Mataupu 12

O Se Ala Faamaoni Atoa o le Olaga

o pusa meaai ma sapalai i autafa o le pasi

“O loo o’u matua popole lava i lo’u faa’i,” na tusia ai e Elder Spencer W. Kimball i lana api talaaga i le aso 8 Ianuari, 1970. “E foliga mai ua fai ifo lemu lo’u leo.”

I le aluga o tausaga e sefululua talu ona aveese e fomai se uaua o le leo na maua i le kanesa, lea a manao e tautala ua na o se musumusu oolo. Ae o lenei faafitauli sa lei telegese ai lana auaunaga i le Ekalesia. Talu mai le faavaeina o le Siteki a São Paulo i le 1966, sa faatulagaina ai e Elder Kimball uluai siteki i Atenitina ma Iurukuei, faapaiaina Kolomupia mo le galuega faafaifeautalai, ma auauna atu i le Au Paia i Ekuatoa. Sa ia tusia foi se tusi mamana, O Le Vavega o le Faamagalo Atu ma amata ona auauna atu o se taitaifono o le komiti o le paketi a le Ekalesia ma le komiti a faifeautalai.

Ae faatasi ai ma le faasolo faaletonu atili o lona leo, sa ia talanoa ai i se fomai, i le popole ua toe foi mai le kanesa. Sa maua e le fomai se vaega lanumumu i le itu tauagavale o le faa’i o Elder Kimball ma faatinoina ai ni suesuega se lua. O lenei tulaga na atili faigata ai le leo o le aposetolo, ma faamalosia ai o ia e faaleotele lana tautala e ala i se tamai masini faaleotele leo e tautau i lona ua.

Sa toe foi atu Elder Kimball i le falemai i le aso 12 o Ianuari ia iloa le tulaga ua i ai le ma’i. Ina ua uma ona suesue i taunuuga o suesuega ma le feutagai ma isi tagata tomai faapitoa, sa talitonu le fomai ua toe foi mai le kanesa, ma e itiiti se faamoemoe e mafai ona faasaoina le leo o Elder Kimball.

A o mafaufau Elder Kimball i le auala e agai ai i luma i togafitiga, sa ia mafaufau pe tatau ona ia aluese mai le Korama a Aposetolo e Toasefululua ae faaavanoa mo se alii e sili atu ona gafatia.

O le aso na sosoo ai, na ta’u atu ai e Elder Kimball ia N. Eldon Tanner le mea na fai mai ai le fomai, ma sa fautuaina mai e Peresitene Tanner ia faia e le au pulega aoao se anapogi faapitoa mo ia. E lua aso mulimuli ane, na faapotopoto ai le au pulega aoao i le malumalu, ma tuuina atu ai e Harold B. Lee se tatalo naunautai. Ina ua uma, sa nofo Elder Kimball i se nofoa i le ogatotonu o le potu, ma sa faauuina lona ulu i le suauu e Gordon B. Hinckley. Ona potopoto lea o isi aposetolo sa i totonu o le potu i se lio faataamilo ia Elder Kimball, ma sa faamauina e Peresitene Tanner le faauuga ma faamanuiaina o ia.

I le taimi o le faamanuiaga, sa lagona e Elder Kimball le latalata atu i lona Tama Faalelagi ma uso o lana korama. O le avega mamafa sa ia tauaveina na foliga mai ua aeveese atu, ma sa ia iloa afai e finagalo le Atua ia te ia e faaauau lana galuega, ona Ia maua lea o se ala mo ia e faia ai, pe i ai pe leai sona leo. Ina ua maea le faamanuiaga, sa fusi ma opo e Elder Lee ia Elder Kimball. Fai mai isi aposetolo sa i le li’o, sa latou lagonaina le faamanuiaina e auai i se aafiaga faaleagaga mamana ma soofaatasi.

I le taeao o le Aso Sa, i le tolu o aso talu ona uma le faamanuiaga, sa telefoni faafuasei atu ai le tuaoi o Elder Kimball ia te ia. Sa faalogo o ia ua maliu Peresitene MaKei, ma sa ia fia iloa pe moni.

“Ou te lei faalogo ai,” na tali atu ai Elder Kimball. Sa amata ona ia faia ni valaau, ma e lei umi, ae ia iloaina ua maliu moni lava le perofeta i lena taeao.

Sa faanatinati atu Elder Kimball i le Maota o le Pulega a le Ekalesia. O Iosefa Filitia Samita, le aposetolo sinia, ma Harold B. Lee o loo feiloai ma le aiga o MaKei. Na maua e Elder Kimball ia Iosefa Anderson ma Afa Haycock, o failautusi i le Au Peresitene Sili ma le Toasefululua, ma sa latou faaaluina ni itula e valaau ai i le au pulega aoao e ta’u atu ia i latou le talafou.

