Sailia o Tali i Fesili Faaleagaga
O a tatou fesili faamaoni o le talalelei e mafai ona tuuina atu ai i le Tama Faalelagi ma Iesu Keriso ni avanoa e fesoasoani ai ia tatou tuputupu a’e.
Ou te iloa o lenei mea e ono faateia ai, ae ua lava lou matua e manatua ai le taimi na aoaoina ai i matou i le aoga e faapea, e iva paneta i lo tatou taatiaga o paneta. O se tasi o na paneta o Pulotu, sa faaigoaina e se teineitiiti e 11-tausaga le matua o Venetia Barney o Oxford, Egelani, ma ina ua mavae lona mauaga i le 1930. Ma e oo mai i le 1992, na talitonuina o Pulotu o le mea faitino aupito mamao lea i la tatou taatiaga o paneta. I le taimi lea, sa masani ona maua faataitaiga o vaifale o tatou paneta e fai i fasipepa i totonu o potuaoga ma faaaliga faasaienisi, o mea taitasi na faaalia ai le tulaga o Pulotu i luga o se tuaoi na iloa. Na talitonu le toatele o saienitisi o tua atu o lena faatausiusiuga o le taatiaga o paneta na i ai se laolao gaogao.
Ae peitai, sa tumau le faamalumalu ifo o se fesili i le lotoifale faasaienisi e uiga i le afuaga o se ituaiga fetulele faapitoa lea na masani ona tulitulimatagauina e le au vaaifetu. Ma ua fiasefulu tausaga o i ai lena fesili ao lei maua se isi itu mamao o le tatou taatiaga o paneta. Faatasi ai ma le utiuti o le malamalama sa i ai, na faaaoga ai e saienitisi le fiasefulu o tausaga i le va o mea na tutupu e gaosi ai ni taumafaiga iloga faatekinolosi na mafai ai ona fai ni suesuega ma ni sailiiliga atili. O le mea na iu ina latou maua na toe faatulaga ai la tatou sone faapaneta ma iu ai ina toe maua se nofoaga fou o Pulotu i lenei vaega fou o le laolao ma le tatou taatiaga o paneta e aofia ai paneta e valu.
Na fai mai se taitai saienitisi o paneta ma o le alii suesue autu o le misiona a le New Horizons na nafa ma le sailiiliga o Pulotu e uiga i lenei aafiaga: “Sa matou manatu ua tatou malamalama i le folasiaga o le taatiaga o le tatou paneta. E leai. Sa tatou manatu ua tatou malamalama i le faitauaofai o paneta i le taatiaga o le tatou paneta. Ma sa tatou sese lava.”
O le mea mataina ia te au e uiga i lenei vaitaimi o le talafaasolopito o le suesuega o le atulaulau, o ni isi o itu e tutusa ai ma eseesega autu i le va o le taumafaiga faafaatusa o le faalautelega o tafailagi faasaienitisi ma le malaga o loo tatou faia o ni fanau a le Atua, e su’e tali i a tatou fesili faaleagaga. E faapitoa lava, i le pe faapefea ona tatou tali atu i tapulaa o o tatou malamalama faaleagaga ma saunia ai i tatou lava mo le isi vaega e sosoo ai o le tuputupu ae patino—ma po o fea tatou te liliu atu i ai mo se fesoasoani.
Lea Fuaitau i luga o Lea Fuaitau
O le faia o fesili ma le sailia o faauigaga o se vaega faalenatura ma masani ai o lo tatou aafiaga i le olaga faaletino. E i ai taimi, o le le i ai o ni tali atoatoa i lea taimi e mafai ona aumaia ai i tatou i le faatausiusiuga o lo tatou malamalama, ma o na tapulaa e mafai ona lagona ai le le fiafia po o le lofituina. E maoae, o le fuafuaga o le fiafia a le Tama Faalelagi mo i tatou uma ua mamanuina e fesoasoani tatou te alualu ai i luma e ui lava i o tatou tapulaa ma ausia ai mea e le mafai ona tatou ausia nao i tatou lava, e tusa lava pe aunoa ma se malamalama atoatoa i mea uma. O le fuafuaga a le Atua e alofa mutimutivale i tapulaa o lo tatou tulaga faaletagata; saunia mo i tatou lo tatou Faaola, o Iesu Keriso, e avea ma o tatou Leoleo Mamoe Lelei; ma musuia i tatou e faaaoga o tatou faitalia e filifili ai o Ia.
