Sauniuniga mo le Afio Mai Faalua

Elder Dallin H. Oaks

O Le Korama a Aposetolo e Toasefululua

E ao ina tatou faia sauniuniga … faaleagaga, mo mea ua valoia i le taimi o le Afio Mai Faalua.

I faaaliga i ona po nei, ua tatou maua ai le folafolaga afai tatou te saunia, e leai se mea tatou te popole ai (tagai MFF 38:30). Sa folasia mai ia te a’u lena mataupu faavae i le 60 tausaga talu ai, i le taumafanafana, ina ua ou auai i le Sikauti ma a’oa’o i le latou anavatau: “Ia sauniuni.” O le aso, ua uunaia au ina ia ou tautala atu i le taua o le sauniuni mo se mea e aupito sili ona taua o le a tupu i le lumanai—o le Afio Mai Faalua o le Alii.

Ua tumu tusitusiga paia i mau e faasino i le Afio Mai Faalua, o se taimi o loo faatalitali atu i ai ma le naunau le au amiotonu, ae e mata’utia ma faafitia e e amioleaga. Sa manatunatu le au faatuatua o le talafaasolopito, i le gasologa ma le uiga o le tele o mea sa valoia, e muamua ma mulimuli mai i lenei taimi aupito taua o le talafaasolopito.

E fa mataupu e matua mautinoa lava e le Au Paia o Aso e Gata Ai: (1) O le a toe foi mai le Faaola i le fogaeleele i le mana ma le mamalu tele, e nofo tupu ai i le Meleniuma o le amiotonu ma le filemu. (2) I le taimi o Lona afio mai, o le a i ai se faatafunaga o e amioleaga ma se toetutu o e amiotonu. (3) E leai se tasi na te iloa le taimi o Lona afio mai, peitai (4) ua aoaoina le au faatuatua ina ia suesue i faailoga [o le Afio Mai Faalua] ma sauniuni i ai. Ou te fia tautala e uiga i le lona fa o nei mea: o faailoga o le Afio Mai Faalua ma mea e tatau ona tatou faia e sauniuni ai mo le Afio Mai Faalua.

I.

Sa fetalai mai le Alii, “O le e mata’u ia te au mo le oo mai o le aso sili o le Alii, ma faailoga o le oo mai o le Atalii o le Tagata,” o faailoga o le a faaalia i le “lagi i luga, ma le lalolagi i lalo” (MFF 45:39–40).

Sa aoao mai e le Faaola lenei mea i le faataoto i le laau o le mati, o ona lala mu’amu’a fou o le faailoga lea o le oo mai o le taumafanafana. “E faapena foi,” ona vaaia e le nuu filifilia o le Atua ia faailoga o Lona afio mai “ona latou iloa ai lea ua latalata lava le ituaso” (Iosefa Samita—Mataio 1:38–39; tagai foi Mataio 24:32–33; MFF 45:37–38).

E tele faailoga o loo aumai i Tusitusiga Paia ma valoaga i ona po nei e uiga i le Afio Mai Faalua. E aofia ai:

1. O le atoaga o le talalelei ua toefuatai mai, ma folafola atu i le lalolagi uma, e avea ma molimau i atunuu uma;

2. O Keriso pepelo ma perofeta pepelo, latou te faasese i le toatele;

3. O taua ma tala o taua, e sii le taua e le tasi malo i le isi malo;

4. O mafuie i lea mea ma lea mea;

5. O oge ma faama’i;

6. E ufitia le laueleele i le faama’i e faaumatia;

7. E tupu tele le amioleaga;

8. E vavao le lalolagi atoa; ma

9. E loto vaivai tagata.

(Tagai Mataio 24:5–15; Iosefa Samita—Mataio 1:22, 28–32; MFF 45:26–33.)

I se tasi faaaliga sa fetalai mai ai le Alii, o nisi o faailoga o Lona siufofoga lea e valaau mai i Lona nuu ina ia salamo.

“Ina faalogo mai ia, outou atunuu e i le lalolagi, faalogo i afioga a le Atua o le na faia outou… .

