Mo Le Malosi o le Autalavou

Elder Earl C. Tingey

O Le Au Peresitene o Fitugafulu

E mausali ma moni tulaga faatonuina o le Ekalesia. E mo lou saogalemu ma le puipuiga e faavavau.

O’u uso pele o le perisitua, ua matua faamamaluina lava a’u ina ua tatou faatasi i lenei afiafi. E toafa le fanau a la’u fanau o loo i ai i le Nofoaga Autu mo Konafesi i le po nei—o Craig, Brent, Kendall, ma Michael. Ou te fia talanoa atu ia te i latou faatasi ai ma i latou uma o loo umia le Perisitua Arona, ma e valaaulia foi isi e faalogologo mai.

I se savali mai le Au Peresitene Sili, o loo i ai i le tamaitusi Mo Le Malosi o le Autalavou, tatou te faitauina ai:

“O matou alii e talavou pele … , ua i ai lo matou talitonuga tele ia te outou. O outou o ni agaga faapitoa ua filifilia e soifua mai i lenei vaitaimi, [o se taimi] ua aupito sili ona tele ai tiutetauave ma avanoa, e faapea foi ona tetele ai tofotofoga. Ua outou i ai nei i le amataga o la outou faigamalaga i lenei soifuaga faaletino. E finagalo lo outou Tama Faalelagi ina ia olioli o outou olaga ma ia toe taitaiina atu outou i Lona afioaga. O faaiuga tou te faia i le taimi nei, o le a fuafua ai le tele o mea o le a mulimuli mai i o outou olaga faapea foi ma le faavavau.”¹

Ua outou ola i se lalolagi ua tele naua le le mautonu. Ua tele leo eseese. Ua tele auala. E le tau uma atu na auala i lo tatou Tama oi le Lagi. E faapefea ona e iloa pe o ai e faalogo i ai ae po o fea foi e alu i ai?

Sa tali e le perofeta o Iakopo nei fesili i le mau lea: “E tautala mai le Agaga i le upu moni, ae le pepelo lava. O lea, e tautala mai i mea e pei ona i ai lava, o mea foi e pei lava ona oo mai.”²

Peitai, pe o “i ai ea mea e pei ona oo mai” e pei ona ta’ua ai e Iakopo? I le saunoaga a Elder Neal A. Maxwell, e uiga i lenei mataupu, na saunoa ai:

“A aunoa ma le tali ma le usiusitai ‘i mea e pei ona i ai’, o le a faavavau lava ona faataamilomilo ma lē manuia sailiga mo se isi ala e ola ai … O se ala o le olaga e sese i le taimi nei, e le mafai ma o le a le mafai lava ona faamaonia lona sa’o i se taimi mulimuli ane … .

“E aumaia mo i tatou e le talalelei a Iesu Keriso le tele o upu moni … —o loo i ai moni lava se Atua soifua; o loo i ai moni le Ekalesia ola; o loo i ai moni ni perofeta soifua; o loo i ai moni ni tusitusiga paia ola; ma o le a i ai moni se toetutu ma se faamasinoga.”³

E i ai upu moni patino, o “mea [patino] e pei ona i ai,” o loo faamalolosia e tulaga faatonuina—o le tele lava o nei mea e mafai ona fuaina. Se i o tatou vaavaai i ni faataitaiga i taaloga afeleti.

O le faavaa o le New Era o le masina o Mati 2004, o loo faaalia ai se ata o Moroni Rubio o Mekisiko. I le lua tausaga talu ai, ina ua 16 ona tausaga, sa mua ai i le tuuga e 100 mita, i le Suegasiamupini o Aoga Faaitumalo o Amerika Tutotonu. O lona taimi aupito sili ua i ai, o le 10.46 sekone.⁴ Sa fuaina lona taimi i se uati e fua ai taimi o faatinoga.

O le matati’a o le oso maualuga a alii, o loo umia lea e se tama taalo mai Kiupa, pe tusa ma le 8 futu (2.4 m) le maualuga o lana oso. Mata e mafai ona e oso i lena maualuga? E tulioso le au oso maualuga i luga o se laau faalava e faatietie i pou e lua e faatutu i luga. O le laau faalava lea e faatusa i se tulaga faatonuina, o se fua e tatau ona ausia pe ova atu ai.

