Na Veivutuni, e dua na Veivakalougatataki ni Lewenilotu
Na Veivutuni … e sega ni ivakavuvuli dredre… . E dauloloma ka yalovinaka.
Kemuni na taciqu lomani, au vakavinavinaka ka vakarokoroko niu sa mai qarava tiko na ilesilesi oqo. Ko ni na kila vinaka, niu sega vakadua ni bau tadra ni na torovi au mai na itavi oqo. Ena noqu a tokoni ena dua na yabaki sa oti, e a vakamatatataka o Peresitedi Hinckley ki na lewenilotu kece sara ni a sega ni vakatura na veivosakitaki ni noqu mai kacivi. Au qai tukuna vua e muri ni o au duadua beka ga na Vakaitutu Raraba ena ivolatukutuku ni Lotu meu tokoni mai vei ira na lewenilotu dina ga niu a mai lecavi mai vua na parofita!
Sega ni dua na ka o ya, au sa vakavinavinaka ga ena nomuni veitokoni, kau sa yalataka ena yaloqu taucoko kei na noqu kaukauwa kecega kei na noqu igu ki na cakacaka levu oqo. Sa vuabale na noqu vakavinavinaka vei iratou na noqu matavuvale, vua na watiqu kei iratou na luvei keirau, vakakina vei rau na noqu itubutubu. E a leqa o tinaqu ena rua na yabaki sa oti, ni oti toka ga e rua na siga mai na koniferedi ni Epereli. O tinaqu e bulicaki lailai toka ga, ia au dau tokoni koya voli tu ga ena veisiga. Na nona dau veivakavulici ena tiko voli ga kei au. Au na sega ni vakacaucautaki koya rawa vakavinaka ena vosa, ia ena rawa walega ena noqu ivakarau ni bula.
Au sega ni kila na ka meu kaya baleti tamaqu ka na sega ni vakamadualaki koya, ia, vakavo walega niu lomani koya, kau tokoni koya. Ena noqu sa bolea meu tukuna sara mada, au na tukuna ga ena gauna vata au wanonova toka kina na nona sa qase tiko mai, e lesu tale na noqu vakasama ki na gauna keitou se gone lalai kina, ena nona dau dadavo tu kei keitou ena fuloa ka veibo, ka qito vata kei keitou, ka keveti keitou ka mokoti keitou ka qai dau vakanikaniorataki keitou, se dau tauri keitou cake ki na idavodavo me keitou davo vata kei koya kei Tinai keitou ni keitou dau tauvimate se rere ena lomaloma ni bogi. Na noqu vakanananu me baleti koya ena dau ka tu ga ni mamarau kei na yalololoma; na yalodei kei na ivakadinadina, na cakacaka kaukauwa ka tabusoro, na vakabauta kei na yalodina. E duatani sara ga ka yalomatua ka vakasakiti, kau sa kalougata sara ga ni sega walega niu tokoni koya me noqu parofita ena bula oqo, ia baleta niu na vakatokai koya talega me tamaqu ena bula oqo ka vakakina ena gauna taucoko me tawamudu.
Ena vica na macawa sa oti e a vakayavalati na yaloqu ena nona a kerei o Elder Douglas L. Callister mai na Le Vitusagavulu, me solia e dua na itukutuku lekaleka sara kei tukana o LeGrand Richards ena dua na soqoni ni kuoramu. E dua vei ira na ka bibi e a tukuna e vakaoqo: Na gauna e a bisopi kina ni se tamata gone sara o Elder Richards, e a dau laki sikovi ira era luluqa tu ena lotu. E a yalodoudou ena nona sureti ira me ra mai vosa ena soqoni ni sakaramede ena ulutaga, “A cava na kena ibalebale vei au na noqu sa mai lewena na Lotu i Jisu Karisito ni Yalododonu Edaidai.” Totoka sara na nodra vakadonuya mai e lewe vica vei ira ka a vakavuna talega me ra mai tudei tale ena Lotu.
Ena yakavi nikua, au gadreva meu na vosa mada ena ulutaga o ya. Au na gadrevi kemuni na itabagone kei na uabula mo ni na vakalewena ena dua na ivolalailai ena ulutaga oqo. Vola ena imatai ni draunipepa e cake na vosa, “Na cava na kena ibalebale vei au na noqu sa mai lewena na Lotu i Jisu Karisito ni Yalododonu Edaidai.” Mo ni qai vola vakalekaleka na veika era basika mai na nomuni vakasama. Ni toso na gauna, ena so tale na vakasama ena basika, ka sa na rawa ni volai talega ena nomuni lisi. Vakalailai ga ko ni sa na rawata e dua na ivola ena vakasinaiti kemuni ena vakavinavinaka kei na vakamuduo ni ko ni sa mai lewena tiko na Lotu ni Turaga. Ena rawa sara ga ni vukei kemuni ena nomuni vakarautaka e dua na ivurevure ni ulutaga ko ni na rawa ni kerei ena dua na gauna mai liu mo ni na vosa kina.