“Po ua atufia ona ou valaau atu ia te outou i fofoga o a’u auauna ma i galuega a agelu, ma i lo’u lava leo, ma i le leo o faititili, ma i le leo o uila, ma i le leo o ta’uta’u, ma i le leo o mafui’e, ma uato’a tetele, ma i le leo o oge ma faama’i uiga eseese, … ma semanu e faaolaina outou i le faaolataga faavavau, a e na outou le mafafai!” (MFF 43:23, 25).

Ua siomia i tatou i nei faailoga o le Afio Mai Faalua, ma e foliga mai ua faateleina le saosaoa ma le malosi. Mo se faataitaiga, o faamaumauga o mafui’e i le The World Almanac and Book of Facts, 2004 o loo faaalia ai ua faaluaina le tele o mafui’e i le ta’isefulu tausaga o le 1980 ma le 1990, nai lo le luasefulu tausaga na muamua atu ai (i. 189–90). Ua faaalia ai le faateleina na’ua i nai uluai tausaga o lenei seneturi. E tali tutusa foi le faateleina o lologa tetele ma galulolo ma afa, o asiosio ma timu aisa, i le lalolagi atoa, i tausaga talu ai nei (i. 188–89). O tulaga faateleina pe a faatusatusa i le 50 tausaga ua mavae, e mafai ona le faaaogaina ona o suiga i auala ma mea e manatu e tatau ona lipotia, peitai, o le saosaoa o mala faanatura i le silia ma le sefulu tausaga talu ai, e mata’utia.

II.

O se tasi faailoga o taimi, o le faapotopotoina o le au faatuatua (tagai MFF 133:4). I le popofou o lenei augatupulaga mulimuli, sa aofia ai nuu eseese i le Iunaite Setete i le faapotopotoina o Siona: i Katelani, i Misuri, o Navu, ma tumutumu o mauga. O taimi uma lava, o potopotoga uma nei e fai i mea e fai ai malumalu. O le faatuina o siteki ma le fausiaina o malumalu i le tele o atunuu, ma le faitau aofai tele o le au faatuatua, o le poloaiga i le taimi nei, ia le potopoto i se nuu e tasi ae ia potopoto i siteki o o tatou lava laueleele. O iina o le a mafai ai ona olioli le au faatuatua i faamanuiaga atoatoa o le faavavau i se Maota o le Alii. O iina, i o latou lava laueleele, e mafai ai ona latou usiusitai i le poloaiga a le Alii e faalautele tuaoi o Lona nuu ma faamalolosia ona siteki (tagai MFF 101:21; 133:9, 14). O lena tulaga, o le a avea ai siteki o Siona ma “olo ma sulufa’iga mai le afa, ma le ita pe a liligi ifo e le faafefiloia i le lalolagi atoa” (MFF 115:6).

III.

E ui ina leai so tatou malosiaga e fetuunai ai le Afio Mai Faalua ma e le mafai ona iloa lona taimi tonu, ae e mafai ona tatou faateleina a tatou lava sauniuniga, ma taumafai e uuna’ia sauniuniga a i latou a o tatou tuaoi.

O se faataoto o loo i ai se aoaoga taua ma le faigata e uiga i lenei mataupu, o le faataoto i taupou e toasefulu. O le faataoto, na fetalai mai ai le Alii: “E faataunuuina foi i lea aso, ou te sau ai i lo’u mamalu le faataoto na ou fai atu ai e uiga i taupou e toasefulu” (MFF 45:56).

I le mataupu e 25 o le Mataio, o lenei faataoto o loo faatusatusa ai taupou valea e toalima ma taupou popoto e toalima. Sa valaaulia taupou uma e toasefulu i se tausamaaga o le faaipoipoga, ae na o le afa o i latou sa saunia a latou suauu i a latou lamepa ina ua sau le faatoafaiava. O le toalima sa saunia, sa ulufale atu i le tausamaaga, ona tapuni ai lea o le faitotoa. O le toalima sa leai ni a latou sauniuniga, sa tuai mai. Ua tapuni le faitotoa, ma sa le i faaulufaleina mai i latou e le Alii, ma sa ia faapea atu, “Ou te le iloa outou” (f. 12). “O lea ia outou mataala ai” sa faaiu atu ai le fetalaiga a le Faaola, “aua tou te le iloa le aso po o le ituaso e sau ai le Atalii o le tagata” (f. 13).

