Tumau ai i le Ala Tanu

Peresitene Gordon B. Hinckley

Tatalo mo le malosi e te savali ai i le ala tanu, atonu o nisi taimi e tuuatoatasi ai, ae e tau atu ai i le filemu ma le fiafia ma le olioli faalelagi.

A’u uo talavou pele, outou na tamaitai talavou lalelei e, ua tatou faalogologo i molimau musuia ma lauga matagofie mai lenei au peresitene o Tamaitai Talavou. Oka ni taitai talenia, ma le tomai. O tua atu o i latou, o loo i ai se au faatonu aoao e fautuaina, ma o i latou uma ia e taitai i lenei polokalama maoae mo tamaitai talavou i le lalolagi atoa.

Ua oo mai le faasologa ou te lauga atu ai ia te outou, ma ua ou tau le iloa se upu e fai atu. Ua lofituina lava a’u i lo outou aofai. O lenei Nofoaga Autu tele mo Konafesi ua aofia ai le faitau afe. Ua faatumulia foi isi fale taulalata mai. O loo oo atu nei sauniga i falelotu i le tele o atunuu o lenei lalolagi.

Ua matua toatele naua outou. E avatu lava lo’u loto ia te outou. Ou te talisapaia outou. Ou te faamamalu ia te outou. Ou te faaaloalo ia te outou. Se ‘au ina a maoae mo le lelei, lena ua outou i ai.

O outou o le malosiaga o le taimi nei, o le faamoemoega mo le lumanai.

O outou o le fua aliali o augatupulaga uma ua mavae, o [outou] o faataitaiga o tamaitai talavou uma e le i fananau mai.

E tatau ona outou iloa, e pei ona tauina atu ia te outou, e le o tuulafoa’ia outou i lenei lalolagi. E faitau fiaselau afe outou. Tou te aumau i le tele o atunuu. E eseese gagana tou te tautatala ai. Ua i totonu o outou taitoatasi se mea e paia.

E le faaluaina lava outou. O outou o afafine o le Atua.

Ua ia te oe se tofi matagofie ma le paia ma faalelagi. Ia aua lava nei galo lena mea. O lou Tama e Faavavau o le Alii sili o le atulaulau. Na te pulea tagata uma, ae e faafofoga mai foi o Ia i au tatalo aua o oe o Lona afafine, ma e faafofoga mai foi ia te oe pe a e talanoa atu ia te Ia. E tali mai o Ia i au tatalo. Na te le tuulafoaiina lava oe.

A oo i ou taimi paganoa, ona ou mafaufau lea i le lumanai ma mea matagofie uma e mafai ona fai, ma ona tofotofoga matautia uma. Pe mata o le a le mea o le a tupu ia te outou i le isi 10 tausaga. Mata o fea o le a e i ai? O a au mea o le a fai? E faalagolago lava lena mea i au filifiliga e fai, o nisi [filifiliga] atonu e le taua i le taimi nei, ae o le a ogaoga ni ona taunuuga.

E i ai se tagata sa fai mai, “Atonu o le a i ai se eseesega i le faavavau atoa, pe tatou te faia le mea tonu po o le mea e sese i le aso” (James Freeman Clarke, in Elbert Hubbard’s Scrap Book [1923], 95).

Ua ia te oe le tulaga gafatia e avea ai ma soo se mea e mafuli i ai lou mafaufau. Ua ia te oe se mafaufau ma se tino ma se agaga. A galulue faatasi nei mea e tolu, e mafai ona e savali i le ala tanu e tau atu i le faataunuuga ma le fiafia. Ae e manaomia ai se taumafaiga ma se ositaulaga ma le faatuatua.

Faatasi ai ma isi mea, e tatau ona faamanatu atu ia te oe, e tatau lava ona e puepue maia a’oa’oga uma e mafai ona e maua. Ua matua lavelave ma faatautava le olaga. E le mafai ona na ona e manatu e i ai au aia tatau e tatau ona avatu ia te oe. E faamoemoe e te faia se taumafaiga tele, ma faaaoga au taleni aupito sili ina ia e oo atu ai i le lumanai e sili ona matagofie, lea e tatau ona e maua. E i ai taimi, atonu o le a i ai ni tulaga matuia o le le fiafia. Ae o le a toatele naua ni lima fesoasoani i le ala, latou te avatu ia te oe le faamalosiauga ma le malosi e te alualu ai i luma.

