Konafesi Aoao
“O La’u Talalelei Lenei”—“O La’u Ekalesia Lenei”
Konafesi aoao ia Oketopa 2024
13:49

“O La’u Talalelei Lenei”—“O La’u Ekalesia Lenei”

Saunia e Elder Dale G. Renlund

O Le Korama a Aposetolo e Toasefululua

O le talalelei lenei a le Faaola, ma o Lana Ekalesia lenei (tagai 3 Nifae 27:21; Mosaea 26:22; 27:13). O le tuufaatasiga o le lua lea e mamana ma suia.

Mo le tele o seneturi, o le oge uliuli o le mea faapa aupito malosi lea na i ai. E mafai ona faaoso atu ai pulufana, ae sa le’i aogā mo le tele o galuega faatino i le eliga o minerale ma le fauga o auala. Sa vaivai tele e le mafai ona nuti ai papa.

I le 1846, sa i ai se kemisi Italia e igoa ia Ascanio Sobrero, na tuufaatasia ni kemikolo e fai ai se mea faapa fou, o le naitolaiserini. O lea suā’u’u suavaia e le itiiti ifo i le faaafe e malosi atu ai nai lo le oge uliuli. E faigofie lava ona nuti ai papa. Ae paga lea, sa le’i mautu lelei le naitolaiserini. Afai e te faapa’ū ifoa mai sina maualuga laitiiti, e pasae. Afai e vevela tele, e pasae. Afai e malulu tele, e pasae. E tusa foi pe tuu i se potu malū, pogisa ma tuu e le lotea, e oo lava ina pasae. O le tele o atunuu na faasāina ai le fela’ua’i, e tele foi na faasāina lona gaosia.

I le 1860, sa i ai se saienitisi Suetena e igoa ia Alfred Nobel, na amata taumafai e faamautu le naitolaiserini. I le mavae ai o tausaga e fitu o le taumafaiga e faataitai, sa ausia lana sini e ala i le fufui o le naitolaiserini i se anomea e faalētaua ua lauiloa o le limulimu po o le kieselguhr [kiseluku]. O le kieselguhr [kiseluku] o se papa pūpū e mafai ona nutililii i se pauta malū. A palu faatasi ma le naitolaiserini, ona miti’ia lea e le kiseluku le naitolaiserini ma maua ai se kulimi e mafai ona mamanu i ni “fasilaau.” O lea faiga, na matuai mautu ai le naitolaiserini. E mafai ona teumaluina, feavea’i, ma faaaoga e aunoa ma le faaitiitia o le malosi e faapa ai. Na faaigoa e Nobel le tuufaatasiga o le naitolaiserini ma le kiseluku o le “fanai’a.”

Na suia e le fanai’a le lalolagi. Na afua ai foi ona maumea Nobel. A na leai se kemikolo e faamautu ai, semanu e matuā lē saogalemu le naitolaiserini ma lē taua faapisinisi, e pei ona iloaina e Ascanio Sobrero. A na o ia lava, e pei ona ou ta’ua, o le kiseluku e itiiti lava le aogā. Ae o le tuufaatasiga o elemene e lua ua maua ai le suiga o le fanai’a ma taua ai.

I se tulaga foi faapena, o le tuufaatasiga o le talalelei a Iesu Keriso ma Le Ekalesia a Iesu Keriso o le Au Paia o Aso e Gata Ai, ua maua ai faamanuiaga mamana ma suiga mo i tatou. E atoatoa le talalelei, ae o se ekalesia ua poloaiina mai le lagi na manaomia e folafolaina atu, tausisia lona mamā a’ia’i, ma faatautaia ona sauniga paia i le pule ma le mana a le Faaola.