O le matua taufaamata’u lava o le savali o lenei faataoto. O taupou e toasefulu, e faasino i tagata o le ekalesia a Keriso, aua sa valaaulia uma lava i le tausamaaga o le faaipoipoga, ma sa iloa foi e tagata uma mea sa manaomia, ina ia mafai ai ona ulufale atu pe a sau le faatoafaiava. Ae sa na o le afa o i latou sa saunia ina ua sau o ia.

O loo i ai i faaaliga i ona po nei lenei aoaoga, lea na fetalai atu ai le Alii i uluai taitai o le Ekalesia:

“A uma foi la outou molimau ona oo mai ai lea o le toasa ma le inosia i tagata.

“Aua a uma foi la outou molimau, ona oo mai ai lea o le molimau a mafui’e, …

“Ma … molimau a leo o faititili, ma le leo o uila, ma le leo o ta’uta’u, ma le leo o peau o le sami ua siitia ma oo atu ai i tala atu o o latou tuaoi.

“O le a faanunununu foi mea uma; ma e moni lava, o le a meia loto o tagata; aua o le a oo le fefe i tagata uma.

“O le a felelei foi agelu i le taulotoaiga o le lagi, o loo alalaga atu ma le leo tele, ma ilia le pu a le Atua, ua faapea atu: Ia outou saunia, ia outou saunia, e oi le lalolagi; aua ua oo mai le faamasinoga a lo tatou Atua. Faauta, ma vaai ia, ua oo mai le Faatoafaiava, ina o atu ia outou ma faafetaia’i ia te ia (MFF 88:88–92).”

IV.

Uso e ma tuafafine, e pei ona aoao mai e le Tusi a Mamona, “o le aso o lenei olaga, o le aso lea e tatau ona fai ai e tagata a latou galuega” (Alema 34:32). Pe o tatou sauniuni ea?

I Lana tuleiga tomua i le tuufaatasiga o faaaliga o ona po nei na fetalai mai ai le Alii, “Ina sauni ia outou, sauni ia outou mo mea a oo mai, aua ua latalata mai le Alii” (MFF 1:12).

Sa lapata’i mai foi le Alii: “Ioe, ia oo atu le valaau i tagata uma: Ina ala mai ia ma tula’i ma o atu e faafetaia’i le Faatoafaiava; faauta ma vaai ia, o loo oo mai le Faatoafaiava; ina o atu ia outou e faafetaia’i ia te ia. Ia outou saunia mo le aso tele o le Alii” (MFF 133:10; tagai foi MFF 34:6).

O loo lapata’ia pea i tatou e le aunoa, e le mafai ona tatou iloa le aso po o le itula o Lona afio mai. I le mataupu e 24 o le Mataio sa aoao mai ai Iesu:

“O le mea lea ia outou mataala ai; aua tou te le iloa po o le fea itu aso e afio mai ai lo outou Alii.

“Ae ia outou iloa le mea lenei, ana iloa e le matai o le aiga le itu po e sau ai le gaoi, semanu na te mataala ma le tuua e ia lona fale ia gaoia”. (Mataio 24:42–43). “Ae nofo saunia” (Iosefa Samita—Mataio 1:47).

“O le mea lea, ia outou nofo sauni ai: aua o le itu aso tou te le manatunatu ai, e sau ai le Atalii o le tagata” (Mataio 24:42–44; tagai foi MFF 51:20).

E faapefea pe afai o taeao le aso e afio mai ai o Ia? Afai sa tatou iloa o taeao le aso tatou te faafetaia’i ai i le Alii—e ala i lo tatou oti faafuasei, po o Lona tu faafuase’i mai foi—o le a sa tatou mea e fai i le aso? O a ni mea o le a tatou ta’uta’u atu? O a ni mea o tatou faia o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le a tatou faia?

