafi. Sa vave ona ou iloaina ua vave ona ou tuua i ai le vanisi, o le vaega lena o le vali o la lava sa susū!
O le mea moni, sa ou soloiesea se vaega o la’u ata i le vanisi. Oka, se faanoanoa o lo’u loto. Sa ou lagona e pei ua ou faatoa faatama’iaina lava le mea sa fesoasoani mai le Atua ia te a’u e fai. Sa ou tagi ma sa ou lagona le mafatia. I lo’u le fiafia, sa ou faia le mea e masani ona fai e soo se tasi i se tulaga faapea: sa ou valaau i lo’u tina. Sa ia fai mai ma le atamai ma le toafimalie: “E te le toe maua le mea sa i ai muamua, ae fai le mea aupito sili e te mafaia i le mea o totoe ia te oe.”
Ma sa Ou ’Ai, saunia e Kristin M. Yee
O lea sa ou tatalo ai ma augani atu mo se fesoasoani, ma vali i le po atoa e toefaaleleia ia mea. Ma ou te manatua le tilotilo atu i le atavali i le taeao—na sili atu nai lo le mea sa i ai muamua. Na mafai faapefea lena mea? O le mea sa ou manatu o se measese e le mafai ona toefaaleleia, sa o se avanoa lea mo le faaalia mai o Lona aao alofa mutimutivale. Sa lei uma Lana pitolaau i le atavali, ma sa lei uma foi le mea sa Ia manao ai mo au. Oka se olioli ma se toomaga na faatumulia ai lo’u loto. Sa ou faamanūina le Alii mo Lona alofa mutimutivale, mo lenei vavega sa le gata ina faasaoina ai le atavali ae sa aoao atili ai foi au e uiga i Lona alofa ma le mana e laveai ai i tatou taitoatasi mai a tatou measese, vaivaiga, ma agasala ma fesoasoani ai ia avea i tatou ma ni ē sili atu.
E faapei ona faatupula’ia le loloto o lo’u lotofaafetai i le Faaola e pei ona sa Ia fesoasoani mai ia te au ma le alofamutimutivale e toe faalelei le atavali “e le mafai ona toe faaleleia”, ua faapena foi ona faalolotoina lo’u lava alofa ma le lotofaafetai i lo’u Faaola, a o o’u saili e galulue ma Ia i o’u vaivaiga ma ia faamagaloina i o’u sese. O le a faavavau ona ou faafetai i lo’u Faaola ua mafai ona ou suia ma faamamaina. Ua ia te Ia lo’u loto, ma ou te faamoemoe e faia soo se mea e finagalo o Ia ou te faia ma avea ai.
O le salamo e mafai ai ona tatou lagonaina le alofa o le Atua ma iloa a alolofa ia te Ia i ni auala semanu tatou te le iloa lava. E uiga i le fafine na u’uina aao o le Faaola, na Ia fetalai ai, “Ua faamagaloina ana agasala e tele; aua ua alofa tele mai o ia: a o lē ua faamagaloina i ai se mea itiiti, ua itiiti foi lona alofa.” Sa tele lona alofa ia Iesu aua sa Ia faamagaloina foi ana mau agasala.
E i ai lena mapusaga ma le faamoemoe i le iloaina e mafai ona tatou toe taumafai—e pei ona sa aoao mai Elder Bednar, e mafai ona tatou maua se faamagaloga faifaipea o a tatou agasala e ala i le mana faapaia o le Agaga Paia, pe a tatou salamo ma le faamaoni.
O le mana togiola o Iesu Keriso o se tasi o faamanuiaga silisili folafolaina o a tatou feagaiga. Mafaufau i lenei mea a o outou auai i sauniga paia. A aunoa ma lena, e le mafai ona tatou toefoi atu i le afioaga o lo tatou Tama o i le Lagi ma i latou tatou te alolofa i ai.
Ou te iloa o lo tatou Alii ma le Faaola, o Iesu Keriso, e malosi aoao e lavea’i. I le avea ai o le Alo o le Atua, o le na togiola mo agasala a le lalolagi ma sa tuuina ifo Lona lava soifua ma toe aumai ai, ua Ia umia le mana o le togiola ma le toetu. Ua Ia faia ina ia mafai ai ona maua le tino ola pea ma le ola e faavavau mo i latou o e filifilia o Ia. Ua ou iloa e ala mai i Lana taulaga togiola e mafai ai ona tatou salamo ma faamama ma togiolaina moni ai. O se vavega lava Lona alofa faapea ia te oe ma a’u.
