O Le Togiola: O Mea Uma mo Tagata Uma

Elder Bruce C. Hafen

O Le Au Fitugafulu

Afai e tuufaatasia mea uma a le Faaola ma mea uma tatou te mafaia, o le a le gata tatou te mauaina le faamagaloina o agasala—“o le a avea i tatou e faapei o ia.”

E le i leva ni tausaga, i le avea ai o i tatou ma tagata o le Au Paia o Aso e Gata Ai, sa tatou aoao atu, pepese, ma molimau soo atu e uiga i le Faaola o Iesu Keriso. Ua ou fiafia ona o loo faateleina lo tatou fiafia.

A o tatou “tautalatala [atili] ia Keriso,”¹ o le a faapea ona aveina a’e nai le pouliuli ia le atoatoaga o mataupu autu o le talalelei. Mo se faataitaiga, e le o mafai e nisi o a tatou uo ona iloa le sootaga o o tatou talitonuga i le Togiola ma o tatou talitonuga i le avea e faapei o lo tatou Tama Faalelagi. O isi o loo manatu sese e faapea o loo tatou agai atu i se malamalama i le va o le alofa tunoa ma galuega lea e taulai atu i ai talitonuga faaPorotesano. O ia manatu sese, ua uunaia ai au e talanoaina i le aso, le aoaoga faavae tulaga ese o le Toefuataiga, e uiga i le Togiola.

Na toefuatai mai e le Alii Lana talalelei e auala mai ia Iosefa Samita aua sa i ai le Liliuese. Talu mai le senituri sefululima, sa aoaoina e le faaKerisiano e faapea o le Pau o Atamu ma Eva o se sese matuia lea, ma ua taitaiina atu ai i le talitonuga e faapea o le tagata e leaga lava lona natura. O lena manatu e sese—e le gata i le Pau ma le natura o le tagata, ae sese foi i le faamoemoega tonu lava o le olaga.

O le Pau e le o se mea leaga. E le o se mea sese po o se mea na tupu faafuasei. O se vaega na fuafuaina o le ata o le faaolataga. O i tatou o “fanau”² agaga a le Atua, na auina mai i le lalolagi ma le “mama”³ mai le agasala a Atamu. Ae peitai, o le fuafuaga a lo tatou Tama tatou te oo atu ai i faaosoosoga ma le faanoanoa i lenei lalolagi Pau e avea ma taui ina ia malamalama ai i le olioli. Afai tatou te le oo i mea leaga, e le mafai ona tatou olioli i mea lelei.⁴ Tatou te moomia le aoaiina ma le faaleleia i le olaga nei e avea ma se “isi laasaga i [lo tatou] atinaeina” ina ia avea faapei o lo tatou Tama.⁵ Ae o le alualu i luma o lona uiga o le faateleina foi lena o tiga. O lona uiga foi o lo tatou aoao mai a tatou mea sese, i se faiga faifaipea ua mafaia lea e ala i le alofa tunoa o le Faaola, lea ua Ia tuuina mai e le gata i le taimi tatou te faia ai ma le “uma ona faia mea uma tatou te mafaia.”⁶

Sa aoaoina pea e le aunoa ia Atamu ma Eva mai le aafiaga tiga sa la oo i ai. Sa la iloaina le lagona e oo i se aiga faanoanoa. Mafaufau i faafitauli na tutupu i le va o Kaino ma Apelu. Ae peitai talu ai ona o le Togiola, la te mafaia ai ona aoao mai aafiaga na la oo i ai e aunoa ma le faasalaina ai. O le taulaga a Keriso e lei aveesea pe na suia ai mea na latou filifili e fai ma toe foi atu ai ia i laua i se tulaga mama e pei ona la iloaina i Etena. O se tala lena e leai se otootoga ma leai se alualu i luma o tagata o loo i ai. O Lana fuafuaga e fatufatua’i—o lea upu ma lea upu, o lea laasaga ma lea laasaga, o le alofa tunoa i le alofa tunoa.

Afai la o i ai ni faafitauli i lou olaga, aua e te manatu faapea o loo i ai se mea o loo sese ia te oe. O le tauivi ai ma na faafitauli o le faavae lea o le faamoemoega o le olaga. A o tatou faalatalata atu i le Atua, o le a Ia faaali mai ia i tatou o tatou vaivaiga, ma o na vaivaiga o le a tatou atamamai, ma malolosi ai.⁷ Afai o loo e iloaina le tele o ou vaivaiga, o le uiga o lena mea o loo e agaigai atu i le Atua, ae le o le mamao ese mai ai.