Na noqu lisi sa balavu sara, kau sa digitaka kina e duabulu ga na vakasama meu wasea ena yakavi nikua. Meu sa na maroroya na kena vo me baleta e dua tale na vanua kei na kena gauna.
Au na vosa vakalekaleka ena ivakavuvuli ni veivutuni. Au vakavinavinaka ena vuku ni ka eda kila me baleta na ivakavuvuli ni veivutuni. E sega ni ivakavuvuli dredre, me vaka au a dau nanuma ena gauna au se gonetagane kina. E dauloloma ka yalovinaka. Na kena ibalebale ena vosa vaka-Iperiu na, “mo vuki”1 se mo lesu tale vua na Kalou. E a kerei ira na Isireli o Jiova, “Dou lesu mai … kau na qai sega ni vakatauca na noqu cudru vei kemudou, niu sa yalololoma, kau na sega ni vakadedetaka tikoga na noqu cudru me sega ni mudu. Me vakatusa ga na nomu caka cala, ko sa talaidredre kina vei Jiova na nomu Kalou.”2
Ni da sa vakadinadinataka na noda cala, ka vakatusa ka kauta laivi, “ka lesu vua na Kalou,” ena vosoti keda o Koya.
Na gauna au a peresitedi tu kina ni kaulotu ena dua na gauna lekaleka sa oti, erau qai kerei au e rua na cauravou daukaulotu meu laki sota mada kei na dua na nodrau dauvakadidike ka na papitaiso tiko ena siga ka tarava. E tiko vua eso na taro ka rau sega ni rawa ni sauma. Keitou a vodo yani ki na nona vale ka laki sota sara kei na dua na marama yabaki 20 vakacaca ka sa mate na watina kei na dua na luvena. E a mate o watina ena dua na vakacalaka levu ena vica na yabaki yani ki liu. Na nona taro e vakavure vakasama ka sa tu vakarau o koya me vakarorogo. Ni sa mai matata na veika o ya, au sa qai taroga se dua tale na ka e via vakaraitaka. E kaya ni vakakina, ka gadreva kevaka ke rawa ni vosa taudua ga vei au. Au sa qai kerei rau na daukaulotu me rau laki wawa toka mai tuba ka me rawa ni rau raici keirau tu mai vakavinaka ena dua na katubaleka levu. Na gauna ga e sogo kina na katuba sa tekivu tagi. E vakananuma lesu na nona veiyabaki ka dau tu duadua voli ga kina, sinai ena mosi ni yalo kei na galili. E a levu sara na veicala lelevu a vakayacora ena veiyabaki oqori. E a kaya ni kila tu na veika dodonu, ia a sega ni tu vua na kaukauwa me digia na sala dodonu me yacova na nona mai sotavi rau na noda daukaulotu. Ena loma ni veimacawa erau a vakavulici koya tiko kina, e a vakamamasu vua na Turaga me vosoti koya. E a gadreva meu vakadeitaka vua ni nona sa veivutuni oqo kei na nona sa ciqoma na cakacaka tabu vakalotu ni papitaiso kei na ciqomi ni isolisoli ni Yalo Tabu, sa na vakasavasavataki kina ka sa na bula dodonu me rawa ni lewena na Lotu. Au vakavulici koya mai na ivolanikalou, ka cavuta na noqu ivakadinadina me baleta na ivakavuvuli ni veivutuni kei na Veisorovaki.
Keirau a lako kei watiqu ki na nona papitaiso kei luvena goneyalewa lailai ena siga ka tarava. E e sinai na rumu mai vei ira na nona itokani ena tabanalevu ka ra sa vakarau tu me ra tokoni koya ena nona sa mai lewena oqo na Lotu. Ni keirau biuta mai na soqoni o ya, au sa vakasinaiti sara ga ena vakavinavinaka me baleta na totoka ni ivakavuvuli ni veivutuni, kei na Veisorovaki ka rawa ni vakavuna; na mana ni veisau, ena Lotu qaqa oqo kei ira na lewena ka vakakina o ira na noda daukaulotu.
Na cava na kena ibalebale vei au na noqu sa mai lewena na Lotu i Jisu Karisito ni Yalododonu Edaidai. Sa kena ibalebale na veika kecega. E vakauqeta, vakabulabulataka, vakatitobutaka, vakainakitaka ka vakaibalebaletaka na veika kece ka ra bibi vei au ena bula oqo: o ya na neirau veiwekani kei na Kalou, na Tamaqu Tawamudu, kei na Luvena Tabu, na Turaga, o Jisu Karisito. E vakavulici au ni talairawarawa ki na ivakavuvuli ni cakacaka tabu vakalotu ni kosipeli, au na sotava kina na vakacegu kei na marau ena bula oqo, kau na sureti meu laki bula vata kei na Kalou, kei na noqu matavuvale, na bula ena muria mai na bula vakayago oqo, na vanua ena sotava kina na lewa dodonu na Nona loloma veivueti, ka na solegi au kei ira na noqu, vakakina o iko kei ira na nomu ena liga dauveitaqomaki,3 au sa vakadinadinataka, ena yaca i Jisu Karisito, emeni.