Manatu i ni taaloga afeleti e le fuaina ai le au taufetuli i se uati pe leai foi se laau faalava e tulioso ai le au oso maualuga e fua ai a latou oso.

O le olaga, e pei foi o afeleti, e i ai tulaga faatonuina po o amioga e fuaina. E i ai sa’o ma sese. O i tatou o e umia le perisitua, tatou te le feosofi e aunoa ma se laau faalava.

O le mea e faanoanoa ai, ua tatou vaaia le aveesea o tulaga faatonuina o le ola mama ma amioga i le lalolagi i ona po nei. O le anaga taatele o aso nei o le “e alu a soo se mea.” Ua manatu le lalolagi o tulaga faatonuina ua leva ona i ai ma faamamaluina, ua le toe aoga.

Ua tatou auai i se ekalesia e manaomia ai le tumau i tulaga faatonuina. O mea sa sese i aso ua fano, o loo sese pea lava i aso nei. E le suia e le Ekalesia ia tulaga faatonuina o le ola mama, e ala i le fetuutuunai i le suiga o tu masani, po o amioga a atunuu o loo tatou ola ai.

Sa faamatala e Peresitene Gordon B. Hinckley se mea na oo i ai, a o talavou sa taotooto ai i le moega o se taavale tuai o le faatoaga i le po, ma lona uso o Sherman. Sa la “matamata i le anoanoai o fetu i le lagi, ma sa la feauaua’i i le pikiina o fetu ua masani i ai, ma sa la sailia foi le Big Dipper, le ’au ma le ipu, ina ia saili ai le Fetu i Matu.” Fai mai Peresitene Hinckley, sa matua maofa i le Fetu i Matu. E ui lava i le taamilosaga a le lalolagi, e tumau lava le Fetu i Matu i lona tulaga i le lagi ma e le minoi lava. Fai mai a ia: “Sa ou iloaina e tumau lava ia i le totonugalemu o suiga. O se mea e mafai ona faalagolago i ai e le aunoa, o se mea e faatuatuaina, o se taula i le mea e foliga mai o loo gaioi ma se vanimonimo e le mau.”⁵

O le matauina o le mausali, ma le maua’i o le tulaga o le Fetu i Matu, sa faamatala ai e se tasi tusitala se tala e ese, o se alii talavou sa leiloa i se malaga o se tolauapiga. Ina ua toe maua o ia e lona tama, sa fesili lona tama pe sa ia manatua e piki mai se mea i le laufanua e mafai ona ia vaavaai pea i ai. Fai mai lona tama, o lena mea, o le a fesoasoani ia te ia e nofomau ai. Fai mai le tamaitiiti, “Ua i ai.”

“O le a?” sa fesili ai lona tama.

“O le lapiti la le,” o le tala lea a le tamaitiiti.⁶

Alii talavou o le Perisitua Arona, ia e pulato’a i tulaga e le femoumouai o le talalelei, ae le o le lapiti feosoosofa’i.

I le tamaitusi Mo Le Malosi o le Autalavou, o tulaga faatonuina nei, faatasi ai ma nisi, e pei o le Fetu i Matu mo outou: filifili uo e maualuga o latou tulaga faatonuina, aua le faamatagaina lou tino i pe’a pe tatuiina foi, aloese mai tusi ma ata mataga, aua le faalogologo i musika e i ai le gagana faatuaupua, aua le fai upusa, tafafao faamasani na o i latou e maualuga tulaga faatonuina, ia tausisia le mama mai feusuaiga, salamo pe a tatau ai, ia faamaoni, ia tausia le paia o le aso Sapati, totogi ia sefuluai, tausi le Upu o le Poto.⁷

Ua sefululua tausaga talu ai, i se tasi o atunuu o Aferika, sa i ai ni tagata faamaoni o le Ekalesia, sa fai a latou sauniga i o latou fale mo le tele o tausaga. Sa ou alu i lena atunuu e vaai pe mafai ona maua se faatagaga mai le malo, e avatu ai faifeautalai e faatu ai le Ekalesia. Sa ma fono ma le minisita maualuga o le malo. Sa ia tuu mai ia te au le 20 minute e faamatala ai lo tatou tulaga.