Na faamatalaina e se tasi tagata liliu mai i Ausetalia: “O lo’u olaga ua mavae [sa] o se togavao, sa tau leai ni fugalaau e fuga mai ai. [Peitai], ua leai nei ni vao, ma ua fuga mai fugalaau i le mea sa i ai vao.”⁸

E lua auala tatou te alualu ai i luma—o le aveeseina lea o vao leaga ae toto ai fugalaau lelei. O le alofa tunoa o le Faaola e faamanuiaina ai vaega uma e lua—pe afai e fai la tatou vaega. O le mea muamua ma ia faifai soo, e tatau ona tatou veleeseina vao o le agasala ma filifiliga leaga. E le lava le na ona moa o le vao. Ia matuai vele ese atoa ma aa, ia salamo atoatoa ina ia faamalieina ai tulaga manaomia o le alofa tunoa. Ae o le faamagaloina ua na o se vaega o lo tatou alualu i luma. Tatou te le o totogiina na o se aitalafu. O lo tatou faamoemoega ia avea ma ni tagata selesitila. A uma loa ona tatou faamamaina o tatou loto, e tatau loa ona tatou faaauau pea ona toto, vele, ma tausia faalelei ia fatu o uiga faalelagi. A o faapea ona tatou alualu i luma i le galulue malolosi ma le lotopulea ina ia ausia Ana meaalofa, “o le a fotu mai le olioli mai le lagi,”⁹ e pei o le faamoemoe ma le agamalu. E oo lava i le laau o le ola e mafai ona ola i totonu o i tatou, e fua mai ai fua lea e sili ona suamalie e faamamaina ai a tatou avega uma “e ala i le olioli mai lona Alo.”¹⁰ Ma afai e fuga tele mai le alofa mama i totonu o i tatou, o le a tatou alolofa i isi i le mana o le alofa o Keriso lava ia.¹¹

Tatou te moomia le alofa tunoa e le gata e faatoilalo ai vao o le agasala ae ia faatutupu ae ai ni fugalaau faalelagi. E le mafai ona tatou faia na o i tatou na mea uma. Ae o le alofa tunoa e le taugofie. E taugata tele, e anagata foi. E fia le tau o lenei alofa tunoa? Pe ua lava le na ona “talitonu ia Keriso?” O le tagata na ia maua le penina tautele na ia foaiina atu “mea uma sa ia te ia”¹² ina ia maua ai. Afai tatou te mananao i “mea uma o i [le] Tama,”¹³ ua finagalo mai le Atua i mea uma o ia i tatou. Ina ia agavaa mo se ‘oa uiga ese faapea, e soo se auala e mafai ona tatou agavaa ai mo sea ‘oa, e tatau ona tatou foai atu i le auala na foai mai ai Keriso—o mea uma lava sa ia te Ia: “Ma o le uiga ese o le tiga e te lei iloa, ioe, o le faigata ona onosai e te lei iloa.”¹⁴ Fai mai Paulo, “afai tatou te tiga faatasi ma ia” “o suli faatasi i tatou ma Keriso.¹⁵ O Lona finagalo atoa, ma o tatou loto atoatoa.

O le a se isi penina e mafai ona taugata faapena sona tau—mo Ia ma mo i tatou? O lenei lalolagi e le o lo tatou aiga lea. O lenei olaga e pei lava o lea tatou te o i se aoga, e taumafai ina ia atamamai i lesona o le “fuafuaga sili o le fiafia”¹⁶ ina ia mafai ona tatou toe foi atu i le aiga ma iloa le uiga o le i ai iina. Ua atulasi ona tau mai e le Alii ia i tatou le mafuaaga e taua ai ona tatou ositaulaga mo le fuafuaga—e faapea foi ia te Ia. Na taua e Eva, “o le olioli i le togiolaina.”¹⁷ Na taua e Iakopo, “o lena olioli ua saunia mo le au paia.”¹⁸ E pei ona moomia ai, o le fuafuaga e tumu i mea matuitui ma loimata, ia te Ia ma i tatou. Ae talu ai ona o loo galulue faatasi o Ia ma i tatou i lo tatou faaolataga, o lo tatou “aufaatasi” la ma Ia i le faatoilaloina o mea faafeagai uma o le a aumaia ai ia te ia lava le “olioli e le mafuatia.”¹⁹

O le Togiola a Keriso o loo i le totonugalemu o lenei fuafuaga. Ana le seanoa Lana taulaga taugata, semanu e leai se auala i le aiga, e leai se auala e faatasia ai, e leai se auala e avea ai faapei o Ia. Na Ia tuuina mai mea uma sa ia te Ia. O lea, “faauta i le tele o lona olioli,”²⁰ e tusa lava pe na o le toatasi o i tatou “na te maua”—pe a tatou tepa ese mai o tatou faanoanoaga ma tiga ae liliu atu i le Alo.

