O Filifiliga
O faamanuiaga ma avanoa mo a taeao, e faalagolago i filifiliga tatou te faia i le aso.
Ou uso pele o le perisitua paia a le Atua i le lalolagi atoa, ou te faatalofa atu ia te outou taitoatasi, i le agaga o le alofa ma le faauo. I le olaga lenei, e tele filifiliga e tatau ona tatou faia. O nisi filifiliga e taua tele. O nisi e leai. O le tele o a tatou filifiliga, o le va o le lelei ma le leaga. Peitai, o filifiliga tatou te faia, e tele ina fuafua ai lo tatou fiafia ma lo tatou le fiafia foi, aua e tatau ona tatou ola i taunuuga o a tatou filifiliga. O le faia o filifiliga e lelei atoatoa i taimi uma, e le mafai. E le mafai ona tupu. Ae e mafai ona fai o filifiliga lelei tatou te ola ai ma alualu ai i luma. A ola agavaa le fanau a le Atua mo le taitaiga faalelagi, e mafai ona “saoloto e faavavau, ma iloa le lelei mai le leaga; e filifili mo i latou lava ae le galueaiina.”1
O nisi taimi e le lelei a tatou filifiliga pe a tatou faalogo i uunaiga mai ia tatou uo. E i ai se aafiaga faapena na oo i ai Keith Merrill a o talavou o ia. Sa latou fepuna ma ana uo mai ni papatu i le Faatanoa o le East Canyon, i matu i sasae o le Aai o Sate Leki. Sa te’i ua avea ai ma se tauvaga a le tupulaga, ina ua a’e se alii talavou i le tumutumu o le faatanoa ma oso faatu ifo ai i le 50 futu, agai i le vailoloto o le faatanoa. Sa taufai o uma tama i le tumutumu o le faatanoa ma taufai tulioso ifo ai. Sa le malie se tasi tama, ma o lea sa ia fai atu ai, “Ua lelei la, o le a sili atu la’u oso lea!” Sa a’e o ia i le 60 futu i le isi itu o le mato. Ona o le le manao la e faiaina, o lea sa a’e atu ai foi ma Keith i ona tafatafa. Ina ua uma ona oso faatu ifo le tama lea na muamua, ma sa foliga mai o loo lelei, sa lototele ia Keith ma oso ifo loa. Ua tauva nei na o le toalua lea. Ona a’e lea o le uo a Keith i le 70 futu ma oso ifo i lalo. Sa ea a’e o ia i luga mai le vai ma ata, ma olo ona tauau ma ona mata. Ona ia lu’iina lea o Keith, “E a, e te mafaia?”
“Oi ioe, ou te mafaia.” Sa taufai fai atu tagata uma sa i ai, “Oi ioe, na te mafaia!”
O lea sa toe aau ai Keith i le pa’umatu ma a’e i luga o papa. Sa ia iloa, afai e oso ifo mai le maualuga lava lea e 70 futu, o le a toe manao foi lana uo e a’e maualuga atu, o lea sa ia a’e ai i le 80 futu i le tumutumu o le mato. E leai se isi e mafai ona a’e maualuga atu nai lo le tumutumu. A o tilotilo ifo Keith i lalo, sa fefe o ia i le matua maualalō o le vai. Ua ia faia se faaiuga topelau. E le o le mea lea sa ia manao e fai, na te le’i lagonaina foi e sa’o. Ae na ia faia lana faaiuga i luga o uunaiga ma lu’i a ni alii talavou, na te le o toe manatua i le taimi nei.
Sa solomuli o ia i tua, ma tamoe saosaoa i le mea sa ia mafaia aga’i i le pito. Sa ia maua le maka sa ia aia i le pito o le papa, ma puna ifo ai loa. A o alu ifo o ia i lalo, sa ia manatua le aoao atu a ona matua, ina ia faaeteete i le faiga o ana faaiuga aua o se faaiuga sese, e mafai ona oti ai. Ma o lea sa ia mafaufau ai, “Lea ua e faia [se faaiuga sese] aua a e pau i le vai, o le a matua vave tele ma pei ai le vai o se sima.” Ina ua pau o ia i le vai, sa pei lava o se sima i lana faalogo. Sa lagona lona faafetai, ina ua toe maunu a’e i luga lona ulu.
