Sa Tu vei Kemuni na Dodonu Vakakawa Vakamarama

Julie B. Beck

iMatai ni Daunivakasala ena Mataveiliutaki Raraba ni Goneyalewa

Sa rawa mo ni vulica e vuqa tale na ka me baleta na nomuni bula kei na nomuni ilesilesi e vuravura oqo ena nomuni vakavakarau ki na nomuni ciqoma ka vulica na nomuni veivakalougatataki vakapeteriaki.

Ena loma ni yabaki sa oti au sa raica na rarama ni Kalou ni sa serau mai matamuni na goneyalewa ena vuqa sara na gauna. Au raica rawa ena veisoqoni lelevu tekivu mai Brazil ki na Dominican Republic. Au a raica rawa ena gauna ko ni dreta tiko kina na qiqi ena veisalatu vakapainia. Au raica rawa na nomuni rarama niu lagasere ka qito vata kei kemuni ena gauna ni keba. Au a raica rawa na rarama oqo ni a cila mai ena matadra na goneyalewa ena tobu ni papitaiso ena veivaletabu mai Mexico ka yaco ki Utah. Sa veisautaki au vakalevu kei ira tale eso na nomuni rarama oqo. Sa tu vei kemuni na rarama baleta ni sai kemuni na luvena vakayalo dina na Kalou, “nodra kawa na itubutubu bula vakalou”¹ ena dua na ituvaki lagilagi kei na ivotavota tawamudu.² Ko ni a tuberi taumada mai na vuravura ni yalo mai vei rau na nomuni itubutubu.³ Ko ni sa vakau mai ki vuravura oqo mo ni mai “vakadeitaki” kemuni.⁴

Sa gauna donu oqo ena nomuni bula mo ni vakayacora eso na vakatulewa bibi. Baleta ni o ni sa rui vakasosataki ena veitukutuku vakatanitaki me baleti kemuni, sa gadrevi kina mo ni dusimaki vakalevu cake tale. Sa rawa mo ni vulica e vuqa tale na ka me baleta na nomuni bula kei na nomuni ilesilesi ena vuravura oqo ena nomuni vakavakarau ki na nomuni ciqoma ka vulica na nomuni veivakalougatataki vakapeteriaki.

E sega ni ko ni sa rui gone ena nomuni tekivu vulica na veika e baleta na nomuni veivakalougataki vakapeteriaki.⁵ Au marau niu a ciqoma na noqu veivakalougatataki ni bera niu mai vakataotaki vakalevu ena veitukutuku veilecayaki ka vakatanitaki ena vuravura oqo. Au a drotani mai na veika o ya ena veivakadeitaki veivakacegui ni sa lomani au ka kilai au na Turaga, o koya gona mai na gauna o ya ka lako mai, au sa tekivu meu dau vakasamataka vakalevu na veika e tawamudu ka sega ni veika meu rogo kina.

Sa kena gauna oqo vei ira na goneyalewa me ra vakavakarau me ra ciqoma na nodra veivakalougatataki vakapeteriaki. Sa rawa ni vukei kemuni o bisopi kei ira na nomuni itubutubu ena nomuni vukei ena kena lewai na gauna donu me baleta tiko ni duidui na yabaki kei na vakavakarau ni tamata yadua.⁶ Ni ko ni sa kila vakavinaka na ibalebale kei na inaki ni veivakalougatataki vakapeteriaki ka gadreva sara mo cakava na cakacaka ni Turaga, mo ni sa na qai matua vinaka toka mo ni ciqoma na nomuni veivakalougatataki.⁷ Ena so na gauna eso na tamata era na vakabalavutaka vakalailai na nodra wawa ni bera ni ra ciqoma na nodra veivakalougatataki, ka ra nanuma ni dodonu me ra kilikili kaya ena dua na ivakarau ni bera ni ra ciqoma. Kevaka o sa kilikili mo na ciqoma e dua na ivolatara mo vakayacora kina na papitaiso ena valetabu, ko sa na qai kilikili kaya mo ciqoma e dua na veivakalougatataki vakapeteriaki. Sa ka bibi sara mo ni vakavakarau ki na nomuni veivakalougatataki ena lolo kei na masumasu mo ni yalomalumalumu kina ka vakavulici rawarawa. Na nomuni vakavakarau yadudua sa ka bibi sara.