O le maliu o Peresitene MaKei na faanoanoa ai le Ekalesia. O lona alofa mo le Au Paia i le salafa o le lalolagi sa lauiloa. Sa ia taitaia le Ekalesia mo le toeitiiti sefuluiva tausaga, ma o le lua-vaetolu o ona tagata auai o le tolu miliona na papatisoina a o avea o ia ma peresitene. Ina ua ia suitulaga ia Siaosi Alapati Samita ia Aperila 1951, e 184 siteki a le Ekalesia. O lenei la, i le 1970, ua i ai le 500 siteki, e aofia ai siteki e sefulufa i Ausetalia ma Niu Sila, sefulutolu siteki i Europa, ma uluai siteki i Atenitina, Pasila, Kuatemala, Mekisiko, Toga, Iurukuei, ma Samoa i Sisifo.

Toeitiiti 90 pasene o siteki fou i le taimi o le taitaiga a MaKei sa faatuina i le Iunaite Setete ma Kanata, lea na tumau ai le maualuga o le tuputupu ae o le Ekalesia. I Amerika i Matu, o le tulaga tauleleia o le Ekalesia na faamanuiaina mai Au Paia o Aso e Gata Ai lauiloa e pei o J. Willard Marriott, na faavaeina se pisinisi tele o faletalimalo, ma Siaosi W. Romney, o lē sa avea ma pule sili o le Kamupani o Faletaavale o Amerika ma o le kovana o le setete o Michigan.

Na faapaiaina e Peresitene MaKei malumalu e lima i atunuu e fa ma vaaia le faaliliuga o sauniga o le malumalu i gagana e sefululua. Sa faapena foi ona maua le konafesi aoao, e pei o le lua selau o alaata o televise ma le tele o alaleo o leitio i Amerika i Matu, Tutotonu, ma Saute e faasalalau ai taualumaga. I le avea ai ma se taitai iloga o le galuega faafaifeautalai ma aoaoga a le Ekalesia, sa matua faalauteleina ai e Peresitene MaKei taumafaiga a le Ekalesia i vaega uma e lua. Ma o lona faatinoina o le polokalama faamaopoopo, lea sa ia manatu i ai o lana galuega aupito taua o se peresitene o le Ekalesia, na atili ona faigofie ona maua ai e se aofia i le lalolagi atoa ia upumoni faigofie o le talalelei toefuataiina.

E faitau afe ma afe le Au Paia na o mai i le falelauasiga o Peresitene MaKei e faailoa lo latou faaaloalo. I se taimi puupuu mulimuli ane, sa fono ai le Korama a Aposetolo e Toasefululua e lagolago Iosefa Filitia Samita e avea ma peresitene fou o le Ekalesia. I le ivasefulu-tolu [o tausaga o lona soifua], o Peresitene Samita o le toeaina aupito matua lea na taitaia le Ekalesia. Na o’o mai o ia i le tofi toeitiiti onosefulu tausaga o le poto masani o se aposetolo, ma sa faaaloalogia e le Au Paia lona malamalama tele i le talafaasolopito o le Ekalesia ma tusitusiga paia. I le avea ai ma atalii o Peresitene Iosefa F. Samita, o ia foi o le atalii o le atalii o Ailama Samita, le uso o le perofeta o Iosefa.

Sa valaauina e Peresitene Samita ia Harold B. Lee ma N. Eldon Tanner e avea ma ona fesoasoani i le Au Peresitene Sili. Talu ai o tiute fou o Peresitene Lee na le mafai ai ona auauna atu o se peresitene o le Korama a Aposetolo e Toasefululua, sa vaetofia ai Elder Kimball e avea ma peresitene o le korama i lona tulaga.

O le faia o le faafeagai o le fautuaga a se uo fomai, o lē sa uunaia o ia e saili togafitiga o le kanesa i Kalefonia, sa faataatia ese ai e Elder Kimball ona popolega faalesoifua maloloina ina ua mavae le maliu o Peresitene MaKei, ma filifili e taulai atu i ona tiute faaaposetolo. Sa tumau lona le mautinoa po o le a le mea sili e taulima ai le faama’i, ma talu ai ua faaleleia lana tautala talu mai le faamanuiaga, sa lei manao o ia e faia soo se taotoga e lamatia ai lona leo.

A o vaetofia o ia e Peresitene Lee i lona valaauga fou, sa ia saunoa e uiga i atugaluga o le soifua maloloina o Elder Kimball, ma ofoina atu upu o le faamafanafanaga ma le faamoemoe.

“Matou te faamanuia faapitoa lava lou leo,” na ia saunoa ai, “ma aioi atu i le Alii e faasao lou tomai e fesootai atu ai i le leo faapea foi i le tusia o faatonuga, ina ia mafai ona e soifua i le lalolagi pe afai o le a sologa lelei pea le olaga ia te oe, ma seia oo ina fetalai mai le Alii ua lava lea.”

E lei leva ona taunuu i Kalefonia, ae alu loa Maeta Holiday i se fale faatau tele faatasi ma Venna Black, o lona tina tausi i le Polokalama o le Faaofi Mai o Tamaiti A’oga Initia. E lei alu muamua lava Maeta i le fale faatau tele, o lea sa ia gauai atu ai ma le toto’a i soo se gaoioiga a Venna e faia i totonu o le taavale.

I le fale faatau tele, sa piki ai e Maeta ni lavalava sa ia manaomia, ae ina ua oo i le taimi e alu ai, sa lei mautinoa e Venna pe faapefea ona toe foi i le fale. “Ou te le manatua le mea e tatau ona ou alu i ai,” sa ia fai atu ai ia Maeta.

