Mataupu 3

Afioga ma le Finagalo o le Alii

Sa taunuu atu Uilifoti ma Fipi Uitilafi i le Vaitafe o Misuri faatasi ma le la fanau i le amataga o Iulai 1846. Ina ua le mafai ona faatauanau lona tuafafine ma lona uso faaletulafono e mulimuli i aposetolo nai lo James Strang, sa tuua ai e Uilifoti ia Navu i le taimi lava na maea ai le faapaiaga o le malumalu faatasi ma ona matua ma isi o le Au Paia.

O lo latou taunuu atu i le tolauapiga sa fetaui lelei ma le malaga ese o William Hendrick ma isi o tagata na faaopoopo atu i le vaegaau. Sa faaigoaina o le Autau Mamona, sa sili atu lo latou aofaiga ma le lima selau alii. Sa faafaigaluega e le autau ni tamaitai e toa luasefulu o ni fai tagamea. O isi foi fafine na o atu ma a latou tane i le savali, ma o nisi sa ave ma a latou fanau. I se aofaiga, na silia ma le tolusefulu tamaitai sa malaga faatasi ma le autau.¹

Sa masalomia muamua lava e Uilifoti taumafaiga a le malo e faaaofia alii o le Au Paia o Aso e Gata ai. Ae sa le’i pine ae suia lona mafaufau, aemaise lava ina ua mavae le asiasiga a Tomasi Kane i le tolauapiga. E ui sa itiiti se fiailoa o Tomasi i le talalelei toefuataiina, ae sa saofaga o ia i le faatauanauina o le malo e fesoasoani atu i le Ekalesia. Sa popole tele o ia i le tau faasaga i le amioletonu, ma sa naunau moni o ia e fesoasoani i le Au Paia i o latou tulaga mativa tele.

Sa vave ona faagaeetia aposetolo ia Tomasi. “Mai faamatalaga na matou maua mai ia te ia,” sa tusia ai e Uilifoti i lana apitalaaga, “sa faatalitonuina i matou ua amata ona uunaia e le Atua le loto o le peresitene ma isi o le malo.”²

E tolu aso a o lei savavali ese atu le autau, sa saunoa atu Polika Iaga i ona taitai. Sa ia fautua atu ia i latou ia tausia le mama o o latou tino, ia amio mama, ma ia laei o latou ofusa o le malumalu pe afai ua maua o latou faaeega paia. Sa ia ta‘u atu ia i latou ia amio faatamalii i tagata Mekisiko ma aua ne’i fefinaua’i ma i latou. “Ia taulimaina pagota ma le faaaloalo silisili,” sa ia saunoa ai, “ma aua ne’i fasioti i se tasi, pe afai e mafai ona alofia.”

Peitai, sa faamautinoa atu e Polika i alii o le a leai ni a latou fetauaiga e faia. Sa ia uunaia i latou ia faia o latou tiute e aunoa ma le muimui, tatalo i aso taitasi, ma ave a latou tusitusiga paia.³

Ina ua malagaese atu le autau, sa toe liliu atu Polika i le laasaga e sosoo ai o le malaga a le Au Paia. O le felagolagomai ai ma le Iunaite Setete sa mafai ona ia maua ai le faatagaga e faatu ai se tolauapiga o le taumalulu i luga o eleele o Initia i sisifo o le Vaitafe o Misuri. Na ia fuafua loa e faaalu le taumalulu a le Au Paia i se nofoaga ua ta’ua o le Grand Island, e luaselau maila i sisifo, ma mai iina na auina atu ai le vaega muamua i luga o Mauga Papa.⁴

A o fefautuaai faatasi le au aposetolo, sa saunoa atu Uilifoti e uiga i isi mataupu taua a le Ekalesia sa manaomia ona latou gauai vave atu i ai. O Reuben Hedlock, o le alii lea sa ia tofia e pule faamalumalu i le misiona i Peretania, sa faatupuina le tetee o le toatele o le Au Paia Peretania i lona faaaoga sese o tupe sa latou faapaiaina mo le malaga. Sa muai vaaia e Uilifoti faafitauli i totonu o le misiona, e aofia ai le toe o ese o le toatele o tagata fou liliu mai, seia oo ina faamalolo Reuben ma sui tulaga i ai ni taitai sili atu ona faatuatuaina.⁵

Sa iloa foi e le korama o loo iai pea le Au Paia matitiva i Navu i le lamatia ai e vaega leaga ma perofeta pepelo. Afai sa le’i faia e aposetolo nisi mea se tele atu e fesoasoani ai i nei Au Paia, e pei ona latou folafola atu i totonu o le malumalu i le konafesi ia Oketopa e fai, o lona uiga la ua solia e le korama se feagaiga paia ma le Au Paia ma le Alii.⁶

O le galulue ai ma le mautinoa, na tonu ai i le korama e auina atu le toatolu o aposetolo mai le tolauapiga—o Pale Palate, Osona Haite, ma Ioane Teila—i Egelani e taitai le misiona a Peretania. Ona latou toe auina atu lea o taavale toso, o povi ma solofanua toso taavale toso, ma sapalai i Navu e aveese mai ē matitiva.⁷

A o auina atu e le korama ia alii ma sapalai i sisifo, sa iloa e Polika ua le o toe gafatia lana fuafuaga e tulei tele atu i sisifo le malaga i lena tausaga, aemaise o le autau ua faaitiitia ai le aofai o tamaloloa tino malolosi i le tolauapiga. Sa fautua atu Tomasi Kane e faatu le latou tolauapiga o le taumalulu i le Vaitafe o Misuri, ma sa i’u ina ioe i ai Polika.⁸

I le aso 9 Aokuso, 1846, sa faasilasila atu ai e le au aposetolo e faapea, o le a faaalu e le Au Paia le taumalulu i se nofoaga le tumau i sisifo o le vaitafe. Sa manao Polika e alu i luga o Mauga Papa ma fausia ai se malumalu i se vave e mafai ai. Ae a o le’i tupu lena mea, e ao ona ia faapotopoto faatasi maia le Au Paia ma tausi i e matitiva.⁹