Sa ou asiasi i le falemai i se tasi aso e vaai sau uo lelei. Sa ou vaaia tamaitai fomai eseese sa tiute. O ni tagata tomai tele. Sa faafiafiaina lava a’u aua sa latou iloa le mea la e tupu, ma le mea foi e fai. Sa matua lelei ona aoaoina i latou, ma sa iloa lelei lava. Sa i ai se anavatau sa faatioata i luga o puipui o potu taitasi. E faitauina, “Matou te taumafai e fai le mea sili.”

E maeu le eseesega ona o aoaoga. O aoaoga o le ki lea i avanoa. E aumai faatasi ai ma le luitau o le faateleina o le malamalama ma le malosi ma le mana o le amio pulea. Atonu e le o i ai ni a outou tupe e maua ai aoaoga uma tou te mananao ai. Faaaoga lau tupe i le mea e gata mai ai lou mafai, ma faaaoga ia sikolasipi, o fesoasoani, ma faaunegatupe e te gafatia ona toe totogi.

O le mafuaaga lena sa faavaeina ai le Teugatupe Faaagaga mo Aoga. Ua matou iloa e mafai e ni nai tālā ona faia se eseesega i le lalolagi, i avanoa mo alii talavou ma tamaitai talavou, e faamautinoa ai aoaoga o loo manaomia. E mautinoa ua maua aoaoga e le tagata e faaune atu i ai le tupe, ona toe totogi lea ina ia mafai ai foi e se isi tagata ona maua lea lava avanoa e tasi.

O le taimi nei, ua faailoa mai o aoaoga, ua faatolu ai pe faafa foi tupe ua maua e le tagata nai lo le mea e i ai pe ana leai nei aoaoga. Manatu i lena mea!

E ui ina e le o maua lenei polokalama i nuu uma, ae ua i ai nei i nofoaga e o mai ai nisi o outou, ma afai o i ai, e mafai ona faamaonia o se faamanuiaga tele i lou olaga.

A o e savalia le auala o le olaga, ia e faaeteete i au uo. E mafai ona latou atiina ae oe pe faataumaoia foi. Ia agalelei e fesoasoani i e vaivai ma i latou e faanoanoa. Ia piiama i uo e pei o oe, o uo e faamalosiau ia te oe, [o uo] e tutusa o outou tulaga tausaafia, e ola e pei ona e manao ai; e tutusa ituaiga faafiafiaga e fiafia ai; ma i latou e tetee i mea leaga na e te manao e teena.

Ina ia ausia Lana ala o le fiafia, o lea sa toto ai e le Foafoa Sili i totonu ia te i tatou se natura e fiafia mai ai tama i teine, ma faapena foi ona fiafia mai teine i tama. E mafai e lena manao ona toso atu ai i aafiaga matagofie, po o le toso atu ai foi i aafiaga mataga ma le matautia. Pe a tatou vaavaai atu i le lalolagi, e foliga mai ua lafoa’i le ola mama. Ua taatele le solia o tulaga faatonuina tuai. Ua tele suesuega ua faaalia ai ua faatuatuana’i mataupu faavae ua leva ona faamaonia le sa’o. Ua faagalo le amio pulea. Ua salalau faiga feusuai faatautala.

Peitai, a’u uo pele, e le mafai ona tatou taliaina mea ua taatele i le lalolagi. O outou tulaga, o ni tagata o le Ekalesia, o se tulaga e maualuga atu ma ua i ai tapu. O loo poloai mai e pei o se leo mai Sinai, e aua tou te faia ni uiga feusua’i i fafo o faaipoipoga. E tatau ona taofiofi mamau o outou manaoga. Aua e leai se lumanai o i ai i se isi lava ala. Se’i ou toe suia e faapea, ua saunia e le Alii le salamo ma le faamagaloga. Peitai, o le faamatuu atu i tofotofoga, e mafai ona avea e faapei o se manu’a e foliga mai e le mafai ona pe, ma o le a i ai pea lava se ma’ila mataga.

O le tausaafia o lavalava ma uiga, o le a fesoasoani e puipuia ai mai tofotofoga. Atonu e faigata ona maua ni lavalava e tausaafia ai, ae e mafai ona maua pe a lava le taumafai i ai. O nisi taimi ou te moomoo ai, maimau pe ana tofu teine ma se laau suisui ma ua aoaoina e faaaoga. Ona mafai ai lava lea ona nofo ia ma sui ona ofu mananaia. Atonu o se moomooga e le mafai ona tino lea. Ae ou te le faatuai e fai atu, e mafai ona e lalelei e aunoa ma le faia o lavalava e le talafeagai. E mafai ona e onomea ma fiafia i lou ofu ma lau amio. O ou foliga i isi, o le a iloa i ou uiga faaalia, ma o le aotelega foi lena o uiga o lou tagata. Ia e fiafia. Ataata. Ia i ai ni mea malie. Ae tosi ni au laina tuaoi malolosi, pei o se laina tuaoi i le oneone, e te le sopoia pe solia.

