“Aua Na Ou Fia ‘Ai Ona Outou Avane ai lea Ni Mea Ou Te ‘Ai Ai”

Peresitene Gordon B. Hinckley

Po o fea lava e manaomia mai ai, ma pe o le a foi le mafuaaga, e i ai lava sui o le Ekalesia iina… . Ua ou molimauina e au lava ia le aoga o a tatou taumafaiga mo galuega fesoasoani.

I le 1936, ua 68 tausaga talu ai, na ta’u mai ai ia te a’u e se tasi o failautusi i le Korama a le Toasefululua le mea na ta’u atu e se sui o le Toasefululua ia te ia. Na ia faapea mai, o le konafesi aoao o le a sosoo ai, o le a fofogaina mai ai se polokalama o le a lauiloa, e sili atu ona taua nai lo le taunuu mai o o tatou tagata i nei vanu, o ni paionia.

O lea la, e ese ai mai le autu o la’u lauga, e le tatau lava ona e ta’uina atu i lau failautusi mea e tatau ona e teuina e le faalauaiteleina, ma e le tatau foi [i lau failautusi] ona ia ta’uina atu i soo se tasi pe afai e tuuina atu ia te ia se faamatalaga e le faalauaiteleina.

Ae, o le mea lena sa tupu i na aso. E le o tupu lava i nei aso. Oi e leai! E tatau ona ou faaopoopo atu, e le i solia lava e a’u failautusi atamamai [le tulafono] o le le fauaiteleina o se mea.

E pei ona outou masani ai i le talafaasolopito ua lauiloa, sa faasilasilaina ai i lena taimi le fuafuaga saogalemu a le Ekalesia, o le igoa lea na suia mulimuli ane i le polokalama o le uelefea a le Ekalesia.

Sa ou manatunatu i tua i na aso pe mafai faapefea e soo se mea e faia e le Ekalesia ona sili atu lona taua i le manatu o se tasi nai lo le logologoa o le faapotopotoina mai o o tatou tagata i nei vanu i sisifo o le Iunaite Setete. O lena faapotopotoina o o tatou tagata o se fesuiaiga sa toatele ni tagata na aafia ai lea na ou lagonaina ai e leai se mea e mafai ona sili atu le taua. Ae na ou iloaina se mea taua i se taimi e le i mamao atu.

E toatele tagata asiasi lauiloa matou te taliaina i le ofisa o le Au Peresitene Sili. E aofia ai ia taitai o malo ma amepasa o atunuu. I nai vaiaso ua tuanai, sa matou talimalo ai i le pulenuu o se tasi o taulaga tele i le lalolagi. Na faapena foi ona matou talimalo talu ai nei i le sui peresitene ma le amepasa o Ekuatoa, o le amepasa mai Litunia, o le amepasa mai Pelarusi, ma isi. I a matou talatalanoaga, e leai ma se tasi o nei tagata asiasi na ta’ua le malaga maoae faapaionia a o tatou tuaa. Ae o i latou uma lava, e aunoa ma le tau faaosoina, latou te talanoa faaviivii mai lava i la tatou polokalama o le uelefea ma a tatou taumafaiga o fesoasoaniga alofa.

Ma o lea ou te tautala atu ai i lenei sauniga maoae a le perisitua, ou te fia tuuina atu ni nai upu e uiga i a tatou taumafaiga mo i latou o e le tagolima, e tusa pe o ni tagata o le Ekalesia pe leai, i vaega eseese o le lalolagi.

Ina ua amataina le polokalama o le uelefea i ona po nei, sa fuafuaina e tausia ai manaoga o tagata o le Ekalesia. I tausaga na mulimuli mai ai, e faitau afe ma afe i latou na tautuaina. Sa tuuina atu e Epikopo ma peresitene o Aualofa ia meaai ma lavalava ia i latou faapea ma isi sapalai mo i latou o e le tagolima. E anoanoai tagata o le Ekalesia sa galulue i tulaga faavolenitia i le gaosiga o mea sa moomia. O loo tatou faagaoioia nei ia ni fale teuoloa se 113, o ni faatoaga se 63, o ni fale tuuapa ma nofoaga autu e tuupepa ai meaai se 105, o ni nofoaga se 18 e gaosia ai meaai ma tufatufa atu ai laau, e faapea foi le tele o isi fale.

E le gata ua ausia ia manaoga o tagata o le Ekalesia, ae ua faalautele atu foi le fesoasoaniga i le anoanoai o isi. O iinei lava ia i pitonuu o le Aai o Sate Leki o loo fafagaina ai le toatele o tagata fiaaai e ni faalapotopotoga e le puleaina e le Ekalesia ae faaaoga ai ia sapalai o le uelefea a le Ekalesia.

