O Le Tulaga Faatamā, o se Valaauga e Faavavau
Ina tatou usitai ia i siufofoga o perofeta, o e na lapata’ia i tatou mai lava i le amataga o taimi, e uiga i le taua o tamā i aiga.
A tatou vaavaai totoa i le lalolagi i ona po nei, ua matua iloa lelei lava le faigaluega ovataimi o Satani, e noanoatia agaga o tagata. O lona faamoemoega autu, o le iunite faavae o le lalolagi—o le aiga.
I nai tausaga ua mavae, sa faia ai e Satani se faatosinaga malosi, e ta’ufaatauvaaina ai ma faata’uvalea lenei iunite faavae ma le aupito taua o faalapotopotoga uma. Ua matua faateleina le iloa lelei o lona manumalo—ua vaaia ma lipotia mai ma faalogo foi i mea matautia i aso taitasi e faamaonia ai, ma e aofia ai ma le malepelepe o le tele o iunite faaleaiga. O le malepe o le aiga, ua tatou vaaia ai aafiaga matautia i lo tatou lalolagi—ua faateleina le solitulafono, o amioga e le talafeagai, o le mativa, faaaogaina sese o fualaau oona, ma o loo tuputupu pea lava pea le lisi.
E foliga mai ia te au, o le uaea tupito o le mea vaai a Satani, o loo taula’i tonu lava i tane ma tamā. Mo se faataitaiga, i ala o faasalalauga i aso nei, ua le toe malolo i a latou osofaiga—i le taufaifai ma le ta’ufaatauvaaina o tane ma tamā i o latou matafaioi mai le Atua.
O Faataitaiga mai Tusitusiga Paia
Atonu e aoga pe a avatu le faafeagai o le ata o tane ma tamā i ala o faasalalauga, ma tusitusiga paia. O iina o loo i ai ni faataitaiga sili se tele.
O Le Tama ma le Faaola. I le Feagaiga Fou tatou te maua ai se vaaiga i le sootaga o le Faaola ma le Tama. O se vaaiga aupito olaola, o le togalaau lea a o toeitiiti oo ina faalataina o Ia:
“Ua tootuli [Iesu] ua tatalo,
“Ua faapea atu, Lo’u Tama e, a e finagalo i ai, ia e aveese lenei ipu ia te au: a e aua le faia lo’u loto, a o lou finagalo.
“Ona faaali mai ai lea ia te Ia o le agelu mai le lagi, ua faamalosi ia te ia.”1
O Mose ma Ietero. O loo i ai le faataitaiga i le Esoto o Ietero, le tama o le ava a Mose, sa ia matauina le auala na pulea ai e ia le fanauga a Isaraelu:
“Ua iloa foi e le tama o le ava a Mose mea uma na ia faia i le nuu, ona fai mai ai lea o ia, Se a lava lenei mea o loo e faia i le nuu? O le a le mea ua e nofo toatasi ai, ae laulaututu mai le nuu uma i ou luma, e afua mai i le taeao, ua oo lava i le afiafi?
“Ua tali atu foi Mose i le tama o lana ava, Aua o le nuu e o mai i latou ia te au, latou te saili i le Atua: …
“Ona fai mai lea o le tama o le ava a Mose ia te ia, E le lelei le mea o loo e faia.
“O le a matua tigaina oe atoa ma lenei nuu ua ia te oe: aua e mafatia oe i lenei mea, e te le lavā ona fai toatasi.”2
Ona aoao lea e Ietero ia Mose i le auala e faamatuu atu ai lenei tiutetauave e ala i le tofia o ni alii lototetele e matatau i le Atua, ma tuuina atu latou te faamasino o ni taitai o Isaraelu:
“Ma ia latou faamasino atu i le nuu i aso uma lava; o mea tetele uma lava e au mai ia te oe, a o mea iti uma ia latou faamasinoina; ona faamama ai lea ia te oe, latou te fesoasoani foi ia te oe.”3
Alema. I le Tusi a Mamona o loo i ai le tala ia Alema, le atalii o Alema, lea sa faitauina faatasi ma le au fouvale sa faia uiga leaga uma. Sa tatalo le tama o Alema ma le faatuatua tele ina ia malamalama lona atalii i le upumoni—o se tatalo sa tali mai i se auala faapitoa:
“O lenei foi, ina o fealuai o ia e faaumatia le ekalesia a le Atua, … ua faaalia mai le agelu a le Atua ia te i latou; ua afio ifo o ia e peiseai ua i se ao; ma ua peiseai ua ia tautala ma le leo o le faititili … ;
“Ma ua faapea ona tele lo latou taufaiofo, ua pauu ai i latou i le eleele, ma ua le lagona upu na ia fetalai mai ai ia te i latou.