“Ia, ta o ii,” o le tala lea a Maeta, na ia faatonu atu ai Venna i le auala sa’o. Ona ia taitai atu lea o Venna i le fale, i lea afega ma lea afega.

Sa faagaeetia Venna. “E faapefea ona e iloa le auala e toe foi ai i le fale?” sa ia fesili ai.

“Ou te maitaua i taimi uma,” o le tala lea a Maeta. O le manatuaina o faailoga iloga o se mausa sa ia maua a o taitaia lafu mamoe a o teineitiiti i nofoaga o tagata Navajo. Afai e na te le gauai atu i faailoga, atonu o le a ia le oo i le fale.

Sa amata ona auai Maeta i le aoga maualuga i le lotoifale ina ua mavae lenei aafiaga. O ona aso muamua sa lagona ai le fefe. Sa sili atu le telē o le aoga nai lo soo se aoga sa ia auai ai muamua. O ona ala savali sa laina ai loka. E toetoe lava o tamaiti aoga uma e papae, ma i lona iloa ai, sa na o ia lava le tagata aoga mai le polokalama o le faaauai iina. E ui i lea, na te lei lagonaina le faailogalanu mai lana tupulaga, e pei ona sa lagonaina e nisi o tamaiti aoga i le polokalama i isi aoga. Sa faafeiloai o ia e tamaiti o lana vasega, ma sa vave ona ia maua ni uo.

E pei o isi talavou i lana uarota, sa auai Maeta i le seminare i le vaveao. Sa la feala i luga ma lona uso fai o Lusi i taeao o aso uma o le vaiaso i le lima ina ia mafai ona la oo atu i le falelotu o le uarota i le taimi e tatau ai mo le vasega. I lona aso muamua o le seminare, sa faatalitali ai Maeta i lona nofoa, ma le le iloa moni lava pe aisea na i ai ai o ia iina seia o’o ina amata le vasega. Ona ia iloaina lea. “Oi,” sa ia mafaufau ai, “tatou te aoao e uiga i le Ekalesia.”

Sa lei fiafia tele Maeta i le seminare. Sa faateia ma lē mautonu o ia ina ua ia iloa o le a ia mauaina se togi i le vasega. “E mafai faapefea ona togiina oe mo ou talitonuga?” sa ia mafaufau ai. Mata o le a tuuina atu e le Atua ia te ia le togi? Ae, sa seāseā ona misia e i la’ua ma Lusi le vasega.

I lona tausaga muamua i le aoga maualuga, sa auai ai Maeta i se aufaipese a le aoga. O le tausaga na sosoo ai, sa taalo pasiketipolo ai o ia, lea sa ia aoaoina a o aoga i le aoga nofotumau i Arisona. Sa lelei o ia i le taaloga ma avea ma se tagata taalo pito i luma mo lana au. Sa fiafia o ia e fai ’ai tai lua lima tasi, ma sikoa i le toe maua mai o le polo pe a misi se togi a le isi au. Ae sa lelei foi o ia i le pasi atu o le polo i isi tagata taaalo. I le faaiuga o le vaitau taalo, sa palota ai e ana au taaalo ma faiaoga o ia o se tagata taalo silisili ona taua.

O le polokalama o le faaauai na fautuaina e toe foi atu tamaiti aoga pe a maea tausaga aoga taitasi e nonofo ma o latou aiga na fananau mai ai mo le taumafanafana. Sa lei fiafia Maeta e toe foi i le aiga pe faaalu se taimi ma lona tina atuatuvale, o Evelyn. Ae sa talitonu Venna e taua mo Maeta ona tumau le fesootai atu i ona aiga ma uunaia o ia e tusi atu i le aiga i masina taitasi. O taimi uma lava e o’o mai ai le taumafanafana, e pue ai e Maeta le pasi i Arisona.

I le tautotogo o le 1970, a o faamaeaina e Maeta lona tausaga lona lua i le aoga maualuga, sa ia iloa ai ua mu le fale o lona tina. Sa leai se tasi na faamanualia, ma sa lei popole Maeta i lona aiga. Peitai, sa fesoasoani Venna ia Maeta e faatau ni nai mea e sui ai mea na mu i le afi a ona uso ma tuagane laiti.

I le aso na malaga ai Maeta mo Arisona, sa momoli ai o ia e Venna i le fale faatali pasi ma ni pusa e tumu i meaai, lavalava, ma palanikeke. “E mo lou aiga mea ia,” sa ia faamatala atu ai. “E mai le tatou uarota.”

A o vaai atu Maeta i pusa o loo la’u atu i le mea e teu ai uta a le pasi, sa lofituina o ia i lagona ootia. I le taimi na faatoa taunuu ai o ia i Kalefonia, sa masalosalo o ia i le agalelei o tagata Uli, ma mafaufau pe ua latou aveina o ia i le na o le faia o a latou feau i le fale. Talu mai lena taimi ua ia iloa ai sa latou popole mo ia. Ae i lona faatoa vaai ai i pusa, na te lei iloaina le tele o le alofa o lona aiga tausi ia te ia.