Afai o le a tatou faia na mea i lena taimi, aisea e le fai ai nei loa? Aisea e le sailia ai le filemu a o mafai ona maua? Afai ua lata ina uma a tatou lamepa o sauniuniga, ia tatou amata nei loa ona toe utu.

E ao ina tatou taufai faia sauniuniga faaletino ma le faaleagaga, mo mea ua valoia i le taimi o le Afio Mai Faalua. Ma o le sauniuniga lava e tau le amana’iaina, o lea e tau le iloa ma sili atu ona faigata—o le faaleagaga. E taua le pusa faaagaga mo le 72-itula o mea faaletino e sili ona taua mo luitau faalelalolagi, ae, pei lava ona aoaoina e taupou valelea i lo latou faanoanoa, e sili atu ai se pusa faaagaga faaleagaga mo le 24-itula, aua e tumau lona aoga.

V.

Ua tatou ola nei i aso na valoia “o le a aveeseina ai le filemu mai le lalolagi” (MFF 1:35), ina o le a “faanunununu foi mea uma” ma “o le a meia loto o tagata” (MFF 88:91). E tele mafuaaga o faanunununu faaletino, e aofia ai taua ma mala faanatura, ae o le pogai tele atu o le “faanunununu” o i ai nei, o le faaleagaga.

A tatou vaavaai i o tatou siosiomaga e ala i tioata faamatatetele o le faatuatua ma se vaaiga o le faavavau, ona tatou iloa ai lea ua siomia i tatou i se faataunuuga o le valoaga “o le a pulea e le tiapolo lona lava malo” (MFF 1:35). O loo faamatala mai i le tatou viiga “ua to’atele mai le fili, / Ua ‘au ai i mea sese” (“Faamoemoe o Isaraelu,” Viiga, Nu. 161, f. 2), ma ua sa’o lava.

O le amioleaga sa masani ona faasa ma ufiufi e pei o se ma’isua [tulou], a ua aloa’ia ma agiagia e pei o se fu’a. O faavae ma olo ma puipuiga o malo, ua masalomia pe osofa’ia foi. Ua lafoa’i e malo o latou tupuaga faalelotu. Ua faatuatuana’i tiutetauave o faaipoipoga ma aiga, fai mai ua fai ma faalavelave i le faamalieina o le loto. O tifaga ma mekasini ma televise e aafia ai o tatou uiga, ua tumu i tala ma ata e faaali mai ai fanau a le Atua ua pei o ni manu feai, po o le faaalia mai ai foi o tagata lelei ua pei o ni tagata faatauvaa o loo tulimata’i atu i nisi mea nai lo le fiafia patino. Ma ua toatele naua i tatou ua taliaina nei mea, [fai mai] o ni faafiafiaga.

O alii ma tamaitai sa faia ni osigataulaga tele e tau ai ma tetee i pulega leaga i aso ua mavae, sa faaaafia i tulaga tausaafia ua mou atu mai a tatou aoaoga. O le lelei, o le mea moni, ma le matagofie, ua suia i le le lelei, o le “po o le a lava” (whatever) ma le faamaualuga e leai se aoga. E le o se mea e ofo ai, o le toatele o o tatou tupulaga ma tagata matutua, ua aafia i tusi ma ata mataga, o le tatui o tino pei ni faapaupau, sailia ma le manatu faapito o mea e faamalie ai lona loto, o le le faamaoni, o ofu faatosina, o gagana faatufanua, ma feusuaiga mataga faatautala.

