Ua Sauni Aao o le Alii e Fesoasoani ia i Tatou

Saunia e Elder Juan Pablo Villar

O Le Fitugafulu

A o tatou aapa atu ia Iesu Keriso i le faatuatua, o le a i ai o Ia iina e le aunoa.

A o o’u laitiiti, sa matou o ai o se aiga e tafafao i se matafaga i le talafatai o lo’u atunuu moni, o Chile. Sa ou fiafia lava e faaalu ni nai aso e olioli ai i le taumafanafana ma lo’u aiga. Sa ou matuai fiafia foi ona sa ou manatu ua mafai ona ou aufaatasi ma faia mea sa masani e o’u uso matutua ona fai e fiafia ai i le vai.

I se tasi aso, sa o ai o’u uso e taaalo i le mea sa fafati mai i ai galu, ma sa ou manatu ua lava lo’u malosi ma lo’u matua e mulimuli ai ia te i la’ua. A o o’u agai atu i lena vaega, sa ou iloa ai e tetele atu galu nai lo se vaaiga mai le matafaga. Sa faafuasei, le vave oo mai o se galu ia te a’u, ma aveese atu ai a’u e aunoa ma so’u iloaina. Sa ou lagona ua pei ua taena’i a’u e le malosi o le natura, ma sa toso atu ai a’u i le loloto o le sami. Sa le mafai ona ou iloa pe lagonaina se itu e tautatā i ai ona sa featofa’i solo a’u. O le taimi lava na ou manatu ai atonu ua oo mai le i’uga o lo’u ola, sa ou lagonaina se lima o tosoina a’u i luga. Na i’u ina mafai ona ou vaaia le la ma mafai ona ou manava.

Na iloa mai e lo’u uso o Claudio ia a’u taumafaiga e fia faapei o se tama matua, ma sau ai e lavea’i a’u. Sa ou le mamao mai le matafaga. E ui ina sa papa’u le vai, ae sa ou fememea’i ma ou te le’i iloaina semanu e mafai lava ona ou fesoasoani ia te a’u lava. Sa fai mai Claudio sa tatau ona ou faaeteete ma afai ou te manao ai, e mafai ona ia aoao mai a’u. E ui i kalone vaisami sa ou foloina, sa sili ona malosi atu lo’u mimita ma lo’u manao e fia tama matua, ma sa ou fai atu, “Ua lelei.”

Sa tau mai e Claudio ia te a’u e tatau ona ou osofaia ia galu. Sa ou fai ifo ia te a’u lava, e mautinoa lava lo’u faia’ina i lena taua e faasaga i le mea sa foliga mai o se papupuni tele o le vai.

A o latalata mai se galu lapo’ā, sa vave fai mai Claudio: “Vaai mai ia te a’u; e faapea ona e faia.” Sa tamoe Claudio agai atu i le galu o loo sau ma puna atu i ai a o le’i fati. Sa faagaeetia lava a’u i lana puna ma sa ou lē iloaina ai le isi galu na sosoo mai ai. O lea la, sa toe auina atu ai foi a’u i le loloto o le sami ma featofa’i solo ai e ‘au o le natura. Na mavae ni nai sekone, sa papa’i mai se lima i lo’u lima, ma sa toe toso mai ai foi a’u i luga ma toe maua ai le ea. Sa mou malie atu le afimumu o lo’u mitavale.

O le taimi lea, sa valaaulia ai a’u e lo’u uso ma te fepuna faatasi. O lana valaaulia la, na ou mulimuli ai ia te ia, ma ma fepuna faatasi. Sa ou lagonaina e faapei ua ou faatoilaloina le luitau aupito sili ona faigata. E moni, sa le’i faigofie, ae sa ou mafaia, faafetai i le fesoasoani ma le faataitaiga na faailoa mai e lo’u uso. Na faalua ona lavea’i a’u e lona lima; o lana faataitaiga na faaali mai ai ia te a’u le ala e taulima ai o’u luitau ma manumalo ai i lena aso.

Sa valaaulia i tatou e Peresitene Russell M. Nelson e mafaufau faaselesitila, ma ou te manao e mulimuli i lana fautuaga ma faaaoga i la’u tala o le taumafanafana.

O Le Mana o le Faaola e faatoilalo ai le Fili

Afai tatou te mafaufau faaselesitila, o le a tatou malamalama ai, i o tatou olaga o le a tatou feagai ai ma luitau e foliga e tetelē atu nai lo tatou gafatia e faatoilalo ai. I le taimi o lo tatou olaga faitino, o le a tatou le ma’alofia osofaiga a le fili. E faapei o galu na lafotuina a’u i lona malosiaga i lena aso o le taumafanafana, e mafai ona tatou lagonaina le leai o se malosi ma mananao ai e faamatuu atu i se taunuuga e malosi atu. O na “galu matamataita” e mafai ona fetuleia’i solo ai i tatou. Ae aua nei galo lē o i ai le mana i na galu, ma o le mea moni, i mea uma lava. O lo tatou Faaola lea, o Iesu Keriso. Ua i ai ia te Ia le mana e fesoasoani ai tatou te o ese mai i tulaga faanoanoa po o tulaga faigata. Tusa pe tatou te lagona le latalata ia te Ia, e mafai lava ona Ia aapa mai i le mea o tatou i ai ma tagata o tatou i ai.

A o tatou aapa atu ia te Ia i le faatuatua, o le a i ai lava o Ia iina, ma i Lona taimi, o le a saunia o Ia ma naunau e pu’e mai o tatou lima ma toso mai i tatou i se nofoaga saogalemu.