Ni ko sa ciqoma na nomu veivakalougatataki, ko na ilova rawa na veika tawamudu. Ko na tekivu mo raitayaloyalotaka rawa na veika sa tu mai liu me baleti iko baleta na nomu veivakalougatataki ena sema tiko ki na kemu inaki tawamudu kei na nomu ilakolako. O peteriaki ka na solia vei iko na nomu veivakalougatataki ena sega tu ni kila na nomu veivakalougatataki me yacova sara ni sa qai solia vei iko. Ena vakararavi vua na Yalotabu me na tukuna vua na veika me na kaya. Ena nomu veivakalougatataki, ena tukuni kina vei iko na nomu kawa ena vuvale vaka Isireli. Na kemu isema vakakawa e dau vakatokai me yavusa. Na yavusa taucoko sara era sema kece vua na peteriaki cecere o Eparaama. E ka bibi na kemu isema. Sa kena ibalebale ni ko sa okati tale tikoga ki na yalayala a soli vei Eparaama ka ni o koya ga era na vakalougatataki kina na veimatanitu taucoko e vuravura.⁸

Na kemu isema “sa dua na veiwekani vakadra.”⁹ Ko sa okati sara ga kina mo “luvedra na parofita”¹⁰ ena dodonu vakakawa e vakamarama. O ya na vuna eda sa dau tukuna tiko kina ni sai kemuni na “itabagone vakamarama dodonu vakakawa”¹¹ ka lewe ni “tabatamata digitaki” vakatui.¹²

E a kaya e dua na noqu itokani: “Ena gauna au a lewena kina na Lotu niu se yabaki 16, au a tekivu meu vulica na kequ itukutuku. Au a ciqoma na noqu veivakalougatataki vakapeteriaki ka a tukuni vei au niu kawa ni vuvale vaka Isireli. Ena gauna o ya, au a sega tu ni kila na kena ibalebale, ia ni toso tiko na gauna au sa qai vulica kina ni sa qai dua na madigi cecere niu nodra kawa na parofita. Sa mai noqu e dua na iyau talei kei na dua na gauna vinaka duadua.”

Me vakataki Eparaama, ko ni vakasaqara na veivakalougatataki mo ni rawa ni vakavukui sara kina vakalevu ka vakasalataki mai vua na Turaga.¹³ Ni ko ni sa ciqoma na nomuni veivakalougatataki ko ni na qai kila kina ni kila tiko na Turaga na dui yacamuni. Ni a se qai tauyavu walega na Lotu, e vuqa sara na tamata era a lako yani vei Josefa Simici ka kerea vua me taroga vua na Turaga ena veika vakatabakidua me ra dusimaki kina ena nodra bula. Eso vei ira na ivakatakila oqori era sa okati tu ena Vunau kei na Veiyalayalati. Me vakataki ira ga na Yalododonu ena gauna makawa, sa rawa mo okata na nomu veivakalougatataki vakapeteriaki me sa “nomu ivolanikalou vakaiko.”¹⁴ E dodonu mo okata me ka tabu ka kakua ni wasei yani ki tautuba ni nomu matavuvale.¹⁵

Sa rawa me raivotutaka o peteriaki na torocake kei na ituvaki ni nomu bula ka sa rawa me solia e dua na veivakalougatataki e baleta na veika oqori. Me vaka a kaya vei au e dua na goneyalewa, “E a vuqa na ka a tukuni me baleti au ena noqu veivakalougatataki ka rau a sega mada ga ni kila oi rau na noqu itubutubu.” E a kaya o Peresitedi James E. Faust ni veivakalougatataki vakapeteriaki vakayadua era “ivakatakila ceguvi yadudua mai vua na Kalou.” Era sa “kalokalo yadua me da muria, … a ikelekele ni yaloda.” Era sa vakatakila na noda rawata rawa na ka kei na noda rawa ka lalawataki.¹⁶

E kaya o Peresitedi Boyd K. Packer ni noda veivakalougatataki “sai koya e dua na parakaravu mai na [noda] ivola ni rawa ka.”¹⁷ E vakatoka o Peresitedi Thomas S. Monson ni noda veivakalougatataki sa “dua na Liaona ni rarama.”¹⁸

Niu a se vuli torocake tiko, e a raica na macala ni noqu veitarogi e dua na daunivakasala ka kaya ni nanuma niu na sega ni rawata na noqu vuli torocake o ya. Ia niu mai vulica vakavinaka yani ena yalomasumasu na noqu veivakalougatataki vakapeteriaki, au sa nanuma kina meu kakua ni biuta na noqu inakinaki ni gauna balavu o ya. O koya gona, baleta niu sa raica rawa na ituvatuva ni Turaga baleti au, au sa vakabauta dina kina niu na rawa ni toso ki liu ena nuidei. Au qai raica e muri ni vinaka sara na ituvatuva o ya, kau a qai rawata kina e dua na dipuloma ni univesiti. Ni da mai kila se o cei oi keda kei na ka me da vakayacora, sa rawarawa sara kina me da vakayacora na veivakatulewa bibi me baleta na vuli, cakacaka, kei na vakamau. Sa ka rawarawa sara me da vakacaudreva na noda cina ena loma ni noda matavuvale, kivei ira na itokani, kei na veivanua tale eso.

E kaya na iVakabula: “Au sa kaya vakaidina vei kemudou: Au sa lesi kemudou mo dou nodra rarama na tamata oqo. Na koro sa tara toka ena dela ni ulunivanua, sa sega ni tabonaki rawa.