Mafaufau i le tuufaatasiga o le talalelei a le Faaola ma Lana Ekalesia e pei ona faatuina e le perofeta o Alema i le Tusi a Mamona. Sa nafa le Ekalesia ma le folafolaina atu o le “leai se isi mea vagana ai le salamo ma le faatuatua i le Alii, o lē [o le a togiolaina] lona nuu.” O le faaaogaina o le pule a le Atua, sa nafa ai le Ekalesia ma le faatautaia o le sauniga o le papatisoga “i le suafa o le Alii, e fai ma molimau [o le ulu atu] i se feagaiga ma ia … [e] auauna ia te ia ma tausi ana poloaiga.” O tagata na papatiso na latou tauave i o latou lava luga le suafa o Iesu Keriso, ma auai faatasi i Lana Ekalesia, ma sa folafola atu ia te i latou le mana tele e ala i se liligi mai o le Agaga.

Sa lolofi atu tagata i le vai o Mamona e faalogologo ia Alema o folafola atu le talalelei. E ui ina sa latou ava ma migao i na vai ma vaomatua na siomia ai, o le Ekalesia a le Alii sa le o se nofoaga po o se fale, ma e faapena foi i aso nei. O le Ekalesia ua na o ni tagata masani, o soo o Iesu Keriso, e faapotopoto ma faatulaga e avea o se fausaga ua tofia lea e fesoasoani ai i le Alii ia ausia Ona faamoemoega. O le Ekalesia o le meafaigaluega lea tatou te aoao mai ai le matafaioi tutotonu a Iesu Keriso i le fuafuaga a le Tama Faalelagi. Ua ofoina mai e le Ekalesia le ala faatuatuaina mo tagata taitoatasi e auai ai i sauniga ma osia ai feagaiga e faavavau ma le Atua. O le tausia o na feagaiga tatou te latalata atili ai i le Atua, tatou te maua ai le avanoa i Lona mana, ma suia ai i tatou i tagata ua faamoemoe o Ia tatou te avea ai.

E pei lava o le fanai’a a leai se naitolaiserini o le a le matua’i lelei, e faatoa faapitoa foi le Ekalesia a le Faaola pe afai e fausia i luga o Lana talalelei. A aunoa ma le talalelei a le Faaola ma le pule e faatautaia ai na sauniga, e le tulaga ese le Ekalesia.

A aunoa ma le aafiaga faamautu a le kiseluku, e utiuti le aogā o le naitolaiserini o se mea faapā. E pei ona faaalia i le talafaasolopito, a aunoa ma le Ekalesia a le Alii, e faapena foi ona lē mautu le malamalama o tagata i Lana talalelei—e ono pagatia i le tafetafea solo faaleaoaoga faavae ma aafia ai i tosinaga o tapuaiga, aganuu, ma filosifia eseese. O se taunuuga o le tuufaatasia o na tosinaga na faaalia i tisipenisione uma e oo mai i lenei tisipenisione faaiu. E ui ina sa amata faaalia mai le talalelei i lona mamā a’ia’i, ae o le faaliliuga ma le faaaogaina o lena talalelei, na faifaimalie ona tauavea se ituaiga o faaleatua lea na leai se mana ona sa le’i i ai le faavaa faatagaina mai le lagi.

O Le Ekalesia a Iesu Keriso o le Au Paia o Aso e Gata Ai, ua mafai ai ona maua le mana o le Atua ona ua faatagaina mai e Ia e aoao atu ai le aoaoga faavae a Keriso ma ofo atu ai sauniga laveai ma le faaeaga o le talalelei. E finagalo le Faaola e faamagalo a tatou agasala, fesoasoani ia tatou maua Lona mana, ma suia i tatou. Na puapuagatia o Ia mo a tatou agasala ma matuai naunau e faamagalo i tatou mai le faasalaga semanu ua tatau ai mo i tatou. E finagalo o Ia ia tatou paia ma faaatoatoaina ia te Ia.