E na o le talalelei toefuataiina o loo i ai le atoatoaga o nei upumoni! Ae peitai o le tiapolo o loo galue i se tasi o taufaasese sili i le talafaasolopito atoa, e taumafai e faatauanau tagata e faapea o lenei Ekalesia e tau leai ni mea e iloa—ae o le mea moni e tele mea o loo iloa—e uiga i le auala o loo avea ai i tatou ma Kerisiano faamaoni ona o lo tatou sootaga ma Keriso.

Afai e tatau ona tatou tuuina atu mea uma ua ia i tatou, o la tatou foai la e “toeitiiti o mea uma” e le lava lea. Afai e toeitiiti lava tatou tausia ia poloaiga, e toeitiiti lava foi o tatou mauaina ia faamanuiaga. Mo se faataitaiga: Ua manatu nisi talavou e mafai ona latou taaalo i le palapala o le agasala seia oo ina taeele i le salamo, i le taimi o le a faatalanoa ai mo se misiona po o le malumalu. O nisi ua faia le agasala ma le iloa, ae ua manatu o le a lelei mea uma pe a salamo. Ua latou ulagia le meaalofa o le alofa tunoa lea e maua mai i le salamo faamaoni.

O nisi tagata e mananao e tuu le isi lima i le puipui o le malumalu, a o la e tagotago le isi lima i “mea eleelea”²¹ o le lalolagi. E tatau ona tuu uma o tatou lima i le malumalu, ma taofi mau ai i le olaga atoa. O le tago limatasi i ai, e le taitai ona lava.

Na toeitiiti lava tuu uma atu e le alii talavou mauoa ana mea uma. Ina ua tau atu e le Faaola ia te ia e tatau ona faatau uma atu ana mea, sa le na o se tala i le tuuina atu o meatotino ma le tamaoaiga.²² E mafai ona tatou maua le ola faavavau pe a tatou mananao i ai, ae seiloga lava e leai se isi mea tatou te toe mananao i ai.

O lea e tatau ai ona tatou tuuina atu mea uma ma le naunautai, aua e le mafai e le Atua lava ia ona atiina ae i tatou e aunoa ma lo tatou manao, ma aunoa foi ma lo tatou auai atoatoa. Ae peitai e tusa lava pe ua alu uma lo tatou malosi ma punaoa, tatou te le maua le mana e foafoaina ai le atoatoa, aua e na o le Atua e mafai ona faaatoaina ai. O a tatou mea “uma” lava e tumau pea lava le faapea “toeitiiti lava”—seiloga e faaatoaina mea “uma” e Ia o le e “faaatoatoaina lo tatou faatuatua.”²³ O le tulaga lea, o lo tatou le atoatoa, ae ua toeitiiti lava faapaiaina mea uma, ua lava lena.

Na ola ae la’u uo o Donna ma talitonu o le a faaipoipo o ia ma tausia se aiga toatele. Ae lei taunuu lena faamanuiaga. Nai lo lena, sa ia faaaluina tausaga o lona tagata matua e auauna atu ai i tagata o lana uarota i se alofa e le mafuatiaina, ma fautuaina ia fanau e i ai faafitauli tau le mafaufau i totonu o se aoga tele faaitumalo. Sa tau le mafai ona gaoioi o ia ona o le tiga o ona ponaivi faapea ma le tele o aso faanoanoa; ae peitai sa siitia pea lava o ia e ana uo ma lona aiga. Ina ua aoao atu e uiga i le miti a Liae, sa ia faapea lemu ane i se aga malie, “O le a ou tuuina au i lena ata i luga o le ala sao ma le vaapiapi, o loo pipii pea i le ai uamea, ae na ou matapogia i luga lava o le ala, ona ua ou le lava.” I se faamanuiaga musuia a o lei maliu o ia, sa faapea atu ai le faiaoga o aiga a Donna ua “talia” o ia e le Alii. Sa tagi Donna. Na te lei lagonaina lava e taliaina o ia, ona e le i faaipoipo. Peitai, na fetalai mai le Alii, o i latou o e “ua tausia a latou feagaiga i le taulaga … e talia i latou e au.”²⁴ E mafai ona ou vaai faalemafaufau ia te Ia o savali i luga o le ala mai le laau o le ola e siitia i luga ia Donna ma le fiafia ma ave o ia i le fale.