O iinei, i lenei aai, faapea ma le tele o isi nofoaga, o loo tatou faagaoioia ai ia ni fale teuoloa matagofie lea e leai ni masini tala tupe e faaaoga ai, lea e le faafesuiaia ai ni tupe, lea e tuuina atu ai meaai, lavalava, ma isi mea e manaomia ia i latou o loo mafatia. Ou te talitonu e leai se susu, e leai se aano o manufasi, e leai se falaoamata o loo maua i soo se faleoloa e sili atu nai lo mea o loo tufatufaina atu mai fale teuoloa o epikopo.

O mataupu faavae o loo faagaoioia ai nei vaega e matuai taua lava e pei ona i ai i le amataga.

O i latou o e le tagolima e faamoemoe e faia mea uma latou te mafaia ina ia ausia ai i latou lava. Ona faamoemoe lea e fesoasoani atu ia aiga i le tausia o tagata o o latou aiga ua le gafatia. Ona faatoa tuu atu loa lea i ai o punaoa a le Ekalesia.

Matou te talitonu ma matuai faatauaina ia afioga a lo tatou Alii:

“O mai ia, o outou ua faamanuiaina e lo’u Tama, ia fai mo outou tofi le malo ua saunia mo outou a o lei faavaeina le lalolagi:

“Aua na ou fia ‘ai, ona outou avane ai lea ni mea ou te ‘ai ai: na ou fia inu, ona outou avane ai lea ni vai ou te inu ai: sa fai au ma tagata ese, ona outou talia lea o au:

“Na ou le lavalava, ona outou faaofuina lea o au: na ou mai, ona outou asiasia mai lea o au: na ou i le falepuipui, ona outou o ane ai lea ia te au” (Mataio 25:34–36).

O le ala lenei a le Alii e tausia ai i latou o e le tagolima, na Ia folafola mai, “aua latou te … nonofo pea ma outou” (tagai Mataio 26:11).

O i latou o e gafatia, e galulue volenitia ina ia fesoasoani ia i latou o e le mafai ona latou tausia i latou lava. O le tausaga na tea nei e tusa ma le 563,000 aso [e aunoa ma se totogi] na foai atu e fai ai galuega i totonu o fale o le uelefea. E tutusa lelei lena ma se tagata e faigaluega mo le valu itula i aso taitasi, mo tausaga e 1,542.

O se lomiga talu ai nei a le Church News o loo i ai le tala i se vaega o fai faatoaga i se tamai nuu i Idaho. Pe mafai ona ou faitauina faapuupuu atu lena tala?

“O le 6 i le taeao i le taufaaiuiuga o Oketopa, ma ua amata ona ufitia e le puao mafiafia i luga o le toga a’a suamalie [sugar beet] i Rupert, Idaho.

“Sa faaloaloa atu lima uumi o le masini e tusa ma le sefululua laina e au i ai, e seleeseina ia tumutumu o a’a suamalie. O tua atu, e i ai se masini e suaina ia a’a, ma tase’i i luga ma tuu i luga o se fusipau e vili atu ai i luga o se loli o loo faatali mai.

“… O le Faatoaga lea o le Uelefea i Rupert Idaho, ma o i latou o loo galulue ai iina i le taimi nei o ni tagata sa ofo mai e galulue fue… . E i ai taimi e silia ma le 60 masini e galulue uma faatasi—… o masini a faifaatoaga i le nuu.”

E alu le aso atoa o faia le galuega.

“[O le] 7 i le afiafi … ua goto le la, ma tuua le fanua pogisa ma le malulu. Ona agai atu lea o le au faifaatoaga i aiga, ua lelavava ma le fiafia.

“Ua maea lelei se isi foi aso.

“Sa latou seleseleina ia a’a suamalie a le Alii” (Neil K. Newell, “A Harvest in Idaho,” Church News, 20 Mar. 2004, 16).

O se ituaiga galuega auauna atu faavolenitia lea o loo faia pea ina ia mautinoa ai le i ai o sapalai i fale teuoloa o le Alii.

Talu mai ona faatoa amata, ua suia e le polokalama ana sini mai le tausia o e le tagolima i le uunaia lea o aiga o le Ekalesia ina ia saunia. E leai se tasi na te iloa le taimi e oo mai ai se mala. Po o se ma’i, po o le leai o se galuega, po o se faalavelave e tupu e le toe atoatoa ai le malosi.