E i ai ia Iesu Keriso le mana e faia ai lenei mea. Sa le na ona Ia lotofaavauvau i o tatou lē atoatoa ma tagiaue i lo tatou ta’usalaga e faavavau ona o taunuuga o le agasala. Leai, na ia sopoia ona talaatu, e le muta ona talaatu, ma sa toefuata’ia Lana Ekalesia ina ia faigofie ai ona maua Lona mana.

O le ute o le talalelei o loo aoao mai e le Ekalesia e faapea, na tauave e Iesu “o tatou tiga, ma tauave o tatou faanoanoaga.” Sa “faaoo ia te Ia [Ieova] le amio leaga o i tatou uma.” Sa Ia “onosaia le satauro,” motusi “noataga o le oti,” sa “afio ae i le lagi, ma … ma ua afio i le itu aao taumatau o le Atua, e maua mai i le Tamā ana aia o le alofa mutimutivale.” Sa faia e le Faaola nei mea uma ona e alofa o Ia i Lona Tama ma e alofa o Ia ia te i tatou. Ua uma ona Ia totogia le tau e le iu ina ia mafai ona Ia “maua i latou uma o e faatuatua ia te ia [ma faufautua]” mo i latou—mo i tatou. E leai se isi mea e manao ai Iesu Keriso nai lo mo i tatou ia salamo ma o mai ia te Ia, ina ia mafai ona Ia ta’uamiotonuina ma faapaiaina i tatou. I lea naunautaiga, e finafinau o Ia ma e mausali.

O le mauaina o le mana faalefeagaiga a le Atua ma Lona alofa faalefeagaiga e ala mai lea i Lana Ekalesia. O le tuufaatasiga o le talalelei a le Faaola ma Lana Ekalesia e suia ai o tatou olaga. Na suia ai matua o matua o lo’u tina. O lo’u tamamatua, o Oskar Andersson, sa faigaluega i se nofoaga e toso ai vaa i Högmarsö, o se motu i atumotu o Stockholm. O lona toalua, o Albertina, ma le la fanau sa nonofo i le motu autu o Suetena. E taitasi i vaiaso ta’ilua uma, i Aso Toonai, sa aloalo atu e Oskar lana vaa i le fale mo le faaiuga o le vaiaso, a o le’i toe foi i Högmarsö i le afiafi o le Aso Sa. I se tasi aso, a o i ai i Högmarsö, sa ia faalogo i ni faifeautalai se toalua mai Amerika, o folafola atu le talalelei toefuataiina a Iesu Keriso. Sa lagona e Oskar o le mea sa ia faalogoina o se upumoni a’ia’i, ma sa faatumulia o ia i le olioli e le mafaaleoina.

O le isi taimi na ia toefoi mai ai i le fale, sa faamatala ma le fiafia e Oskar ia Albertina, mea ma e uiga i faifeautalai. Sa ia faamatalaina na talitonu o ia i mea sa la aoao atu. Sa ia fai atu ia te ia e faitau tamaitusi na tuu atu ia te ia e faifeautalai; ma sa ia fai atu e le’i manatu o ia e tatau ona papatisoina se tasi o a la fanau i le lumanai o ni tamameamea. Sa faalii Albertina ma tauai tamaitusi i le faaputuga lapisi. Sa le’i tele ni a la tala na fai a o le’i alu Oskar e faigaluega i le afiafi o le Aso Sa.

O le taimi lava na alu ai o ia, sa toe aumai ai e Albertina ia tamaitusi. Sa ia faatusatusaina ma le toto’a a latou aoaoga faavae ma aoaoga a lana Tusi Paia ua masaesae i le faaaoga soo. Na faateia o ia i lona lagonaina e moni mea sa ia faitauina. O le isi taimi na toefoi mai ai Oskar i le fale, sa ia mauaina se faafeiloaiga mafanafana, e faapei ona faia e le kopi o le Tusi a Mamona na sau ma aumai. Sa faitauina ma le naunauta’i e Albertina, ma toe faatusatusa foi le aoaoga faavae i aoaoga a lana Tusi Paia. E pei o Oskar, sa ia iloaina le upumoni mamā ma sa faatumulia o ia i le olioli e lē mafaamatalaina.