Aisea na oso ai? O le a se mea sa ia taumafai e faamaonia? O alii talavou sa lu’iina ia, e le’i kea ma atonu foi latou te le o manatuaina lena mea faavalevalea. Ae sa iloa mulimuli ane e Keith, sa ia faia le mea e ono faigofie ona avea ma se faaiuga e oti ai. Sa usitai o ia i uunaiga mai ana uo sa faamoemoe na te faia le mea sa le’i manao o ia e fai. Sa malamalama o ia. Fai mai a ia, “Sa ou ola i le lalolagi, i lena taimi sa ou sau mai i le lalolagi, aua ou te le i puleaina a’u lava. Ou te le i faia faaiuga o lo’u lava olaga. Sa fai e le lalolagi ia faaiuga mo au … ma sa toetoe lava ina le mafai ona [ou] aloese mai le ono futu i lalo o le eleele.”2
E manaomia se ituaiga o lototoa e teena ai nai lo faatino e aunoa ma se mafaufau, ma faatagaina ma le faavalevalea se tasi na te faia filifiliga mo i tatou. E mafai ona tatou faia o faaiuga sa’o ma tumau ai, pe a tatou manino i lo tatou faasinomaga o ni atalii o le Atua, o loo umia le perisitua paia, ua i ai agavaa maoae mo se lumanai ‘anoa.
O le mea e faanoanoa ai, o nisi o a tatou filifiliga le lelei e tumau, ae tele e leai. E tele taimi e mafai ai ona tatou suia le ala ma toe foi ai i le ala sa’o. O le toe foi i le ala sa’o, e ono aofia ai mataupu faavae o le salamo: muamua, ia iloa le sese o o tatou ala; lona lua, lafoai le amio sese; lona tolu, ia le toe faia lava; ma le lona fa, ta’uta’u atu3, ma toe faaleleia le mea e tatau ai. O le iloa mai mea na oo i ai, e taua, ae o le “aoao mai tofotofoga ma mea sese,” ua fetaui lava ma lona igoa. E vave ma faigofie ona alualu i luma, pe a tatou aoao mai i o tatou matua, ma i latou e alolofa ia i tatou, faapea foi o tatou faiaoga. E mafai foi ona tatou aoao mai mea sese a isi, pe a matauina taunuuga o a latou filifiliga sese.
O nisi filifiliga e aumaia ai avanoa lelei tusa lava pe o le fea auala tatou te ui ai—mo se faataitaiga, pe a filifili pe o le fea galuega e fai pe o le fea foi aoga e alu i ai. Ou te iloa se tasi taulealea atamai lava, sa manao e fia avea ma fomai, ae e le i maua se avanoa mo ia, o lea sa ia filifili ai e ave le faaloia. O se loia faamanuiaina tele, ae ou te ioe foi, semanu e faapena foi ona avea ma se fomai faamanuiaina.
O nisi o a tatou filifiliga taua e i ai taimi patino. Afai e faatuai sa tatou faaiuga, e le toe maua se avanoa. O nisi taimi o o tatou masalosaloga e taofia ai i tatou mai le faia o se filifiliga e aofia ai se suiga. Ona misia ai foi lea o se avanoa. E pei ona faapea mai se tasi, “Afai e tatau ona e faia se faaiuga ae e te le faia, o se faaiuga lava lena.”4
E faigata i nisi tagata ona fai se faaiuga. Sa fai atu se fomai o le mafaufau i se tagata ma’i, “E i ai se taimi e faigata ai ona fai se tonu i lou mafaufau?” Sa tali ane le gasegase, “Ioe, toe leai foi.” Ou te faamoemoe ma tatalo, ia mafai ona tatou mausali, e faapei o Iosua ina ua ia faapea mai, “Ina filifili ia outou i le aso nei po o ai tou te auauna i ai; … a o a’u ma lo’u aiga, matou te auauna ia Ieova.”5
O nisi filifiliga e tele atu o latou taunuuga nai lo isi. E leai se isi filifiliga lotofuatia ifo e sili atu i lenei olaga, nai lo le filifiliga o se soa e faaipoipo i ai. E mafai e lenei faaiuga ona aumaia le fiafia ma le olioli e faavavau. Ina ia maua le fiafia atoatoa i le faaipoipoga, e tatau i le ulugalii ona matua gauai atu atoatoa i le faaipoipoga.