Ma na te lei iloaina le tele o lona alofa ia i latou.

Mulimuli ane i lena tausaga, sa vaavaai atu ai Kazuhiko Yamashita e sefuluono tausaga e sola ese mai le la i se taeao vevela o Iulai i Osaka, Iapani. O ia ma lona uso matua, o Masahito, sa malaga mo le tele o itula e auai i le Expo ’70, o se faaaliga a le lalolagi e aofia ai le faitau selau ma selau o faaaliga ma faapaologa e maofa ai mai malo ma faalapotopotoga i le salafa o le lalolagi. O lona autu o le “Alualu i Luma ma le Lototasi mo Tagata,” ma po o fea lava e vaavaai i ai tagata asiasi mai, e mafai ona latou vaaia faamaoniga o le manuia faagaeetia o le toe faaleleia o Iapani mai le faatafunaga o le Taua Lona Lua a le Lalolagi.

Ua uma ona asia faatasi e Kazuhiko ma Masahito ni nai faaaliga. I le Faapaologa a le Iunaite Setete, sa la vaaia ai se tasi o faaaliga sili ona lauiloa a le expo: o se maa mai le masina na aumaia mai le nofoaga faasolopito lea na tulaueleele ai i le tausaga na muamua atu.

Ae o le taimi nei ua o eseese ai le au uso, a o saili atu Masahito mo faaaliga enisinia ma sa taamilo solo Kazuhiko i le lotoa o le expo ma lana meapueata. Sa manao Kazuhiko e alu i le Faapaologa a Iapani e vaai po o a ituaiga o faaaliga sa faailoa atu e lona atunuu i le lalolagi. Ae o le taimi na o’o atu ai o ia i le faapaologa, ua mamao lava le laina i fafo o le faitotoa. Sa ta’u atu e se tagata faigaluega ia te ia o le faatalitali e le itiiti ifo ma le lua itula.

Nai lo le tu umi i le la vevela, sa agai atu pea Kazuhiko, ma savali mo le lima pe sefulu minute faatoa ia vaaia ai se faapaologa na foliga mai o se fale paepae matagofie. Sa i ai ni tulaga se lua ma se tumutumu umi ma se faatagata auro o se alii o loo iliiina se pu umi. Sa lei iloa e Kazuhiko po o le a le faapaologa, ae sa leai se laina, o lea e na te le ono faatali ai e alu i totonu.

I le ui atu ai i se togalaau sitaili faa-Iapani, sa ia ulufale atu ai i se vaega o avanoa lea na faapotopoto ai o ia ma isi malo e se tagata taiala mo se malaga maimoa. O le faapaologa, na vave ona iloa e Kazuhiko, na tuuina mai ai faamatalaga e uiga i Le Ekalesia a Iesu Keriso o le Au Paia o Aso e Gata Ai ma ona tagata. Sa faaalia e le Ekalesia ni faaaliga lauiloa i isi faaaliga i le lalolagi, ae o le taimi muamua lenei ua aumaia ai se faapaologa i se atunuu e le numera tasi ai le faaKerisiano. O le fogafale pito i lalo o le fale sa i ai se faatusa e sefululua futu le maa faatusa o le Keriso, o se faatagata na saunia e le vane-faatagata Tenimaka o Bertel Thorvaldsen. Sa i ai foi se faaaliga o atapu’e manino e uiga i gaoioiga o aso uma a tagata o le Ekalesia i Iapani.

O le aiga o Kazuhiko sa lotu Puta, ma na te lei iloaina se mea e uiga ia Iesu Keriso po o se Tama Faalelagi. Ae ina ua siitia atu o ia ma isi malo i le fogafale lona lua o le faapaologa, sa latou ulufale atu i se faasologa o potu na aoaoina ai i latou e uiga i le galuega a le Faaola ma Lana matafaioi i le Foafoaga o le lalolagi. Sa latou aoao e uiga i le fuafuaga o le fiafia a le Atua ma le Toefuataiga o le talalelei a Keriso e ala i se perofeta taulealea e suafa ia Iosefa Samita.

Na faaiuina le malaga maimoa i se tamai potu matamata ata o se ata i le gagana faaIapani o le Sailiga a le Tagata mo le Fiafia, o le ata puupuu lea na faia e le Ekalesia i le Faaaliga a le Lalolagi o Niu Ioka i le 1964. I le uunaia ai e taitai misiona i le lotoifale o Ed ma Chieko Okazaki, o le ata Iapani na pu’eina i le lotoifale e i ai tagata lauiloa o ata tifaga pu’e, o nisi o i latou na iloa e Kazuhiko. Ae o fesili na aumaia i le ata—O fea na sau ai o ia? Aisea na i ai o ia iinei? O fea e alu i ai o ia?—sa fou ia te ia. Na te lei tuuina atu lava i ai se manatu. Ma sa ia le mautinoa pe na ia talitonu i tali na tuuina atu e le faapaologa ia te ia.

A o malaga ese atu o ia mai le potu e faaali ai ata, sa vaaia e Kazuhiko se tamaloa o tu i le falefaafiafia.