Mafaufau i isi tagata e pei o Donna, ua matuai faapaiaina lava o latou tagata, ma o le “toeitiiti” ia i latou, ua lava lea:

E toatele faifeautalai i Europa, o e le mafai ona taofi le faasoaina atu o o latou manatu ma lagona, e ui i ni feteenaiga faifai pea.

Mafaufau i paionia o taavaletosolima o e na faapea mai na latou iloa le Atua i le mea e gata mai ai lo latou mafai, ma le tau na latou totogia ina ia iloa ai o Ia, ma o se faamanuiaga le totogiina.

Mafaufau i se tama o le na faia mea uma na te mafaia, ae sa le mafai lava ona i ai se aafiaga i filifiliga a lona afafine; sa na o le pau le mea na ia mafaia o le faalatalata faamaualalo atu lea i le Alii, ma ole atu e pei o Alema mo lona atalii.

Mafaufau i se tina o le sa faamalosiau atu i lona toalua e ui i le tele o tausaga o lona lolo atu i le agasala, seia oo ina ua fotu mai ia fatu o le salamo i lona loto. Sa ia faapea mai, “sa ou taumafai ou te vaai ia te ia i le auala e silasila mai ai Keriso ia te au.”

Mafaufau i se tama na mafatia lona toalua mo le tele o tausaga i le le atoatoa o lagona; ae ia te ia lava ia o si o “matou tamai luitau”—e aunoa ma le faapea o “sona ma’i.” I le aotelega o le la faaipoipoga, sa pagatia o ia i ona mafatiaga,²⁵ e pei lava o Keriso i Lona malo e le i’u, sa ”puapuagatia i o tatou puapuaga.”²⁶

O tagata o loo ta’ua i le 3 Nifae 17 sa faasaoina mai le faatafunaga, masalosalo, ma le pouliuli i le na o le o atu lava i le malumalu ma Iesu. Ina ua mavae ona faalogologo atu ma le ofo ia te Ia mo le tele o itula, sa faasolo ina latou le mafafai ona malamalama ia te Ia. A o saunia o Ia e tuumuli ese atu, sa latou vaai atu ma loimata ia te Ia ma se naunautaiga ina ia nofo o Ia ma faamanuia o latou tagata mamai ma a latou fanau. Latou te lei malamalama foi ia te Ia, ae sa latou mananao ina ia saga faatasi pea ma Ia e sili atu nai lo se isi mea na mananao i ai. O lea na Ia nofo ai. Sa lava le latou “toeitiiti.”

O le “toeitiiti” e matuai fiu e lava pe afai e talitutusa a tatou osigataulaga i le taulaga a le Faaola, e ui i lo tatou le atoatoa. E le mafai ona tatou lagonaina moni le alofa mama—le alofa o Keriso mo isi—e aunoa ma le oo i ai i sina vaega o Lona puapuaga mo isi, aua o le alofa ma le puapuagatia o vaega e lua o se mea e tasi. Afai tatou te matuai puapuagatia lava i puapuaga o isi, e mafai ona tatou “faatasi i ona puapuaga”²⁷ ua lava lea e avea ai ma suli faatasi ma Ia.

Ia aua nei o tatou meia pe a tatou iloaina, e tusa po o le a le mea ua e iloaina, le taugata o se tau e tatau ona tatou totogiina ina ia maua ai i le faaiuga se meaalofa mai ia te Ia. Afai e tuufaatasia mea uma a le Faaola ma mea uma tatou te mafaia, o le a le gata tatou te mauaina le faamagaloina o agasala—“aua tatou te iloa atu ia te ia e pei lava o i ai nei o ia,” ma “o le a avea i tatou e faapei o ia.”²⁸ Ou te iloa o loo soifua o Ia. Ou te alofa ia te Ia. I le suafa o Iesu Keriso, amene.