O Le Faaaogaina o Mataupu Faavae Faigofie ma le Manino i le Aiga
O mataupu faavae manino ma le faigofie o le talalelei a Iesu Keriso … e tatau ona matua mausali lona faavaeina i totonu o o tatou aiga, ina ia mautinoa le fiafia i le olaga faaleaiga.
I le Sauniga Aoao a le Aualofa ia Oketopa i le 1998, sa saunoa ai Peresitene Gordon B. Hinckley: “Ou te talitonu o o tatou faafitauli, ma e toetoe o faafitauli uma lava, e tulai mai totonu o aiga. Afai e tatau ona i ai se tulaga e faaleleia i o tatou olaga, afai e tatau ona i ai se suiga, afai e tatau ona toe foi i tulaga tausaafia paia anamua, e tatau lava ona amata i le aiga. O iina e iloa ai le upumoni, e atiina ae ai le amiosa’o, e aoao ai le amio pulea, ma faafailele ai le alofa” (Gordon B. Hinckley, “Savavali i le Malamalama o le Alii,” Liahona, Ian. 1999, i. 115).
O loo i ai i uiga tausaafia anamua ma le paia ia e tatau ona tatou toe foi i ai ia mataupu faavae manino ma le faigofie o le talalelei a Iesu Keriso. E tatau ona matua mausali lona faavaeina i totonu o o tatou aiga, ina ia mautinoa le fiafia i le olaga faaleaiga.
Sa tautino mai foi e Peresitene Uilifoti Uitilafi: “E anoanoai mataupu faavae o loo teuina e le Alii mo i tatou; ma o mataupu faavae sili o loo ia te ia mo i tatou, e manino ma faigofie. O uluai mataupu faavae o le talalelei e taitai atu ai i tatou i le ola e faavavau, e aupito sili ona faigofie, ae e leai se mea e sili atu ona mamalu pe taua ia te i tatou” (“Remarks,” Deseret News, 1 April. 1857, 27).
E matuai sao lelei aua o nei mataupu faavae e manino ma faigofie, ma o le ala foi lea e tele ai taimi e le mafaufau ai i ai pe a oo mai luitau e aafia ai le aiga. E i ai taimi tatou te mafaufau ai, o le tele lava o le ogaoga o le faafitauli, o le telē foi lena ma le lavelave o lona vaifofo. O lena manatu e mafai ona taitai atu ai i tatou, mo se faataitaiga, e sailia se fesoasoani mai tagata po o faalapotopotoga i fafo atu o le aiga, ae o le mea moni lava, e maua le vaifofo e sili ona aoga i o tatou aiga, o mataupu faavae matagofie o le talalelei, i nai faatinoga iti ma tiute o le olaga i aso taitasi. Ua faamanatu mai e le mau ia te i tatou “o mea faatauvaa ma mea faavalea ua faataunuuina ai mea tetele” (Alema 37:6).
I totonu “O Le Aiga: O Se Folafolaga i le Lalolagi” o loo tautino mai ai e le Au Peresitene Sili ma le Korama a le Toasefululua e faapea, “O faaipoipoga ma aiga manuia, e faavae ma tumau i mataupu faavae o le faatuatua, tatalo, salamo, loto faamagalo, faaaloalo, alofa, agalelei, galuega, ma gaoioiga faafiafia tuufaatasi” (Liahona, Oke. 1998, 24).
A faavasega nei mataupu faavae, ona mafai lea ona tatou iloa o le tele lava, e feāiāa’i ma e ogatasi lava, ma o le mana e mafai ai ona faaaoga i o tatou olaga, e maua mai i le taulaga togiola a lo tatou Togiola ma le Faaola o Iesu Keriso.