Na Ia fetalai, “Pe tou te le foi mai nei ea ia te a’u, ma salamo i a outou agasala, ma liua, ina ia Ou faamaloloina outou?” E mafai ona Ia faamalolo “nofoaga tuufua” o lou agaga—o nofoaga ua mamago, pa’a’ā ma ua naumati i le agasala ma faanoanoaga—ma “fai [lou] vaomatua e faapei o Etena.”
E faapei foi ina le mafai ona tatou malamalama i tiga ma le loloto o mafatiaga o Keriso i Ketesemane ma luga o le satauro, e faapena foi ona “le mafai ona tatou fuaina tuaoi po o gafa o le loloto o [Lana] faamagaloga faaleatua,” alofamutimutivale ma le alofa.
Atonu e te lagona i nisi taimi faapea e le mafai ona togiolaina, faapea atonu e tuusaunoaina oe mai le alofa o le Atua ma le mana togiola o le Faaola ona o mea o loo e tauivi ai, pe ona o ni mea sa e faia. Ae ou te molimau atu e te le o mamao mai le aapa mai a le Matai. Na “afio maualalo ifo le Faaola i mea uma” ma o loo i ai i se tulaga paia e si’i a’e oe ma aumaia oe mai se lua aupito pogisa ma avatu oe i “lona malamalama ofoofogia.” E ala i Ona mafatiaga, na Ia faia ai se ala mo i tatou taitoatasi e faatoilalo ai o tatou vaivaiga patino ma agasala. “Ua ia te ia le mana uma e lavea’i ai tagata uma e talitonu i lona suafa ma aumaia fua e tatau ai mo le salamo.”
E faapei ona manaomia ai le galue ma le augani atu mo le fesoasoani mai le lagi e toefaaleleia ai le atavali, e manaomia foi le galue, le faamaoni o le loto, ma le lotomaualalo e aumai ai “fua e tatau ai mo le salamo.” O nei fua e aofia ai le faaaogaina o lo tatou faatuatua ma le faalagolago ia Iesu Keriso ma Lana taulaga togiola, ofoina atu o se loto salamo ma se agaga nutimomoia, ta’uta’u atu ma le lafoaiina o agasala, toefuatai mea sa faatama’ia i le mea sili tatou te mafaia, ma taumafai malosi e ola amiotonu.
Ina ia salamo faamaoni ma suia, e tatau ona muamua “faatalitonu i a tatou agasala.” E le iloa e se tagata le manaomia ona inu o se fualaau sei vagana ua latou malamalama o la e mama’i. Atonu e i ai taimi tatou te le loto ai e suesue i tatou lava, ma vaai pe o le a moni le mea o loo manaomia le faamalologa ma toefaalelei.
I tusitusiga a C. S. Lewis, na fai atu ai e Aslan upu nei i se tamaloa na saisaia ia lava i ana lava masini: “Oi, [le tagata e], oka so outou popoto e puipuia outou lava mai mea uma semanu tou te lelei ai!”
O fea tatou te ono puipuia ai i tatou lava mai na mea semanu tatou te lelei ai?
Aua nei o tatou puipuia i tatou lava mai mea lelei e finagalo le Atua e faamanuia ai i tatou. Mai le alofa ma le alofamutimutivale lea e finagalo o Ia ia tatou lagonaina. Mai le malamalama ma le atamai e finagalo o Ia e faaee mai i o tatou luga. Mai le faamalologa ua Ia silafia ua leva ona tatou manaomia. Mai le sootaga loloto atu o feagaiga ua Ia faamoemoeina mo Ona atalii ma afafine uma.
Ou te tatalo ia mafai ona tatou faataatia ese soo se “auupega o taua” ua tatou fetagofi atu i ai ma le iloa pe aunoa foi ma se manatu i ai, e puipuia ai i tatou lava mai faamanuiaga o le alofa o le Atua. O auupega o le faamaualuga,manatu faapito, fefe, inoino, faatiga, faalēāno, faamasinoga amioletonu, lotoleaga—soo se mea o le a taofia ai i tatou mai le alolofa atu i le Atua ma o tatou loto atoa ma le tausiga o a tatou feagaiga uma ma Ia.
A o tatou ola i a tatou feagaiga, e mafai e le Alii ona aumai ia i tatou le fesoasoani ma le mana tatou te moomia e iloa ai ma faatoilalo o tatou vaivaiga, e aofia ai le fili’a’ati faaleagaga o le faamaualuga. Na saunoa mai lo tatou perofeta:
“O le salamo o le ala lea i le mamā, ma o le mamā na te aumaia le mana.”
