A Matabete Vakaturaga

Peresitedi James E. Faust

iKarua ni Daunivakasala ena Mataveiliutaki Taumada

Ena gauna vata e kauta mai kina na veivakalougatataki cecere na taura tu na itutu ni matabete, e kauta vata talega mai vakakina e dua na itavi bibi.

Kemuni na taciqu lomani, e sa ka dokai ka itavi bibi tu ga e veigauna na vosa kivei ira na matabete ni Lotu. Oqo e vaka me dua na soqoni levu duadua ni matabete ena itukutuku makawa kei vuravura. Au gadreva meu vosa kivei kemuni na gonetagane me baleta na nomuni vakalougatataki ena nomuni taura tu na itutu ni Matabete i Eroni, ka kilai talega me “matabete e ra.” Ia na vosa e ra, na kena sala cava ga e sega ni na kauta laivi na kena bibi. E sega ni dua na ka lailai e tiko kina—vakabibi ena gauna au raica kina na kemuni lelevu eso vei kemuni na gonetagane!

Au kila ni o ni nanuma vinaka tiko na nomuni vakauqeti ena imatai ni gauna o ni veivotayaka kina na sakaramede. Me vaka ni o kemuni o ni taura tu na itutu ni Matabete i Eroni o ni veivuke ena kena vakarautaki, vakalougatataki, vakayacora ka veivotayaka na sakaramede, o ni vukei ira taucoko na lewenilotu era vakayagataka me ra soli ira tale vua na Turaga ka vakavouya na nodra vakabauta na nona solibula ni veisorovaki na iVakabula. O ira na lewenilotu era vakayagataka na sakaramede era vakananuma lesu tale me ra taura ena yaca ni Luvena, ka dau nanumi Koya, muria na ivunau sa solia vei ira o Koya, ka vakasaqara me tikoga kei ira na nona Yalotabu. Au sa nuitaka ni o ni na taleitaka na itutu ni matabete taura matua ka dau rokova na nomuni itavi vakamatabete.

Au a wilika ena dua na gauna walega oqo na itukutuku me baleti ira eso na dikoni era a sega soti sara ni kauwaitaka na nodra itovo ni veivotayaka na sakaramede. E tekivu me ra vakasamataka me dua na itavi wale tu ga, e dua na ka e sega tale ni dua e via cakava. Era dau yaco bera mai vakawasoma, kei na so na gauna era sega ni dau vakaisulu mai vakamatau. Ena dua na Sigatabu e a tukuna vei ira na nodra daunivakasala: “Dou kakua ni leqataka na sakaramede edaidai. E sa na qaravi ga.”

Era a kidacala vakaidina ni ra rogoca na ka oqo, ia me vaka ga na kena ivakarau, era a berata mai na soqoni ni sakaramede. Era sega soti sara ni kauwaitaka ena nodra curu mai loma ena kena lagati tiko na sere ni idola ni soqoni ka ra mai dabe sara vei ira na ivavakoso. Oqori sara ga na gauna era sa qai raica rawa kina se o cei soti era sa dabe tiko ena nodra idabedabe na dikoni—na nodra daunivakasala kei na matabete e cake ni tabanalevu, ka okati kina o ira na turaga era a vakaitavi vakabisopi kei na peresitedi ni iteki. Era a vakaisulu taucoko tu ena sutu buto vata kei na sote vulavula ka vakaneketai. Ia e sega ni o koya walega oqori, era vakaraitaka na nodra vakarokoroko ena nodra kauta na veitere ni sakaramede mai na dua na iyatu ki na dua tale. E sa dua na ka na kena titobu ka vakasakiti vakalevu cake sara na sakaramede ena siga o ya. O ira na dikoni oqori ka ra dau taura tu ga vakamamada na nodra ilesilesi era sa qai vulica mai na ivakaraitaki oqo ni veivotayaki ni sakaramede sa ikoya e dua na veivakadinati tabu cecere ka dokai.¹ Era sa qai tekivu me ra kidava ni matabete sa ikoya, me vaka e vakatoka o Pita na iApositolo, “a matabete Vakaturaga.”²

