Faaipoipoga ma le Aiga: O Lo Tatou Tiutetauave Paia

Elder W. Douglas Shumway

O Le Au Fitugafulu

I se sosaiete e masani ona ‘alofia ai faaipoipoga, e ‘alofia ai foi tulaga faamātua, ma ta’uvalea ai aiga, o lo tatou tiute le faamamalu o a tatou faaipoipoga, faafailele a tatou fanau, ma faamalolosi o tatou aiga.

E le i umi ona ou faaipoipo, ae matou saofafa’i ma o’u uso i le ofisa o lo’u tama mo sa matou fonotaga faapisinisi. I le faaiuga o le matou fonotaga, a o matou tutu o le a taape, sa tu Papa ma faliu mai ia te i matou ma faapea mai, “Sole, tou te le o faia faalelei o outou taitoalua e pei ona tatau ai. E tatau ona tele atu le alofa ma le faaaloalo tou te faaali atu mo i latou.” Sa matua tuia lo’u loto i upu a lo’u tama.

O le taimi nei, ua tatou molimauina se osofaiga faifai pea o faaipoipoga ma le aiga. Ua foliga mai o taula’iga autu ia a le tiapolo mo le faamāmāsagiaina ma le faatafunaga. I se sosaiete e masani ona ‘alofia ai faaipoipoga, e ‘alofia ai foi tulaga faamātua, ma ta’uvalea ai aiga, o lo tatou tiute le faamamalu o a tatou faaipoipoga, faafailele a tatou fanau, ma faamalolosi o tatou aiga.

O le faamamaluina o le faaipoipoga, e manaomia ai ona tuuina atu e taitoalua le alofa, faaaloalo, ma le faamaoni o le tasi i le isi. Ua uma ona tuuina mai ia i tatou o le faatonuga paia ina “ia e alofa atu i lau ava ma lou loto atoa … ma pipii atu ia te ia ae le o se isi” (MFF 42:22).

Ua aoao mai e le perofeta o Malaki, “O Ieova, o ia ua fai ma molimau ia te oe ma lau ava sa e fai a o e taulealea, o lē ua e faa’ole’ole i ai: a o ia sa lua mafuta, o le ava foi o ia o lau feagaiga… . O lenei, ia faaeteete outou i o outou loto, ina ne’i faa’ole’ole se tasi i lana ava na fai a o taulealea” (Malaki 2:14–15). O le uma o o tatou ola i le ava na fai a o taulealea, tausia feagaiga, maua le poto, ma fefaasoaai le alofa i le taimi nei e oo i le faavavau atoa, o se faamanuiaga moni lava.

Ou te manatua ai le faamatalaga, “E i ai le alofa pe a e faatauaina le fiafia ma le saogalemu o le isi tagata e pei foi ona e faatauaina i lou lava fiafia ma lou saogalemu.” (Harry Stack Sullivan, MD, Conceptions of Modern Psychiatry, [1940] 42–43).

E tatau ona avea le faaipoipoga ma se sootaga alofa, mausali, ma paleni lelei i le va o se alii ma se tamaitai. A malamalama se tane ma se ava o le aiga e faauuina e le Atua, ma e mafai ona faatumulia le faaipoipoga i folafolaga ma faamanuiaga e oo atu i le faavavau, e seāseā lava ona i ai i se aiga o le Au Paia o Aso e Gata Ai se mafaufau i se tete’aga ma se tatalaga o se faaipoipoga. O le a iloa e ulugalii, o sauniga paia ma feagaiga e osia i le maota o le Alii, e mafai ai ona toe foi atu i le afioaga o le Atua.