---

Ae e tusa o le taimi lea, sa ufitia ai le Brooklyn i puao a o folau atu i le Faga o San Francisco, i le mavae ai o le ono masina faaleleva talu ona tuua le Uafu o Niu Ioka. A o tu ai i le taumua o le vaa, sa tilotilo atu Sam Brannan i le puao ae vaaia ai se matafaga gaoā. I totonu atu o le faga, sa ia iloa atu ai se olo masofa a Mekisiko. I luga a’e sa lealea ai i le savili le fu’a a Amerika.¹⁰

Sa popole Sam i le ono tupu o se mea faapea. O lea fu’a o se faailoga mautinoa lea ua faoa e le Iunaite Setete ia San Francisco mai ia Mekisiko. Sa ia iloa e uiga i le taua ma Mekisiko a o taula ai le Brooklyn i motu o Hawaii. O iina sa faapea atu ai se taitai au o se vaatau a Amerika o loo faamoemoeina le Au Paia e fesoasoani atu i le militeli a le Iunaite Setete i le mauaina mai o Kalefonia mai i tagata Mekisiko. Sa feitai le Au Paia i lea tala, o e sa lei faimalaga i sisifo e tau mo se malo na teenaina i latou.¹¹

A o latou folau atu pea i totonu o le faga, sa mafai ona iloa atu e Sam ia laau i luga o le matafaga oneone ma ni nai manu o loo feoai mai ai. Mai se vaaiga mamao, i le va o ni mauga, sa taoto mai ai Yerba Buena, o se taulaga tuai o Sipaniolo.

Sa taula le Brooklyn i le uafu, ma sa o ese atu le Au Paia i se taimi mulimuli ane o lena aoauli. Sa latou faatutuina ni faleie i mauga i fafo atu o Yerba Buena pe sa maua foi ni malutaga i ni fale tuufua faapea ma se nofoaga tuai faamiliteli na lata ane. I le faaaogaina o anomea sa latou aumaia mai Niu Ioka, sa faatutu ai e le Au Paia ni fale vilisaito ma se fale lomitusi. Sa maua foi e nisi o i latou ni galuega mai tagata na nofoia le taulaga.¹²

E ui sa le fiafia i le umiaina nei e le Iunaite Setete le talafatai o Kalefonia, ae sa naunau lava Sam e faatu le malo o le Atua iina. Sa ia auina atu se vaega o alii i se vanu i se malaga mo ni nai aso i sasae o le faga e faato’a se nofoaga na taua o le Faamoemoega Fou. O iina sa latou fausia ai se fale ililaupapa ma se faleoo, ona faamama lea o le fanua ma toto eka o saito ma isi laau toto.

Sa manao Sam e ave ni alii i sasae e saili ia Polika ma taitai mai vaega o totoe o le Au Paia i Kalefonia i le taimi lava e liusuavaia ai le kiona mai mauga i le tausaga na sosoo ai. I le faamemelo ai i le tau maloloina, eleele lauusiusi, ma se uafu lelei, sa ia talitonu ai e le mafai ona toe ole atu le nuu o le Alii mo se isi nofoaga sili atu e potopoto i ai.¹³

---

I lena taumafanafana, sa tolauapi ai Luisa Palate ma lana fanau teine i le nofoaga malolo o le Mauga o Pisgah i luga o le alasopo o Iowa. Sa matagofie le nofoaga, ae o le vai sa mafanafana ma leaga le tofo. Sa le’i pine ae pepesi se faama’i i le nofoaga, ma sa toatele le Au Paia na maliliu ai. Sa sosola ese le aiga o Luisa i le amataga o Aokuso a o soifua maloloina lelei, ae sa le lelei o latou lagona i le tuua ai o le toatele o uo mamai.

I se taimi na le’i mamao ane, na tolauapi ai le vaega a Luisa i talaane o se vaitafe na tuufua ai namu, ma sa le’i pine ae maua o ia ma isi i le fiva. Sa afe le vaega e malolo ma toe faaauau ai i le Vaitafe o Misuri, lea sa iai se laina umi o taavale toso sa faatalitali ai e ave e vaa i le isi ituvai. Ina ua oo mai i le taimi o Luisa, sa iai se mea na fefefe ai povi, lea sa mafua ai se fenumiai tele i luga o le vaa ma sa atili ma’i ai Luisa.

I le isi itu o le vaitafe, sa faateteleina le fiva o Luisa, sa le maua ai sana moe. Pe tusa o le vaeluapo, o lona oi sa ala ai le toalua o le tautai, lea sa maua atu o ia i se tulaga matautia. Sa vave ona faatonuina e le fafine le fanau teine a Luisa e fai se isi moega mo i latou ina ia mafai ona maua se malologa a lo latou tina. Ona ia avatu lea ia Luisa se kofe mafanafana ma ni meaai e toe tau faate’i ai o ia.¹⁴

O le aso na sosoo ai, sa o atu ai le vaega i totonu o le nofoaga fou a le Au Paia o Uinita Kuota, o le nofoaga aupito telē lea o nofoaga uma a le Au Paia i le Vaitafe o Misuri. Pe tusa ma le lua afe lima selau tagata sa nonofo i Uinita Kuota i fanua sa i ai faatasi ma le au Omaha ma isi ituaiga Initia i le lotoifale.¹⁵ O le toatele o le Au Paia sa nonofo i faleoo sa faia i ogalaau po o taaiga vao, ae o nisi sa nonofo i faleie, taavale toso, po o apitaga e pei o ni ana sa ta’ua o falemo’u.¹⁶

Sa vave ona siomia e tamaitai o Uinita Kuota ia Luisa, sa naunau e fesoasoani ia te ia. Sa latou avatu ia te ia le meainu malosi ma se suka e fai ma vailaau faafomai, lea sa tau feololo ai o ia i le taimi muamua. Ae sa le’i pine ae faateleina le fiva, ma amata ai ona matuai tetete o ia. I le fefe ai ne’i oti o ia, sa ia tagi atu ai i le Alii mo le alofa mutimutivale.¹⁷

O nisi o tamaitai sa faatasi atu ia Luisa sa faauuina o ia i le suauu, faaee o latou lima i ona luga, ma faamanuia o ia i le mana o lo latou faatuatua. I Navu, sa aoao ai e Iosefa Samita le Aualofa o le faamalologa o se meaalofa a le Agaga, o se faailoga e mulimuli atu i e uma e talitonu ia Keriso.¹⁸ Sa faamafanafanaina e le faamanuiaga Luisa, ma maua ai lona malosi e onosaia ai lona ma’i, ma sa vave ona ia faafaigaluegaina se tausi ma’i e tausi o ia seia oo ina aluese lona fiva.