“E ui i lea, ua ia toe valaau, ua faapea mai: Alema e, ina tulai ia, maia tu mai, aua se a ea le mea ua e faasau ai i le ekalesia a le Atua? Aua o loo faapea ona fetalai mai le Atua: O la’u ekalesia lenei, o a’u foi e faatumauina ai; e leai foi se mea e manumalo i ai, sei iloga o le solitulafono a lo’u nuu.
“Ma lea foi, ua fetalai mai le agelu: Faauta, ua faafofogaina e le Atua talosaga a lona nuu, atoa foi ma talotaloga a lana auauna o Alema, o lou tama lea; aua ua tatalo o ia ma le faatuatua tele ona o oe, ina ia aumaia oe i le malamalama o le upu moni; o le mea lea na ou sau ai e famautinoa ia te oe le mana ma le pule a le Atua, ina ia talia talosaga a na auauna, e tusa ma lo latou faatuatua.”4
Ina ua toe malosi mai Alema mai lenei aafiaga, sa avea o ia o se tagata ua suia.
O Le Matafaioi ua Ta’uvalea a Tama
O Satani, i lana fuafuaga ua faia ma le faaeteete ina ia faatama’ia ai le aiga, ua ia saili e faaitiitia le matafaioi a tamā. O le faateleina o le fevaevaeai o le autalavou, o le solitulafono a le tupulaga, o le mativa tele ma le leai o se puipuiga o le tamaoaiga, ma le toilalo o le anoanoa’i o tamaiti i a tatou aoga, ua iloa ai le faamaoniga manino o le lē lava o se uunaiga lelei a tamā i aiga.5 E manaomia e se aiga se tamā e taula i ai.
Mai aafiaga o le tele o senituri, ua tatou iloa nei, o le aiga lava e maua ai le faavae mautu ma le malupuipuia mo nuu, ma e taua tele e saunia ai tupulaga talavou mo o latou tiute i le lumanai. Ua tatau foi ona tatou iloa, o isi ituaiga aiga ia ua faavae [o le itupa lava ia], e lē lelei, ma o le a lē lelei lava. Sa ta’ua manino mai lava lenei mea e le Au Peresitene Sili ma le Korama a Aposetolo e Toasefululua i le “O Le Aiga: O Se Folafolaga i le Lalolagi”:
“O i matou, o le Au Peresitene Sili ma le Aufono a le Au Aposetolo e Toasefululua O Le Ekalesia a Iesu Keriso o le Au Paia o Aso e Gata Ai, matou te tautino atu ma le faamaoni, o le faaipoipoga i le va o se alii ma se tamaitai, ua faauuina e le Atua, ma o le aiga o le totonugalemu lea o fuafuaga a le Foafoa, ma le taunuuga e faavavau o Lana fanau.
“O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine faaleagaga faapelepele a ni matua faalelagi ma, o lea ua tofu ai i latou taitoatasi ma se natura ma se taunuuga paia. O le tulaga tane po o le fafine [o le tagata], o se vaega taua lea o le muai olaga, olaga faitino, ma lona faamoemoe… .
“O le uluai poloaiga na tuuina e le Atua ia Atamu ma Eva, e faatatau i lo la agavaa mo tulaga faamatua, o se tane ma se ava. Matou te tautino atu o le poloaiga a le Atua i Lana fanau ia fanafanau ma uluuluola ai le lalolagi, ua faamalosia ma faatumauina. Matou te toe tautino atu foi ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma se ava, e tatau ona faaaogaina ai… .
“… I le fuafuaga paia, e tatau ona pulefaamalumalu tama i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o tatou aiga. O uluai matafaioi a tina, o le faafaileleina lea o a latou fanau. O nei matafaioi paia, e ao i tama ma tina ona fesoasoani le tasi i le isi o se paaga tutusa… .