Sa fetalai le Alii e faatatau ia i latou e teena le apoapoaiga e “tausuai ma pauu pe a oo ifo le afa, ma agi le matagi, ma to mai uaga, ma taia i luga lo latou fale” (MFF 90:5).

Aloese mai faafiafiaga e le mama. Atonu e mananaia, ae o le tele lava o taimi e tauvalea ai. Ou te le manao e soona tautala i lenei mea. Ou te le manao e ta’u au o se faauma-fiafia. Ou te le manao tou te faapea o au o se toeaina e lē ‘ilafia se mea e uiga i talavou ma o latou faafitauli. Ou te manatu, e i ai si o’u iloa e uiga i nei mea, ma e mai i lo’u loto ma ona o lo’u alofa lea ou te aioi atu ai ina ia outou tumau ai i le ala tanu. Fai ni mea tou te fiafia ai ma au uo. Pepese ma sisiva, feausi ma sopo, ia fai faatasi ni galuega faatino, ma ola ma le sagisagi fiafia.

Faaaloalo i o outou tino. Ua faamatalaina e le Alii [o outou] tino o malumalu. Ua toatele naua i latou i nei aso, ua faamatagā o latou tino i pe’a. Oka se le manafanafa mo le lumanai. E uma lenei olaga o i ai pea. E uma loa ona ta, e le toe mafai ona aveese, se i vagana o se faiga faigata ma le taugata. Ou te le malamalama, pe aisea o le a gauai atu ai se teine i se mea faapena. Ou te aioi atu ia te outou, ia aloese mai nei ituaiga o mea mataga.

Ma a o ou tautala e uiga i mea e tatau ona aloese ai, ou te fia ta’ua foi fualaau oona. Faamolemole aua e te faata’ita’ia. Aloese mai ai, ia faapei o se faama’i leaga, aua e moni lava.

Aua lava nei e manatu faapea e te mafaia na o oe. E te manaomia le fesoasoani a le Alii. Aua lava e te faatuai e tootuli i se nofoaga paganoa e te lua talanoa ai ma Ia. Oka se ofoofogia ma le matagofie o lenei mea o le tatalo. Mafaufau i ai. E mafai ona tatou talanoa ma lo tatou Tama i le Lagi. E faafofoga mai o Ia ma tali mai foi, ae e tatau ona tatou faalogo atu i lena tali. E leai se mea faapea ua matuia tele ma e leai foi se mea faapea e le taua tele e ta’u atu ia te Ia. Ua fetalai mai o Ia, “Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28). Sa Ia toe fetalai mai, “Aua e avegofie la’u amo, o la’u avega foi e mama ia” (f. 30).

O lona uiga, i le faaiuga, e faigofie ona tauave Lana auala, e faigofie foi ona savalia Lona ala. Sa tusi atu Paulo i Roma, “Aua o le malo o le Atua e le o mea e ‘ai ma mea e inu; a o le amiotonu, ma le filemu, ma le olioli i le Agaga Paia” (Roma 14:17).

E tatau ona avea le faatuatua i le Alii o Iesu Keriso ma se moli faailoilo i ou luma, ma se fetu taiala i ou luga.

E masani ona saunoa Peresitene Siaosi Alapati Samita e uiga i le tumau i le itu a le Alii. Oka se taua o lena mea.

E tele tausaga ua mavae sa ou faamatalaina ai se tala i se konafesi, ma ua ou manatu o le a ou toe faamatalaina atu. O se tala e uiga i se tagata e taalo peisipolo. Ou te iloa e i ai nisi o outou i vaega eseese o le lalolagi, e le tele se malamalama e uiga i le peisipolo. Tou te le ano lava foi i ai. Ae e tele se lesona e maua i lenei tala.

O lea mea sa tupu i le 1912. Sa faia le Su’ega Siamupini a le Lalolagi, ma o le taaloga mulimuli lenei e iloa ai le siamupini. O le sikoa e 2 Niu Ioka, sa talituaa, ae 1 le Au a Boston sa tata. Sa ta le tagata [o le Au a Boston] ma sa alu maualuga le polo. Sa taufetuli i ai tagata e toalua o le Au a Niu Ioka. Sa valaau atu Feleti Sinokalasi sa talituaa i le ogatotonu, o le a ia sapoina. Sa taunuu tonu lava i le alu ifo o le polo ma sa ia sapoina. Peitai, e le’i mau. Sa pau le polo i lalo. Sa feei le au maimoa. Sa le talitonu tagata e le i maua e Sinokalasi le polo. E fiaselau polo ova sa ia sapoina. Ae o lenei, i le taimi aupito sili ona taua, a ua le mafai ona ia sapoina le polo, ma sa i’u ina siamupini le au a Boston i le lalolagi.