Ua tuuina mai i matua le tiute paia e “tausi … ai [fanau] i apoapoaiga … a le Alii” (Efeso 6:4). “O le uluai poloaiga na tuuina e le Atua ia Atamu ma Eva, e faatatau i lo la agavaa mo tulaga faamatua, o se tane ma se ava” (O Le Aiga—O Se Folafolaga i le Lalolagi, Liahona, Oke. 1998, 24). O lona uiga, o lo tatou tiutetauave e le na o le lelei o o tatou taitoalua ae e oo foi i le tausiga lelei o a tatou fanau, aua “O le fanau, o le tofi lea mai ia Ieova” (Salamo 127:3). E mafai ona tatou faia le filifiliga e faafailele a tatou fanau e tusa ai, ma “aoao foi [i latou] ia tatalo, ma savavali tonu i luma o le Alii” (MFF 68:28). I le avea ai ma matua, e tatau ona tatou manatu i a tatou fanau o ni meaalofa mai le Atua, ma e tatau ona tatou tautino atu ia fai o tatou aiga ma nofoaga o le alofa, aoaoga, ma le faafailelega o o tatou atalii ma afafine.

Ua faamanatu mai e Peresitene Thomas S. Monson ia i tatou, “o le ofutalaloa o le taitaiga e le o se ofutalaloa e mafanafana ai, ae o le avega o tiute… . ‘E manaomia e le tupulaga talavou ni nai faitioga laiti, ae ia tele atu ni tagata [e mulimuli i ai].’ O le selau tausaga e amata atu i le aso, o le a le toe afaina pe o le a le ituaiga o taavale sa tatou aveina, pe o le a le ituaiga o fale sa tatou nonofo ai, pe fia ni a tatou tupe sa i ai i le faletupe, pe o a foi foliga o o tatou ofu sa fai, ae atonu o le a lelei teisi atu le lalolagi aua sa taua i tatou i le olaga o se tama po o se teine” (Pathways to Perfection [1973], 131).

E ui lava ina faavaivaia i tatou e le olaga i nisi o taimi, e le lava le onosai, pe leai foi se taimi mo a tatou fanau, e le tatau lava ona galo ia te i tatou le taua e faavavau o mea o loo i totonu o o tatou aiga—o o tatou atalii ma o tatou afafine. Po o a lava mea o tatou faia i le taimi nei, o se galuega faapisinisi, po o se taavale fou, o mea taua uma lava, ae peitai e laitiiti lava se taua pe a faatusatusa i le taua o le agaga o se talavou.

Sa saunoa John Gunther, o se tama na maliu lona atalii talavou i le kanesa o le faiai, ma ia uunaia ai i latou e i ai atalii ma afafine, “e opo mai i latou ma sina faaopoopoga o le fiafia ma se olioli tele” (Death Be Not Proud: A Memoir [1949], 259).

Sa ta’ua e Peresitene Harold B. Lee se tagata atamai maoae, o Horace Mann, sa “avea ma se failauga i le faapaiaga… . o se aoga mo tama. I lana lauga sa saunoa ai, ‘O lenei aoga ua faitau selau afe tala lona tau, ae afai e mafai e lenei aoga ona laveai se tamaitiiti se toatasi, ua matua alu aoga lava na tupe.’ Sa alu atu se tasi o uo a [Mr. Mann] ina ua maea le sauniga ma faapea atu, ‘Pei a ua fai si ova o lou naunau, a ea? Na e … fai mai afai e mafai e lenei aoga, e fia selau afe tala lona tau, ona laveai se tamaitiiti se toatasi, ua matua aoga lava na tupe? Ou te iloa e le o le uiga lena o lau tala.’

“Sa tilotilo atu Horace Mann ia te ia ma faapea atu, ‘Ioe, la’u uo e. O le matua aoga lava pe afai o lena tamaitiiti e toatasi o lo’u atalii; e matua aoga lava’” (“Today’s Young People,” Ensign, June 1971, 61).

O le alolofa, puipui, ma faafailele a tatou fanau, o nisi ia o mea e aupito sili ona paia ma faavavau o le a tatou faia. E mou atu mea o lenei lalolagi, o tifaga ma pese o loo numera tasi i le taimi nei o le a le toe aoga taeao, ae o se atalii po o se afafine, e faavavau ia.