O Le Faaola ma Lana Faataitaiga Faaleauaunaga

Afai tatou te mafaufau faaselesitila, o le a tatou iloaina Iesu Keriso o se faataitaiga o le auaunaga e leai se ila. O loo i ai se mamanu mo i tatou i tusitusiga paia ina ua aapa atu o Ia po o Ona soo i se tasi e manaomia le fesoasoani, lavea’i, po o se faamanuiaga a o latou aapa atu ma o latou lima. E faapei o la’u tala, sa ou iloaina sa i ai lo’u uso iina, ae mo a’u, o le i ai iina sa le’i lava. Sa iloa e Claudio ua ou i ai i se tulaga faaletonu, ma sa alu o ia e fesoasoani e sisi a’e a’u mai le vai.

O nisi taimi, tatou te mafaufau ai e na ona moomia lava o lo tatou i ai iina mo se tagata o manaomia le fesoasoani, ae e tele taimi, e tele atu mea e mafai ona tatou faia. O le i ai o se vaaiga e faavavau, e mafai ona fesoasoani ia i tatou e maua ai faaaliga e ofo atu ai se fesoasoani i le taimi e tatau ai i isi e moomia. E mafai ona tatou faalagolago i le taitaiga ma musumusuga a le Agaga Paia e iloatino ai le ituaiga o fesoasoani e manaomia, pe o se lagolago faaletino e faapei o le faamafanafanaga faalelagona, meaai, fesoasoani i feau i aso taitasi, po o le taitaiga faaleagaga e fesoasoani ai i isi i a latou malaga e saunia, osia, ma faamamalu feagaiga paia.

Ua Sauni le Faaola e Laveai i Tatou

I le taimi na “savali ai [Peteru], le Aposetolo sinia” i luga o le sami, e alu ia Iesu … sa fefe o ia; ma amata ona magoto,” ona “ia alaga lea ma faapea atu, Le Alii e, ia e faaola mai ia te au.” Sa silafia e Iesu le faatuatua na faatino e Peteru e sau ia te ia i luga o le sami. Sa Ia silafia foi le fefe o Peteru. E tusa ai ma le tala, sa “vave loa lava ona … faaloaloa atu [e Iesu] Lona aao, ma pue o ia,” ma fetalai atu i upu nei: “O oe na lē faatuatua itiiti, se a le mea ua e masalosalo vale ai?” O ana upu sa le otegia ai Peteru ae faamanatu ai ia te ia faapea o Ia, o le Mesia, sa faatasi ma ia ma le au soo.

Afai tatou te mafaufau faaselesitila, o le a tatou maua le faamautuuga i o tatou loto faapea e moni lava o Iesu Keriso lo tatou Lavea’i, o lo tatou Fautua i le Tama, ma o lo tatou Togiola. A tatou faaaoga lo tatou faatuatua ia te Ia, o le a Ia faaolaina i tatou mai o tatou tulaga pa’ū, i talaatu o o tatou luitau, vaivaiga, ma manaoga i lenei olaga faaletino, ma aumaia ia i tatou le meaalofa aupito silisili o meaalofa uma, o le ola e faavavau lea.

E Le Fiu Lava le Faaola Ia i Tatou

E le’i fiu lo’u uso ia te a’u i lena aso, ae sa finafinau pea ina ia mafai ona ou aoaoina le ala e faia ai mo a’u lava ia. Sa finafinau o ia, tusa lava pe na manaomia ai lona lavea’ia faaluao a’u. Sa finafinau o ia tusa lava pe na ou le’i malamalama i ai muamua. Sa finafinau o ia ina ia mafai ai ona ou faatoilalo lena luitau ma faamanuiaina. Afai tatou te mafaufau faaselesitila, o le a tatou iloaina o le a i ai lo tatou Faaola iina po o le a lava le tele o taimi e tatau ai e tuuina mai le fesoasoani pe afai tatou te mananao e aoao, sui, manumalo, galulue faatasi, pe faamanuiaina i soo se mea e aumaia ai le fiafia moni ma faavavau i o tatou olaga.

O Aao o le Faaola

Ua faaeaina e tusitusiga paia le faatusa ma le taua o aao o le Faaola. I Lana taulaga togiola, sa tutu’ia Ona aao i fao e faamau ai o Ia i luga o le satauro. Ina ua mavae Lona Toetu, sa Ia faaali i Ona soo i se tino ua atoatoa, ae sa tumau ai pea faailoga i Ona aao e avea o se faamanatu o Lana taulaga e le i’u. O le a i ai pea Ona aao iina mo i tatou, tusa lava pe le mafai ona tatou vaai i ai pe tagotago foi i ai muamua, ona sa filifilia o Ia e lo tatou Tama Faalelagi e avea ma o tatou Faaola, o le Togiola o tagata uma.

Afai ou te mafaufau faaselesitila, ou te iloa e le o tuulafoaia i tatou i lenei olaga. E ui ina tatau ona tatou feagai ma luitau ma tofotofoga, e silafia lava e le Tama Faalelagi o tatou gafatia ma silafia e mafai ona tatou onosaia pe faatoilaloina o tatou faigata. E tatau ona faia la tatou vaega ma liliu atu ia te Ia i le faatuatua. O Lona Alo, o Iesu Keriso, o lo tatou lavea’i ma o le a i ai pea o Ia iina. I Lona suafa paia, le suafa o Iesu Keriso, amene.