Na iSolisoli ni Digidigi
Ni gauna eda talairawarawa kina ki na ivakaro nei Tamada Vakalomalagi, ena tubu na noda vakabauta, eda na tubu ena yalomatua kei na kaukauwa vakayalo ka rawarawa kina vei keda me da digidigi dodonu.
Ena dua na gauna sa oti, au a draiva tiko, kau kele sara ni sa cina damudamu. E toboka sara na mataqu na motoka e tiko e liu vei au. E kabi toka kina e dua na sitika ka vaka koto oqo: “Au vakayacora na ka ga au vinakata.”
Au vakananuma sara se cava mada e digitaka kina e dua na malanivosa vakaoqo me tabaki ena nona motoka. Na vakasama cava e via kaburaka tiko? E rairai via vakaraitaka raraba tiko na itaukei ni motoka oqo ni sa rawata na taucoko ni galala ena nona vakayacora ga na ka e vinakata. Ena noqu vakananuma toka na ka oqo au liaca rawa ni sa na via dua toka na vuravura kabuwacara oqo, kevaka me na vakayacora tu yani e dua ga na ka e vinakata.
E matata sara ni vaka me so toka na veilecayaki ena noda veitikotiko ena vuku ni ulutaga oqo. Eda raica kina ni vakasama kilai levu vei ira na dauvolaitukutuku, veivakamarautaki kei na veivanua tale eso, sa ikoya ni sa rawa vua e dua me rekitaka na galala ka marau kina ena gauna sa rawa kina vua me vakayacora ga na ka e vinakata. E vakatura tiko oqo ni ka ga e gadrevi ena noda digidigi, sa ikoya na ka me na vakamarautaki keda, na ka e lasa, se ka ga e salavata na noda dui gagadre yadudua vakaikeda.
E solia vei keda o Tamada Vakalomalagi e dua na kena vakasama e vinaka cake. Sa ikoya o ya na Nona ituvatuva ni marau cecere, ka solia vei keda na galala kei na marau. Eda wilika ena Vola i Momani: “Ia ena yaco vakaidina na gauna ena lako mai kina na Mesaia me vakabulai ira na luve ni tamata mai na nodra lutu. Ia ni ra sa vakabulai mai na nodra lutu era sa sereki kina ka tawamudu ka kila na ka vinaka mai na ka ca era na lewa na ka me ra kitaka ka sega ni vakasaurarataki vei ira; ia era na lewai ga ena vunau ena siga mai muri me vaka na nona ivakaro na Kalou.
“A ra sa sereki na tamata kecega ena bula vakayago, ka sa soli vei ira na ka kecega sa yaga vua na tamata. Era sa sereki me ra digitaka na galala kei na bula tawamudu ena vuku ikoya na Dauveisorovaki ni tamata kecega, se me ra digitaka na tiko vakabobula kei na mate me vaka na nona veivakabobulataki kei na nona kaukauwa na tevoro; raica sa segata ko koya me ra rarawa na tamata kecega me vakataki koya.”1
Ena noda a lako mai ki na vuravura oqo, eda a kauta vata tiko mai kei keda mai na noda itikotiko vakalomalagi na isolisoli kei na gauna vinaka mai vua na Kalou oqo ka da vakatoka me noda galala. E dua na lawa tawamudu na galala. E a kaya vakaoqo o Peresitedi Brigham Young ena nona vakatavuvulitaka na galala ni: “Oqo e dua na lawa ka a tu sara mai na taucoko ni tawamudu, ka na tomani tiko ena taucoko ni tawamudu se bera mai. Sa dodonu me tu vua na veika bula vuku kece na kaukauwa ni digidigi.”2
Na nona vakadidike o Peresitedi Wilford Woodruff me baleta na ulutaga vata ga oqo: “Na galala oqo sa dau iyau ni tamata ena ruku ni veiliutaki kei na matanitu ni Kalou. E a nona ena lomalagi ni veilomalagi ni se bera na vuravura, ka taura matua ka sabaya mai na veivakasaurarataki nei Lusefa kei ira na nona mai kea na Turaga. Mai na vinaka ni galala oqo sa rawa kina vei iko kei au ka vakakina na kawatamata kece me da na tarogi, tarogi me baleta na sala eda muria, na bula eda bulataka, kei na cakacaka eda vakayacora.”3
Ena gauna e vakavulica kina vei Eparaama na Turaga na veika me baleta na tawamudu ni yalo ka vakakina ni a sa digitaki tu mai ni se bera ni sucu, e a vakamacalataka talega kina vei Eparaama e dua na vuna bibi na nona lako mai ki na vuravura oqo, ena nona a kaya: “Io me da vakatovolei ira mada kina, era na muria na veika kece sa vakarota vei ira na Turaga na nodra Kalou se sega.”4
Sa na rawa gona kina me dua na gauna ni veivakatovolei ni noda bula e vuravura na noda galala. Kevaka me a sega ni noda na isolisoli talei oqo ni galala, ke a sega ni rawa kina me da vakaraitaka vua na Tamada mai Lomalagi na noda rawa ni vakayacora na veika kece e vakarota vei keda.