“Pe e te talitonu i ai?” Sa fesili atu ai Kazuhiko, e faatatau i le ata.

“Ioe, ou te talitoni i ai,” na fai atu ai le tamaloa e aunoa ma le faatuai.

“E te mo’i?”

“Ou te mautinoa.”

Sa tuua e Kazuhiko le faapaologa ma faaauau pea ona matamata i le faaaliga, ae sa lei mamao atu o ia ina ua ia iloaina ua ia tuua lana meapueata. Sa ia toe faatopetope atu i le fale o le faaaliga, lea na maua ai e se tagata faigaluega le meapueata na leiloa.

I le avea ai ma se faaaliga o le lotofaafetai, sa faatau ai e Kazuhiko se kopi Iapani o le Tusi a Mamona ma tuu ai lona igoa ma le tuatusi i le tagata faigaluega, e ui lava sa lei fiafia faapitoa o ia e aoao atili e uiga i le Ekalesia.

I le tolu masina mulimuli ane, na o atu ai se soa o faifeautalai i lona fale i fafo atu o Tokyo. Na te lei faamoemoeina i latou e asiasi mai, ae sa fiafia o ia e vaai ia i latou—ma naunau e faalogo i mea na latou fai mai ai.

Ia Setema 1970, sa tulai ai le peresitene aoao o le Aualofa o Belle Spafford i le Tapeneko i Sate Leki i luma o le faitau afe ma afe o tamaitai o le Au Paia o Aso e Gata Ai i le konafesi faaletausaga a le Aualofa. O lea faatinoga e masani o se taimi o le olioli, ao o mai faatasi tamaitai mai le salafa o le lalolagi e fefaasoaai aafiaga ma maua aoaoga mai o latou taitai. Peitai, o lenei konafesi, sa sili atu ona faaleiloga nai lo isi.

“O loo tatou ola i se vaitaimi ua iloga i faigata mai lea faalavelave i lea faalavelave,” na saunoa ai Peresitene Spafford. I le Iunaite Setete, o ata o taua ma faalavelave i le lotoifale faalemalo e emo vave felavasai i lau o televise i aso uma. Sa tumau pea le maualuga o le femisaa’i o le faailogalanu, ma le tagatavaleina o taitai iloga o le malo ma e taulamua i aia tatau faalemalo na faateia ai le atunuu. Sa faaauau pea ona tetee tagata talavou e faasaga i le Taua i Viatename. O le filemu ma le toafimalie na foliga mai e le tumau.

O le Aualofa lava ia sa i ai i se taimi o le suiga a o faamasani atu le faalapotopotoga i le faamaopoopoga a le Ekalesia. I aso ua mavae, sa faia ai e sui auai o le Aualofa le sailia o a latou lava tupe ma fatuina ni paketi ona faamaonia lea e taitai perisitua. Peitai, talu ai nei, sa faasilasila mai ai e le Au Peresitene Sili e faapea o le a faatupeina Aualofa e paketi a uarota po o paranesi.

I lalo o le polokalama fou, na tofia ai e taitai perisitua i le lotoifale ia faalapotopotoga taitasi a uarota se aofaiga faatulagaina e faaalu i tausaga taitasi. E mafai e Aualofa taitasi ona faaauau pea ona pulea le auala e latou te faaaluina ai a latou tupe e aunoa ma le avega faaopoopo o le suegatupe mo la latou faalapotopotoga. Ae talu ai ua faamalosia nei Aualofa i se paketi faatapulaaina, ua aveesea ai nisi o tutoatasi tautupe sa latou olioli ai i le aluga o tausaga. O pasā a le Aualofa, o suegatupe faamamaluina i le taimi lea na faaalia ai ma faatau atu ai e tamaitai a latou meataulima, na iu foi ina faamutaina.

O isi suiga na aafia ai le puleaina. O se vaega o lana galuega o auaunaga faaagafesootai, sa vaaia ai e le Aualofa le Polokalama o le Faaauai o Tamaiti Aoga Initia, o auaunaga faalevaetamaina ma le tausiga o auaunaga tausi, a le Ekalesia ma se polokalama o le toefuataiga o talavou faaletonu. Ae o nei polokalama sa tele lava ina na o le Iunaite Setete i sisifo sa taula’i i ai, ma o le manao e tuuina atu auaunaga faaagafesootai i tagata o le Ekalesia i le lalolagi atoa i lalo o se faamaopoopoga faalefaalapotopotoga e tasi, na uunaia ai se toefaatulagaina.

I le 1969, na fatuina ai e taitai o le Ekalesia Auaunaga Faaagafesootai Tuufaatasi, lea na aumaia faatasi ai nei ta’imua uma i lalo o le taitaiga a taitai perisitua. Sa faaauau pea ona avea Peresitene Spafford o se faufautua, ae ua ia le o toe taitaia polokalama.

A o faamasani le Aualofa i suiga, sa tuusa’o atu e Peresitene Spafford ma ona fesoasoani e uiga i faafitauli e ono tulai mai sa latou vaaia. Ina ua latou iloaina sa galulue le Komiti Faamaopoopo a Tagata Matutua i le tusiaina o lesona a le Aualofa, sa faailoa atu e le au peresitene ni manatu. I le faaiuga, sa tusia e le Aualofa ana lava lesona i le aofia ai o manatu ma iloiloga a le komiti.

