Ona Galulue Faatasi ai Lea o Mea Uma mo Lo Outou Lelei

Susan W. Tanner

Peresitene o Tamaitai Talavou

A tatou sailiili, tatalo, ma talitonu, ona tatou iloa ai lea o vavega i o tatou olaga, ma avea ai i tatou ma tufuga o vavega i olaga o isi.

Ou te fiafia lava e faitau. Ae e ese lo’u le fiafia pe a oo ina luluti—pe ua matua lamatia le ola o le toa, pe faanoanoa pe lavelave foi. Ona ou faitau ai lea muamua o le faaiuga o le tusi, tau lava ina ou mautinoa e le o afaina le tagata autu.

Tasi o le mea, o i tatou uma lava ua tatou i ai nei i le ogatotonu o a tatou lava tusi, o tala o o tatou lava olaga. O nisi taimi e luluti ai o tatou tala, ona tatou mananao ai lea e sii i luma le faitauga ina ia iloa ai lo tatou iuga, ina ia mautinoa ai o le a lelei mea uma. E ui ina tatou le iloa auiliiliga patino o aafiaga o o tatou olaga, ae o le mea e lelei ai, ua tatou iloa se mea e uiga i o tatou lumanai, pe afai tatou te ola agavaa.

Tatou te maua lenei malamalamaaga i le Mataupu Faavae ma Feagaiga 90:24: “Ina sailiili ia ma le filiga, ma tatalo e le aunoa, ia talitonu lava foi, ona galulue faatasi ai lea o mea uma mo lo outou lelei, pe afai tou te savavali sa’o.” O lenei folafolaga ofoofogia mai le Alii faapea e galulue faatasi mea uma mo lo tatou lelei, e tele taimi o loo ta’ua ai i tusitusiga paia, aemaise lava i tagata po o perofeta o loo pagatia i tofotofoga o o latou lava talaaga.

Ou te lagona o lenei folafolaga e mai se Tama agamalu ma le alofa, e finagalo e faamanuia i tatou ma aumai mo i tatou se faamoemoega o la tatou malaga i le olaga nei. O le iloa, e oo mai le taimi e galulue faatasi ai mea uma mo lo tatou lelei, e fesoasoani lea tatou te onosa’ia ai o tatou puapuaga e faapei o tagata faatuatua mai tusitusiga paia, sa iloa Ana folafolaga ma faatuatua i ai, “ua iloa ai e i latou o e mamao, na mautinoa foi, ma latou talia ma le fiafia” (Eperu 11:13). E mafai foi ona tatou talia ma le fiafia lenei folafolaga.

O nisi taimi e vave ona tatou vaai i le faataunuuina o le folafolaga. O isi taimi, e au tausaga o tatou talotalo, ona faatoa tatou vaai lea ua faataunuuina ia folafolaga manaomia. O nisi taimi, e pei foi o Aperaamo faatuatua, e mafai ona tatou talitonu i folafolaga, ae oti “o faatuatua, e le i maua mea na folafolaina” (Eperu 11:13) a o i ai i le fogaeleele. E ui ina sa’o i nisi taimi faapea, o o tatou faamanuiaga folafolaina o le a na o le faavavau e faataunuu ai, ae e sa’o foi, pe afai tatou te sailiili, tatalo, ma talitonu, e masani ona tatou iloa mea ua galulue faatasi mo lo tatou lelei i lenei olaga.

Ina ua ou faitau i tala o Aposetolo a Iesu ina ua mavae Lona maliu, sa ou iloa ai le matautia o le sauaina o i latou i le tele o taimi, sa fetogi i maa, ma faafalepuipui. Ae sa latou ola ma le lototoa ma le faatuatua. Sa latou iloa o le iuga lava e galulue faatasi mea uma mo lo latou lelei. Sa latou iloaina foi o o latou faamanuiaga ma vavega i le taimi nei, o le a lelei ai mea uma. Sa tausia i latou, ma aoaoina, ma puipuia. Sa le gata ina latou talia ma fiafia i folafolaga mamao ae faapena foi iinei i le taimi nei.