O nisi filifiliga mo le faataunuuga ma le fiafia, e tatau ona tasi le faiga, ma pe a uma ona faia, ia le toe faia lava faalua. Mo se faataitaiga, e tatau ona na o le taitasi ona tatou faia o se faaiuga e le masuia, ia le ulaula tapaa, ia le inu i le ava malosi, e le faaaogaina foi fualaau e faaluafesasi ai le mafaufau.
I le 1976, sa avea ai Elder Robert C. Oaks, ma se tasi o le ‘au e faia fesootaiga o Mea e Tutupu i le Sami, a o le taimi foi lea o avea ma ta’ita’i lona ono o le Fuavaa a le Iunaite Setete i le Ea. Sa avea i latou ma malo faaaloalogia i se taumafataga sa talimalo ai le Itumalo o le Leningrad Naval. E tusa ma le 50 taitai sinia o Lusia ma le Iunaite Setete sa i ai, a o taitai e le sa talimalo se faamanuia [i mea inu malolosi] a o le i amataina le taumafataga. Sa latou tutula’i mo le faamanuia muamua ma sisii a’e a latou ipu, o le tele lava sa faatutumu i le voka Lusia. O Uso Oaks, sa i ai lana vaitipolo lanu piniki i lana ipu, ma sa vave ona iloa atu e le faauluuluga o le fuavaa a Lusia lea e ta’ita’ia le faamanuia. Sa taofi, ae poloaiina Uso Oaks e faatumu lana ipu i le voka, ma sa ia fai atu, e le faia le faamanuia seiloga ua fai le mea na faatonuina. Sa musu Uso Oaks, ma sa faamatala atu o la e fiafia i le mea la e i lana ipu.
Sa amata ona oo ifo se lagona e le lelei, e oo lava i tagata o lana ‘au, o le toatele foi o i latou e maualuluga atu ia te ia, sa le fiafia aua o se tulaga ono leai se vaifofo. Sa musumusu atu le faafeao Lusia a Uso Oaks, “Faatumu lau ipu i le voka!” Sa faia e Uso Oaks se tatalo e aupito puupuu i lona olaga: “Le Atua e fesoasoani mai!”
I ni nai sekone, sa musumusu atu le faamatala upu o Lusia, o se kapeteni i le ami sa talanoa ma Uso Oaks e uiga i lana lotu, i le pule o le taumafataga, “E mafua ona o lana lotu.” Sa luelue atu le ulu o le pule o le taumafataga, ma vave ai ona maui ifo le lagona faaletonu, ma faaauau ai loa le polokalama.6
Sa tonu ia Elder Oaks i le tele o tausaga a o le’i tulai mai lena mea, o le a ia le inu lava i se ava malosi, ma ina ua oo i le taimi o le tofotofoga, na te le’i toe tau faia lena filifiliga. Sa talitonu Elder Okas, semanu e tele atu se leaga e oo i ai, pe ana faapea na te fetuuna’ia le mataupu faavae o lona faatuatua, nai lo le leaga semanu e oo mai i le inuina o le voka. I le ma lea, o le gauai atu i ana mataupu faavae faalelotu, e le i afaina ai lana galuega. Ina ua mavae lenei mea, sa oo ina avea o ia ma se taitai ‘au maualuga o se fetu-fa [four-star general].