Vakararaba na Matabete i Eroni, ena ruku ni veidusimaki ni matabisopi, e tu kina na itavi me ra vakayacora ka veivotayaka na sakaramede. Ena neitou tabanalevu eke e Salt Lake City e lewe levu na lewenilotu yalodina, qase cake sara ia e lewe vica walega na yabaki ni Matabete i Eroni. Ena veiyabaki sa oti au dau vakadikevi ira tiko na matabete e cake kei ira na italatala qase oqo, era turaga yalodina ka ra vakayacora na veika cecere, yalomalua ka vakarokorokotaka na kena veivotayaki na sakaramede ni Vakayakavi ni Turaga. Ena dua na gauna na ilawalawa ni vakaitutu ni matabete oqo e okati kina e dua na vakaitutu cecere ni turaganilewa ni matanitu veiliutaki, e dua na mata vakaturi me baleta na itutu ni kovana ena itikotiko e Utah, kei na so tale na turaga kilai tani na nodra itutu. Ia era doka vakalevu ka laurai votu na nodra marautaka na vakayacori ni itavi tabu oqo ni matabete.

Na Matabete i Eroni sa ikoya e dua na isolisoli cecere ni kaukauwa vakayalo ka solia na Turaga vei Eroni kei ira na nona kawa.³ E taura tu “na lewa ni nodra mai veiqaravi na agilosi kei na vakatavulici ni itukutuku vinaka”⁴ ka okati talega kina “na ivakavuvuli ni veivutuni kei na papitaiso, na vakabokoci ni ivalavalaca.”⁵

Au gadreva meu kaya e dua na vosa me baleta na veiqaravi ni agilosi. Ena gauna makawa kei na gauna oqo era sa basika mai na agilosi ka ra soli ivakaro, ivakasala, kei na veidusimaki, ka yaga sara kivei ira na tamata era a sikovi. Eda sega ni vakasamataka vakavinaka na levu ni veika e tara na noda bula mai na veiqaravi ni agilosi. E kaya na parofita o Joseph F. Smith, “Me vaka ga na kena ivakarau vei ira na tamada kei na tinada, tacida tagane, tacida yalewa kei ira na noda itokani era sa takali yani mai na vuravura oqo, ena nodra a yalodina tu, ka kilikili kaya me ra marautaka na dodonu kei na gauna donu, e rawa me soli vei ira e dua na itavi me ra sikovi ira tale mai na wekadra kei na nodra itokani ena vuravura oqo, ka ra kauta tiko mai na itukutuku ni loloma Taukeni vakalou, na ivakasala, se ivunau kei na ivakaro, kivei ira era a vulica me ra loloma vakayago.”⁶ E vuqa vei keda eda vakila ni da sa sotava oti na veika oqo. Na nodra veiqaravi e sa yaco me dua na tiki bibi ni kosipeli. Era veiqaravi na agilosi kivei Josefa Simici ena nona tauyavutaka tale na kena taucoko na kosipeli.

O Alama na Gone e a sotava vakaikoya na veiqaravi ni agilosi. Me vaka e dua na tamata gone, ka sa wili vata kei ira sa tawa vakabauta ka “a sa vakacala e vuqa na tamata, ka ra sa vakayacora talega na veika ca sa kitaka ko koya.” Ena dua na siga,“e sa veilakoyaki voli me vakacacani ira na lewe ni lotu ni Kalou” e sa dau lako vata voli kei iratou na luvei Mosaia, e “sa rairai vei iratou e dua na agilosi ni Turaga; a sa lako sobu mai me vaka na o; a sa vaka na kurukuru na rorogo ni domona ka sa yavalata na vanua eratou tu kina.” E a qai tagi mai na agilosi, “I Alama, mo tucake mai; ko sa vakacacana na lotu ni Kalou ena vuku ni cava?”