Sa masii Oskar, Albertina, ma le la fanau i Högmarsö ina ia latalata ai i nai tagata toalaiti o le Ekalesia iina. I se vaiaso talu ona papatiso Oskar ma Albertina i le 1916, sa tofia ai Oskar e avea ma taitai vaega i Högmarsö. E faapei o le toatele o tagata fou e liliu mai, sa feagai Oskar ma Alberta ma faitioga ona o lo la faatuatuaga fou. Sa mumusu le aufaifaatoaga i le lotoifale e faatau atu ia i la’ua le susu, o lea sa alo ai e Oskar lona vaa e sopoia le alavaa i aso uma e faatau mai le susu mai se faifaatoaga alofa.

Ae i tausaga na sosoo ai, sa faateleina le auai i le Ekalesia i Högmarsö, o le isi itu ona o le molimau mamana a Albertina ma le tuuto mumū a faifeautalai. Ina ua avea le vaega o se paranesi, sa tofia Oskar e avea ma peresitene o le paranesi.

E ava ma migao tagata o le paranesi i Högmarsö i lena motu. O lo latou Vai o Mamona lea. O iinei na latou maua ai se malamalama i lo latou Togiola.

I le aluga o tausaga, a o latou tausia a latou feagaiga o le papatisoga, sa suia Oskar ma Albertina e le mana o Iesu Keriso. Sa naunau i la’ua ia toe osia nisi feagaiga ma maua o la faamanuiaga o le malumalu. Ina ia maua na faamanuiaga, sa la faimalaga tumau mai lo la aiga i Suetena i le Aai o Sate Leki i le 1949. Sa auauna atu Oskar o se taitai o le au paia i Högmarsö mo le 33 tausaga.

O le tuufaatasiga o le naitolaiserini ma le kiseluku, na tāua ai le fanai’a; o le tuufaatasiga o le talalelei a Iesu Keriso ma Lana Ekalesia e le mafaatauina. Sa faalogo Oskar ma Albertina e uiga i le talalelei toefuataiina ona o se perofeta a le Atua sa valaauina, tofia, ma auina atu faifeautalai i Suetena. E ala i le poloaiga faalelagi, na aoao atu ai e faifeautalai le aoaoga faavae a Keriso ma e ala i le pule o le perisitua na papatisoina ai Oskar ma Albertina. I le avea ai ma tagata o le ekalesia, sa faaauau ai e Oskar ma Albertina ona aoao, atina’e, ma auauna atu i isi. Sa avea i laua ma Au Paia o Aso e Gata Ai ona sa la tausia feagaiga sa laua osia.

E ta’u e le Faaola Le Ekalesia a Iesu Keriso o le Au Paia o Aso e Gata Ai o “la’u Ekalesia” ona sa Ia poloaiina ia faataunuu Ona faamoemoega—o le folafola atu o Lana talalelei, ofoina atu Ana sauniga ma feagaiga, ma mafai ai e Lona mana ona ta’uamiotonuina ma faapaia i tatou. A aunoa ma Lana Ekalesia, e leai se pule, leai se talaiga o upumoni na faaalia mai i Lona suafa, leai ni sauniga po o feagaiga, leai se faaalia mai o le mana o le faaleatua, leai se suia i lē ua finagalo le Atua e avea ai i tatou, ma o le mea noa le fuafuaga a le Atua mo Lana fanau. O le Ekalesia i lenei tisipenisione e taua i Lana fuafuaga.