O se tulaga matautia, o le faia o le mea sese e tele ina foliga mai o la e lelei, atonu ona e foliga mai o le ala e pito faigofie. E tele foi ina tatou faalogo [i se faamatalaga] e faamaonia ai se amioga sese, “O la e fai e tagata uma.” O lenei manatu leaga, ua femilosa’i ai le upumoni, ma o lona tusitala o Satani. E pei ona ta’u mai e Nifae, “Ua olegia e le tiapolo o latou agaga, ma taitai ifo ai i latou ma le faaeteete i seoli.”7
Tusa lava pe o le a le toatele o tagata o lo tatou lalolagi e aofia ai, ae leai se tasi e faatagaina ai le le faamaoni, pepelo, faaimamago, palauvale, aemaise lava o le ta’u fua o le suafa o le Alii, o le faia o sootaga feusua’i e le mama, po o le le faapaiaina foi o le aso o le Alii.
O faatinoga a isi tagata, e le fuafuaina ai le sa’o po o le sese. O se tagata e lototoa e fai le filifiliga sa’o, e mafai ona faatosina mai ai le toatele o isi e filifili ma le atamai. Ou te fia faamaonia atu le mea o loo ta’ua i le tamaitusi Mo Le Malosi o le Autalavou:
“O lau matafaioi o le faia o au filifiliga. E le tatau ona e tuua’ia tulaga e te oo i ai, o lou aiga, po o au uo pe afai e te filifili e le usitaia poloaiga a le Atua. O oe o se atalii o le Atua ua ia te oe foi se malosiaga tele. Ua ia te oe le tulaga gafatia e filifili ai le amiotonu ma le fiafia, tusa lava pe o le a le tulaga e te oo i ai.”8
E faapefea ona tatou faia filifiliga sa’o? O se filifiliga e aofia ai le faia o se faaiuga toto’a. Ina ia faia se faaiuga poto, e tatau ona tatou iloiloina mea moni uma i itu uma o se mataupu. Ae e le lava lena. O le faia o faaiuga sa’o, e aofia ai tatalo ma musumusuga. O le vaega e 9 o le Mataupu Faavae ma Feagaiga, o loo i ai le ki atoatoa. Sa fetalai le Alii ia Oliva Kaotui:
“Faauta e te le i malamalama; fa te oe ou te tuuina atu ia te oe, i le na o lou ole mai ae e te le’i mafaufau i ai.
“Ae peitai, faauta, ou te fai atu ia te oe, e ao ina e filifili mae’a ai i lou mafaufau; ona e ole mai lea ia te au po ua sa’o, afai ua sa’o ou te faia ia mu lou loto i totonu ia te oe; o lea la, o le a e lagona ai ua tonu.
“Ae peitai afai e le sa’o o le a le maua lena faalogoga, a o le a e maua le pogisa i le mafaufau e te faagaloina ai mafaufauga ua sese.”9
Pe a tatou vaavaai i le lumanai, e tatau ona tatou malolosi ma atamamai i le faiga o a tatou filifiliga i se lalolagi ua fai mai ai tagata, ua “ta’ulelei le leaga, ae ta’uleaga le lelei.”10 Tatou te le filifili ma le atamai pe afai tatou te faaaoga lo tatou saolotoga e le tusa ai ma le finagalo o le Atua po o fautuaga faaleperisitua. O faamanuiaga ma avanoa mo a taeao, e faalagolago i filifiliga tatou te faia i le aso.
Uso e, o lo’u talitonuga ma la’u molimau, o i tatou o se vaega ua i ai le tiutetauave e fai ma faataitaiga o le amiotonu i le lalolagi uma. I lalo o le taitaiga a Peresitene Gordon B. Hinckley, e tatau ona tatou faasino le ala e ala i filifiliga musuia tatou te faia. O loo ia te oe le mana o le filifiliga. Ia tatou taufai faaaogaina ma le atamai le saolotoga na aumai i le Atua e filifili ai, a o tatou faia a tatou filifiliga o le faavavau. I le suafa o Iesu Keriso, amene.