Sa ia totogia foi se tamaloa i le lima talā e fau sona faleoo i ta’aiga vao ma pupuvao. O le faleoo sa na o le palanikeke sa fai ma faitotoa, ae sa lelei ona faamafanafanaina ma lava le telē mo ia e saofai ai i se nofoa faalue i talaane o lana afi faamafanafana a o faasolosolo ina toe malosi.¹⁹

---

I Uinita Kuota, sa sua ai e le Au Paia le eleele ma toto fanua, fausia fale vili saito i talaane o se vaitafe, ma faatutu ni faleoloa tetele ma laiti. O le nofoaga sa faato’aina sa faataatia i poloka o le aai e talitutusa ma le mamanu a le Alii mo le aai o Siona, e pei ona sa faaalia ia Iosefa Samita i le 1833. I matu o le taulaga, sa fausia ai e Polika, Heber Kimball, ma Willard Richards ni fale e latalata i se tamai fale fono i le mea sa fono ai le Korama a le Toasefululua ma le au fautua maualuga fou faato’a valaauina i Uinita Kuota. E latalata i le ogatotonu o le taulaga, sa iai se fola lautele mo le tala’iga ma isi fonotaga faalenuu.²⁰

O le alasopo e ui atu i Iowa sa vaivai ai le toatele o le Au Paia, ma o le faatumauina o le fafagaina o o latou aiga, faalavalava, ma malutiaina sa faaauau ona mou atu ai lo latou malosi.²¹ E faapena foi, o lago ma namu mai le auvai palapala sa tele ina lagoia ma namu’ia ai le nofoaga faato’a fou, ma sa mafatia le Au Paia i tiga ma le maalili o le malaria mo le tele o aso ma vaiaso i lea taimi ma lea taimi.²²

A o feagai ai ma nei tofotofoga, sa toatele le Au Paia na usiusitai i poloaiga. Ae o nisi sa gaoi, faimamago, faitio i le taitaiga a le au aposetolo, ma mumusu e totogi sefuluai. Sa itiiti se onosai o Polika i nei amioga. “E taitaiese malie atu tagata,” sa ia tautino mai ai, “seia oo ina umia e le tiapolo o latou tino ma taitai faatagataotaua ai i latou i le loto o le tiapolo.”²³

I le uunaia ai o le amiotonu, sa apoapoai atu ai Polika i le Au Paia ia galulue faatasi, tausia feagaiga, ma aloese mai le agasala. “E le mafai ona faapaiaina i tatou i le taimi e tasi,” sa ia saunoa ai, “ae e ao ona tofotofoina ma tuu i totonu o tulaga eseese uma ma faamaonia i le tulaga aupito maualuga ia iloa ai pe o le a tatou auauna atu i le Alii e oo i le iuga.”²⁴

Sa ia faatulagaina foi i latou i ni uarota laiti, tofia epikopo, ma faatonu fautua maualuga ia tausisia se tulaga faatonuina mausali o le amio. O nisi o le Au Paia sa faapotopoto atu foi i ni aigafai faapitoa. I lena taimi, sa lei faamauina le Au Paia i o latou matua ua maliliu pe afai sa lei auai o latou matua i le Ekalesia i lenei olaga. O le mea lea, a o lei tuua Navu, sa faamalosiau atu Polika i le Au Paia pe tusa ma le lua selau ina ia faamauina, pe vaetamaina faaleagaga, o ni atalii ma afafine i aiga o taitai o le Ekalesia o e o ni a latou uo, po o ni faufautua i le talalelei.

O nei faamauga faavaetama sa faatinoina e ala i se sauniga i totonu o le malumalu. Sa tele ina ofo atu e matua fai le lagolagosua faaletino ma faalelagona, ae o atalii ma afafine fai, o nisi o i latou sa leai ma nisi o o latou aiga i le Ekalesia, sa tele ina tali mai ma le faamaoni ma le tuuto.²⁵

O nisi o luitau i Uinita Kuota ma isi nofoaga faato’a le tumau sa le mafai ona alofia. E oo ifo i le taimi na oo mai ai le tau malulu, ua silia ma le iva afe le Au Paia sa nonofo i le eria, e aofia ai le tolu afe lima selau sa nonofo i Uinita Kuota. O faalavelave, faama’i, ma le oti sa mafatia ai nofoaga uma. O le malaria, māmā pala, papala, ma isi faama’i sa feoti ai pe tusa e tasi le tagata mai le toasefulu. Pe tusa o le afa o ē na feoti, o pepe ma tamaiti.²⁶

Sa mafatia ai le aiga o Uilifoti Uitilafi faatasi ma isi. Ia Oketopa, a o tipi laau ia Uilifoti, sa pa’ū ai se laau ia te ia ma gaui ai nisi o ona ivi aso’aso. Sa le’i pine lena, ae maua lona atalii laitiiti o Iosefa i se fiva tugā. Sa faatasi atu e le aunoa ia Uilifoti ma Fipe i le tama, ae sa leai se mea na la faia na aoga, ma sa le’i pine ae la tanuina lona tino i se fanuatanu fou na faato’ā faato’a i lo latou nofoaga.

I ni nai vaiaso talu le maliu o Iosefa, sa vave fanauina ai e Fipe se pepe ae le’i oo i le taimi e fanau ai, ma sa maliu le pepe i le lua o aso mulimuli ane. I se tasi afiafi, sa sau ai Uilifoti i le fale ma tau mai o faanoanoa Fipe, o loo tilotilo i lona ata o loo ia siiina Iosefa. O le maliliu ai o le fanau sa matua tiga ai i laua uma, ma sa faananau Uilifoti mo le taimi o le a maua ai e le Au Paia se nofoaga e aumau ai, nonofo ai i le filemu, ma olioli ai i faamanuiaga ma le saogalemu o Siona.