“Matou te lapatai atu o tagata taitoatasi o e ua solia feagaiga o le ola mama, o e faasaunoa i taitoalua po o fanau, o e ua faatalale i le faataunuuina o tiutetauave faaleaiga, o le a i ai se aso tou te tutu atu ai e tali atu i luma o le Atua. E le gata i lea, matou te lapatai atu foi, o le faamalepeina o le aiga o le a aumaia ai i tagata taitoatasi, alaalafaga, ma malo, faafanoga ia na uluai tau mai e perofeta anamua ma aso nei.”6
O Matafaioi a le Tama
Ona ua matua faanatinati mai le lapataiga ia i tatou, e uiga i le lumanai o fanau a lo tatou Tama Faalelagi, e ao i tama ma tina ona vaili o latou loto, ina ia mautinoa ua latou mulimuli i le faatonuga a le Alii mo le fausiaina o aiga e faavavau. I le taula’i atu la i tama, o le a se mea o faamoemoe mai le Alii tatou te faia?
A uma ona faavae se aiga, o mea nei e aofia ai i matafaioi a le tama:
1. O le tama, o le ulu lea o lona aiga.
“O le tulaga faatama o se tulaga faaleta’ita’i, o le ituaiga taitaiga e aupito sili ona taua. O le mea lava lena sa i ai; ma o le a i ai pea lava. Tama, faatasi ai ma le fesoasoani ma fautuaga ma le faamalosiauga a lau soa e faavavau, e te pulefaamalumalu ai i le aiga. E le o se mataupu faapea pe o oe o se tagata e aupito sili ona agavaa, pe sili ona onomea ae o se mataupu o se tofiga e [paia].”7
O lau taitaiga i le aiga, e tatau ona aofia ai le taitai i tapuaiga faaleaiga.
“E te pulefaamalumalu i le laulau ‘ai, ma tatalo faaleaiga. E te pulefaamalumalu i afiafi faaleaiga; ma a o ta’ita’i oe e le Agaga o le Alii, ia e tagai ua aoaoina lau fanau i mataupu faavae sa’o. O lou tulaga e avatu ai faatonuga e faatatau i le ola uma faaleaiga.
E te tuuina atu faamanuiaga faatamā. O oe e te taulamua i le faavaeina o tulafono faaleaiga ma le aoaoina o amio. I le avea ai ma se taitai i lou aiga, ia fuafua lelei ma ositaulaga ina ia maua ai le faamanuiaga o se aiga lotogatasi ma le fiafia. O le faia o nei mea uma, e manaomia ai lou ola i se olaga e faatotonugalemu i le aiga.”8
E pei ona apoapoa’i mai Peresitene Iosefa F. Samita: “Uso e, ua matua laitiiti tele le faamaoni i lotu, alofa, ma le mata’u i le Atua, i le aiga; ua tele naua le faalelalolagi, manatu faapito, faasausili, ma le leai o se faaaloalo i le aiga, semanu e le vaaia tele i fafo atu. O lona uiga, o le aiga, o le mea lena e tatau ona toe fatufatua’i. Taumafai nei, ma taeao, e faia se suiga i lou aiga.”9
Manatua, uso e, i lau matafaioi o se taitai i totonu o le aiga, o lau ava, o lau soa lea. E pei ona aoao mai e Peresitene Gordon B. Hinckley: “I le Ekalesia lenei, e le savali le tamaloa i luma o lana ava po o tua foi o lana ava, ae [savali] i ona tafatafa. E tutusa lelei i la’ua.”10 Talu mai le amataga, sa aoao mai ai e le Atua le tagata, o le faaipoipoga e tatau ona tuu faatasia ai le tane ma le ava ia tasi.11O lea, e leai se peresitene po o se sui peresitene i se aiga. E galulue faatasi le ulugalii e faavavau mo le manuia o le aiga. E tuu faatasia i le upu, i galuega, ma faatinoga, a o la’ua taitai, ma faatonu lo la’ua iunite faaleaiga. O i la’ua o se paaga tutusa. La te fuafuaina faatasi ma faatulaga mataupu a le aiga ma le lotogatasi a o agai atu i luma.
2. O le tamā o se faiaoga.
E faatatau le apoapoaiga a Peresitene Iosefa F. Samita i ona po nei: “Aua le aveina a outou fanau i tagata tomai faapitoa … , ae aoao i latou i au lava mataupu ma faataitaiga, e ala i a oe lava faeasaite. Ia avea oe lava ia ma se tagata tomai faapitoa i le upumoni.”12
“A e iloaina le taua o lou faiaoga i lau fanau, ona e lotomaulalo ai lea, aua e te iloa ai, e mafai lea mea i lau mataupu ma le faataitaiga. E le mafai ona aoga lou faiaoga i se tasi, ae e te le ola i [au aoaoga]. E tatau ona e ola ma suesue ma tatalo, mo le mafutaga faifai pea a le Agaga Paia. E tatau ona faamama ma faatulaga lou olaga, ina ia susulu atu i au faataitaiga ma lau taitaiga, le malamalama o le talalelei a Iesu Keriso.