Sa faailoa mai e Peresitene Spafford le manaomia ona fetuunai le Aualofa a o salalau atu le talalelei toefuataiina i le lalolagi atoa. O le mekasini a le Ekalesia mo le aufaitau faavaomalo ua faaliliuina nei i gagana e sefulufitu. Ae o le Mekasini a le Aualofa sa na o le Igilisi ma le Sipaniolo na lolomiina ai.

Ina ia fesoasoani e oo atu i le toatele e mafai o le au faitau i savali fesootai, sa le’i leva ona fautuaina atu e taitai ni suiga i lomiga a le Ekalesia. Ia Iuni 1970, sa latou faasilasila mai ai o le tele o mekasini o i ai nei, e aofia ai le Instructor, le Improvement Era, ma le Relief Society Magazine, o le a le toe lomia. O mekasini ua loa ona lolomiina i le gagana faaPeretania i misiona, e pei o le Millennial Star i le Malo Aufaatasi ma le Cumorah’s Southern Messenger i Aferika i Saute, o le a faamutaina foi. I lo latou tulaga, o le a lolomi ai e le Ekalesia ni mekasini fou se tolu, e tofu saunoa atu i se vaitausaga faapitoa: o le Ensign mo tagata matutua, o le New Era mo le autalavou, ma le Uo mo tamaiti.

A o tula’i ai i luma o lana aofia i le Tapeneko, sa silafia e Peresitene Spafford o le toatele o tamaitai sa tauivi e faamasani i suiga talu ai nei, e pei lava ona sa ia faia. Sa maua e lana au peresitene ni tusi mai tamaitai o e sa faavauvau i le talafou e uiga i le muta ai o le mekasini. Ma sa mafai ona malamalama Peresitene Spafford i lo latou faanoanoa. Ina ua faatoa fautuaina atu le manatu, sa ia tetee, ma le lagonaina o le mekasini na i ai se faamoemoega taua i le Ekalesia ma i olaga o uso. O le a se mea e mafai ona ia fai atu nei e aumai ai le faamalologa ma le faamafanafanaga?

Sa ia avea ma ana autu se fuaitau mai le Tusi a Mamona: “Sa matou ola e tusa ma le ala o le fiafia.” Ina ua feagai ma taimi faigata, sa lei faavaivaia e le nuu o Nifae a latou taumafaiga. Sa latou tausia poloaiga a le Atua i le mea sili latou te mafaia. Ma sa latou toaaga, ma tausia lafu ma fagaga ma totō ma selesele mai faatoaga.

E mafai foi ona faia faapena e le Aualofa. O suiga faalefaalapotopotoga e lei suia ai mea ia na taitai atu ai i le fiafia: amiotonu, auaunaga agaalofa, faailoaga fatufatuai, ma le faaauai i nuu.

“Ua ofoina mai e le Aualofa ni avanoa e le faatapulaaina,” na molimau mai ai Peresitene Spafford, “e faafailele ai elemene taua o se olaga fiafia.”

Ia Fepuari 1971, i le ono o tausaga talu ona ia liliu mai, sa nofo ai Darius Gray i le Aai o Sate Leki. I le avea ai ma se tagata o le Ekalesia, sa fiafia o ia i le faaaumea o le toatele o le Au Paia o e sa faauoina o ia ma fesoasoani ia te ia e faamasani i lona faatuatuaga fou. Sa ia feiloai foi i ni nai tagata o le Ekalesia o e sa agaleaga ia te ia ona o ia o se tagata Uliuli. Ae sa ia pipiimau i upu mamana sa ia faalogo i ai i le po a o lumanai lona papatisoga: “O le talalelei toefuataiina lenei, ma e tatau ona e auai.”

Sa galue Darius o se failipoti mo le KSL-TV, o se nofoaga o talafou i le lotoifale. A o lei mauaina le galuega, na te lei mafaufauina lava se galuega i le aufaasalalau. Ona ia feiloai lea ia Arch Madsen, le peresitene o le kamupani o fesootaiga a le Ekalesia lea na vaaia le KSL. O lona iloaina o Arch, o se tagata faauo lelei ma tuusao, na talia ai e Darius le galuega. Sa peiseai na fofola atu e le Atua se ala mo ia.

Ina ua uma ona faafaigaluega Darius, sa ia tulitulimatagauina se faailoga tau faasalalauga mai le Iunivesite o Iuta. Sa ia auai atoa foi i lana uarota i le Aai o Sate Leki ma sa avea ma se faatonu o le Aoga Sa. E ala atu ia Arch, sa ia feiloai ai ia Monroe Fleming, o se agata Uliuli o le Au Paia o Aso e Gata Ai sa faigaluega i le Faletalimalo o Iuta. O le faletua o Monroe, o Frances, o se augatupulaga lona fa o le Au Paia ma o se tamateine o le tamateine a Jane Manning James. Sa valaaulia o ia e le au Fleming mo se taumafataga o le afiafi, talanoa ma le faamaoni e uiga i o latou aafiaga i le Ekalesia, ma faailoa atu o ia i isi tagata uli o le nuu o le Au Paia o Aso e Gata Ai o le Aai o Sate Leki.