O nei mataupu faavae, a oo ina faaaoga, o le a avea ma se malamalama e aafia ai tagata taitoatasi o le aiga ma, e faasolosolo malie lava, ona taitaiina ai i tatou e ola ai i isi foi uiga tausaafia ma mataupu faavae e tau mai i ai, ia o le a faamalolosia ai sootaga faaleaiga. Ua tatou iloa “o lē talia foi le malamalama, ma tumau pea i le Atua, e faateleina atu ai le malamalama; ma e tuputupu pea le pupula o lea malamalama seia oo mai le aso e atoatoa ona lelei” (MFF 50:24).
Afai tatou te manumalo i le atinaeina ma le faatumauina o o tatou aiga, e ala i le faaaogaina o nei mataupu faavae, o le a mafai ona tatou vaaia se aafiaga mamana i tulaga o loo aafia ai o tatou aiga i lea aso ma lea aso. O le a foia manu’a e afua ona o le fetuatuana’i o tagata o le aiga. O le a magalo le faatuaupua. O le a suia le faamaualuga ma le manatu faapito i le lotomaualalo, agalelei, ma le alofa.
O mataupu faavae tatou te filifili e faaaoga i o tatou olaga, e iloa ai ituaiga agaga tatou te avatu i fegalegaleaiga ma isi. A tatou faaaogaina se mataupu faavae, e susulu atu ia te i tatou ona aafiaga ma e mafai foi ona lagonaina e isi.
E sili atu nai lo se isi lava taimi, pe a tatou vaai ua i ai le aiga i le totonugalemu o osofaiga mai autau a le tiapolo, e pei o ona po o le perofeta o Mamona, ina ua faasauatoa le mana o le amioleaga i luga o le fogaeleele uma (Mamona 1:19)—ua tatau ia te i tatou o matua ona faaaoga nei mataupu faavae i o tatou olaga, ina ia faasusulu atu ai ona aafiaga, ma ia vaai foi a tatou fanau i nei aafiaga.
Ou te fia faailoa atu nei le auala e mafai ai ona faaaoga nei mataupu faavae, e amata ai se faiga e maua ai e tagata taitoatasi ma aiga le aoga o le Togiola. O lea faiga e amata lava i le uluai mataupu faavae o le talalelei, o le faatuatua.
I se lalolagi ua fesuisuiai ai tulaga e faatauaina lea ua fai mai ua lelei le mea leaga, a e leaga le mea lelei (Isaia 5:20), o upu sa tautino mai e Mamona ua faatumulia ai i tatou i le faamoemoe ma le mautinoa i aoaoga “e fai [mo Iesu Keriso] i latou uma o e faatuatua ia te ia; o i latou foi o e faatuatua ia te ia, e uumau i latou i mea lelei uma” (Moronae 7:28).
O lena faatuatua e afua ai ona tatou taofimau i mea lelei uma e ala i le faalogo i le afioga a le Atua (tagai Roma 10:17), ma o lenei foi upu e faalogo i ai i le mana e sili atu, i lesona o afiafi faaleaiga ma suesuega faaleaiga o tusitusiga paia. E leai lava se isi nofoaga e sili atu e galueaiina ai le faatuatua nai lo le aiga, o iina e talisapaia ai lesona ma faaaoga, ma ola ai i aso uma.
O le aiga e aoao ai e le tagata, o le faatuatua e fesootai lelei lava ma le Togiola, “o le uiga lea o lenei taulaga faaiu e faataunuu mai alo alofa, e manumalo i le faamasinoga, e faaoo mai ai i tagata le ala latou te faatuatua ai e oo i le salamo” (Alema 34:15).
A leai ia aafiaga o le Togiola i o tatou olaga, o le a le mafai ona atiina ae le ituaiga o faatuatua e tatau ai mo le salamo, ona tatou le aofia ai lea i le ala o le alofa, ona “ua na o lē faatuatua e oo i le salamo e oo i ai le ala o le faaolataga sili ma le faavavau” (Alema 34:16).