“E tatau ona fuafua lou aso, e pei ona taialaina ai e le Agaga o le Alii, ma saili ma le faamaoni lou lava soifua manuia ma le manuia o lou aiga, a o le’i faatauasoina oe mo nei tiutetauave muamua, ona o isi gaogaosa. E pei ona aoaoina i tatou e perofeta soifua, ‘E leai se isi faamanuiaga i le olaga e mafai ona suitulaga ai le toilalo i le aiga’ (David O. McKay, in Conference Report, Apr. 1964, 5; quoted from J. E. McCulloch, Home: The Savior of Civilization [1924], 42).”13
3. O le tamā o ia lea e saunia mea e manaomia mo le tausiga i la le tino.
Sa ta’ua manino e Peresitene Ezra Taft Benson lea mea: “Ua tuuina atu e le Alii i alii le tiutetauave e saunia mea e manaomia e o latou aiga, ina ia tuu ai lana ava e faataunuu lana matafaioi o se tina i le aiga… . O nisi taimi, e faigaluega ai le tina i fafo atu o le aiga, ona o le faamalosiau, po o le uunai malosi, e lana tane … [ona o] mea e mafai ona faatau i tupe faaopoopo e maua mai. Uso e, e le gata ina o le a pagatia le aiga i ia tulaga, ae o le a faavaivaia ai foi lou lava tuputupu ae ma lou alualu i luma faaleagaga.”14
Tama, i se poloaiga faalelagi, o outou e pulefaamalumalu i o outou iunite faaleaiga. O se tiutetauave taua tele, ma e aupito sili e te maua, aua o se tiutetauave e faavavau. E te tuuina lou aiga i le faamuamua e tatau i ai. O se vaega o lou olaga e tumau i luga atu o le tuugamau. Ou te molimau atu e moni le saunoaga lea:
“O le tulaga e tutu ai alii i le aiga, aemaise lava i latou e umia le Perisitua Mekisateko, o se tasi o tulaga muamua e taua, ma e tatau ona iloa lelei ma ia faatumauina i le faatulagaga ma le pule lea na faaee mai e le Atua i luga o le alii e faanofo ai i le ulu o lona aiga.
“… E leai se isi pule e maualuga atu, i mataupu e faatatau i le faalapotopotoga o le aiga, aemaise lava pe a pulefaamalumalu le tagata e umia le perisitua maualuga i lena faalapotopotoga, nai lo le tama… . O le faatulagaga faapeteriaka, e paia lona amataga ma o le a faaauau ai pea lava i le olaga nei ma le faavavau. O le ala lea, e i ai se mafuaaga faapitoa e tatau ai ona malamalama tane, ma fafine ma fanau i lenei faatulagaga, ma lenei pule i aiga o le nuu o le Atua, ma saili ia faia e pei ona faamoemoe i ai le Atua, o se faailoga ma se sauniuniga mo le faaeaga aupito maualuga o Lana fanau. I totonu o le aiga, o le pule e pulefaamalumalu ai, e tuu lava i le tamā, ma o mataupu uma lava i le fale ma le aiga, e leai se isi pule e i luga atu.”15
Ia, ua tele upusii ua ou faaaogaina ou te le’i mataulia. Ua ou faia ona o se mafuaaga. O le a faamanino atu i le lomiga o le Ensign ma le mekasini o le Liahona o Me. Ou te valaaulia outou ina ia suesue i ai ma toe faitau i nei savali o le konafesi. E ao ona tofu aiga uma ma nei mekasini matagofie. Ona mafai lea ona ola le agaga o lenei konafesi i le tausaga atoa i itulau o nei mekasini.
Ina tatou usitai ia i siufofoga o perofeta, o e na lapata’ia i tatou mai lava i le amataga o taimi, e uiga i le taua o tamā i aiga. Ina tatou naunau atoatoa ia e faataunuu o tatou tiute ma matafaioi ua tuuina mai e le Alii, o ni tama o Siona, o la’u tatalo lea ma le lotomaulalo, i le suafa o Iesu Keriso, amene.