“Ou te tatalo i lo’u Tama Faalelagi ia faafualoaina o’u aso,” sa ia tusia ai i lana apitalaaga, “ia vaai ai i le maota o le Atua ua tu i luga o tumutumu o mauga ma ia vaai i le tagavai o le saolotoga o sisi a’e e fai ma tagavai i malo.”²⁷

---

I le lotolotoi ai o mafatiaga i Uinita Kuota, sa maua ai e Polika se tala e faapea na osofaia e se vaega leaga pe tusa ma le afe tagata le tamai nuu o le Au Paia sa i ai pea i Navu. Pe tusa ma le lua selau le Au Paia na tau faasaga i ai, ae sa faatoilaloina i latou i le taua i le mavae ai o ni nai aso. Sa feutagai taitai o le aai mo le aveesega filemu o le Au Paia, o le toatele lava o e matitiva ma mama’i. Ae a o tuua ai e le Au Paia le aai, sa toe osofaia i latou e tagata leaga ma faaleaga o latou fale ma taavale toso. Sa faoa faamalosi e se vaega leaga le malumalu, faaleaga totonu, ma faatauemu i le Au Paia a o latou sosola ese atu i tolauapiga i le isi itu o le vaitafe.²⁸

Ina ua faalogo Polika i puapuaga o tagata sulufai, sa ia auina atu se tusi i taitai o le Ekalesia, ma faamanatu atu ia i latou le feagaiga na latou osia i Navu ia fesoasoani atu i ē matitiva ma lagolago i tagata uma o le Au Paia o loo mananao ia o mai i sisifo.

Sa ia tautino atu, “O uso ma tuafafine matitiva, o tina ua oti a latou tane, ma fanau matuaoti, o ē mama’i ma lē tagolima, o loo taooto nei i le auvai i sisifo o le Misisipi.” “O le taimi lenei, o galuega. Ia tuu le afi o le feagaiga, lea sa outou osia i le maota o le Alii, ia mu i o outou loto e pei o se afi lē matineia.”²⁹

E ui sa latou auina atu ni taavale toso e luasefulu o le toomaga i Navu i le lua vaiaso na muamua atu ma sa itiiti foi meaai ma ni nai sapalai na totoe, ae sa toe auina atu e le Au Paia i Uinita Kuota ma nuu tuaoi nisi taavale toso faaopoopo, povi ma solofanua e tosoa taavale toso, meaai, ma isi sapalai i Navu. O Newel Whitney, le epikopo pule faamalumalu o le Ekalesia, sa ia faatauina mai foi falaoamata mo le Au Paia matitiva.³⁰

Ina ua maua e vaega o le toomaga le au sulufa’i, sa toatele le Au Paia iina sa fiva, sa le lava a latou tapenaga mo le tau malulu, ma sa matua fiaaai lava. I le aso 9 o Oketopa, a o latou sauni e malaga atu i le Vaitafe o Misuri, sa vaavaai atu le Au Paia i le faatumulia o le lagi i manufelelei o le salu [quail] ma sa tutu i luga ma autafa o a latou taavale toso. Sa laga atu i ai tamaloloa ma tamaiti i manufelelei, ma tapu’e mai i o latou lima. E toatele sa manatuaina le auala sa auina atu ai foi e le Atua ia Mose ma le fanauga a Isaraelu ia manufelelei o salu i o latou taimi o mafatiaga.

“I lenei taeao sa matou maua ai se faaaliga tuusao o le alofa mutimutivale ma le lelei o le Atua,” sa tusia ai e Tomasi Paloka, o se failautusi a le Ekalesia i lana apitalaaga. “Sa viia e uso ma tuafafine le Atua ma faamamalu i Lona suafa ona o mea sa to faaua ifo i le fanauga a Isaraelu i le vao ua faaalitino mai ia i matou i o matou puapuaga.”

“O alii uma, tamaitai, ma tamaiti sa tofu ma se manulele e taumafaina mo a latou meaai o le afiafi,” sa tusia ai e Tomasi.³¹

---

Ae o le taimi lea, i le faitau afe o maila le mamao i luga o le motu amu o Anaa i le Vasa Pasefika, sa lauga atu ai se alii na umiaina le Perisitua Arona e igoa ia Tamanehune i se konafesi sa silia ma le valu selau o le Au Paia o Aso e Gata Ai. “E tatau ona auina atu se tusi i le Ekalesia i Amerika,” sa ia fautua atu ai, “e talosagaina ai i latou e auina vave mai iinei ni toeaiina se toalima i le selau.” Sa faaluaina le talosaga e Ariipaea, o se tagata o le Ekalesia ma o se taitai o le nuu i le lotoifale, ma sa siilima le Au Paia i le Pasefika i Saute e lagolagoina.³²

I le pulefaamalumalu ai i le konafesi, sa ioe ai Addison Pratt ma le loto atoa ia Tamanehune. I le gasologa o le tolu tausaga ua mavae, sa papatiso ai e Addison ma Peniamina Grouard le silia ma le afe o tagata. Ae i lena taimi sa na’o le tasi le tusi na la mauaina mai se tasi o le Toasefululua, ma sa leai ni faatonuga na aumai ai mo le toe foi atu i le fale.³³

I le ono masina talu ona taunuu atu lena tusi, sa leai ma se isi mea na faalogo i ai faifeautalai e toalua mai aiga, uo, po o taitai o le Ekalesia. Soo se taimi na oo atu ai se nusipepa i le motu, sa la tasu’e i ona itulau mo ni talafou e uiga i le Au Paia. O le tasi pepa na la faitauina sa ta’ua ai o le afa o le Au Paia i Navu sa fasiotia ae o isi na totoe sa faamalosia ona sosola atu i Kalefonia.³⁴

I le popole ai e fiailoa se tulaga ua oo i ai Luisa ma ona afafine, sa tonu ai ia Addison e toe foi atu i le Iunaite Setete. “O le iloa o le mea moni, e tusa lava pe leaga,” sa ia fai ai ia te ia lava, “e sili atu nai lo le tumau ai i le masalosalo ma le popole vale.”³⁵

O uo a Addison, o Napota ma Telii, o le tane ma le ava o ē sa auauna faatasi ma ia i Anaa, sa filifili e toe foi atu i Tubuai, i le mea sa alofagia ai Telii o se faiaoga faaleagaga i le toatele o tamaitai o le Ekalesia. Sa fuafua Peniamina e nofo i le motu e taitai le misiona.³⁶

Ina ua iloa e le Au Paia i le Pasefika o le a tuuvaa ese atu Addison, sa latou faatauanau ia te ia ia vave ona toe foi mai ma sau ma aumai nisi faifeautalai. Talu ai ua uma ona fuafua Addison e toe foi atu i le motu faatasi ma Luisa ma ona afafine, pe a faapea lena o loo feola pea i latou, sa ia ioe atu ai ma le fiafia.³⁷

Sa taunuu mai se vaa i le motu i se masina mulimuli ane, sa folau atu ai Addison faatasi ma Napota ma Telii mo Papeete, Tahiti, lea sa ia faamoemoe e pu’e ai se vaa i Hawaii ma alu ai loa i Kalefonia. Ina ua latou taunuu atu i Tahiti, sa faateia o ia i lona iloa, na faatoa auina mai lava se afifi o tusi mai ia Luisa, Polika Iaga, ma le Au Paia i Brooklyn mai le motu i Anaa.