O le salamo, le suiga lena e tulai mai i le loto, lea e afua ona o le alofa i le Alii, lea tatou te o ese ai mai le agasala ae gauai atu i Lona finagalo, e mafai “ona aoga ma taliaina e le Atua” “i le ala e tasi o le togiola a Iesu Keriso” (Guide to the Scriptures, “Repent, Repentance,” i. 206)
A taliaina loa e le Atua lo tatou salamo, ona taitai atu ai lea o i tatou e le faiga o loo tatou faamatalaina, ia tatou auai i sauniga ma feagaiga e o faatasi ma le salamo, e pei o le papatisoga ma le faamauga. E faataunuuina le faafouga o nei feagaiga pe a tatou aai ma feinu e le aunoa ma le agavaa i le Faamanatuga, ona maua ai foi lea o le faamagaloga o a tatou agasala.
A maua le faamagaloga o a tatou agasala ma taumafai e faatumauina e ala i le usiusitai i poloaiga, ona tatou maua ai lea e pei ona faamatala mai i le tusi a Moronae, o le agamalu, ma le lotomaualalo, lea e oo mai ai le asiasiga a le Agaga Paia; o lea Fesoasoani e [faatumulia ai i tatou] i le faamoemoe ma le alofa atoatoa; o lea alofa foi e tumau ona o le filiga i le tatalo (tagai Moronae 8:26).
O le tagata na te mauaina le agamalu ma le lotomaualalo, ma fiafia i le mafutaga a le Agaga Paia, o le a le manao lava o ia e faatausuai pe faatiga i isi. E fai faalelei e ia ma le alofa ma le faaaloalo lona toalua ma lana fanau, ma o le a lelei foi ana fegalegaleaiga ma tagata uma latou te mafuta. A tuu foi i tofiga faaleautaitai i le Ekalesia, o le a ia faaaogaina mataupu faavae lava nei e tasi e pei ona faia i le aiga, ma faaalia ai e leai se eseesega o lona tagata pe a i ai i lona lava aiga, ma ana fegalegaleaiga ma tagata o le Ekalesia.
O mataupu faavae e pei o le faatuatua, salamo, alofa, faamagalo atu ma le tatalo, pe a ola ai i le faiga sa ou faamatalaina atu, o le a avea ma tui puipui aupito sili e tetee atu ai i le faama’i o le agasala, lea e mafai ona alia’e mai i totonu o aiga i auala eseese e pei o le ola le mama, faamaualuga, loto mataua, femisaa’i, saua, ma isi amioga e aafia ai sootaga faaleaiga ma tulai mai ai le tiga, o le le faamaoni, ma le malepelepe o sootaga faaleaiga.
O le faaiuga ina ia faaaoga ia mataupu faavae i o tatou olaga ma le avanoa e amata ai le faiga lea i soo se taimi lava e tatau ai, e faalagolago tonu lava i la tatou filifiliga. O se faiga faigofie e mafai e tagata uma lava ona fai. E faavae i luga o mataupu faavae o le talalelei ia o loo faaauau pea ona faaaogaina ma le manuia e i latou uma o e ua tuu atu lo latou faatuatuaga i le Alii.
O lo tatou tiute le saga aoaoina pea o nei mataupu faavae i se lalolagi o loo manaomiaina i taimi uma, aua:
“Po ua poloai atu ea o ia i se tasi, aua le ‘au i latou i lana faaolataga? Faauta, ou te fai atu ia te outou, e leai, a ua ia foaifua mai ai mo tagata uma, ma ua ia poloaiina foi lona nuu ia latou faaoleole i tagata uma ia latou salamo. Faauta, po ua poloai atu ea le Atua i nisi ia le au i latou i lona agalelei? Faauta, ou te fai atu ia te i latou, e leai, a o le tofi o tagata uma e tutusa lava ma ua le vaosia se tasi” (2 Nifae 26:27–28).
Ou te faasoa atu ia te outou la’u molimau, e moni nei mataupu faavae. Ou te tautino atu o le Togiola a Iesu Keriso ua mafai ai ona faaaoga i o tatou olaga. Ua ou iloa lenei mea aua o loo matou taumafai faatasi ma lo’u aiga ina ia ola e tusa ai. I le suafa o Iesu Keriso, amene.