Sa i ai se vavega ofoofogia i le soifuaga o Peteru ina ua faafalepuipui e le Tupu o Herota. E le i leva ona fasiotia lona uso a Aposetolo o Iakopo, a o lea foi ua lafo Peteru i le falepuipui, ma sa leoleo malu e ni tagata e 16. Ou te le iloa pe sa na maua le lagona e pei o lea sa maua e le Perofeta o Iosefa Samita, a o pagatia ai i le Falepuipui o Karefasi. A o i ai Iosefa iina, sa folafola atu i ai e le Alii “e tuuina atu ia te oe le poto masani ona o ia mea uma, ma avea mou lelei” (MFF 122:7). Atonu e faigata ona talitonu i lenei folafolaga i le lotolotoi o faigata faapea, ae e faapei foi o Iosefa, sa faamanuiaina Peteru e le Alii.

Sa potopoto tagata o le Ekalesia ma tatalo “faatauanau” mo Peteru. Ona tupu ai lea o se mea ofoofogia. I le po a o moe Peteru i le va o leoleo e toalua, ma a o saisai i filifili e lua, “sa tu mai le agelu ia te ia” ma “fai atu ia te ia e tu i luga” ona “pauu ifo ai lea o maea uamea nai ona lima.” Sa tau manatu Peteru pe o fai sana miti. Sa mulimuli atu o ia i le agelu ma ua tuanai mai leoleo, ma ulufafo atu ai i se faitotoa u’amea i le alatele, “ona tuua loa lea o ia e le agelu.” Ona iloa ai lea e Peteru, e le o se miti. Ua faasaolotoina mai o ia i se vavega. Sa faamanuiaina o ia e le Alii iina.

Sa alu atu o ia i fale sa faapotopoto ai tagata o le Ekalesia ma tatalo mo ia. Ina ua tuitui atu Peteru i le faitotoa, ona sau lea o se tamaitai talavou (e faapei o outou tamaitai talavou), o Rosa le igoa. Sa ia faalogo ma na iloa ai o le leo o Peteru. Fai mai le mau, sa olioli o ia. Ae i lona fiafia tele sa galo ai ia te ia ona aumai [Peteru] i totonu. Sa toe tamoe o ia i tua ma ta’u atu i isi le tala sili, o Peteru o loo i ai i le faitotoa. Latou te le i talitonu ia te ia ma sa finau i latou ma ia, ma latou faapea atu ua valea o ia. A ua tuitui atu pea Peteru. Ma ina ua sau o ia i totonu, “sa matua ofo ai i latou” (tagai Galuega 12:4–17).

Sa fai pea tatalo a nei tagata ia tupu se vavega, ae ina ua tali mai le Alii ia latou tatalo, sa latou maofa. Sa ofo i latou i le agalelei o le Alii ma Lana tali faavavega. Pe o tatou iloaina ea le faataunuuina o folafolaga i o tatou olaga? E pei ona fesili o le Faaola, “O ia te outou mata, tou te lei vaai ai ea?” (Mareko 8:18). Pe o i ai ea ni o tatou mata e vaai ai?

Soo se mea lava ua i ai tamaitai talavou, o loo i ai i le lotolotoi o o latou lava olaga, o loo feagai ma tulaga matautia ma le faigata. E faapei foi o Peteru, o le a “siomia outou e a’u agelu, e lagolagoina outou” (MFF 84:88). O le a latou lagolagoina i tatou a o tatou tauamoina a tatou avega i lenei lalolagi. E masani lava i o tatou olaga, o na agelu, o tagata lava o loo siomia ai i tatou, o tagata e alolofa ia te i tatou, o i latou ua tuuina atu i latou lava e fai ma meafaigaluega i aao o le Alii. Sa saunoa Peresitene Spencer W. Kimball: “E silafia i tatou e le Atua, ma na te leoleo ia te i tatou. Ae e masani ona ia taulimaina mea tatou te manaomia, e ui mai i se isi tagata. O le mea lea, e taua tele lo tatou auauna atu o le tasi i le isi i le malo” (“O Loo I Ai Le Faamoemoega i le Olaga,” New Era, Aok. 1974, 3).

Ou te talisapaia tamaitai talavou maoae ma taitai o Tamaitai Talavou, o tina ma tama, ma uo lelei o loo fefaamalosia’i e le tasi le isi. O outou o agelu e fesoasoani i le faataunuuina o folafolaga a le Tama Faalelagi i olaga o Lana fanau faapelepele.