“Sa ou manatu ua ou le toe aafia i ni lē fiafia,” sa ia auē ai i lana apitalaaga, “ae o lenei mea ua faia ni uunaiga muamua i lo’u mafaufau faapea ua avea a’u ma se tagata ese.”³⁸

---

Ina ua oo mai le tau malulu i luga o Uinita Kuota, sa tele ina tatalo Polika Iaga ia iloa pe faapefea ona saunia le Ekalesia mo le malaga i talaatu o Mauga Papa. I le mavae ai toetoe o se tausaga i luga o le alasopo, sa ia iloa ai o le faatulagaina ma le faatotogaina o le Au Paia mo le auala i luma atu sa taua tele i lo latou tulaga manuia. Ae o lea faafitauli ma lea faafitauli sa faaali atu ai foi ia te ia le taua tele o le faalagolago i le Alii ma mulimuli i Lana taitaiga. E pei ona sa iai i aso o Iosefa, e na o le Alii e mafai ona taitaia Lana Ekalesia.

Sa le’i pine le mavae o le amataga o se tausaga fou, ae lagona e Polika ua tatalaina e le Alii lona mafuafau i se malamalama ma se atamai fou. I se fonotaga faatasi ma fautua maualuga ma le Toasefululua i le aso 14 Ianuari, 1847, sa amata ona ia faamaumauina ai se faaaliga mai le Alii i le Au Paia. Ae le’i tofā Polika Iaga, sa tuu atu e le Alii ia te ia nisi faatonuga mo le malaga o loo loma. I le aveesea ai o faaaliga lē maē’a, sa faaauau ona faamaumau e Polika faatonuga a le Alii mo le Au Paia.³⁹

O le aso na sosoo ai, sa tuu atu ai e Polika le faaaliga i le Toasefululua. Sa ta’ua o le “Afioga ma le Finagalo o le Alii,” sa faamamafa ai le manaomia ona faatulaga le Au Paia i ni vaega i lalo o le taitaiga a le au aposetolo. I lea faaaliga, sa poloaiina ai e le Alii le Au Paia ia saunia mo o latou lava manaoga faapea ai foi ma le galulue faatasi i le latou malaga, tausia o tina ua oti a latou tane, tamaiti matuaoti, ma aiga o tagata o le Autau Mamona.

“Ia tuu atu i tagata uma ia faaaoga lona malosi ma ana meatotino uma e aveese atu ai lenei nuu i le nofoaga o le a faatu ai e le Alii se siteki o Siona,” sa faatonu atu ai le faaaliga. “Ma afai tou te faia lenei mea ma le loto mamā, i le faamaoni atoa, o le a faamanuiaina outou.”⁴⁰

Sa poloaiina foi e le Alii Lona nuu ia salamo ma faamaualaloina i latou lava, taulima le tasi ma le isi i le agalelei, ma tuu le faasuā’avā ma le tautala leaga. Sa tuuina atu ana upu o se feagaiga, i le faatonuina o le Au Paia ia “savavali i sauniga uma,” ma tausi folafolaga na faia i le malumalu o Navu.⁴¹

“O Aʼu o le Alii lo outou Atua, o le Atua lava o o outou tamā, o le Atua o Aperaamo ma Isaako ma Iakopo,” sa Ia tautino atu ai. “O Aʼu o lē na taitaiina le fanauga a Isaraelu i fafo o le laueleele o Aikupito; ma ua faaloaloa atu loʼu lima i aso e gata ai.”

E pei o Isaraelu anamua, sa ao i le Au Paia ona viia le Alii ma valaau atu i Lona suafa i taimi o puapuaga. Sa ao ona latou pepese ma sisiva faatasi ma se tatalo o le faafetai i o latou loto. Sa le tatau ona latou fefefe i le lumanai ae ia faalagolago ia te Ia ma onosai i o latou mafatiaga.

“E ao ina tofotofoina loʼu nuu i mea uma,” sa tautino mai ai le Alii, “ina ia latou saunia e maua le mamalu ua ia te Aʼu mo i latou, o le mamalu lava lea o Siona.”⁴²

---

Sa faailoa atu e le au aposetolo le faaaliga fou i le Au Paia i Uinita Kuota i ni nai aso mulimuli ane, ma e toatele sa olioli ina ua latou faalogo i ai. “Ua toe manatua e le Alii Ana auauna ma faafiafia i latou i se faaaliga o Lona finagalo,” sa tusi atu ai se tasi o tamaitai i lona toalua i Egelani. “Ua iai le filemu ma le lotogatasi i lo matou lotolotoi,” sa ia alaga ai, “ma o le Agaga o le Atua ua taatele ia i matou.”⁴³

Ae sa iai pea lava nisi o faafitauli i Uinita Kuota. Talu lava ona tuua Navu, sa faaauau pea ona faatino e le au aposetolo ni vaetamaga faaleagaga i le Au Paia. Sa matau e Polika nisi o le Au Paia sa uunaia ni uo ina ia vaetamaina i o latou aiga, ma le talitonuga o lo latou mamalu e faavavau e faalagolago lea i le toatele o tagata e faamau ia i latou. O le lotoleaga ma le faatautavā sa alia’e a o latou finau po o ai o le a sili ona toatele le aiga i le lagi. O finauga sa tuufesili ai Polika pe mata o le a i ai se isi o i latou e oo i ai iina.⁴⁴

Ia Fepuari, a o lauga atu i le faatinoga o vaetamaga faaleagaga, sa tautino atu Polika e le o tele sona iloa e uiga i lea mataupu. E alofa tele o ia i le toatele o le Au Paia ua vaetamaina i lona aiga e ala i lea sauniga. Ae ui i lea, sa ia lagona lona le malamalama i lenei faatinoga ma tuufesili ai i lona uiga.⁴⁵

“O le a ou saili i se malamalama atili i lea mataupu,” sa ia folafola atu ai i le Au Paia, “ma faapena ai ona mafai ona aoao atu ma faatino atili.”⁴⁶

O le aso na sosoo ai, sa ma’i o ia ma taoto ai e malolo. A o moe o ia, sa ia miti na ia vaai ia Iosefa Samita o nofo i se nofoa i luma o se faamalama tele. I le uuina o le lima taumatau o Iosefa, sa fesili atu Polika i lana uo pe aisea ua le mafai ai ona faatasi o ia ma le Au Paia.

