Iesu, a Mafaufau ia Oe

Epikopo Keith B. McMullin

Fesoasoani Lua i le Au Epikopo Pulefaamalumalu

Iesu, a mafaufau ia oe, ou te fiafia naua. E faatautaia vaega uma o lo’u tagata.

Na ou faalogo talu ai nei o ta’ua e Peresitene Hinckley se ulugalii talavou faatoa faaipoipo i le malumalu, “O se taimi matagofie lenei e ola ma gaualofa ai.” O lana vaaiga o le a lelei mea uma i le olaga ma ona uiga, e faagaeetia loto. Latou te lagolagoina le faamoemoe i se lalolagi puaoa. Ae peitai, e sili atu [ia saunoaga] nai lo na o ni manatu faigofie o se tagata e talitonu o le a lelei mea uma. O se toe tepa i tua, o le a fesoasoani e faamalamalamaina le uiga o lau faamatalaga.

I le amataga lava o le seneturi lona 12, na tusia ai e le faifeau o Saint Bernard o Clairvaux, “o se alii e malosi … lona faatuatua,”¹ ia upu nei:

Iesu, a mafaufau ia oe
Ou te fiafia naua;
Ae sili le mau ai ma oe
I lou afioaga.2

O nei laina o loo talanoa e uiga i le faamoemoe ma le olioli ma le filemu, e ui ina sa tusia i se taimi e le i tele se atamai i le lalolagi, pagatia, ma leai se faamoemoe. O nei upu ua faailoa mai ai le faamautinoaga malu lea e vaavaalua i taimi uma ma le molimau ia Iesu. O lenei foi faamautinoaga e tasi, na te tuuina atu i lo tatou Perofeta pele ma soo faamaoni uma o Keriso, le faagaeetia ma le talitonuga o le a lelei mea uma.

O le a la, lenei molimau e uiga ia Iesu, e mafai faapefea ona maua, ma o le a se mea na te faia mo i latou o e mauaina? O le molimau ia Iesu o le malamalama patino ma le mautinoa, ua faaalia e le Agaga Paia i le agaga o se tagata, o Iesu o le Alo soifua o le Atua soifua.³

Talu ai ona o le molimau ia Iesu e mai le Atua, o lea ua tulaga ese ai ma e taua tele i se olaga fiafia. [O le molimau ia Iesu] o le mataupu faavae autu o lo tatou faatuatuaga, ma o isi mea uma e faatatau i lo tatou faatuatuaga o ni faaopoopoga.⁴ Ua faamanatu mai e Peresitene Hinckley ia i tatou:

“O se faamanuiaga, o se avanoa, o se tiute o tagata uma o le Au Paia o Aso e Gata Ai, le mauaina mo ia lava o se malamalama patino … o Iesu o le Keriso, le Alo o le Atua, o le Togiola o tagata uma… . O lena molimau … o le meatotino e sili ona pele, e mafai e soo se tasi o i tatou ona umia… .

“ … Ua faamalieina au … soo se taimi lava e maua ai e se tagata se molimau moni i totonu o lona loto i le moni o le soifuaga o le Alii o Iesu Keriso o isi mea uma o le a faaleleia e pei ona tatau ai.”⁵

O lenei molimau ia Iesu, e fafagaina i le ola amiotonu, e avea ma puipuiga malosi i mea uma e faia e se tagata. Ma le isi, e mafai ona maua e tagata uma, aua “e le faailogaina tagata e le Atua.”⁶

Ae peitai, o le mauaina o se molimau faapena, e le oo mai e aunoa ma se taumafaiga a le tagata lava ia. E tatau i le tagata ona manao e fia iloa, suesue ina ia iloa, ola ina ia agavaa, ma tatalo ina ia maua. Pe afai e fai i le lotomaulalo ma le faatuatua, o le a oo mai le malamalama, ma o lenei malamalama e oo mai ai foi ma le faamautinoaga matagofie, o le a lelei mea uma faapea ma le malosi i totonu e faia ai ia lelei.