“Raica, sa tutuvaki li na cina ka qai biu toka e ruku ni tutu ni sila? E segai; ena biu ga ena kena itutu me cinavi ira kece sa tiko e vale; “

Ia me caudre vakakina na nomudou rarama e matadra na tamata oqo, me ra raica na nomudou ivalavala vinaka ka vakarokorokotaka na Tamamudou sa tiko mai lomalagi.”¹⁹

Ni ko ni sa kilai kemuni rawa kei na veika mo ni cakava ena nomuni bula, ko ni na sega ni vinakata mo ni vunitaka na nomuni rarama.

Me vaka beka, na nomuni na sega ni vinakata mo ni “vunia na kemuni rarama” ena nomuni na daramaka na isulusulu ena vakacacana na kemuni irogorogo. O ni na sega ni taurivaka na veivosa tawa kilikili se italanoa se vakacacana na yagomuni ena samuqawe kei na cakacaka tale eso ka na rawa ni vakatorosobutaki kemuni na goneyalewa sucu vakatui. O ni na sega ni vakalolovirataka na nomuni dodonu vakakawa ena nomuni na gunuva e dua na ka veivakamavoataki se veivakatogatogani. Ka sa sega talega ni rawa mo ni sarava se vakayacora e dua na itovo e vakasisila ka vakatorosobutaka na kemuni ituvaki vakamarama. Ko ni na vakasaqara ga na veika sa “vinaka, totoka, se rogo vinaka ka dokai”²⁰ baleta ni o ni sa kila ni sa nomuni tu na iyau vakamarama.

Sai kemuni na gone talei ni yalayala. Kevaka mo ni na muria na ivakaro kei na vunau ni Turaga ka vakarorogo ki na Nona vosa, sa yalataka tu o Koya me na laveti kemuni mo ni cecere vei ira na matanitu kecega mo ni rogo ka vakarokorokotaki ka vakavinavinakataki.²¹ E dodonu me vakauqeti kemuni na nomuni veivakalougatataki vakapeteriaki mo ni veisautaka na nomuni bula ni gadrevi vakakina. E umani tu kina na veiyalayala ka na rawa mo ni ciqoma ke o ni yalodina tiko. Kevaka o ni sega ni yalodina tiko, sa na sega ni rawa mo ni navuca me yaco na nomuni veivakalougataki.

Ena so na gauna era dau nanuma na goneyalewa ni baleta ga ni ra a sa caka cala, era sa sega kina ni kilikili me ra ciqoma e dua na veivakalougataki vakapeteriaki se era sa vakasivoi ira mai na veivakalougatataki e a soli taumada vei ira. Mo ni nauma tiko ni yavu ni ivakavuvuli ni Turaga o Jisu Karisito o ya mo ni vakabauti Koya kei na Nona kaukauwa ni sa sorovaka na noda ivalavala ca. “E vinakata o Setani mo ni nanuma ni sega ni rawa ni o ni veivutuni, ia o ya e sega ni dina!”²² Ena noda vakayagataka na sakaramede ena veimacawa, eda sa yalataka kina me da veisautaka na noda bula me vinaka sara. E dodonu me da kakavaki tikoga me da tamata vou me vakataka sara na noda iVakabula, o Jisu Karisito. E vakatoka o Paula na ka oqo me da “sai valavala vakatalega kina ena bula vou.”²³ Kevaka o ni sa cala bibi ka sa rawa mo ni vakasivoi kemuni mai na nomuni itutu dodonu vakakawa, mo ni yalorawarawa ka kauta na nomuni rarawa vua na nomuni bisopi. Sa nomuni itokani o koya ena cakacaka ni veivutuni oqo ka sa tabaki oti o koya me daunilewa ena vuravura oqo ena vuku i Karisito, ka sai Koya na Daunilewa Tawamudu. Na veivutuni sa vaka e dua na ibokoboko kaukauwa, sa rawa me qusia laivi na iqi kaukauwa! E sega ni ka rawarawa, ia e rawa.²⁴ E kaya vakaoqo na Turaga: “Raica ko koya sa veivutunitaka na nona ivalavala ca, ena vosoti; ia koi au na Turaga au na sega ni nanuma tale na nona ivalavala ca”²⁵

Kemuni na goneyalewa, ena vukei kemuni na nomuni veivakalougatataki vakapeteriaki mo ni kila ni ko ni sa dodonu vakakawa. Ni ko ni sa na qase cake tiko mai ko ni na qai raica ni sa yaco tiko ena nomuni bula na veiparofisai ena nomuni veivakalougatataki. Sa tu vua na Turaga na veika bibi ka veivakurabuitaki mo ni na vakayacora. Oqo na gauna mo “dou tucake ka rarama mai; io me cila yani na [nomuni] rarama me ivakaraitaki vei ira na veimatanitu.”²⁶ “Ia me caudre vakakina na nomudou rarama e matadra na tamata oqo, me ra raica na nomudou ivalavala vinaka ka vakarokorokotaka na Tamamudou sa tiko mai lomalagi.”²⁷ Ena yaca i Jisu Karisito, emeni.