Pe a Liua Mai Oe

Elder D. Todd Christofferson

O Le Au Peresitene o le Au Fitugafulu

Ole atu i le Atua i le suafa o Keriso ia tusia le talalelei i lou mafaufau, ina ia mafai ai ona e maua le malamalama, ma [ia tusia foi i] lou loto ina ia e fiafia ai e faia Lona finagalo.

E faasino tonu lava la’u tautalaga i le autalavou, e ui ina ou faamoemoe ia aoga i tagata uma.

I tausaga ua leva, a o ou peresitene i se siteki, sa sau se tagata e ta’uta’u mai sana solitulafono. Sa ou te’i ai. Sa tele tausaga o malosi i le Ekalesia. Sa ou taumafaufau pe mafai faapefea e se tagata faapea ona faia le solitulafono sa ia faia. Ina ua mavae sina taimi sa ou manatunatu loloto ai, sa oo mai ia te au, o lenei uso e le i liua moni. E ui lava ina sa malosi i le Ekalesia, ae le i tuia lona loto i le talalelei. Sa na o lana amio faaalia na aafia i le talalelei. Pe a i ai o ia i siosiomaga lelei, na te tausia poloaiga, ae a i ai i se isi ituaiga siosiomaga, ona pulea ai lea o ana amioga e isi faatosinaga.

E mafai faapefea ona e liua? E mafai faapefea ona e avea le talalelei a Iesu Keriso ia lē na o se faatosinaga i lou olaga ae ia avea ma faatosinaga e faafoe ai, ma mea e aupito sili ona taua o lou tagata? Sa tautala le perofeta anamua o Ieremia, e uiga i le tulafono a le Atua, o le talalelei ua tusia i o tatou loto. Sa ia ta’ua le fetalai o le Alii e uiga ia i tatou, o Lona nuu i nei aso e gata ai: “Ou te tuuina la’u tulafono i totonu ia te i latou, ma ou tusi ai i o latou loto; e fai foi au mo latou Atua, o i latou foi e fai mo’u nuu.”¹

Pe e te manao i ai mo oe lava? E mafai ona ou faamatalaina atu le auala e mafai ai ona tupu lena mea, ae e tatau ona e manao i ai. E le mafai ona tusia le talalelei i lou loto, sei vagana ua tatala lou loto. A aunoa ma lena manao o lou loto, e mafai ona e auai i sauniga faamanatuga, o vasega ma gaoioiga faaleEkalesia, ma faia isi mea ou te faamatalaina atu, ae o le a leai lava sona eseesega tele. Ae afai e tatala lou loto ma naunau, e faapei o se loto o se tamaitiiti,² ona tuu mai lea se i ou faamatalaina atu mea e mafai ona e fai ia liua ai.

Ia avea o se laasaga muamua, e tatau ona e faataatia ese soo se lagona o le faamaualuga lea ua matua taatele i le lalolagi i aso nei. O lona uiga, o uiga ia e teena ai le pule a le Atua e pulea ai o tatou olaga. O lea uiga sa faamalamalama e le Alii ia Iosefa Samita ina ua Ia fetalai atu: “Latou te le saili i le Alii e faatuina lana amiotonu, a ua taitoatasi le tagata ma savali i lona lava ala, ma e tusa ma le faatusa o lona lava atua.”³ Ua outou faalogo i ai o faaleo i fasi fuaitau e pei o le, “Fai le mea e te loto oe i ai,” po o le “O le sa’o ma le sese e faalagolago i le mea ou te manatu ua sa’o mo au, o le mea lava lena e sa’o.” O lena uiga faaalia, o se fouvale lea i le Atua e faapei lava ona fouvale ia Lusifelo i le Atua i le muai olaga. Sa ia teena le aia tatau a le Atua e folafola le upumoni ma faatuina le tulafono.⁴ Sa manao Satani, ma o loo manao pea lava i le pule e folafola mai ai e ia lava le mea e sa’o ma le mea e sese. E le faamalosia i tatou e lo tatou Foafoa pele ina ia tatou talia Lana pule, ae o le gauai atu ma le naunau i lena pule, o le laasaga muamua lea o le liua.