Na aoao mai Elder Dieter F. Uchtdorf, “o le faia o fesili e le o se faailoga lea o le vaivai; ae “o se taimua o le tuputupu ae.” O le saunoa tuusao mai ai i la tatou taumafaiga patino o ni tagata saili o le upmoni, na aoao mai ai lo tatou perofeta o Peresitene Russell M. Nelson, e tatau ona i ai so tatou “manao loloto” ma “ole atu ma se loto faamaoni [ma le] manatu tonu i ai, ia faatuatua ia [Iesu ] Keriso.” Na ia aoao atili mai, o le “‘manatu tonu i ai’ o lona uiga ua manao moni lava se tasi e mulimuli i le taitaiga faalelagi ua tuuina mai.”
O la tatou taumafaiga patino e tuputupu ae i le poto e mafai ona taitai atu ai i tatou e iloilo a tatou fesili, faigata pe a le o lena, e ala i vaaiga o le pogai ma le aafiaga, o le sailia ma le iloa o mamanu ona tuu lea i ai o ni faamatalaga e mamanu ai i o tatou malamalamaaga ma faatumu ai ni ava e vaaia i le atamai Peitai, a tatou manatu i la tatou tulitulimatagauina o le atamai faaleagaga, o nei faagasologa na mafaufauina lelei, e i ai taimi e aoga ai, ae a faaaoga na o i latou e mafai ona le atoatoa ao tatou vaai atu e iloatino mea e faatatau i le Tama Faalelagi ma lo tatou Faaola, o Iesu Keriso, le Laua talalelei, le Laua Ekalesia, ma le Laua fuafuaga mo i tatou uma.
O le ala a le Atua le Tama ma Lona Alo e faailoa mai ai lo Laua atamai ia i tatou, e faamuamua ai le valaaulia o le mana o le Agaga Paia e avea ma o tatou faiaoga patino a o tatou faaogatotonu Iesu Keriso i o tatou olaga ma i lo tatou sailia ma le faatuatua o a Laua tali ma la Laua faauigaga. Laua te valaaulia i tatou ia iloa upumoni e ala i taimi tuuto e faaaluina e suesue ai tusitusiga paia ma ia saili mo upumoni ua faaali mai i aso e gata ai mo o tatou aso ma o tatou taimi, ua faailoaina mai e perofeta ma aposetolo o aso nei. Latou te augani mai ia i tatou e faaalu e le aunoa ni taimi tapuai i totonu o le maota o le Alii ma ia tulivae atu i le tatalo “ina ia maua faamatalaga mai le lagi.” O le folafola a Iesu ia i latou na auai e faalogologo i Lana Lauga i luga o le Mauga e moni lava foi moi tatou i o tatou aso e pei ona sa i ai i le vaitaimi o Lana galuega i le lalolagi: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu ona toina ai lea ia te outou.” Ua faamautinoa mai e lo tatou Faaola e faapea, e “foaiina mai e lo outou Tama oi i le lagi o mea lelei i e ole atu ai.”
O le auala a le Alii e aoao mai ai o “lea fuaitau i luga o lea fuaitau, ma lea mataupu i luga o lea mataupu.” Atonu e ono manaomia ai ona tatou “faatalitali ia Ieova” i le laolao o le laina o loo i ai nei lo tatou malamalama ma le isi e lei tuuina mai. O lenei laolao paia e mafai ona avea o se nofoaga e mafai ona tupu ai lo tatou aoaoga tele faaleagaga—o le nofoaga lea e mafai ona tatou “tauave ma le onosai” a tatou sailiga faatauanau ma faafou lo tatou malosi e faaauau ai ona tausia folafolaga paia ua tatou faia ma le Atua e ala i feagaiga.
O le tatou sootaga faalefeagaiga ma le Tama Faalelagi ma Iesu Keriso e faailo ai lo tatou manumalo o ni tagatanuu i le malo o le Atua. Ma o le tatou nonofomau ai iina e manaomia ai le faaogatasi o o tatou olaga i mataupu faavae paia ma fai le taumafaiga e ola ai faaleagaga.