“E le afaina,” sa fai mai ai Iosefa, a o tulai a’e mai lona nofoa.

“Ua atuatuvale tele le auuso i le fia malamalama i le tulafono o le vaetamaina po o mataupu faavae o le faamauga,” sa fai atu ai Polika. “Afai e iai sau upu apoapoai mo au, o le a ou fiafia lava e taliaina.”

“Ta‘u atu i tagata ia lotomaualalo ma faamaoni, ma ia mautinoa e faatumau le Agaga o le Alii,” sa saunoa ai Iosefa. “Afai o le a latou faia, o le a latou iloa ai ua avea i latou ma tagata tonu e pei ona sa faatulagaina ai e lo tatou Tama o i le Lagi ae latou te le’i o mai i le lalolagi.”

Sa ala a’e Polika ma upu a Iosefa sa tatagi i lona mafaufau: “Ta‘u atu i tagata ia lotomaualalo ma faamaoni, ma ia mautinoa e faatumau le Agaga o le Alii ma mulimuli i ai, ma taitai sa’o i latou.”⁴⁷ Sa le’i taliina e lea fautuaga ana fesili e uiga i faamauga o tagata vaetama, ae sa faamanatu atu ai ia te ia ia usiusitai i le Agaga ina ia mafai ona taialaina o ia ma le Au Paia i se malamalamaaga sili atu.

---

Mo le vaega na totoe o le tau malulu, sa faaauau ai ona saili atu le au aposetolo i faaaliga a o latou saunia e auina atu vaega o taavale toso i luga o Mauga Papa. I lalo o le latou taitaiga, o le a tuua ai Uinita Kuota e se vaega taoititi e muamua i le tautotogo, sopoia atumauga, ma faatu le nofoaga fou e faapotopoto i ai le Au Paia. Ina ia usiusitai i le poloaiga a le Alii ma faataunuu le valoaga, o le a latou faatu a’e se tagavai i malo ma amata galulue i se malumalu. O vaega toatele atu, sa matele lava i auaiga, o le a le umi ae mulimuli atu ia i latou, e usitaia ai le Afioga ma le Finagalo o le Alii i le latou malaga.⁴⁸

A o le’i tuua Navu, sa mafaufau le Korama a le Toasefululua ma le Aufono a le Toalimagafulu e faamautu i le Vanu o Sate Leki po o le Vanu o le Vaitafe o Pea i matu. O vanu uma ia e lua sa iai i le isi itu mamao o Mauga Papa, ma o o la faamatalaga sa faaalia ai ni faailo o le lumanai faamanuiaina.⁴⁹ Sa vaai Polika i se faaaliga i le nofoaga o le a faamautu i ai le Au Paia, ae sa na o se lagona lautele o le mea e sue i ai. Sa ia tatalo pea ia taitaia e le Atua o ia ma le vaega na muamua atu i le nofoaga sa’o e faapotopoto i ai le Ekalesia.⁵⁰

O le vaega na muamua atu sa iai ni alii e 143 sa filifilia e le au aposetolo. Sa talosaga Harriet Young, o le avā a Lorenzo, le uso o Polika, pe mafai ona latou o ma ona atalii laiti e toalua faatasi ma Lorenzo i le malaga. Ona fai atu lea o Polika i lona toalua o Clara, o le tama teine a Harriet mai lana faaipoipoga muamua, ia auai faatasi i le vaega lea. Sa auai ai foi le avā faaautaunonofo a Heber Kimball, o Ellen, o se tasi na malaga mai Nouei i le vaega lea.⁵¹

Ae a o sauni le vaega muamua lea e o ese atu, sa toe foi ane Pale Palate ma Ioane Teila i Uinita Kuota mai le la misiona i Egelani. Faatasi ai ma Orson Hyde, o lē sa vaaia pea le Ekalesia i Peretania, sa latou tofiaina ni taitai fou o le misiona ma toe fuatai le faatulagaga i le Au Paia. O lea, o le talitonu ai ua umi se taimi na latou valavala ai ma o la aiga, sa teena ai e Pale ma Ioane ia talosaga a Polika ia auai faatasi ma le isi vaega atoa o le korama i le malaga atu i sisifo. O lea sa tuu ai loa e Polika i laua e vaai ia Uinita Kuota.⁵²

I le aoauli o le aso 16 Aperila, 1847, sa amata ai e le vaega muamua le latou malaga i le malulu ma le aupouli o le lagi. “Ua matou naunau e tatala le ala mo le faaolataga o e loto faamaoni mai malo uma, pe ositaulaga mea uma ua ia i tatou,” sa tautino atu ai le au aposetolo i se tusi faamavae i le Au Paia i Uinita Kuota. “I le suafa o le Atua o Isaraelu, ua matou naunau ai ia manumalo pe feoti foi a o taumafai.”⁵³

1. Woodruff, Journal, May 8–July 11 ma le July 18–19, 1846; Tyler, Concise History of the Mormon Battalion, 118, 124–26; Stephen Kearny to James Allen, June 19, 1846, 33, Stephen Watts Kearny, Papers, Missouri Historical Society, St. Louis; Fleek, History May Be Searched in Vain, 136, 142. Autu: Autau Mamona

2. Woodruff, Journal, July 11, 1846; Tyler, Concise History of the Mormon Battalion, 115–16; Kane, The Mormons, 27–28; Grow, Liberty to the Downtrodden, 8, 59–61.

3. Church Historian’s Office, History of the Church, volume 16, July 18, 1846, 86–88; Tyler, Concise History of the Mormon Battalion, 131.