Sa saili atu i le tatalo e se tasi vaega o Tamaitai Talavou i Okalahoma le Tama Faalelagi, ina ia iloa ai pe faapefea ona faaauai atoatoa se tamaitai fou logonoa o le Ofagapi i gaoioiga a Tamaitai Talavou. Sa latou galulue malosi ina ia avea i latou ma Ana meafaigaluega ma Ona aao (e moni lava) e fesoasoani ai i lenei tamaitai talavou. Sa tupu se vavega i le latou uarota atoa, a o avea i latou ma agelu e lagolagoina Alesi, le Ofagapi fou.

Fai mai Alesi: “Sa ou fefe ma sa ou sagisagi e amata i Tamaitai Talavou. Sa masani ona ma o ma Mama e fai maia le gagana faagugu, aua ou te tutuli. Ina ua uma le tatalo ma le pese amata, sa fai mai Sister Hoskin, lo’u peresitene o Tamaitai Talavou, ‘Alesi, e i ai le matou meaalofa mo oe.’ Ona tulai uma ai lea o teineiti ma amata ona fai atu ni taga o se mea. Sa ou iloaina o se mea faapitoa. Ae na ou iloa mulimuli ane, o le autu a Tamaitai Talavou. Sa aoao uma lava e teineiti o le matou uarota, e faaofo ai au.

“Ou te iloa e alofa le Tama Faalelagi ia te au, aua o i ai tagata lelei i le fogaeleele e faaali maia ia te au le alofa, aemaise lava o teineiti o lau [vasega] ma taitai o Tamaitai Talavou, o loo faia le gagana faagugu mo au ma fesoasoani ia ou aoao i le talalelei” (tusi i le au peresitene aoao o Tamaitai Talavou).

Sa tatalo ma le filiga ia Sister Hoskin, o le peresitene o Tamaitai Talavou, ina ia iloa ai le ala e fesoasoani ai ia Alesi. Sa ia tusia:

“E na o le tasi le vaiaso sa avea ai au ma peresitene o Tamaitai Talavou o le matou uarota, ae amata ona ou popole i se tasi o le a sau i le Ofagapi. O Alesi e logonoa, ma sa ou popole pe faapefea ona ou fesoasoani ina ia maua e ia le fiafia, ma faaali atu foi ia te ia matou te talia lelei o ia. Ina ua mavae le tele o aso o o’u atuatuvale, ma ina ua mavae le tele o ni talosaga, sa ou ala ae i le vaeluaga o le po mai sa’u miti, lea sa ou vaai ai i a’u tamaitai talavou o tutu faatasi, ma faia le autu a Tamaitai Talavou i le gagana faagugu. Sa ou iloaina ai le tali i a’u tatalo.

“O le aoaoina o le gagana faagugu o se luitau tele. E tele itula sa alu ai—o le taimi atoa o le Mutuale i se tasi po, ma aoaoga i vaiaso taitasi ae matou te le i sauni. Ina ua oo mai le aso fanau o Alesi, sa fiafia tagata uma ma popole i le matou faaofo. Sa ou aumaia Alesi ma lona tina i luma o teineiti ma sa ou fai atu ia Alesi (i le gagana faagugu), ‘E i ai le matou meaalofa mo oe. Ua avea nei oe ma se tasi o i matou.’ Ona matou laulaututu ai lea ma toe fai faatasi le autu i le gagana faagugu. Sa matua malosi le Agaga ma sa tau le lagona ni leo, aua sa matou fetagisi uma, ae sa matagofie le taumafaiga a teineiti. Sa matua fiafia Alesi. Sa ia iloaina, o ia o se tasi o i matou.

“Sa matou iloaina e alofa le Tama Faalelagi ia i matou uma, ma e i ai taimi e avea ai i tatou ma Ona siufofoga ma Ona aao e fesoasoani ai i isi ina ia lagonaina le alofa. Sa matou iloaina, o le tautua e maua ai le olioli sili. Sa ou iloaina le taua o le mulimuli i musumusuga, tusa lava pe manaomia ai le tele o galuega ma foliga mai e le mafai ona tupu” (tusi i le au peresitene aoao o Tamaitai Talavou).