Usiusitai
O le tasi o mataupu faavae autu ua aoaoina i le Tusi Mamona atoa o le, i taimi na filifili ai le fanau a le Atua e faaali atu le usiusitai ma tausi a latou feagaiga, na latou maua le taitaiga ma taialaga faaleagaga faifaipea. Ua fetalai mai le Alii ia i tatou, e ala i lo tatou usiusitai ma le maelega, e mafai ai ona tatou maua le poto ma le malamalama. E lei mamanuina tulafono ma poloaiga a le Atua e avea o se maagao i lou olaga ae, o se avanoa mamana i faaaliga faaletagata lava ia ma le aotauina faaleagaga. Ua aoao mai e Peresitene Nelson le upumoni taua e faapea, “o faaaliga mai le Atua e o faatasi lava e le aunoa ma Lana tulafono e faavavau” ma le isi “e le teenaina lava Lana aoaoga faavae.” O lou usiusitai ma le loto i ai i poloaiga a le Atua, e ui lava ina le i ai se malamalama atoatoa i Ana mafuaaga, ua tuu ai oe i le tauaofiaga o Ana perofeta. O le Mose e 5 o loo aoao mai ai i tatou e uiga i se fegalegaleaiga faapitoa i le va o Atamu ma se agelu a le Alii.
Ma sa tuu atu e le Alii ia Atamu ma Eva “poloaiga, ia la ifo atu i le Alii lo laua Atua, ma avatu uluai manu o a laua lafu, mo se taulaga i le Alii,” fai mai le mau, “ma sa usiusitai Atamu i poloaiga a le Alii.” Tatou faitau pea, “ina ua mavae aso e tele, sa oo mai se agelu a le Alii ia Atamu, ua fetalai mai: Aisea ua e osi atu ai taulaga i le Alii? Ma sa fai atu Atamu ia te ia: Ou te lē iloa, ae na poloaiina ai aʼu e le Alii.”
O le usiusitai o Atamu sa muamua atu i lona malamalama ma sa saunia o ia e maua le atamai paia e faapea, sa auai o ia i se faailoga paia o le Togiola a Iesu Keriso. O le a faapena foi ona ta e lo tatou usiusitai lotomaualalo lo tatou auala mo lo tatou iloatino faaleagaga o auala a le Atua ma Ona faamoemoega paia mo i tatou taitoatasi. O le aapa atu e siitia lo tatou usiusitai e aumaia ai i tatou e latalata atu i lo tatou Faaola, o Iesu Keriso, aua o le usiusitai i Ana tulafono ma poloaiga o le aapa manuia atu lea ia te Ia.
Ma le isi, o lo tatou faamaoni a’ia’i i le atamai ma le poto ua uma ona tatou mauaina e ala i lo tatou tuuto faamaoni i mataupu faavae o le talalelei ma feagaiga paia, e taua tele i tapenapenaga mo lo tatou saunia e maua ma ia avea ma avefeau o fesootaiga mai le Agaga Paia.
O le Tama Faalelagi ma Iesu Keriso o le puna lea o upumoni uma ma e faasoa mai lo Laua poto ma le le toe tautaua. Ma le isi, o le malamalama e faapea, e le o ia i tatou se atamai patino ua le tu faalagolago i le Atua e mafai ona fesoasoani tatou te iloa ai le e liliu atu i ai ma po o fea e tuu ai lo tatou faatuatuaga autu.
Faatuatuaga Loloto
O le tala i le Feagaiga Tuai ia Naamanu, le taitai au o le sa faamaloloina i le lepela e le perofeta o Elisaia, e faapitoa ona ou fiafia i ai. O le tala o loo faaalia mai ai le ala na suia ai e le faatuatua mausali o se “auauna fafine talavou” le ala o le olaga o se tasi o tamalii ma, mo le au talitonu uma, na faaalia ai le au atu o le alofa mutimutivale o le Atua ia i latou o e tuu atu lo latou faatuatuaga ia te Ia ma Lana perofeta. E ui ina le o taua mai lona igoa, ae o lenei tamaitai talavou sa fesoasoani e uunai i luma lo tatou malamalamaaga. Ma o le talitonu o Naamanu i lana molimau na musuia ai o ia e avatu lana talosaga mo le faamalologa i le auauna filifilia a le Atua.
O le tali a Naamanu i faatonuga a le perofeta o Elisaia e taele i le vaitafe o Ioritana, o le taimi muamua sa le talitonu ma sa le fiafia. Peitai, o se valaaulia mo ia ina ia usitai i le fautuaga a le perofeta na avanoa ai mo lona faamalologa ma lona malamalamaga tulaga ese e moni le Atua.