4. Historian’s Office, History of the Church, volume 16, July 20, 1846, 89–90; James Allen, Authorization, Aug. 9, 1846; Big Elk, Standing Elk, and Little Chief, Authorization, Aug. 31, 1846, Thomas L. Kane Collection, CHL.

5. Wilford Woodruff to Brigham Young, Oct. 1, 1845, Faila o le Ofisa o Polika Iaga, CHL; Woodruff, Journal, July 15, 1846; tagai foi i le Givens and Grow, Parley P. Pratt, 251–52.

6. “War in Hancock,” Sangamo Journal, June 25, 1846, 1; Jensen, “Gleaning the Harvest,” 45–52; Historian’s Office, History of the Church, volume 14, Oct. 6, 1845, 165.

7. Woodruff, Journal, July 15, 1846; Historian’s Office, History of the Church, volume 16, July 17, 1846, 82.

8. Brigham Young to George Miller and Captains of Fifties, Aug. 1, 1846, copy, Faila o le Ofisa o Polika Iaga, CHL; Historian’s Office, History of the Church, volume 16, July 20, 1846, 89–90; tagai foi i le Grow, Liberty to the Downtrodden, 63–64.

9. Church Historian’s Office, History of the Church, volume 16, Aug. 9, 1846, 136; Woodruff, Journal, Aug. 9, 1846.

10. Crocheron, “Ship Brooklyn,” 83; Tullidge, Women of Mormondom, 446; [Edward Kemble], “‘Brooklyn Mormons’ in California,” Sacramento Daily Union, Sept. 11, 1866, 6; Horner, “Voyage of the Ship ‘Brooklyn,’” 795–98; Dunbar, Romance of the Age, 44–45.

11. [Edward Kemble], “‘Brooklyn Mormons’ in California,” Sacramento Daily Union, Sept. 11, 1866, 6.

12. Crocheron, “Ship Brooklyn,” 83; Hansen, “Voyage of the Brooklyn,” 63–67; [Edward Kemble], “‘Brooklyn Mormons’ in California,” Sacramento Daily Union, Sept. 11, 1866, 6; Samuel Brannan, “To the Saints in England and America,” Latter-day Saints’ Millennial Star, Oct. 15, 1847, 9:306–7.

13. Samuel Brannan to “Brother Newell”; Samuel Brannan, “To the Saints in England and America,” Latter-day Saints’ Millennial Star, Oct. 15, 1847, 9:305–7.

14. Louisa Barnes Pratt, Journal and Autobiography, Aug.–Sept. 1846, 136–39. Autu: Upu o le Poto (MF&F 89)

15. Plewe, Mapping Mormonism, 76–77; Louisa Barnes Pratt, Journal and Autobiography, Aug.–Sept. 1846, 139; tagai foi i le Brigham Young to Samuel Brannan, June 6, 1847, Faila o le Ofisa o Polika Iaga, CHL; ma le Winter Quarters Municipal High Council Records, Aug. 27–28, 1846. Autu: Uinita Kuota

16. Louisa Barnes Pratt, Journal and Autobiography, Aug.–Sept. 1846, 140; Lund, “Pleasing to the Eyes of an Exile,” 122.

17. Louisa Barnes Pratt, Journal and Autobiography, Aug.–Sept. 1846, 139–40. Autu: Upu o le Poto (MF&F 89)

18. Louisa Barnes Pratt, Journal and Autobiography, Aug.–Sept. 1846, 140; Nauvoo Relief Society Minute Book, Apr. 28, 1842, i le Derr and others, First Fifty Years of Relief Society, 54–55. Autu: Healing (Faamalologa)

19. Louisa Barnes Pratt, Journal and Autobiography, Aug.–Sept. 1846, 140–41.

20. Lund, “Pleasing to the Eyes of an Exile,” 118–27; Winter Quarters Municipal High Council Records, Jan. 21, 1848; Plat of the City of Zion, circa Early June–June 25, 1833, i le JSP, D3:121–31.

21. Woodruff, Journal, Nov. 17–21, 1846; Historian’s Office, History of the Church, volume 16, Aug. 7, 1846, 9–10.

22. Bennett, Mormons at the Missouri, 131–34; Lorenzo Dow Young, Diary, Sept. 21–26, 1846; Kane, The Mormons, 48; Louisa Barnes Pratt, Journal and Autobiography, Aug.–Sept. 1846, 139–40; Lee, Journal, Mar. 6, 1847.

23. Kimball and Godfrey, “Law and Order in Winter Quarters,” 172–218; Woodruff, Journal, Dec. 20, 1846.

24. Woodruff, Journal, Dec. 20, 1846, and Feb. 16, 1847; tagai foi i le Mary Richards to Samuel Richards, Jan. 29, 1847, Samuel W. Richards, Papers, 1837–1929, CHL.

25. Norton, Reminiscence and Journal, 44; Stout, Journal, Dec. 15, 1846; Willard Richards, Journal, Dec. 20, 1846, ma le Jan. 28, 1847; Stapley, “Adoptive Sealing Ritual in Mormonism,” 62–74; tagai foi i le Historian’s Office, History of the Church, volume 17, Feb. 23, 1847, 56–57. Autu: Faamauga; Galuega o Malumalu

26. Bennett, We’ll Find the Place, 58; Plewe, Mapping Mormonism, 75; Bennett, Mormons at the Missouri, 89–90, 134, 140–41; Lund, “Pleasing to the Eyes of an Exile,” 128–29.

27. Woodruff, Journal, Oct. 15, 1846; Nov. 4 ma le 7–12, 1846; Dec. 8–11, 18, ma le 31, 1846; tagai foi i le Winter Quarters Municipal High Council Records, Sept. 15, 1846.

28. James Whitehead to Brigham Young, Aug. 18, 1846, Faila o le Ofisa o Polika Iaga, CHL; George Alley to Joseph Alley, Jan. 26, 1847, George Alley, Letters, CHL; Mace, Autobiography, 138–45; “Articles of Accommodation Treaty Agreement,” Sept. 16, 1846, Chicago Historical Society, Collection of Manuscripts about Mormons, CHL; Bullock, Journal, Sept. 1846; Historical Department, Journal History of the Church, Sept. 18, 1846; Leonard, Nauvoo, 606–16.