Ena nona vorata o Alama na veika e sotava oqo e a matabuto ka qai kau kivei tamana. Baleta walega ni sa mai cava na lolo kei na masumasu nei tamana kei ira eso tale ena loma ni rua na siga e a qai vakalesui tale mai vei Alama na taucoko ni bula kei na kaukauwa. E a qai tucake ka kaya, “Au sa veivutunitaka na noqu ivalavala ca, ka sa vakabulai au na Turaga; raica au sa sucu vou ena Yalotabu.”⁷ E a qai toso tikoga o Alama me yaco me dua na daukaulotu cecere duadua ena iVola i Momani. Ia ena vuqa na yabaki taucoko ni nona veiqaravi vakadaukaulotu, e sega vakadua ni bau tukuna na nona veisiko mai na agilosi. Me kena isosomi, e digitaka me vakadinadinataka ni a vakatakilai vua na dina mai vei koya na Yalo Tabu ni Kalou.

Me da dusimaki mai vua na agilosi e sa dua na veivakalougatataki uasivi. Ia, me vaka e vakatavulica vei keda o Alama, na iotioti kei na icavacava ni veivosaki e a lako mai ena gauna e sa mai oti kina na nona “lolo ka masu ena vica na siga.”⁸ Na taucoko ni nona veivosaki e lako mai vua na Yalo Tabu, ka sa soli vakarawarawa tu kivei keda kece sara eda kilikili kaya.

Na veicakamana e yaco e dau sega soti ni dua na ivurevure ni saumaki ki na lotu. Me kena ivakaraitaki, ena gauna erau a cakava kina o Leimani kei Lemueli na ivakarau kaukauwa kivei tacidrau, e a basika mai e dua na agilosi ka vakasalataki rau me rau muduka. E a vakadeitaka talega na agilosi kivei iratou taucoko na veitacini ni na soli yani ko Lepani ki na ligadratou. Ena rai nei Nifai mai na dua tale na yasana, vakabauta ka taura mai kina na peleti parasa mai vei Lepani. O Leimani kei Lemueli, ena nodrau raica na ituvaki ena dua tale na yasana, erau sega ni vakabauta, ka sega tale ga ni rau veisautaka na nodrau itovo me dua na isoqoni ni nona veisiko mai na agilosi. Me vaka e a taleva lesu vei rau o Nifai, “Ko drau sa guilecava beka ni drau a raica e dua na agilosi ni Turaga?”⁹

Oi kemuni na gonetagane o ni sa tara cake tiko na nomuni ivakadinadina. Era na vakaukauwataki mai na veivakadeitaki vakayalo mai vua na Yalo Tabu ena veika eda sotava tu ga ena noda bula. Mai na so na ivakaraitaki cecere ka rawa me vakaukauwataka na nomuni ivakadinadina, ena sega beka ni yaco ena sala vata o ya.

Ena gauna vata e kauta mai kina na veivakalougatataki cecere na taura tu na itutu ni matabete, e kauta vata talega mai vakakina e dua na itavi bibi.

O ira taucoko era taura tu na itutu ni matabete e gadrevi me ra yalodina ki na nodra ilesilesi, cakava tiko ena yaca ni Turaga na nodra cakacaka kei na ilesilesi ena kena levu ga e rawa. Eda vakayacora na noda ilesilesi ena noda muria na veidusimaki ni noda kuoramu ni mataveiliutaki, na bisopi, kei na noda daunivakasala ni kuoramu. E kena ibalebale na vakarautaki, vakayacori, kei na veivotayaki ni sakaramede me vaka eda a kerei me da vakayacora vakakina. E kena ibalebale talega na kena vakayacori na itavi ni Matabete i Eroni, me vaka na kena samaki na noda veivale ni soqoni ni Lotu, tuvai ni idabedabe me baleta na koniferedi ni iteki kei na veisoqoni tale eso ni Lotu, kei na kena vakayacori na veitavi tale eso me vaka e lesi vei keda.
O ira era vakaitutu ena Matabete i Eroni, se Matabete vakavakarau tiko, sa nodra itavi me ra vakarautaki ira ki na matabete e cake ka ra ciqoma na veituberi me baleta na itavi cecere ni veiqaravi ena Lotu.
Na vakaitutu ni Matabete i Eroni sala vata tiko na itavi me da dua na ivakaraitaki vinaka, vata kei na savasava ni vakanananu kei na ivakarau rakorako. E gadrevi na veivakaraitaki oqo ena noda vakayacora tiko na noda itavi vakamatabete.
O ni na veimaliwai tiko ena nomuni kuoramu kei na veitavi qaravi tale eso vata kei ira na gonetagane ka tautauvata na nomuni ivakatagedegede. E rawa mo ni veivakaukauwataki vakaikemuni.
E rawa mo ni vulica na ivolanikalou ka vulica na ivakavuvuli ni kosipeli me vukei kemuni ena nomuni vakavakarau mo ni kaulotu.
E rawa mo ni vulica na masumasu ka vulica mo ni kila na isau ni nomuni masumasu.