Ina ua uma la’u faamatalaga sa ia fai mai, “Ou te le iloa pe o le a se mea sa e ta’u maia, e ese mai mea ia ua i ai nei i lo matou atunuu. Ou te le iloa foi se mafuaaga e [tatau] ai ona faamaonia lau talosaga e aumai ni faifeautalai i lo matou atunuu.”

Sa tu o ia i luga e faasino a’u i fafo o lona ofisa. Sa ou matua gatete. Ua ou toilalo. E le o toe mamao ona uma lea o le ma fonotaga. O le a sa’u mea a fai? Sa ou tatalo le leoa.

Ona oo mai lea o se mafaufauga musuia ia te au. Sa ou fai atu i le minisita, “Lau susuga, afai e mafai ona e toe tuu mai se isi lima minute ia te au, ou te fia faamatalaina atu se isi manatu ia te oe. Ona ou alu ai lea.” Sa malie lelei o ia.

Sa ou tago ifo i la’u atotupe ma aumai le tamaitusi Mo Le Malosi o le Autalavou, lea ou te feavea’ia e le aunoa.

Sa ou fai atu, “O se tamaitusi lenei o tulaga faatonuina matou te tuuina atu i talavou uma o la matou Ekalesia.”

Ona ou faitauina lea i ai o nisi o tulaga faatonuina ia sa ou ta’ua i le po nei. Ina ua uma la’u faamatalaga, sa faapea mai o ia, “O lona uiga o lau tala, tou te faamoemoeina talavou o la outou ekalesia e ola ai i nei tulaga?”

“Ioe,” sa ou tali atu ai, “ma e latou te ola ai.”

“E maeu lena mea,” o lana tala lea. “E mafai ona e auina mai nisi tamaitusi faapea ina ia ou tufatufaina i tupulaga talavou o la’u ekalesia?”

Sa ou tali atu, “Ioe,” ma sa ou faia.

I ni nai masina mulimuli ane, sa matou mauaina le faamaoniga aloaia mai le malo o lena atunuu, matou te o atu ma faatuina le Ekalesia.

Alii talavou, o nei tulaga faatonuina ua faamanuiaina outou e tausia, o se penina tau tele lava. E le malamalama i ai le lalolagi. E toatele tagata lelei o loo latou sailia. O lena e ia te outou.

Sa maua e le Perofeta o Iosefa Samita se faaaliga o loo faavae ai le auala e mafai ai ona tatou iloa i ona po nei, pe o fea leo e faalogo i ai—pe o a foi tulaga faatonuina e mulimuli ai. O le faaaliga lea, o o tatou aso, po o la tatou augatupulaga, sa ta’ua o se taimi o le a “iloa ai [e tagata] se puapuaga lautele,” ma “o le a ufitia le laueleele i le faama’i e faaumatia ai.”⁸

Ona aumai ai lea e le Alii le tulaga faatonuina o le saogalemu, o le a puipuia ai soo faamaoni. Na ia fetalai mai: “Ae tutu pea o’u soo i mea paia, ma e le faagaeetia.”⁹

O le Usoga a le Au Peresitene Sili ma le Korama a Aposetolo e Toasefululua, o soo ua tutu i mea paia. E le faagaeetia lava i latou pe maluelue i le fesuiaiga o taimi, mai mea sa faatuina o ni mea moni i augatupulaga uma na muamua. E mausali ma moni tulaga faatonuina o le Ekalesia. E mo lou saogalemu ma le puipuiga e faavavau. A e tautino atu e te ola ai, ua fuaina oe i tulaga faatonuina ua loa ona faamaonia e le Atua.

O lenei, i atalii o la’u fanau ma uso pele o le Perisitua Arona, ua outou i ai nei i se tautuuga mo le olaga atoa. E le o se tuuga puupuu. E tai pei lava o se marafoni.

O le a tofotofoina outou ma faamaonia i tulaga faatonuina a le Atua. O le a taialaina outou e le Agaga, e fesoasoani ia outou iloa le mea e fai.

Toetoe lava ua na o i tatou le faalapotopotoga o totoe, sa faatuina ni tulaga faatonuina ua leva ona i ai ma faamamaluina. O le tele lava o isi ua gauai atu i aganuu a lo tatou lalolagi. E maeu le faamanuiaina o i tatou, i le i ai o perofeta soifua.

Ia faamanuiaina outou i lo outou tausia o tulaga faatonuina o le Ekalesia. I le suafa o Iesu Keriso, amene.