Ua toatele naua i latou e faafoeina manatu lautele ma a latou au, ua latou faafitia le Atua o Aperaamo, Isaako ma Iakopo, ma ua latou avatu le faaaloalo i atua o le lalolagi. E toatele i latou i tulaga o le pule ma aafiaga, ua latou faafitia le mea tonu ma le sese e pei ona faamanino mai i le poloaiga Faalelagi. E oo lava ia i latou ua fai mai ua talitonu i le tonu ma le sese, o i ai i “latou ua fai mai ua lelei le mea leaga ae leaga le mea lelei” (Isaia 5:20; 2 Nifae 15:20). E toatele foi i latou ua faafitia o latou tiutetauave patino ae ola faalagolago i isi, ma sailia e pei o taupou valelea, e ola i mea nono ma malamalama nono.

O mea inosia uma nei i le silafaga a lo tatou Tama Faalelagi, o le e alofa i Ana fanau uma, ma ua faasaina amioga uma e taofia ai le toe foi atu i Lona afioaga.

O le a le tulaga ua i ai la tatou sauniuniga patino mo le ola e faavavau? O le nuu o le Atua o tagata lava ia o le feagaiga. O lelei faapefea lo tatou ola e tusa ma [a tatou] feagaiga, e aofia ai folafolaga paia sa tatou osia i le vai o le papatisoga, i le mauaina o le Perisitua Paia, ma totonu o malumalu o le Atua? Pe o tatou ea o ni fai folafolaga e le o faataunuuina, ma ni tagata talitonu e le o ola ai i o tatou talitonuga?

Pe o tatou mulimuli ea i le poloaiga a le Alii “Ia outou tumau ai i mea paia ma aua le liliu ese, seia oo mai le aao o le Alii; aua faauta, e faataalise atu lava” (MFF 87:8). O a na “nofoaga paia?” E aofia ai le malumalu ma ona feagaiga e tausia ma le faamaoni. E aofia ai se aiga, o i ai fanau e faatauaina ma matua e faaaloalogia. O nofoaga paia e aofia ai o tatou valaauga na tofia ai e taitai o le perisitua, e aofia ai misiona ma valaauga e faataunuuina ma le faamaoni i paranesi, uarota, ma siteki.

Faapei ona aoao mai le Faaola i Lana valoaga o le Afio Mai Faalua, amuia “le auauna faamaoni ma le mafaufau” pe a sau lona Alii ma maua mai o ia o loo faapea ona fai (tagai Mataio 24:45–46). E faapei foi ona aoao mai le perofeta o Nifae e uiga i lena aso, “E le tatau ona fefefe e amiotonu” (1 Nifae 22:17; tagai foi 1 Nifae 14:14; MFF 133:44). Ua folafola mai foi i faaaliga i ona po nei “e i ai le mana o le Alii i luga o lana au paia” (MFF 1:36).

Ua siomia i tatou i luitau i soo se itu (tagai 2 Korinito 4:8–9). Peitai, o le faatuatua i le Atua, tatou te talitonuina ai faamanuiaga ua Ia folafola mai ia i latou e tausia Ana poloaiga. Ua i ai lo tatou faatuatua i le lumanai, ma o loo tatou sauniuni mo lena lumanai. A nono mai se atalilo mai le lalolagi masani o tauvaga afeleti, tatou te le iloa po o afea e uma ai lenei taaloga, tatou te le iloa foi ‘ai faai’u, ae tatou te iloa a oo ina uma le taaloga, e malo le tatou ‘au. O le a tatou savavali atu pea i luma “seia faataunuuina faamoemoega o le Atua, ona fetalai mai ai lea o Ieova Silisili, ua mae’a le galuega” (History of the Church, 4:540).

“O le mea lea,” ua fetalai mai le Faaola, “ia faamaoni ai, tatalo e le aunoa, ia teuteu ma faamu pea a [outou] lamepa, ma ia i ai ma suauu ia te [outou], ina ia saunia [outou] i le oo mai o le Faatoafaiava—Aua faauta, e moni, e moni, ou te fai atu ia te [outou], ou te vave sau” (MFF 33:17–18).

Ou te molimau atu ia Iesu Keriso, ou te molimau atu o le a toe afio mai o Ia, e pei ona sa Ia folafola mai, ma ou te tatalo o le a tatou sauniuni e faafetaia’i ia te Ia, i le suafa o Iesu Keriso, amene.