Na Vunau kei na Veiyalayalati e vakamacalataka na veimataqali lewa ka salavata kei na Matabete i Eroni. Kena imatai, na veitabaki ki na matabete e solia na kaukauwa me vakayacora na veicakacaka tabu vakalotu kei na kena taukeni na kaukauwa ni Matabete i Eroni. Na matabisopi ni tabanalevu e veiliutaki ena Matabete i Eroni.¹⁰ Kena ikarua, ena loma ni matabete oqo e tu kina na duidui ilesilesi, ka dui tu na kedra itavi kei na gauna donu. Me vaka e dua na dikoni mo na qarauna na Lotu me vaka e dua na italatala qase.¹¹ Me vaka e dua na ivakavuvuli, me ikuri ni nomu qarauna na Lotu, sa nomu itavi mo “dau vakaraici ira na lewenilotu ka vakauqeti ira tikoga.”¹² Me vaka e dua na bete sa nomu itavi mo “vunau, veivakavulici, veituberi, veivakaroti ka veipapitaisotaki, sa nomu itavi talega mo lotutaka na madrai kei na waini, ka dau sikova na nodra vuvale na lewenilotu.”¹³ Na nomu bisopi, o koya e taura tu na itutu ni bete e cake, sa ikoya e peresitedi talega ni kuoramu ni bete ka dusimaka na cakacaka ni kuoramu.

Me vaka na nomu sa toro cake tiko mai na dua vei ira na ilesilesi oqo ni Matabete i Eroni ki na kena ka tarava, o na taukena tikoga na kaukauwa ni kena e a taumada. Me kena ivakaraitaki, oi kemuni ko ni sa bete e se tu vei kemuni na kaukauwa mo ni vakayacora na veika kece sara o ni dau cakava ena nomuni a se dikoni ka ivakavuvuli. E ka dina sara, ni gauna mada ga o sa tabaki oti kina ki na Matabete i Melikiseteki, o na maroroya ka vakayacora tikoga na ilesilesi ni Matabete i Eroni. O Elder LeGrand Richards ka sa yali yani, e a lewe tu ni Kuoramu ni Le Tinikarua me vica vata na yabaki, e kila vakavinaka sara tu ga na ivakavuvuli oqo. E vakawasoma na nona dau kaya, “O au e dua ga na dikoni qase.”

Me vaka ga au sa tukuna oti, na veivakavulici e sa dua na itavi bibi ni Matabete i Eroni. Na gauna donu me baleti kemuni na itabagone mo ni veivakavulici e dau lako mai vakavuqa ena gauna o ni veiqaravi kina me vaka e dua na itokani ni dauveisiko vata kei na turaga tamamu se vata kei na so tale era taura tu na itutu ni Matabete i Melikiseteki. Ena kena qaravi tiko na veika e gadrevi ena dua na kena gaunisala vakayago ka vakayalo sa ikoya e dua na tikina vakasakiti duadua ni kena qarauni na Lotu.