O le tausaga na tea nei na fesoasoani atu ai le polokalama i aiga ina ia teuina le 18 miliona pauna o meaai masani aua se taimi e ono moomia ai. E faamoemoe, o le a le oo mai lava lena taimi. Ae o taumafa masani lelei, atoatoa ona teuina ina nei moomia, e aumaia ai le filemu i le mafaufau, faapea foi ma le faamalieina i le usiusitai i le fautuaga.

O lea ua i ai foi nei se isi sini o le uelefea. Na amataina i nai tausaga ua mavae ina ua aumaia e le lamala i Aferika le matelaina ma maliliu ai le anoanoai o tagata. Na valaaulia tagata o le Ekalesia ina ia foai atu i se taumafaiga o fesoasoaniga alofa ina ia ausia manaoga o na tagata sa matuai matitiva lava. O a outou foai sa tele naua, ma le lotofoai. O loo faaauau pea le galuega aua o loo i ai pea isi manaoga ogaoga i le tele o nofoaga. O le aofaiga o tagata ua oo atu i ai lenei fesoasoani ua avea ma se vavega. E faitau miliona pauna o meaai, sapalai mo togafitiga faafomai, faleie, lavalava, ma isi mea e faaaoga na aveeseina ai le oge ma le faanoanoa i le tele o vaega o le lalolagi. Sa eliina ia vaieli, sa totoina ia laau, sa faasaoina ia ola. Sei o’u tuuina atu se faataitaiga.

O Neil Darlington o se enisinia vailaau e galue mo se kamupani gaosimea tele lava i Ghana. Na iu ina litaea o ia.

Ona valaauina lea o ia ma lona toalua e avea ma se ulugalii faamisiona. Sa auina atu i laua i Ghana. Fai mai ia Brother Darlington, “O nofoaga o le oge, faamai, o fevesiaiga lautele, ae sa ma i ai iina o ni sui o le Ekalesia, e tuuina atu se lima fesoasoani i e matitiva, o e fia aai, o e faanoanoa.”

O nuu laiti sa latou eliina ai ni vaieli fou ae toe faaleleia vaieli tuai. O i tatou na o loo maua le tele o vai lelei, ma le mama, e faigata ona malamalama i tulaga o i latou e le o mauaina.

Pe mafai ona outou pueina i o outou mafaufau, lenei ulugalii faamisiona naunautai o le Au Paia o Aso e Gata Ai? Sa latou viliina totonu o le eleele matutu. Sa tau le latou auvili i le mea e maua ai le vai i lalo, ma sa pei o se vavega le puna ae i luga o le vai ma tafe atu i luga o le eleele ua galala. Sa i ai le fiafia. Sa i ai loimata. Ua i ai nei le vai e feinu ai, o le vai e faamama ai, o le vai e tausi ai faatoaga. E leai se mea e sili atu ona taua i se laueleele matutu nai lo le vai. E maeu le matagofie o se vai e tafe ifo mai se vaieli fou.

I se tasi faatasiga, sa faapotopoto atu ai ia alii ma toeaiina o le nuu e faafetai atu ia i laua, ae na talosaga atu ia Brother Darlington i le alii o le nuu pe mafai ona la usuina ma Sister Darlington se pese mo i latou. Sa la pulatoa atu i mata o nei alii ma tamaitai e uli o latou tino o loo tutu mai i o la luma ma usuina le, “O Au Se Atalii o le Atua”, o se faailoga o lo latou usoga e tasi.

O lenei ulugalii, ua tuuina atu e ala i a la taumafaiga ia le vai i se aofaiga o tagata pe tusa ma le 190,000 i nuu maotua ma nofoaga o tagata sulufai. Mafaufau i ai, pe a mafai, i le vavega o lenei mea ua ausia.

O le taimi nei, ua fia afe ia ulugalii faaipoipo e pei o i laua, o ulugalii semanu e na o le ola fifilemu lava ma auai i ni gaoioiga le aoga, sa auauna atu, ma o loo auauna atu, i le tele o auala ma le tele o nofoaga. Sa latou galulue ma faaauau pea ona galulue i vaega matitiva o Amerika. Sa latou galulue, ma o loo galulue pea i Initia ma Initonesia, i Tailani ma Kemupotia, i Rusia ma malo o Paletika. Ma ua faalautele ai le galuega.

I le auai ai faatasi ma isi, na tuuina atu talu ai nei e le Ekalesia ia ni nofoa faataavale mo ni tagata se 42,000 e le atoatoa le malosi. Mafaufau i le uiga o lenei mea i tagata seiloga e totolo ona mafai lea ona feoai. Faatasi ai ma le fesoasoani a fomai ma tamaitai tausimai e le manatu faapito, sa tuuina atu ai ia aoaoga i le faamanavaina o pepe faatoa fananau mai i le lata i le 19,000 tagata galulue faafomai i le tausaga e 2003 lava ia. O le a faasaoina ia ola o pepe e fia afe ona o se taunuuga o lenei aoaoga.

