Mulimuli ia Keriso
I le avea ai o ni soo o Keriso, tatou te aoao atu ma molimau atu e uiga ia Iesu Keriso, lo tatou Faataitaiga Atoatoa. O lea ia tatou mulimuli ia te Ia e ala i le lafoaiese o finauga.
O le tausaga lenei ua faitau miliona i latou ua musuia e le fuafuaga o le suesueina o le talalelei ua lauiloa i le valaaulia a le Faaola “Sau, mulimuli mai ia te au.” O le mulimuli ia Keriso e le o se faiga faasamasamanoa pe na o nisi taimi. O se tautinoga faifaipea ma o se ala o le olaga lea e tatau ona taialaina ai i tatou i taimi uma ma i nofoaga uma. O Ana aoaoga ma Lana faataitaiga ua maioio ai le ala mo soo uma o Iesu Keriso. Ua Ia valaaulia tagata uma e o mai i lenei ala, aua ua Ia valaaulia tagata uma e o mai ia te Ia, “uliuli ma le paʼepaʼe, e pologa ma le saoloto, o tane ma fafine; … ua tutusa tagata uma i le Atua.”
I.
O le uluai laasaga e mulimuli ai ia Keriso o le usitai lea i mea ua Ia faamanino mai “o le poloaiga sili i le tulafono”:
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe.
“O na poloaiga e lua ua autu ai le tulafono uma ma le au perofeta.”
O poloaiga a le Atua ua saunia ai le malosiaga taiala ma le mautu i o tatou olaga. O o tatou aafiaga i le olaga nei, e faapei o le tamaitiiti ma lona tamā na faalele se la maua i se aso matagiā. A o lelelele maualuga a’e le maua, o le malosi o savili sa lavea ma fili faatasi ai ma le manoa sa uuina i le lima o le tamaitiiti. O le leai o se poto masani i le malosiaga o matagi o le olaga nei, sa ia fautua atu e ooti le manoa ina ia mafai ai ona lele maualuga atu le maua. Sa fautua atu lona tamā poto e leai, ma faamalamalama i ai o le manoa o le mea lena o loo taofiofia lelei le maua mai matagi o le olaga. Afai e ta te faamamulua le manoa, o le a le lele maualuga atu le maua. O le a feavea’iina e matagi nei ma i’u ai ina patatu i le eleele.
O lena manoa taua ua faatusa i feagaiga o loo fesootai ai i tatou i le Atua, lo tatou Tama Faalelagi, ma Lona Alo o Iesu Keriso. A tatou faamamaluina na feagaiga e ala i le tausia o a La’ua poloaiga, ma mulimuli i la La’ua fuafuaga o le togiola, o a La’ua faamanuiaga folafolaina e mafai ai ona tatou felelei atu i mauga faaselesitila.
Ua tautino soo mai e le Tusi a Mamona e faapea o Keriso “o le malamalama o le lalolagi.” I le taimi na faaali atu ai o Ia ia sa Nifae, sa faamalamalama atu ai e le Alii toetu lena aoaoga i le ta’u atu ia te i latou: “Ua ou faia se faataitaiga mo outou.” “O A’u o le malamalama lea e tatau ona outou tuu i luga—mea ia na outou vaai ua ou faia.” O Ia o lo tatou faataitaiga. Ua tatou aoaoina o mea sa Ia fetalai i ai ma fai e ala i le suesueina o tusitusiga paia ma mulimuli i aoaoga faaperofeta e pei lava ona faamanatu mai e Peresitene Russell M. Nelson ia i tatou e fai. I le sauniga o le faamanatuga, tatou te osifeagaiga ai i aso Sapati taitasi o le a tatou “manatua pea o ia ma tausi i Ana poloaiga.”
II.
I le Tusi a Mamona, na tuuina mai ai e le Alii ia i tatou mea faavae autu ua Ia ta’ua “o le mataupu faavae a Keriso.” O ia mea o le faatuatua i le Alii o Iesu Keriso, salamo, papatisoga, mauaina o le meaalofa o le Agaga Paia, tumau e oo i le iuga, ma le avea e faapei o se tamaitiiti, o lona uiga ia faalagolago i le Alii ma usiusitai i mea uma ua Ia manaomia mai ia i tatou.