E le gata i lea, ina ia “tusia [le talalelei] i lou loto,” e tatau ona e iloa le talalelei ma ia e malamalama atoatoa i ai. O lona uiga, e tatau ona e suesue i ai.⁵ O lo’u fai atu e “suesue,” o lona uiga, e sili atu nai lo le na ona faitau. O se mea lelei i nisi taimi le faitau o se tusi mai tusitusiga paia, mo sina taimi ia maua ai se lagona aoao o lana savali, ae ina ia liua, e tatau ona e manatu mamafa i le tele o le taimi e te faaaluina i tusitusiga paia, nai lo le tele o lau faitau i lena taimi. Ou te iloa o nisi taimi tou te faitauina ai ni nai fuaiupu, ona mafaufau lea i ai, ma toe faitau ma le faaeteete na lava fuaiupu, ma a o outou mafaufau pe o le a le uiga, tou te tatalo mo se malamalama, tuufesilisili i lou mafaufau, ma faatalitali mo ni lagona faaleagaga, ma tusitusi i lalo lagona ma malamalamaaga e oo mai ina ia mafai ai ona outou manatua ma aoao atili ai. O le suesue faapea, atonu e le tele ni mataupu po o ni fuaiupu tou te faitauina i se afa itula, ae peitai o le a e tuua ai se vaega i lou loto mo le upu a le Atua, ma o le a fetalai atu o Ia ia te oe. Manatua le faamatalaga a Alema i le lagona e maua ai: “E amata ona faateleina ai lo’u loto; ioe, ua amata ona faamalamalamaina ai lo’u mafaufau; ioe, ua amata ona suamalie ia te au.”⁶ O le a e iloa ua tusia le talalelei i lou loto, ua tupu lou liua, a o faasolo ina atili suamalie le upu a le Alii mai Ana perofeta, i aso ua mavae ma ona po nei, i lou loto.

Sa ou ta’ua le tatalo a o e suesue ina ia e malamalama i mau, ae le tatau ona gata ai iina au tatalo. I le Tusi a Mamona, o loo ta’u mai ai e Amoleka e tatau ona tatou tatalo mo mea uma lava i o tatou olaga. Fai mai a ia, “Faaali ae o outou loto uma [i le Atua] i o outou afeafe, ma o outou nofoaga lilo, ma o outou vaomatua.”⁷ E finagalo lou Tama Faalelagi e te tatalo mo ou faamoemoega ma ou popolega, o au uo ma lou aiga, o lau aoga ma le galuega, ma mea e manaomia e i latou o loo siomia ai oe. A o le mea sili, e tatau ona e tatalo ina ia faatumulia oe i le alofa o Keriso. E tuuina atu lena alofa i soo moni o Iesu Keriso e ole atu ai ma le malosi uma o o latou loto.⁸ O lenei alofa o le fua lea o le laau o le ola,⁹ ma o le tofo i ai, o se vaega aupito taua lea o lou liua, aua o le taimi lava e te lagonaina ai le alofa o le Faaola mo oe, tusa lava pe o sina vaega aupito itiiti, o le a e lagonaina le saogalemu, o le a tupu i totonu ia te oe se alofa mo Ia ma lou Tama Faalelagi. O le a naunau lou loto e fai mea e faatonuina ai oe e nei tagata paia. Alu soo i lou afeafe, ma lou nofoaga faalilolilo, ma lou vaomatua. Faafetai i le Atua mo ou faamanuiaga, ma ole atu mo Lana fesoasoani, faatoga atu ia te Ia e faaee atu i ou luga le alofa mama o Keriso. O nisi foi taimi, e fesoasoani le anapogi.

Ina ua uma ona talanoa Amoleka e uiga i le tatalo, sa ia tautala e uiga i se isi elemene taua o lou liua—o le auauna atu lea i isi. Fai mai a ia, afai e leai, “e fai fua a outou tatalo, e le aoga ai ia te outou i se mea e tasi.”¹⁰ I se isi faaupuga, o le liua, e le gata ina tatau ona tatala lou loto mo se malamalamaaga i le talalelei ma le alofa o le Atua, ae e tatau foi ona e ola i le tulafono o le talalelei. E le mafai ona e malamalama atoatoa pe talisapaia foi se i vagana ua e faaaogaina e oe lava ia i lou olaga. Fai mai Iesu, sa sau o Ia e auauna.¹¹ E faapena foi ia te oe. E tatau ona e liliu atu ma tausi atu i isi. E mafai ona e agalelei, e mafai ona e faauo, e mafai ona e tufatufa atu, e mafai ona e fesoasoani atu i isi i le anoanoai o nai mea laiti. A e faia, o le a avea le talalelei a Iesu Keriso ma se vaega o oe.

Se i ou ta’u atua le isi mea lea. I aso anamua, pe a mananao e tapuai i le Alii ma saili Ana faamanuiaga, e masani ona latou aumaia se meaalofa. Mo se faataitaiga, a latou o i le malumalu, latou te avatu a latou taulaga e tuu i luga o le fata faitaulaga. Ina ua maea Lana Togiola ma le Toetu, sa fetalai le Faaola Na te le toe taliaina ni taulaga mu i manu. O le meaalofa po o le taulaga o le a Na taliaina nei o “se loto momomo ma se agaga salamo.”¹² A e sailia le faamanuiaga o le liua, e mafai ona e ofoina atu i le Alii le meaalofa o lou loto momomo po o le loto salamo, ma lou agaga nutimomoia po o le agaga usitai. O le mea moni lava, o le ofoina atu lea o oe lava—o le a lava le tulaga o e i ai ma pe o le a foi le ituaiga tagata ua avea ai oe.