Na Parofita o Josefa Simici e vakaliuca taumada ga na veituberi ki na vuvale. O Baraca Oakley e a kenadau ni veituberi ki na vuvale nei Parofita, e na veigauna e dau lako kina o Baraca Oakley me laki veituberi ki na vuvale nei Simici, “na Parofita e dau kacivi ira taucoko mai na nona matavuvale qai solia na nona idabedabe kivei Oakley, kaya tiko ki na nona matavuvale” me ratou vakarorogo vakavinaka kivei Baraca Oakley.¹⁴

Oi kemuni na gonetagane ena Matabete i Eroni o ni gadreva me tiko vata kei kemuni na Yalotabu ena nomuni dui bula vakayadua ka vakakina ena veituberi ni vuvale, vakavakarau se veivotayaki ni sakaramede, se so tale na itavi qaravi ni matabete. Ena gadrevi mo ni levea eso na veika e dau veivakatarabetaki. E dua na ka levu duadua vei ira oqo sa ikoya na vesuki vakayago.

Au vakasalataki kemuni kece sara na taciqu mo ni levea na veimataqali veivesuki vakayago. Ena gauna sara ga oqo o Setani kei ira na nona ilawalawa era vakabobulataki ira eso na noda tamata gone digitaki mai na veivesuki vakayago ni yaqona ni vavalagi, na veimataqali waigaga ni veivakamatenitaki, iyaloyalo vakasisila, tavako, veimau ilavo, kei na so tale na ivalavala ni veivakasaurarataki. Eso na tamata e kena irairai ni ra a sucu vata sara ga mai kei na malumalumu oqo ka dua walega na kena ivakaraitaki e rawa me yaco kina na veivesuki vakayago ka sega ni tarovi rawa. Eso na veivesuki vakayago era veisautaka sara ga na vakasama ni dua na tamata ka bulia e dua na gagadre me lewa taucoko na vakanananu kei na vakatulewa. Na veivesuki vakayago vakaoqo e vakarusa walega na nodra bula o ira era sega ni vorata rawa ia e vakakina o ira tale na nodra itubutubu, watidra, kei ira na gone. Me vaka e a vakayatuyatutaka na parofita o Jeremaia, “Sa ra sega ni vakadinata ko ira na tui ni veivanua, kei ira kece na kai vuravura, ni ra na curu ki na matamata ni koro.”¹⁵

Ena Nona vuku na Turaga e vakasalataki keda kina me da levea kece sara na veika ka sega ni vinaka vei keda. Eda sa vakasalataki me da kakua ni gunuva na imatai ni yagona ni vavalagi, kania na imatai ni tavako, se tovolea na imatai ni waigaga ni veivakamatenitaki. Na malele ni yalo kei na veiuqeti ni icaba era vakavuna na nanumi koya vakaikoya ka yaco me da cokoti ena veika era veivesuki vakayago. E dodonu me da muduka ka vakasamataka na ka taucoko ena yaco kina, e sega ni vei keda walega kei na noda veigauna sa tu ki liu, ia kivei ira talega na noda daulomani. Na kedra isau ena vakayago, ia era sa bolea talega na yali ni Yalotabu ka vakavuna na noda vakasasataki tu ga mai vei Setani.

Au vakadinadinataka na veivakasavasavataki, vakayalo, veivakacegui, veivakaukauwataki, kei na tarovi ni veivakayarayarataki ka sa vakayacora ki na noqu bula na matabete. Au sa bula tu ga ena ruku ni kena veivakayarayarataki vakayalo ena noqu bula taucoko—ena loma ni vale nei tukaqu, ena loma ni vale nei tamaqu, kei na noqu loma ni vale vakataki au. E sa veivakayalomalumalumutaki sara ga na kena vakayagataki na kaukauwa kei na lewa ni matabete me vakaukauwataki ira eso me ra veivakabulai ka veivakalougatataki. Me da bula kilikili ena noda taura tu na kaukauwa ni matabete me da cakacakataka ena yaca ni Kalou, sa noqu masu ena yaca i Jisu Karisito, emeni.