Manatu i le tele o tausaga sa tatalo ai le tina o Alesi mo si ana tama, ma ona faamoemoega ma moomooga mo ia e pei foi o tina taitasi mo lana tama teine. Fai mai a ia:

“I le avea ai ma se tina o se tama teine e i ai manaoga faapitoa, ua ou masani i le faia o ni nai fesoasoani laiti faaopoopo mo ia. Talu ai ona e logonoa, e tele taimi ou te i ai i ona tafatafa e faamatala upu mo ia. Manatu i lagona na lofia ai au ina ua amata e tamaitai talavou uma ona fai atu faailoga o le autu a Tamaitai Talavou mo ia. A o ou tutu ai iina ma matamata atu i ai ma loimata, sa ou manatua le fuaiupu mai le Mataio e 25:40: ‘Aua na faia e outou i le tasi o e aupito itiiti o o’u uso nei, o a’u lea na outou faia i ai.’

“O le alofa ma le tautua ofoofogia sa faaalia e nei tamaitai talavou, sa faatoa amata ai i lena aso. E toatele i latou sa faaaluina o latou taimi ma le malosi e aoao ai le gagana faagugu, a o lenei ua fesoasoani e faamatala upu ai i le lotu mo Alesi. Sa ou tatalo lava ina ia fiafia Alesi, ia alualu i luma, ma o lenei ua alofagia o ia.

“I le avea ai o se matua, ua faamalosia la’u molimau i le Faaola ina ua ou vaai i le tautua ma le alolofa o nei teineiti ma o latou taitai. E i ai taimi, e avea ai ma avega mamafa ia i ma’ua le popole i le ma tama, ae ua faamamaina nei le ma avega ona o galuega a nei tamaitai talavou faatuatua ma o latou taitai e i ai le tofa.

Sa tatalo lenei tina mo le fesoasoani a le Alii, ma ua ala mai i le fesoasoani a isi, agelu i le fogaeleele, ua ia vaaia ai ua galulue faatasi mea uma mo le lelei o lana tama.

Sa faamatala e isi tamaitai talavou o lea uarota, lo latou alualu i luma ona o le tuuina atu o lenei tautua. Sa faamatala e le peresitene o le vasega a le Lora, o le aoaoina o le autu i le gagana faagugu, o se galuega faigata, ae sa latou lagonaina le fesoasoani o le Agaga i la latou taumafaiga. Fai mai a ia, “Matou te le i faatopelauina le autu ia tau lava ia uma e pei ona masani ai. Sa matou mafaufau i upu, ma fai taga mo se isi ina ia [ona] iloa foi upu, ma o le mea lena sa ou fiafia ai ina ua ou iloa, sa mafai ona ia malamalama i le matou autu ma iloa ai, o ia foi o se afafine o le Atua.”

Sa aofia ai foi alii talavou. Sa latou aoaoina foi i le gagana faagugu le fuaitau “E mafai ona ta sisiva?” e sauniuni ai mo se siva ua lalata mai, o se gaoioiga a le Mutuale a le Uarota. O lea sa siva ai Alesi i siva uma lava. Sa aoao e ositaulaga le faiga o le tatalo faamanatuga i le gagana faagugu mo [Alesi]. Sa ufitia le uarota atoa i le agaga o le alofa.

O uarota po o paranesi taitasi, o fale po o aiga taitasi, e i ai lava se Alesi e i ai se manaoga faapitoa, i le tino, o lagona, po o la le agaga, o loo tatalo ma talitonu ma faapea, e ui i ona luitau, ae e oo lava ina “galulue faatasi mea uma mo [lona] lelei.” E mafai ona tofu avea i tatou ma se meafaigaluega i aao o le Alii, o se agelu i le lalolagi nei, e mafai ona fesoasoani ia tutupu vavega.

Ou te molimau atu o le Tama Faalelagi o se tama e agamalu ma alofa, e finagalo ina ia faamanuia i tatou i mea uma o ia te Ia. A tatou sailiili, tatalo, ma talitonu, ona tatou iloa ai lea o vavega i o tatou olaga, ma avea ai i tatou ma tufuga o vavega i olaga o isi. O le a tosina atu i tatou i Lana folafolaga e galulue faatasi mea uma mo lo tatou lelei. I le suafa o Iesu Keriso, amene.