Atonu tatou te maua o ni isi o a tatou talosaga faaleagaga e i ai ni tali manino magafagafa ma atonu e le fatuina ai se le toalelei tele mo i tatou. Pe, e pei o Naamanu, atonu tatou te iloa ai o isi manaoga e sili atu le luitauina ma e ono fatuina ai ni lagona faigata ma lavelave i totonu ia i tatou. Pe, e talitutusa ma le faamatalaga o faaiuga faavavave a le au vaaifetu e uiga i lo tatou taatiaga o paneta, i la tatou sailiga mo upumoni faaleagaga, atonu tatou te oo ai i faauigaga e le sao lelei pe afai tatou te faalagolago tasi i lo tatou lava malamalama faatapulaaina, o se taunuuga faanoanoa ma sa lei fuafuaina lea e ono taitai ese atu ai i tatou mai le ala o feagaiga. Ma e le gata i lea, o ni isi o fesili e ono i ai pea seia oo ina tuuina mai e le Atua, o le “ua i ai le mana uma” ma le “poto atoa, ma le malamalama uma,” o le “silafia mea uma” i Lona alofa mutimutivale, e tuuina mai le faamalamalamaga e ala mai i lo tatou talitonu i Lona suafa.
O le lapataiga taua e tasi mai le tala ia Naamanu o le, o le teena o le usiusitai i tulafono ma poloaiga a le Atua e ono faaumiumi pe faatuai ai lo tatou tuputupu ae. Ua faamanuiaina i tatou i le i ai o Iesu Keriso o lo tatou Matai Faamalolo. O lo tatou usiusitai i tulafono ma poloaiga a le Atua e mafai ona matala ai le auala mo lo tatou Faaola e tuuina mai le malamalama ma le faamalologa e silafia e Ia tatou te manaomia, e tusa ai ma Lana muai fuafuaga o le togafitiga mo i tatou.
Na aoao mai Elder Richard G. Scott e faapea, “o lenei olaga o se aafiaga i le faalagolago tele—faalagolago ia Iesu Keriso, faalagolago i Ana aoaoga, faalagolago i lo tatou gafatia a o taitaia ai e le Agaga Paia e usitai i na aoaoga mo le fiafia i le taimi nei ma mo se olaga e faavavau e tumu i faamoemoega, ma le fiafia atoatoa. Ina ia faalagolago o lona uiga o le usiusitai lea ma le loto i ai e aunoa ma le iloaina o le i’uga mai le amataga (tagai Faataoto 3:5–7 Ina ia fua mai, e tatau ona sili atu le malosi ma tumau o lou faalagolago i le Alii, nai lo lou talitonu i ou lava lagona ma lou poto masani.
Na faaauau le saunoaga a Elder Scott: “Ina ia faatino le faatuatua o le faalagolago lea e silafia e le Alii mea o loo Ia faia ia te oe ma e mafai e Ia ona ausia mo lou lelei e faavavau tusa lava pe le mafai ona e malamalama pe mafai faapefea ona Ia faia”
Molimau Faaiu
Uo pele, ou te molimau atu o a tatou fesili faamaoni o le talalelei e mafai ona tuuina atu ai i le Tama Faalelagi ma Iesu Keriso ni avanoa e fesoasoani ai ia tatou tuputupu ae. O la’u taumafaiga patino e saili tali mai le Alii i a’u lava fesili faaleagaga—i taimi ua mavae ma le taimi nei—ua mafai ai ona ou faaaoga va i laina o lo’u malamalama ma le [atamai o le] Atua e faataitai ai le usiusitai ia te Ia ma le faamaoni a’ia’i i le malamalama faaleagaga o loo ia te a’u i le taimi nei.
Ou te molimau atu o le tuu o lou faalagolago i le Tama Faalelagi ma i Ana perofeta, o e ua Ia auina mai, o le a fesoasoani e siitia ma uunaia ai oe faaleagaga i luma agai i le tafailagi ua faalauteleina o le Atua. O lou tulaga i se vaaiga lelei o le a suia ona o le a e sui. Ua silafia e le Atua, o lou maualuga lava, o le mamao foi lea e mafai ona e vaai ai. Ua valaaulia oe e le Faaola e a’e i luga. I le suafa o Iesu Keriso, amene.