Ou te valaaulia oe ia tuuto atu oe lava ma le atoatoa i le Faaola, Lana talalelei, ma Lana Ekalesia. A e faia, o le a e iloa ai o le tuufaatasiga o le talalelei a le Faaola ma Lana Ekalesia e aumaia ai le mana i lou olaga. O lenei mana e sili mamao atu nai lo le fanai’a. Na te nutililiiina papa i lou ala ma suia oe e avea o se suli i le malo o le Atua. Ma o le a “faatumuina oe i lena olioli lea ua le magagana ma ua tumu i le mamalu.”. I le suafa o Iesu Keriso, amene.

Faamatalaga

  1. O le oge uliuli o se paluga o le potassium nitrate (saltpeter), sulfur, ma le malala. Ua faatulagaina o se mea faapa maulalo po o se mea faapa vaivai ona o le tuai tele ona pala, ma e tuai ona mu. O mea faapa maualuluga po o mea faapa malolosi e pasae nai lo le mumū, ma aumaia ai se galu tele e saoasaoa atu nai lo le alu o le leo.

  2. O fanai’a, ua mafai ai ona “saputu mai o mea e le mafaatusalia i le fausaga o ana o nofoaafi, faataatiaga o tane o otaota, ma auala i le manava o le eleele i le salafa o le lalolagi—poloketi tetele faaenisinia semanu e le mafai ona [ausia] e aunoa ma le gāpāpā faafoefoe [na faatagaina] e [lena] fanai’a. Sa toetoe o tulaga iloga uma faaenisinia na faataunuuina i le [faaiuiuga o le seneturi 19 ma le popofou o le seneturi 20)—le Manava o le Eleele o Lonetone, le Alalaupapa o Brooklyn, le Ala o Nofoaafi Fesopoa’i Konetineta, [ma le] Panama Canal—na tele ina faalagolago i le fanai’a fou” (Steven Johnson, The Infernal Machine: A True Story of Dynamite, Terror, and the Rise of the Modern Detective [2024], 24).

  3. Ona o le naitolaiserini sa le manuia faapisinisi, sa lei mauoa ai Ascanio Sobrero ona o lana fatufatuga. Ae, ina ua fausia e Alfred Nobel se falegaosi fanai’a i Avigliana, Italia i le 1873, sa tofia Sobrero e avea ma faufautua e lelei le totogi i le aloaia ai mo lona mauaina o le naitolaiserini. Sa umia e Sobrero lena tofiga seia oo i lona maliu i le 1888. (Tagai G. I. Brown, The Big Bang: A History of Explosives [1998], 106.)

  4. Mo le talafaasolopito o le oge uliuli, naitolaiserini, ma le fanai’a, tagai Brown, The Big Bang, 1–121.

  5. O le talalelei a Iesu Keriso e uiga tutusa ma le aoaoga faavae a Keriso.

  6. Tagai i le Mosaea 18:7, 20; 25:15, 22.

  7. Mosaea 18:10.

  8. Tagai i le 2 Nifae 31:13.

  9. Tagai i le Mosaea 18:17; 25:18, 23; Alema 4:4–5; Helamana 3:24–26; 3 Nifae 28:18, 23.

  10. Tagai i le 2 Nifae 31:12–14; Mosaea 18:10.

  11. O le Ekalesia o le ki i le ofoina atu o feagaiga paia i fanau a le Tama Faalelagi. O le mafuaaga lea i le taimi o faae’ega paia i totonu o malumalu, e osifeagaiga ai tagata e tausi le tulafono o le faapaiaga. O lona uiga latou te “tuuto atu o latou taimi, taleni, ma mea uma e faamanuiaina ai i latou e le Alii e fausia ai le Ekalesia a Iesu Keriso i le fogaeleele” (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 27.2, Potutusi o le Talalelei).