“Ma oka, so tatou manaomiaina o Lona mana i aso o i luma atu.”
E faapei o la’u atavali, e le’i uma mea e fai e le Alii mo i tatou pe a tatou faia se measese, e le solaese foi o Ia pe a tatou tautevateva. O lo tatou manaomia o le faamalologa ma le fesoasoani e le o se avega mamafa ia te Ia, ae o le mafuaaga tonu lea na Ia afio mai ai. Sa fetalai mai le Faaola lava Ia:
“Faauta, ua ou sau i le lalolagi e aumai le togiola i le lalolagi, e laveai le lalolagi mai le agasala.”
“Ua faaloaloa atu ia te outou lou lima alofa mutimutivale, ma o soo se tasi e sau, o ia lea o le a ou taliaina; ma amuia lava i latou o e e o mai ia te au.”
O le mea lea, o mai—o mai outou o e ua vaivai, ua gaseā, ma faanoanoa; o mai ma tuua a outou galuega ae maua le mapusaga ia te Ia o lē ua sili le alofa mo outou. Ia outou amoina la’u amo, aua o Ia o le e agamalu ma lotomaualalo.
O loo silasila mai lo tatou Tama Faalelagi ma le Faaola ia te oe. La te silafia lou loto. La te amana’ia mea e te popole ai, e aofia ai i latou e te alofa i ai.
E mafai e le Faaola ona togiola mea ua leiloloa, e aofia ai sootaga ua motusia ma malepelepe. Na Ia faia se ala mo i latou uma ua pauu ina ia togiolaina—ina ia manava atu ai le ola i e ua pei e feoti ma ua leai se faamoemoe.
Afai o e tauivi ma se tulaga ua e manatu ua tatau ona e faatoilaloina nei, aua e te fiu. Ia onosai ia te oe lava, tausi au feagaiga, ia salamo soo, saili le fesoasoani mai ou taitai pe a manaomia, ma alu i le maota o Ieova i le tele e te mafaia. Faalogologo ma usitai i uunaiga e auina mai e Ia ia te oe. O le a Ia le lafoa’ia lava Lana sootaga faalefeagaiga ma oe.
Na i ai sootaga faigata ma lavelave i lo’u olaga sa ou tauivi ai ma sa ou sailia ma le loto faamaoni ia faaleleia. Sa i ai taimi, sa ou manatu ai sa tele atu ona ou toilalo. Sa ou tau mafaufau, “Pe ou te le’i faaleleia lea mea talu ai? Pe ou te le’i faatoilaloina moni ea o’u vaivaiga?” Sa ou aoaoina i le aluga o taimi e le faapea ou te faaletonu; ae, e tele atu mea e tatau ona galue i ai ma e tele atu le faamalologa e manaomia.
Sa aoao mai Elder D. Todd Christofferson: “E mautinoa lava e faamanuia e le Alii se tagata e manao ia oo mai i le faamasinoga ma le agavaa, o lē e galue ma le filiga i lea aso ma lea aso ina ia suia vaivaiga i malosiaga. O le salamo moni, o le suiga moni e manaomia ai ni taumafaiga fai soo, ae o loo i ai se mea lelei atu ma paia i ia taumafaiga. O le faamagaloga faaleatua ma le faamalologa e tafe mai lava faalenatura i se agaga faapena.”
O aso taitasi o se aso fou e faatumulia i le faamoemoe ma avanoa ona o Iesu Keriso. O aso taitasi e mafai ai e oe ma a’u ona iloa, e faapei ona tautino mai e le Tina o Eva, “o le olioli o lo tatou togiolaina,” o le olioli o le faaatoatoaina, o le olioli o le lagonaina o le alofa e le mavae o le Atua mo oe.
Ou te iloa e alolofa lo tatou Tama i le Lagi ma le Faaola ia te oe. O Iesu Keriso o le Faaola ma le Togiola o tagata uma. O loo soifua o Ia. E ala mai i Lana taulaga togiola, na motusia ai e faavavau fusi o le agasala ma le oti, ina ia mafai ona tatou saoloto e filifili le faamalologa, togiolaina, ma le ola e faavavau faatasi ma i latou tatou te alolofa i ai. Ma ou te molimau atu ai i nei mea i Lona suafa, o Iesu Keriso, amene.