Me rawa vei keda me da vakayagataka na noda galala, sa dodonu me da kila na vinaka kei na ca, sa dodonu me noda na galala ni digidigi, ni oti na noda vakayacora na noda digidigi, sa dodonu me salamuria mai na kena isau.
Au vulica rawa ni gauna eda talairawarawa kina ki na ivakaro nei Tamada Vakalomalagi, ena tubu na noda vakabauta, eda na tubu ena yalomatua kei na kaukauwa vakayalo ka rawarawa kina vei keda me da digidigi dodonu.
E a vakaraitaka e dua na ivakaraitaki e taucoko me da muria na noda dauniivakaraitaki cecere, na Turaga o Jisu Karisito ena sala me da vakayagataka kina na noda galala. Mai na Matabose kei Lomalagi ka a vakaraitaki kina vei keda na nona ituvatuva na Tamada, ni na rawa me noda na gauna vinaka me da mai bula kina ena vuravura oqo ka vakayago, e a kaya vei Tamana na Luvena Daulomani, o koya na Daulomani ka Digitaki nei Tamana mai na ivakatekivu: “I Tamaqu me yaco ga na lomamuni, ka me nomuni tikoga na vakarokoroko ka sega ni mudu.”5
Sa vakakina, na noda vakayacora na noda digidigi ena noda vakayagataka na ka e gadrevi me vakaoqo: Sa dodonu me noda ibole: Au na vakayacora na ka e vinakata vei au na Tamada, mai na noda tukuna, au vakayacora ga na ka au vinakata.
Kevaka eda na vakayacora na ka oqo, sa rawa me da nuidei ni na noda na veivakalougatataki ni Turaga. Ena dodonu me da vakayacora eso na digidigi oqo ena so na gauna e dredre kina. Ia au sa mai vulica rawa ni dina ga ni na via dredre toka vei keda ena so na gauna, ia kevaka eda na vakayacora ga na digidigi dodonu, ena vakalougatataki keda na Tugara ena Nona sala ga vakataki koya se sega sara tu ga ni kilai vei keda na gauna o ya.
Ena gauna keitou toki mai kina mai na Tabana ni Kaulotu e Hamburg, Jamani, ki na tuicake kei Jamani, me keitou veiliutaki ena tabana ni kaulotu e Dresden, e a sega sara ga ni ganiti iratou na noqu matavuvale na kena gauna. Eratou se qai veikilai vinaka sara ga mai ena nodratou koronivuli vou e Hamburg ia, oqo e sa dodonu me ratou laki vakamatautaki iratou tale ki na ivakarau ni veimaliwai vakavuli e natuicake kei Jamani. E dua mada ga vei iratou na gone e sa na sega ni rawa vua me sala vata mai kei keitou baleta ni gadrevi me na vakacavara na nona vuli mai na Ra. Ia keitou a vulica rawa mai na ka e yaco oqo ni veika ena vaka me dredre vei keitou na kena itekitekivu, e dau qai yaco me ka ni veivakalougatataki levu vei keitou taucoko sara. Sa tu ga na nona sala vakataki koya na Turaga me dau sotava kina na noda veibolebole
Kemuni na taciqu kei na ganequ lomani, sa dua na ka na noqu vakavinavinakataka na isolisoli talei ni digidigi, ka sa solia tu vei keda na Tamada Vakalomalagi. Au marautaka niu kila ni da Luvena. Au kila vakai au mai na veika au sa sotava ni lomani keda o Koya ka kauwaitaki keda. Au kila ni Karisito o Jisu, na Luve ni Kalou, na noda iVakabula ka Dauveivueti. Au kila ni a raici rau na Tamana kei na Luvena na parofita o Josefa Simici ka sa parofita talega ni Veivakalesui mai. Au kila ni sa parofita ni Kalou nikua o Peresitedi Gordon B. Hinckley.
Au vakadinadinataka na veika oqo ena yaca i Jisu Karisito, emeni.