O le tausaga na tea nei e tusa ma le 2,700 tagata na togafitia mo faafitauli i mata, ae 300 tagata o le lotoifale sa aoaoina i auala e faasaoina ai o le vaai. Ua matuai faapupulaina lava le tagata sa tauaso.

O vaega na matautia ai lologa, o vaega na aafia i mala o le natura ona o mafuie, o vaega o loo avea ai le matelaina i le fia aai ma faafitauli faifaipea, o vaega o loo i ai ni tagata e le tagolima i soo se mafuaaga, sa i ai foi iina ia sui o le Ekalesia. E tusa ma le 98 miliona tala Amerika le tino i tupe ma foai agalelei na tufatufaina atu i le tausaga na tea nei, ma maua ai se aofaiga e 643 miliona tala Amerika o ia ituaiga fesoasoani i le na o le 18 tausaga.

Ua ou molimauina e au lava ia le aoga o a tatou taumafaiga mo galuega fesoasoani. I le femalagaai ai i le lalolagi, ua ou vaai ai ia i latou o e na taliaina lo tatou lotofoai. I le 1998, na ou asiasi atu ai i eria o Amerika Tutotonu, lea sa matuai faatamaia lava e le Afa o Mitch. O iina na vave ai lava ona faatulagaina le tufatufaina atu o meaai ma lavalava, faapea ma le faamamaina ma le toe fausia o fale ma olaga na afaina, o se vavega lea ia i matou.

E le lava le taimi e toe faitaulia ai le mea ua oo atu i ai ia nei polokalama aoga ma le taua. I le tuuina atu o le fesoasoani tatou te le fesiligia pe auai i latou ua aafia i le Ekalesia. Aua ua tatou iloa o fanau uma o i le lalolagi o se atalii/afafine ia o le Atua ua aoga i ai le fesoasoani i le taimi o loo moomia ai. Ua tatou faia le mea ua tatou faia e aunoa ma le faailoaina atu i le tagata ua ia maua, o i tatou na aumai ai. Tatou te le sailia ni faaviiviiga po o ni faafetai. Ua matuai lava ma totoe le taui lea pe afai tatou te fesoasoani atu i se tasi o e aupito itiiti o fanau nei a lo tatou Tama, ua tatou faia foi ia te Ia ma Lona Alo Pele (tagai Mataio 25:40).

O le a tatou faia pea lenei galuega. O le a i ai pea le manaomia. O le matelaina ma le manao, ma mala o le natura o le a i ai pea ma i tatou. Ma o le a i ai pea i latou ua tuia o latou loto i le malamalama o le talalelei, o e o le a naunau e auauna atu ma galulue ma faamalosiau i e le tagolima o le lalolagi.

O se taumafaiga foi faapea ua tatou faavaeina ai le Tupe Faaagaga mo Aoga. Na mafai ona faatinoina e ala i a outou foai agalelei. O lea ua faagaoioia nei i atunuu e 23. Ua tuuina atu nonogatupe i alii ma tamaitai talavou agavaa mo aoaoga. A leai, o le a maileia i latou i le le mafai lea ona o ese mai ma le mativa, lea na oo i ai o latou matua ma augatuaa mo le tele o tupulaga. E tusa ma le 10,000 ma ona tupu i latou ua fesoasoani nei i ai, ma ua faailoa mai i le tulaga o loo i ai nei o aoaoga faapea ua mafai ai ona faatoluina pe faafaina le tupe ua maua mai le mea sa mafai ona maua muamua.

O loo taitaia e le Agaga o le Alii lenei galuega. O lenei gaoioiga o le uelefea o se gaoioiga e faaletino, o loo atagia mai lona uiga moni i tulaga o araisa ma pi, o loo faailoa mai i palanikeke ma faleie, o lavalava ma vailaau faafomai, o galuega ma aoaoga mo ni galuega sili atu ona lelei. Ae o le mea ua tatou taua o se galuega faaletino o se faatinoga lea i fafo o se agaga o loo i totonu—le Agaga lea o le Alii o loo faapea mai, o Ia “sa femaliuai ma agalelei” (tagai Galuega 10:38).

Ia faauluolaina e le lagi lenei polokalama maoae, ma ia i ai faamanuiaga a le lagi i luga o i latou o e o loo galulue ai, ou te tatalo atu ai ma le lotomaulalo, i le suafa paia o Iesu Keriso, amene.