Pe o i ai ea se mea i lou olaga e le o mama, pe le o agavaa? Pe a mafai ona e lafoa’ia, o se meaalofa lena i le Faaola. Pe o i ai ea se mausa lelei po o se uiga tausaafia e le o maua i lou olaga? Pe afai e te taliaina ma avea o se vaega o lau amio, ua e avatua se meaalofa i le Alii.¹³ O nisi taimi, e faigata ona fai lena mea, ae mata e aoga au meaalofa o le salamo ma le usiusitai pe afai na e maua fua mai?¹⁴ Aua e te fefe i le taumafaiga o loo manaomia. Ma ia e manatua, e te le tau faia na o oe. O le a fesoasoani Iesu Keriso ia te oe ina ia avea oe lava ma se meaalofa agavaa. O lona alofa tunoa o le a e mama ai, ma e paia. E iu lava ina avea oe e faapei o Ia, e “atoatoa ia Keriso.”¹⁵

O le liua, e te ofuina ai se talipupuni, o le “ofutau o le Atua”¹⁶ ma afioga a Keriso, e oo mai i le Agaga Paia, o le a ta’u atu ai ia te oe mea uma e ao ona e faia.¹⁷

I le 1992, sa taliu atu ai ni faifeautalai tamaitai se toalua i Sakepo, i Kalaotia, i lo la fale i se tasi afiafi. E mamao le mea sa fai ai le la aoaoga mulimuli, ma ua oo ina po. Sa faia e nisi o tamaloloa sa i ai i le pasi ni faamatalaga matuia, ma ua faataluā. Sa lagona e tamaitai le taufaamata’u, ma sa la tulioso ese mai ai loa ina ua toe tu i le isi nofoaga faatali pasi, ina ua toe tapuni le faitotoa ina ia aua nei mulimuli atu se tasi ia i la’ua. Ua o ese mai i lena faafitauli, a o lea ua i ai nei i la’ua i se nofoaga e leai se isi o i la’ua e masani ai. A o la faliu atu e saili se fesoasoani, sa la vaaia se fafine. Sa faamatala atu i ai e nei faifeautalai o la’ua ua se, ma sa la fesili atu i le fafine pe mafai ona faasinoina i la’ua. Sa iloa e ia le mea e mafai ona pu’e ai se isi pasi e o ai, ma sa ia fai atu loa e mulimuli atu ia te ia. E tatau ona latou pasia se falepia, o loo i ai tagata sa nofonofo i autafa o le auala i le pogisa. Sa foliga taufaamata’u mai foi nei tagata. Ae ui i lea, sa maualuga le lagona o nei tamaitai, e le mafai ona iloa mai i la’ua e nei alii. Sa latou savavali atu i autafa, e foliga mai e le i iloa atu i latou e tagata atonu sa mananao e faatamaia i latou. Ina ua taunuu ia nei tuafafine ma lo la’ua faasinoala i le fale faatali pasi, ae taunuu loa foi ma le pasi na la manaomia. Sa faliu atu i la’ua e faafetai atu i le fafine, ae ua nimo.¹⁸

Sa auina atu se faasinoala ma nisi faamanuiaga i nei faifeautalai e puipuia ai i la’ua i la le tino. A oo ina e liua, o le a i ai foi puipuiga faapena e puipuia oe mai faigata ma laveaiina oe mai le leaga.¹⁹ O nisi taimi e le maua ai oe e le leaga. O nisi taimi o le a puipuia oe pe a le faailoaina atu le leaga ia te oe. E oo lava foi pe a tatau ai ona oulua fetaia’i, ia e faafetaia’ia lava ma le faatuatua, ae le o le fefe.

Ua tatou talanoa i le manao, o le gauai atu i le Atua, o le suesue i le upu a le Atua, o le tatalo, o le auauna atu, o le salamo foi ma le usiusitai. Mai nei mea, e faaopoopo i lou tapuai ma lou malosi i le Ekalesia, e maua ai le molimau ma le liua. O le a lē na o se aafiaga i lou olaga le talalelei—a o lou lava lena tagata o le a i ai. Ole atu i le Atua i le suafa o Keriso ina ia tusia le talalelei i lou mafaufau, ina ia mafai ai ona e maua le malamalama, ma [ia tusia foi i] lou loto ina ia e fiafia ai e faia Lona finagalo.²⁰ Ia tulitulimata’i lenei faamanuiaga ma le lotomaulalo ma le onosai, ona e maua ai lea aua o le Atua “e alofa fua ma alofa mutimutivale, … e tele foi lona alofa.”²¹ Ou te molimau atu ai, i le suafa o Iesu Keriso, amene.