Manao e Fia Iloa

O le manao e fia iloa o le laasaga muamua lea i le sailiga a se tagata mo se molimau ia Iesu. Ua fautua mai tusitusiga paia, “Afai tou te ala mai ma fagua o outou mafaufau, … e oo i le tofotofo i au upu, ma faaaoga sina faatuatua itiiti lava, ioe, afai tou te le mafaia se mea e sili i le manao e fia faatuatua, ina tuu ia lenei manao e galue i totonu ia te outou, seia lava lo outou faatuatua e talia ai nisi o au upu.”⁷

Suesue ina ia Iloa

E tatau i le tagata faamaoni o loo sailia se molimau ia Iesu, ona suesue ina ia iloa. Na fetalai le Alii, “E suesue outou i tusi; aua ua outou manatu tou te maua ai le ola e faavavau: o Tusi foi ia o loo molimau ia te au.”⁸

Mai i le isi faavaa e oo i le isi, o loo aoao ma molimau mai ai le Tusi Paia ia Keriso. O Ia o Ieova i le Feagaiga Tuai, a o le Mesia i le Feagaiga Fou.⁹ O le Tusi a Mamona, o se tasi molimau ia te Ia, na tuufaatasia, ma faapolopolo, ma aumaia mo le faamoemoega ua faailoa mai ina ia “mautinoa … ai e tagata Iutaia ma Nuu Ese, o Iesu o le Keriso, o le Atua Faavavau, o loo faaali mai o ia i atunuu uma lava.”¹⁰

Ola ina ia Agavaa

E o faatasi le manao o se tagata ma le suesue, e tatau i se tagata ona ola ina ia agavaa mo se molimau faapena. O le tagata na te faia le mea na fetalai mai ai Iesu, o le a na ia iloa po o ai Iesu. Na Ia fetalai:

“O lau mataupu e le o sa’u lava, a o lana na auina mai a’u.

Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava au.”¹¹

Tatalo ina ia Maua

O le mea mulimuli, o le molimau ia Iesu, e oo mai ia i latou o e tatalo ina ia maua. “Ia ole atu, ona foaiina mai ai lea ia te outou”¹² o le valaaulia o loo faapea ona taitaiina atu ai le tagata lotomaulalo ma le loto momomo i lena malamalama. O lenei malamalama, e maua ai foi e le o loo sailia se malamalamaaga i le tupuaga ma le faamoemoega o le olaga, ma tatalaina ai vaaiga (e uiga i le olaga), semanu e tumau pea ona natia.

Mo se faataitaiga, o le soifuaga o le Alii e le i amataina i Peteleema,¹³ ma o o tatou olaga e le i amataina i le fanau mai. I le muai olaga, na avea ai o Ia o se fautua faamaoni, mausali i le fuafuaga e faavavau a le Atua mo Lana fanau,¹⁴ ma sa tatou i ai iina. I lena Taua tele i le Lagi, na tuliesea ai Lusifelo, ona o le mana o le Alo e Toatasi na Fanaua,¹⁵ ma sa tatou fesoasoani e lagolagoina le fuafuaga. Na ala mai i le Alo Pele e Toatasi na Fanaua o le Atua “na foafoaina ai lalolagi uma,”¹⁶ o le mea lea, e mafai ai ona tatou ausia o tatou agavaa faaleatua. Na saunoa mai Peresitene J. Reuben Clark:

“E le o se faataitaiga, e le o se mea amata, e le o se Tagata o loo faia se faataitaiga muamua, lea na afio mai i le amataga … ma … faia lenei lalolagi… .

“Ma a outou mafaufau i lo tatou gateatea lenei, le i ai i totonu mai lava i le amataga le tusa ma le … tasi miliona o lalolagi, ma a faatele lena i le aofai o miliona o vateatea … o loo siomia i tatou, o le a outou maua ai se vaaiga po o ai [Iesu Keriso].”¹⁷

Ma le maofa, tatou te olioli faatasi ai ma le faifeau anamua: Iesu, a mafaufau ia O, ou te fiafia naua.

I le avea ai ma Alo moni o le Atua, ma le soifua mai i se tina motale [faaletino], na avea ai le Keriso o le muai olaga, ma Alo Pele e Toatasi na Fanaua e le Tama i le tino. E ui lava ina e le i oo muamua atu ia te Ia le atoatoaga o Lona tulaga tau tupu, tulaga faamesia, ma le faaleatua, “na Ia faia pea lea amioga mama ma lea amioga mama, seia maua e ia le atoatoaga,” ma tatou te mafaia foi.¹⁸

Sa auauna foi agelu ia te Ia, na afio ifo le Agaga Paia i Ona luga, na Ia tauaveina puapuaga o tagata uma, ma e ala atu ia te Ia e mafai ai ona faamagaloina a tatou agasala.¹⁹