“O le aiga o le totonugalemu lea o fuafuaga a Le Foafoa mo le taunuuga e faavavau o Lana fanau” (“O Le Aiga: O Se Folafolaga i le Lalolagi”). O le mea lea, e tatau i matua ma fanau ona galulue faatasi ma le lotogatasi e faamalosia sootaga faaleaiga, ma faafailele i aso taitasi.

E i ai so’u uso e faipaaga ma se iunivesite tele. Sa ia fai mai e i ai se tamaitiiti taalo maoae o le aoga, e tamoe oso i luga o laau faalava. E tauaso le taulealea. Sa fesili i ai Rex, “E te le pau?” “E tatau lava ona ou sa’o lelei,” sa tali ane ai le taulealea. “O taimi taitasi ae ou te le i oso, ou te fuaina ai. O le isi taimi ou te le’i fuaina ai, na toeitiiti a ou oti ai.” Ona faamatala lea e le taulealea o le anoanoai o itula e le mafaitaulia na faaaluina e lona tama i le tele o tausaga, e aoao ai ma fesoasoani e faasino ia te ia le ala e oso ai i luga o le laau faalava, seia oo ina avea o ia ma se tasi o tagata silisili.

E mafai faapefea ona toilalo lenei taulealea i se ‘au faapena?—O se tamā ma se atalii.

Alii ma tamaitai talavou e, e mafai ona avea outou ma se faatosinaga tele mo le lelei i o outou aiga, pe a outou fesoasoani e faataunuu faamoemoega taua o le aiga. E le mafai ona galo ia te au le afiafi faaleaiga, i tausaga ua mavae, sa tuu ai igoa uma o lo matou aiga i se pulou. O le igoa e te pikiina mai le pulou, o le a avea ma au “uo faalilolilo” mo le vaiaso. Mafaufau i le alofa na faatumulia ai lo’u loto ina ua ou manava mai i le fale i lena Aso Lua e salu le faletaavale sa ou fuafua e fai, ae ou sau ua mama lelei. Sa i ai se fasi pepa na tusi ai se faaupuga i le faitotoa o le faletaavale e faapea, “E faamoemoe sa manuia lou aso—o lau uo faalilolilo.” A o le po o le Aso Faraile, e afe ese atu le ie o lo’u moega, ae maua ai se sukalati, e sili ona ou fiafia i ai, o afifi i se pepa paepae ma se faaupuga o tusia ai: “Papa, ou te alofa tele ia te oe!—Faafetai, o lau uo faalilolilo.” Ae taualuga ina ua ou foi mai sa’u fonotaga i le po o le Aso Sa, sa ou tau mai i le laulau ‘ai ua teuteu faamatagofie, ma o loo tusia i le solo sa i tafatafa o la’u ipu ia upu, PAPA SILISILI’ i mataitusi matamatatetele ae puipui ai i autafa, “o lau uo faalilolilo.” Fai a outou afiafi faaleaiga, aua o iina e aoao ai le talalelei, e maua ai molimau, ma faamalosi ai le aiga.

E ui lava ina saili le fili e faataumaoi ia elemene autu e taua mo se faaipoipoga fiafia ma se aiga amiotonu, ae se’i ou faamautinoa atu lava ia te outou, o le talalelei a Iesu Keriso e maua ai meafaigaluega taua e tetee atu ai ma faatoilaloina le osofaiga i lenei taua. Maimau e, sei tau lava ina faamamaluina a tatou faaipoipoga e ala i le faaopoopo atu o lo tatou alofa ma le le manatu faapito i o tatou taitoalua; faafailele a tatou fanau i le faatauanau filemu ma le faiaoga sili ua tatou ta’ua o faataitaiga; ma faamalolosia le faaleagaga o o tatou aiga e ala i le faifai pea e le aunoa o afiafi faaleaiga; tatalo ma suesue i tusitusiga paia; ou te molimau atu ia te outou o le a taialaina i tatou e le Faaola soifua, o Iesu Keriso, ma ia to mai ia i tatou le manumalo i a tatou taumafaiga ia maua ai se iunite faaleaiga e faavavau.Ou te molimau atu ai, i le suafa o Iesu Keriso, amene.