Faatasi ai ma tagata sa feiloai i ai Darius o Lucile Bankhead, o le faatina faapelepele a le nuu. E pei o Frances Fleming, o ia o se e tupuga mai i paionia Uli o le Au Paia o Aso e Gata Ai ma sa ola ae i le Ekalesia. Sa ia feiloai foi ia Eugene Orr, o lē sa auai i le Ekalesia i le 1968 ma faaipoipo i se tamaitai sa ia feiloai i ai i Iuta, o Leitha Derricott. O lea ua talimalo Eugene ma Leitha i tafaoga o le taumafanafana e fesoasoani e faaaumea a la uo Uli i le eria.

Sa faapitoa le faagaeetia o Ruffin Bridgeforth, o se tagata Uli sa siitia atu i Iuta i le 1944 o se tagata faigaluega i le militeli a le I.S. Sa auai Ruffin ma lona faletua o Helena, i le Ekalesia i le 1953 ma tausia le la fanau i le Ekalesia. Sa faamemelo Darius i le tumau, atamai filemu, ma le agamalu o Ruffin. I le aluga o tausaga, sa avea Ruffin ma se uo mamae faatasi ma Elder Thomas S. Monson ma isi taitai o le Ekalesia. E masani ona ia saunoa atu i uarota, siteki, ma misiona e uiga i tagata Uli i le Ekalesia.

I se tasi aso, na maua ai e Darius se valaau mai ia Heber Wolsey, le faauluuluga o le va-i-fafo i le IPI. Sa ia iloaina e galue Darius i le KSL ma o nisi taimi e na te sailia ai lana fesoasoani pe a feagai le IPI ma se faafitauli tau faailogalanu.

Talu ai nei lava, sa matua mamafa ai lava suesuega faalauaitele i le iunivesite i le tapulaa o le perisitua a le Ekalesia, ma o tagata faiupufai faatupuvevesi i nisi taimi e faia ai ni solotetee ma taofia le o i mea tautaaloga a le IPI. Na faateteleina ia faafitauli ia Oketopa 1969, ina ua talosagaina tagata uli taaalo lakapi e sefulufa i le Iunivesite o Wyoming e faamaulu fusilima uliuli i o latou lima i le latou taaloga o loo loma ma le IPI. Sa aveese mai latou mai le au e le latou faiaoga, lea na mafua ai le tosina atu o le vaaiga o ala o faasalalauga ma faamaite ai ia tetee.

O le au faatupu vevesi i Wyoming i lea taimi ua talosaga mo se isi tetee, o le taimi la lenei i se taaloga pasiketipolo ma le IPI. Ina ua iloa e le peresitene o le IPI o Ernest L. Wilkinson e uiga i le fuafuaga, sa ia tuuina atu se faamatalaga tusitusia i le puipuiga o le iunivesite ma auina atu Heber e talanoa ma le au faamaopoopo tetee. Ae sa mananao le au tetee e feiloai i se tagata Uli o le Ekalesia, o lea sa valaau atu ai Heber e fesili pe mafai e Darius ona pue atu se vaalele i Wyoming.

“O le a le vave?” O le fesili lea a Darius.

“Oi,” na fai atu ai Heber, “i le isi tolusefulu minute.”

Sa faananati atu Darius i le malaevaalele ma faimalaga ai. Ina ua ia taunuu atu i le iunivesite, sa faataalise atu o ia e Heber i se faletele o fonotaga ua matua faatumulia lava. Sa la nonofo i le pito i luma, e faafesagai ma taitai o le au tetee. Sa faatumauina pea e Darius lana ataata faauo, ae a o ia taliina a latou fesili, sa mafai ona ia iloa o nisi o i latou sa le fiafia ona o loo ia puipuia le Ekalesia. Ae, sa ia naunau lava ia faamaoni ia te ia lava ma ona talitonuga.

I se tasi o fonotaga i le faaiuga o lena vaiaso, sa tuuaia ai e se tasi ia Darius i lona faalumaina lea o lana lanu i le auai i le Ekalesia. Sa tali atu Darius, “Sa ou fanau mai Uliuli. O lea ou te Uliuli. O le a ou oti Uliuli. Ou te mitamita i lo’u tupuaga Uliuli. Ma o le a ou tau mo faamoemoega amiotonu mo tagata Uli i lo’u malosi atoa.”

Ona ia malolo lea. “O au foi o se Mamona,” sa ia faaopoopo atu ai ma le mitamita. “O le ekalesia Mamona e i ai tali mo au ou te le’i mauaina i se isi lava mea. E leai se feteenaiga i le va o le lanu o lo’u pa’u ma la’u tapuaiga.”

E ui lava i taumafaiga a Darius ma Heber, sa faia lava e tamaiti aoga Wyoming se solo tetee a o lei faia ma i le taimi o faagasolo le taaloga. A o matauina e Darius i latou, sa ia malamalama i lo latou manao mo le tutusa mo tagata lanu, ae na te lei manatu e latou te malamalama atoatoa i le Ekalesia po o ana aoaoga.