29. Historian’s Office, History of the Church, volume 16, Sept. 24 ma le 27, 1846, 49, 51; Brigham Young to “the High Council at Council Point,” Sept. 27, 1846, Faila o le Ofisa o Polika Iaga, CHL.

30. Historian’s Office, History of the Church, volume 16, Sept. 14, 1846, 34; Sept. 27, 1846, 52; Oct. 5, 1846, 7–8; Oct. 6, 1846, 11.

31. Bullock, Journal, Oct. 9, 1846; Historian’s Office, History of the Church, volume 16, Oct. 5 ma le 9, 1846, 7–8, 14–15.

32. Society Islands Conference Report, Sept. 24, 1846, i le Historian’s Office, Minutes and Reports (local units), CHL; Addison Pratt, Journal, Feb. 3, 1846; Sept. 24, 1846; Nov. 1850. I le lipoti o lana apitalaaga ia Novema 1850, e foliga mai sa misi ia Addison ona faailoa le aso o le konafesi. Autu: French Polynesia [Farani Polenisia]

33. Addison Pratt, Journal, Mar. 5, 1846; Apr. 17, 1846; Nov. 14, 1846; Woodruff, Journal, Nov. 26, 1844.

34. Grouard, Journal, 145; tagai foi i le Addison Pratt, Journal, Feb. 6, 1847.

35. Addison Pratt, Journal, Nov. 7, 1846.

36. Addison Pratt, Journal, Mar. 13 and 17, 1846; Nov. 14 ma le 17, 1846; Jan. 9, 1847; Addison Pratt to “My Dear Family,” Jan. 6, 1846, Addison Pratt Family Collection, CHL; Grouard, Journal, 165–66.

37. Grouard, Journal, 172; Addison Pratt, Journal, Nov. 1850; Addison Pratt to “My Dear Family,” Jan. 6, 1846, Addison Pratt Family Collection, CHL; tagai foi i le Addison Pratt, Journal, Jan. 13, 1847.

38. Addison Pratt, Journal, Nov. 14–17, 1846.

39. Historian’s Office, History of the Church, volume 17, Jan. 14, 1847, 18–19; Willard Richards, Journal, Jan. 14, 1847; tagai foi i le Bennett, Mormons at the Missouri, 148–57. Autu: Polika Iaga

40. Mataupu Faavae ma Feagaiga 136:1–11 (Faaaliga, Ian. 14, 1847, Revelations Collection, CHL); Historian’s Office, History of the Church, volume 17, Jan. 15, 1847, 19.

41. Mataupu Faavae ma Feagaiga 136:4, 8, 19, 23–27, 32 (Faaaliga, Ian. 14, 1847, Revelations Collection, CHL).

42. Mataupu Faavae ma Feagaiga 136:17, 21–22, 28–31 (Faaaliga, Ian. 14, 1847, Revelations Collection, CHL); tagai foi i le Esoto 2:23–25; 4:31; 6:6–7; 15:1.

43. Historian’s Office, General Church Minutes, Jan. 17, 1847; Willard Richards, Journal, Jan. 18, 1847; Mary Richards to Samuel Richards, Jan. 29, 1847, Samuel W. Richards, Papers, 1837–1929, CHL; tagai foi i le Mary Richards, Diary, May 23, 1846.

44. Willard Richards, Journal, Jan. 17, 1847Lee, Journal, Feb. 17, 1847; Woodruff, Journal, Jan. 16 ma le Feb. 16, 1847; tagai foi i le Irving, “Law of Adoption,” 296–303. Autu: Sealing [Faamauga]

45. Historian’s Office, History of the Church, volume 17, Feb. 23, 1847, 56–57; Stapley, “Adoptive Sealing Ritual in Mormonism,” 62–74; Jessee, “Brigham Young’s Family,” 475–80.

46. Woodruff, Journal, Feb. 16, 1847.

47. Woodruff, Journal, Feb. 17, 1847; Brigham Young, Vision, Feb. 17, 1847, President’s Office Files, Brigham Young Office Files, CHL; Historian’s Office, History of the Church, volume 17, Feb. 23, 1847, 56–58. E faatatau i le fuaiupu faaiu na sii mai, o le lomiga o lenei upusii i Faila o le Ofisa o Polika Iaga o loo misi ai le upu “Alii”; o le lomiga a le Talafaasolopito o le Ekalesia o loo maua ai lena upu.

48. Woodruff, Journal, Sept. 4, 1847; Historian’s Office, History of the Church, volume 17, Mar. 6 ma le 21, 1847, 65–66, 72; Lee, Journal, Feb. 15 ma le 27, 1847; Council of the Twelve Apostles to “the Brethren at Winter Quarters,” Apr. 16, 1847, Faila o le Ofisa o Polika Iaga, CHL; tagai foi Mataupu Faavae ma Feagaiga 136 (Revelation, Jan. 14, 1847, Revelations Collection, CHL).

49. Council of Fifty, “Record,” Sept. 9, 1845, ma le Jan. 11, 1846, i le JSP, CFM:472, 513.

50. Lee, Journal, Jan. 13, 1846, 79; George A. Smith, in Journal of Discourses, June 20, 1869, 13:85; Council of the Twelve Apostles to “the Brethren at Winter Quarters,” Apr. 16, 1846, Faila o le Ofisa o Polika Iaga, CHL; Norton, Reminiscence and Journal, July 28, 1847; Erastus Snow, in Journal of Discourses, Sept. 14, 1873, 16:207; tagai foi i le Thomas Bullock to Henrietta Rushton Bullock, June 9, 1847, Henrietta R. Bullock Collection, CHL.

51. Clayton, Diary, Apr. 16, 1847; Whitney, History of Utah, 1:300–302; Horace K. Whitney, Journal, Apr. 16, 1847; Young, “Woman’s Experiences with the Pioneer Band,” [4]; tagai foi i le Lorenzo Dow Young, Diary, Sept. 24, 1847.

52. Erastus Snow, Journal, Apr. 8 ma le 12–13, 1847; Historian’s Office, History of the Church, volume 17, Apr. 8 and 13, 1847, 81–83; Givens and Grow, Parley P. Pratt, 262–63.

53. Woodruff, Journal, Apr. 14–16, 1847; Clayton, Diary, Apr. 16, 1847; Council of the Twelve Apostles to “the Brethren at Winter Quarters,” Apr. 16, 1847, Faila o le Ofisa o Polika Iaga, CHL.