O lenei Iesu, o le ua taua o Keriso, na faia se togiola atoatoa mo tagata uma e ala i Lona soifua le mafaatusalia, o Lona puapuagatia i Ketesemane, o le faamaligiina o Lona toto, o Lona maliu i luga o le satauro, ma Lona Toetu mamalu. Ua Ia manumalo mai le tuugamau, ma talu ai ona o Ia, o le a toetutu ai foi i tatou.²⁰ “O Ia o le Tagata aupito maoae ua soifua i luga o lenei fogaeleele… . O Ia o le Alii ia o alii, ma le Tupu o tupu, … le Faaola, … o le Fetu Ao Pupula… . O Lona suafa … ua na o le pau lea o le igoa i lalo o le lagi [e ala ai] ona mafai ona faaolaina i tatou.”²¹ O Ia o le Toatasi na Faauuina. Ma tatou te toe faapea atu: Iesu, a mafaufau ia Oe, ou te fiafia naua.

E pei ona sa le mafai e le lalolagi ona faatoilaloina o Ia i le vaeluaga o aso i le tino ina o soifua le Alii o Iesu Keriso i le lalolagi, e faapena foi ona le mafai ona faia e le lalolagi e aunoa ma Ia i o tatou taimi, ma tatou te le mafaia foi. O Lona faamoemoega ina “ia faataunuuina le faaofuina o le tagata i le tino ola pea ma le ola e faavavau.”²² O le mea lea, na afio mai ai o Ia i le Perofeta o Iosefa Samita, toefuatai mai le perisitua, toe faatuina Lana Ekalesia, ma toe folafola mai le fuafuaga o le faaolataga. Na vaai Iosefa ia te Ia, talanoa ma Ia, ma tuua mo i tatou lenei tala maoae e uiga ia te Ia, ua tusia i se solo:

Sa ou vaai i le nofoalii, o siomia e tagata ma agelu paia,
Ma tagata faapaiaina mai lalolagi na i ai,
O vivii atu i le Atua ma le Tamai Mamoe,
E faavavau, faavavau. Amene ma amene.
Ina ua uma ona faia molimau e tele e uiga ia te ia,
Mai molimau faamaoni, i le tagata na silafia ai o Ia,
O le molimau tupito lenei i mau uma lava, ou te faia ia te Ia; ioe, o loo soifua o ia!
O nofo i le itu taumatau o le Atua, i lona nofoalii.
Na ou faalogoina le siufofoga, o molimau mai le lagi,
O ia o le Faaola, ma le Toatasi na Fanaua o le Atua;
E mai ia te ia, ma o ia, ma ui mai ia te ia, na foafoaina ai lalolagi uma,
E oo lava i felavesaiga i le atulaulau.
O e foi o nonofo ai, mai le muamua e oo i le mulimuli,
E faaolaina e lo tatou nei Faaola;
O i latou foi o afafine ma atalii na fanau e le Atua
Mai nei lava upumoni ma le mana e tasi.23

Ua ia i tatou i aso nei ia Aposetolo ua faauuina lelei a le Alii. E faamaoni e tusa ai ma lo latou tiute paia e avea ma “molimau faapitoa i le igoa o Keriso i le lalolagi atoa,”²⁴ ua latou tautino mai:

“O Iesu o le Keriso Soifua, o le Alo tino ola pea o le Atua. O Ia o le Tupu Silisili o Emanuelu, o loo afio i le taimi nei i le itu taumatau o Lona Tama. O Ia o le malamalama, o le ola, ma le faamoemoega o le lalolagi. O Lona ala o le auala lea e tau atu i le fiafia i lenei olaga ma le olaga a sau. Ia faafetaia le Atua mo le meaalofa le mafaatusalia o Lona Alo paia lea.”²⁵

Iesu, a mafaufau ia oe, ou te fiafia naua. E faatautaia vaega uma o lo’u tagata. O lo’u ola, o mea ou te fiafia i ai, o a’u sini o loo fausia ai, faafiafiaina, ma aumaia ai le faamoemoe, aua ou te iloa o Oe o le Keriso, o Le Paia.

Ou te faafetai i le Atua mo la’u molimau ia Iesu, ma tatalo ina ia faamanuia uma i tatou, i le suafa o Iesu Keriso, amene.