“Afai latou te naunau e faaali atu i tagata uma e faasaga i le faailoga tagata ma le amioletonu i soo se mea atonu o i ai, ae le o le tetee i mataupu faavae o le faatuatuaga a Mamona,” na ia toe manatunatu ai mulimuli ane, “Semanu ou te naunau e auai faatasi ma i latou.”

I le aso 19 Ianuari, 1971, na faaaoga ai e Anthony Obinna, o se faiaoga e fasefulu-lua tausaga le matua o Nigeria, se peni ma se pepa lanumoana e tusi ai se tusi i le peresitene O Le Ekalesia a Iesu Keriso o le Au Paia o Aso e Gata Ai. “Ua ou faitauina ni nai tusi i le sailiga o le faaolataga,” na ia tusia ai, “ma mulimuli ane maua ai le tali.”

I nai tausaga ua mavae atu, sa tele lava ina taofia ai Anthony, lona faletua, o Fidelia, ma le la fanau i lo latou fale a o sasao solo le taua faalemalo a Naitiria na siomia ai latou. I se tasi aso, a o feagai Anthony ma itula e tele o le le mautonu, sa ia tatalaina ai se mekasini tuai ma vaaia ai se mea na te lei mafaufauina: o se ata o se fale umi taua fausia i maa e i ai ni tumutumu lapopoa.

Sa ia vaai muamua i le fale—i se miti na ia faia a o lei amataina le taua faalemalo. I le miti, sa taialaina o ia e le Faaola i le fale ofoofogia. Sa tumu i tagata, o i latou uma sa laei papae.

“O le a lea mea?” Na fesili atu ai Anthony.

“O tagata nei o e auai atu i le malumalu,” na tali atu ai le Faaola.

“O a mea o loo latou fai?”

“O loo latou tatalo. Latou te tatalo iinei e le aunoa.”

Ina ua ala mai o ia, sa naunau Anthony ia iloa atili e uiga i mea sa ia vaaia. Sa ia toe faamatalaina le miti ia Fidelia ma ana uo, ma fesili atu po o le a lo latou manatu i le uiga. E leai se tasi e mafai ona fesoasoani ia te ia. Na iu lava ina ia talosagaina se faifeau mo se taitaiga. Sa le mafai e le faifeau ona faaliliuina foi le miti, ae sa ia ta’u atu ia Anthony afai o le miti e mai le Atua, o le a i ai se aso e malamalama ai ana fesili.

O le taimi lava na vaai ai Anthony i le ata i le mekasini, sa ia iloa ai ua ia maua lana tali. I le pito i luga o le ata sa i ai se faamatalaga e faailoa ai o le malumalu i le Aai o Sate Leki.

“O Mamona—o tagata aloaia o le Ekalesia a Iesu Keriso o le Au Paia o Aso e Gata Ai—e ese,” na amata ai le tusiga. Sa toe faamatalaina ai le talafaasolopito o le Ekalesia ma faamalamalamaina ai nisi o ona aoaoga faavae autu. “O se auala atoa o le olaga,” o le tala lea a le tusiga. “O le aloiafi faalelotu lea e mu ai se nuu faapena o taumafaiga o se talitonuga faapea o tagata uma i le lalolagi o se atalii po o se afafine faaleagaga o le Atua.”

O le tusiga na amata ai ona telea’i le mafaufau o Anthony. Sa nofo o ia latalata i ona uso, o lea sa ia faapotopoto faatasi ai i latou ma tau atu ia i latou e uiga i le ata ma lana miti.

“Ua e mautinoa e uiga i lena fale?” na fesili atu ai lona uso o Francis.

Sa mautinoa e Anthony.

Ae paga lea, sa le mafai ona ia tusi atu i le laumua o le Ekalesia i lena taimi ona o se taofiga o taimi o taua. E lei silafia foi e ia nisi o aulotu e lei aloaia a Nigeria o le Au Paia o Aso e Gata Ai. O le toatele o i latou sa faataapeapeina i le taimi o le taua, ua le toe fesootai le tasi ma le isi ma le Ekalesia. O nisi tagata talitonu, e pei o Honesty John Ekong, sa le’i toe faalogo lava i ai. Ae o lea ua uma le taua, sa leai se mea e toe taofia ai Anthony mai le fesootai atu i le Ekalesia.

I le faaauau ai o lana tusi i le peresitene o le Ekalesia, sa faailoa atu ai e Anthony lona manao ia i ai se paranesi o le Ekalesia i lona nuu. “O le faaMamona moni lava e tulaga ese lava i tapuaiga,” na ia tusia ai.

I ni nai vaiaso mulimuli ane, sa ia maua ai se tusi. “I le taimi nei, e leai ni a matou sui aloaia mai le Aai o Sate Leki i lo outou atunuu,” na faitauina ai. “Afai e te mananao i ai, ou te fiafia e fesootai ma outou e uiga i aoaoga faalelotu a Iesu Keriso.”

Sa sainia le tusi e LaMar Williams, Matagaluega a Faifeautalai.