  12. Tagai i le Russell M. Nelson, “O Oa Faaleagaga,” Liahona, Nov. 2019, 77.

  13. Tagai i le Mosaea 18:22; Mose 6:68; Taiala i Tusitusiga Paia, “Sons and Daughters of God,” Potutusi o le Talalelei.

  14. Tagai i le 3 Nifae 27:13–21.

  15. Tagai i le Mataupu Faavae o le Faatuatua 1:5.

  16. Tagai i le Russell M. Nelson, “Olioli i le Meaalofa o Ki o le Perisitua,” Liahona, Me 2024, 121; 3 Nifae 27:9–11.

  17. O le Faaola “na tuuina mai i nisi, o aposetolo; ma i nisi, o perofeta; ma i nisi, o peteriaka; a o nisi, o faifeau ma faiaoga” ina ia “[mafai] ai e i tatou uma ona o mai i le lotogatasi i le faatuatua, ma le iloa o le Alo o le Atua, … ina ia le toe tama ninii i tatou, o loo felafoaiina e peau, ma feaveaiina e matagi uma lava o mataupu i le pepelo o tagata, i togafiti leaga e faasese ai” (Efeso 4:11–16).

  18. Soofaatasi o le faaupuga o le faafilogia o tapuaiga eseese, aganuu, po o le ala masani o mafaufauga.

  19. Tagai i le Iosefa Samita—Talafaasolopito 1:19.

  20. Tagai i le “O le Toefuataiga o le Atoatoaga o le Talalelei a Iesu Keriso: O le Folafolaga i le Lalolagi mo le Lua Selau Tausaga,” Potutusi o le Talalelei. O le folafolaga sa fofogaina e Peresitene Russell M. Nelson o se vaega o lana savali i le Konafesi Aoao Faaletausaga Lona 190, i le aso 5 o Aperila, 2020, i le Aai o Sate Leki, Iuta (tagai “Faalogo ia te Ia,” Liahona, Me 2020, 91–92).

  21. E mafai ona tatou maua le mana e ala i le faatinoina o le faatuatua ia Iesu Keriso, salamo i a tatou agasala, ma le tausiga o feagaiga tatou te osia ma le Tama Faalelagi ma Iesu Keriso i sauniga e pei o le papatisoga, o le faae’ega paia, ma le faamanatuga.

  22. Tagai i le Taiala i Tusitusiga Paia, “Tauamiotonuina, Tauamiotonu,” Potutusi o le Talalelei.

  23. Tagai i le Taiala i Tusitusiga Paia, “Faapaiaga,” Potutusi o le Talalelei.

  24. Tagai i le Moronae 10:32–33.

  25. Tagai i le Eperu 4:15; tagai foi i le vaefaamatalaga a.

  26. Tagai i le Mataupu Faavae ma Feagaiga 19:15–18.

  27. Tagai i le Isaia 53:4–12.

  28. Eperu 12:2.

  29. Mosaea 15:23.

  30. Moronae 7:27–28; tagai foi i le Mataupu Faavae ma Feagaiga 45:3–5.

  31. Tagai i le Mosaea 18:30.

  32. Tagai i le Inger Höglund and Caj-Aage Johansson, Steg i Tro: Jesu Kristi Kyrka av Sista Dagars Heliga i Sverige 1850–2000 (2000), 66–67.

  33. Mataupu Faavae ma Feagaiga 115:4.

  34. Tagai i le Mataupu Faavae ma Feagaiga 84:19-21

  35. Afai e te mauaina mea o loo ofoina mai e le Ekalesia a le Alii, e mafai ona faaatoatoaina oe ia Keriso ae le’i faaatoatoaina Lana Ekalesia, pe afai e i ai. O Lana sini ia faaatoatoa oe, ae le o Lana Ekalesia. Sa lei avea lava ma Lana sini, faafaatusa, le liliuina o le kiseluku i se taimane; o Lana sini ia faaleleia oe ia avea o se auro mao’i, ia laveai ma faaea oe o se suli faatasi ma Ia i le malo o lo tatou Tama Faalelagi. Ae e tatau ona avea foi lena mea o au sini. O lau filifiliga lena.

  36. Helamana 5:44.