Sa toe foi mai Sinokalasi i isi taaloga peisipolo mulimuli ane, ma sa matagofie lana taalo mo le isi iva tausaga. Sa atoa le 86 o tausaga na soifua ai, ma maliu ai i le 1974. Ae ina ua mavae le 62 tausaga, talu mai lena taimi e tasi na misi ai lana sapo, soo se taimi lava e faafeiloai atu ai o ia i se tagata, o le tali lava, “Oi, i, o oe lea na le sapoa le polo.”

O le mea e faanoanoa ai, tatou te vaaia lava tagata e le sapoina le polo, [e vaivai ma sese] i taimi uma. E i ai se teineitiiti a’oga ua manatu o loo lelei lava lona taumafai, ae oo i le taimi luluti o suega faaiu, ae le pasi. E i ai le avetaavale e ese le faautauta pe a ave le taavale. Ae, i si minute lava e tasi na faatamala ai, na aafia ai i se faalavelave matautia. E i ai le tagata faigaluega e faatuatuaina lava ma e ese le lelei. Ae, sa i ai se taimi, ua feagai ai ma se tofotofoga e le mafai ona ia teena. E manatua pea o ia i lena masei, lea e foliga e le mafai ona galo atoatoa.

E i ai le taimi e pa mai ai le ita, ma faatamaia i se taimi puupuu lava se faigauo mafana ua loa ona i ai. E i ai si agasala laitiiti e tuputupu ma iu ai lava ina aluese mai le Ekalesia.

E i ai se olaga sa ola tauagafau ai; ona oo mai ai lea o se taimi e tasi e lape ai le ola mama, ma faafatuulu ai pea lava le manatua e foliga mai e le galo.

O ia mea uma, ua le sapoina e se tagata le polo [ua sasi i se taimi taua]. Atonu e tele le talitonuina e le tagata o ia lava. Atonu e fai si ona faasausili ma faapea, “Ou te le tau popole fua e fai.” Ae oo ina ua aapa atu i le polo, ae pasi ifo lava i lima ma pau i lalo. E i ai le salamo, ioe. E i ai le faamagaloga, e moni. E i ai se manao e faagalo. Ae peitai, o le taimi na pau ai le polo, e le galo.

O lenei, outou na teine faapelepele ma lalelei e, ou te tautala atu ma le alofa faatamā i a te outou. Ou te faafetai atu i lo outou ola tausaafia e oo mai i lenei taimi. Ou te aioi atu ia te outou, ia aua lava nei tuua a outou taumafaiga, ae ia i ai se faamoemoega ma tumau ai, ma agai i luma ma ia lē faavaivaia e soo se tofotofoga po o se malosi leaga tou te fetaiai.

Ou te tatalo ia lē faamaimauina o outou olaga ae ia fua tele mai i mea silisili ma le faavavau. O le a mavae tausaga, ma o le a ou le iai iinei e vaai pe o a mea ua outou faia i o outou olaga. Ae o le a toatele isi, e matua toatele lava isi, o le a faamoemoe ia te outou, o ē o le a faamoemoe lo latou filemu ma le fiafia i mea tou te fai. Ma o luga atu o i latou uma na, o lo outou Tama i le Lagi, e alofa tele ia te oe o Lona afafine.

Ou te fia faamamafa atu, afai e te faia se mea sese, e mafai ona faamagalo, e mafai ona faatoilalo, e mafai ona faasa’o. E mafai ona e ola manuia ma fiafia. Ae ou te faamoemoe, o le a le oo mai ia te oe se na aafiaga faapena, ma ou te talitonu o le a le oo mai lava, pe afai e faatulaga lelei lou mafaufau ma tatalo mo le malosi e te savali ai i le ala tanu, atonu o nisi taimi e tuuatoatasi ai, ae e tau atu ai i le filemu ma le fiafia ma le olioli faalelagi i lenei olaga ma le olaga e faavavau.

Ou te tatalo atu ai i le suafa paia o Lē na foaiina mai Lona soifua, ina ia mafai ai ona tatou ola e faavavau, le Alii o Iesu Keriso, amene.