O poloaiga a le Alii e lua ituaiga, e tumau e faapei o le mataupu faavae a Keriso, ma lē tumau. O poloaiga lē tumau, o mea ia e tatau ai mo manaoga o le Ekalesia a le Alii po o le au faamaoni i tulaga lē tumau, ae e ao ona faataatia ese pe a uma le manaoga. O se faataitaiga o poloaiga lē tumau mo na o sina taimi o faatonuga ia a le Alii i le taitaiga i popofou o le Ekalesia e ave le Au Paia mai Niu Ioka i Ohaio, i Misuri, i Ilinoi, ma faaiu ai ina taitai le malaga umi a paionia i Atumauga i Sisifo. E ui ina e lē tumau, ae i le taimi e faamalosia ai, o nei poloaiga na tuuina mai ina ia usita’ia.
O nisi o poloaiga tumau e matuai tele le taimi e ao ai ona tausia lautele. Mo se faataitaiga, o le lauga lauiloa a Peresitene Lorenzo Snow e uiga i le tulafono o le sefuluai na faamamafaina ai se poloaiga na tuuina mai muamua ae e lei tausia lautele e tagata o le Ekalesia. Na moomia ona toe faamamafa i tulaga na feagai ma le Ekalesia ma ona tagata i lena taimi. O faataitaiga talu ai nei o mea e faamamafa ua manaomia ona o tulaga o loo tutupu nei o loo feagai ma le Au Paia o Aso e Gata Ai po o le Ekalesia. O nei mea e aofia le folafolaga i le aiga na tuuina mai e Peresitene Gordon B. Hinckley i se tupulaga talu ai, ma le valaaulia talu ai nei a Peresitene Russell M. Nelson mo le Ekalesia ua lauiloa nei i lona igoa na faaalia, O Le Ekalesia a Iesu Keriso o le Au Paia o Aso e Gata Ai.
III.
O se tasi o aoaoga a lo tatou Faaola ua foliga mai e manaomia ai le toefaamamafa i tulaga o o tatou taimi.
O se taimi lenei o le tele o upu mamafa ma faatiga i talanoaga faitele ma o nisi taimi ua oo lava i o tatou aiga. O eseesega o manatu malolosi e uiga i mataupu o aiaiga faalauaitele e tele ina taunuu i faatinoga o le fe’aina’i—o le feitaga’i—i nofoaga faitele ma sootaga patino. O lea siosiomaga o le feitaga’i o nisi taimi e oo ai lava ina faigata i le au faitulafono ona fai ni faaiuga faaupufai i ni mataupu taua ia e iloa e le toatele o tagatanuu o se manaoga faananati mo se faaiuga ona e aafia ai tagata lautele.
O a mea e tatau i soo o Keriso ona aoao atu ma fai i le taimi lenei o fesootaiga ma talanoaga le lelei? O a Ana aoaoga ma faataitaiga?
E taua tele o se tasi o muai mataupu faavae na aoao atu e Iesu ina ua faaali atu o Ia ia sa Nifae, o le aloese lea mai finauga. E ui sa Ia aoao atu i le matalalaga o feeseeseaiga i aoaoga faavae faalelotu, ae o mafuaaga na Ia tuuina atu ma le manino e faatatau i fesootaiga ma sootaga i upufai, aiaiga faitele, ma sootaga faaleaiga. Na aoao mai e Iesu:
“O le e i ai le agaga o le finauga ua le mai ia te au o ia, ae ua mai le tiapolo ia, o le o le tamā o le finauga, ma ua faaoso e ia loto o tagata ia fefinauai ma le ita, o le tasi i le isi.
“Faauta, e le o la’u mataupu lea, le faaoso o loto o tagata i le ita, o le tasi e faasaga i le isi; ae o la’u mataupu lenei, ia aveesea mea faapena.”
I le toega o Lana misiona ia sa Nifae, sa aoao atu ai e Iesu isi poloaiga e fesootai lelei ma Lona faasaina o finauga. Ua tatou iloa mai le Tusi Paia sa Ia aoao mai muamua e uiga i nei mea i Lana Lauga maoae i luga o le Mauga, e masani i le gagana lava e tasi na Ia faaaoga mulimuli ane ia sa Nifae. O le a ou sii maia le gagana ua masani ai i le Tusi Paia.
“Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuaifua mai ma faasaua mai ia te outou.”
O se tasi lenei o poloaiga sili ma lauiloa a Keriso—sili ona fou ae sili foi ona faigata ona mulimulita’ia. Ae o se vaega sili ona taua o Lana valaaulia mo tagata uma e mulimuli ia te Ia. E pei ona sa aoao mai e Peresitene Tavita O. MaKei, “E leai se isi auala e sili atu e faaali atu ai lo tatou alolofa i le Atua nai lo le faaali atu o se alofa e le faapito i o tatou uso a tagata.”
O se isi lenei aoaoga autu a Ia, o lo tatou faataitaiga atoatoa: “Amuia e faatupuina le filemu: aua e ta’ua i latou o fanau o le Atua.”
O e faatupuina le filemu! E ma’eu se suiga o le a i ai sootaga patino pe afai o le a lafoai e soo o Keriso upu malolosi ma faatiga i a tatou talanoaga ma fesootaiga uma.
I le konafesi aoao i le tausaga ua mavae, sa tuuina mai ai e Peresitene Russell M. Nelson ia lui nei:
O se tasi o ala aupito faigofie e faailoa ai se soo moni o Iesu Keriso o le ala e taulima ai ma le agaalofa e lena tagata isi tagata. …
“… O soo moni o Iesu Keriso o ni tagata e faatupuina le filemu.
“… O se tasi o auala pito sili e mafai ai ona tatou faamamaluina le Faaola o le avea lea ma sē e faatupuina le filemu.”
I le faaiuina o ana aoaoga: “O finauga o se filifiliga. O le faatupuina o le filemu o se filifiliga. Ua ia te oe lau faitalia e filifili ai ia finauga po o le faaleleiga. Ou te uuna’ia outou ia filifili e avea o sē e faatupuina le filemu, nei ma aso uma.”
I talanoaga, e ao i ē ono tupu ai finauga ona amata i le faailoa o itu masani e malilie uma i ai.
Ina ia mulimuli i lo tatou Faataitaiga Atoatoa ma Lana perofeta, e manaomia ona tatou faata’ita’ia le mea ua lauiloa nei o le Tulafono Faaauro: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou: aua o le tulafono lea ma le au perofeta.” E manaomia ona tatou alolofa ma faia mea lelei i tagata uma. E manaomia ona tatou aloese mai finauga ma ia avea o ni e e faatupuina le filemu i a tatou fesootaiga po o talanoaga uma. E le faapea ai e fetuunai a tatou mataupu faavae ma mea e faamuamua, ae ia tuu le osofa’ia ma le pa’a’a o isi ona o a latou mataupu. O le mea lena na fai e lo tatou Faataitaiga Atoatoa i Lana misiona. O le faataitaiga lena na ia faia mo i tatou a o Ia valaaulia i tatou e mulimuli atu ia te ia.
I lenei konafesi i le fa tausaga talu ai, sa tuuina mai ai e Peresitene Nelson ia i tatou se lu’i faaperofeta mo o tatou lava aso:
“Pe ua e loto e faamuamua le Atua i lou olaga? O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo o se isi lava leo?”
I le avea ai o ni soo o Keriso, tatou te aoao atu ma molimau atu e uiga ia Iesu Keriso, lo tatou Faataitaiga Atoatoa. O lea ia tatou mulimuli ia te Ia e ala i le lafoaiese o finauga. A o tatou tulitulimatagauina a tatou aiaiga tatou te fiafia i ai i faatinoga lautele, ia tatou agavaa mo Ana faamanuiaga e ala i le faaaogaina o le gagana ma metotia a i latou e faatupuina le filemu. I o tatou aiga ma isi sootaga patino, ia tatou aloese mai mea pa’a’a ma le inosia. Ia tatou saili ia paia, e faapei o lo tatou Faaola, o lē o Lona suafa paia ou te molimau atu ai ma talosagaina Ana faamanuiaga e fesoasoani ai ia i tatou ia avea ma Tagata Paia. I le suafa o Iesu Keriso, amene.