Na iTuvatuva Cecere ni Marau
Ena Veisorovaki bibi oqo, sa vakarautaka kina na Kalou na sala me rawa kina ni da biuta na noda ivalavala ca ka yaco me taucoko tale na noda savasava.
A taroga na parofita ko Jekope, “A cava meu sega ni vunautaka kina na Veisorovaki i Karisito mo dou kilai koya sara?”1
Au vakayagataka na taro o ya me ulutaga ni noqu vosa—a cava meu sega ni vunautaka kina na Veisorovaki i Jisu Karisito?
E dau vakatoka o Alama na Veisorovaki me “na ka sa navuci tu me rawati kina na bula.”2 Au na vakayagataka na malanivosa o ya meu vakamacalataka kina na ivunau totoka eda kila me Veisorovaki i Jisu Karisito.
A tukuna ena dua na gauna o Peresitedi Hugh B. Brown: “Ena yaco mai ena dua na gauna me da na kila oi keda yadua na ulutaga bibi oqo ena veiveisau ni bula … na bula dukadukali ni yalo, kei na nona veiwekani na tamata vua na Kalou… . Oi keda yadua, veitalia na rokada, matatamata, se na vanua eda lako mai kina, e dui tu na noda gauna vata kei na ka eda vakatoka me o mate.”3
E vuqa vei keda ena rarawa kei na galili, era sa dau tu ena vakarokoroko ena nona ibulubulu e dua na daulomani ka taro, “Ena kune li na marau ena mate?”
E sauma vei keda na taro oqo e dua na parofita ena iVola i Momani ena yalomarau kei na vakavinavinaka me baleta na Veisorovaki nei Jisu Karisito, ka sa voli keda oti mai na Lutu kei na mate: “A ka levu vakaidina na nona vuku na Kalou, na nona yalololoma kei na nona loloma! … A ka levu vakaidina na nona lewa loloma na noda Kalou!”4
Meu wasea mada e lima na dina ni ituvatuva cecere ni marau ka sa kauta mai vei au na mataqali marau vakaoqo.
iMatai: Na noda kila na ituvatuva ena vakadeitaka ni tiko e dua na Kalou ka dua na Luvena Tagane, ko Jisu Karisito. Na Tamana kei na Luvena erau sa uasivi sara. Erau tiko mai lomalagi, ka Rau taukena na yago vakalagilagi ni yalo, na lewe, kei na sui.
A vakatakilai vei keda na dina eso oqori ena itabagauna oqo ena nona a tekiduru ena vakarokoroko na gonetagane ko Josefa Simici ena masu ka qai kaya kina e muri: “Au sa qai raica e rua na Tamata, ia na kedrau iserau kei na iukuuku sa sega ni vakamacalataki rawa, raica erau sa tucake tu ena maliwa lala donuya na mataqu. A sa kacivi au e dua vei rau dusi koya na kena ikarua ka kaya —Oqo na Noqu Gone ni Toko. Mo Rogoci Koya!”5
iKarua: Na noda kilai rau na Tamana kei na Luvena ena vukei keda me da kila ni da mai biu e vuravura me da vakayago, me da kila ka, ka vakadeitaki keda me da lesu tale vei Tamada Vakalomalagi. E vauci na noda bula vakayago e vuravura ena veilawa eso. Ni da sa talaidredre ki na lawa oqo, eda sa ivalavala ca. Ni da ivalavala ca eda sa voroka na veilawa tawamudu; na lawa ni lewa dodonu e tiko na kena isau se na kena itotogi.
Na ivalavala ca kei na gadrevi ni veivutuni e rawa ni vakatakarakarataki ena dua na tamata e lako ena dua na ilakolako. E dakuna e dua na taga lala levu, e tomika cake e dua na vatu, ka matataka na voroki ni dua na lawa. E tawana na vatu ki na taga e dakuna. Ni toso na gauna, sa sinai na taga. E bibi. Sa sega ni rawa ni tomana na nona ilakolako na tamata oqo. Sa dodonu me dua na sala me vakalala kina na taga ka kauta laivi na vatu. Oqori e rawata duadua ga na iVakabula ena nona Veisorovaki.
E rawa oqo ena noda cakacakataka na noda vakabauti Jisu Karisito, biuta na ivalavala ca, ka veiyalayalati ena veicakacaka tabu vakalotu ni kosipeli. Ni da vosota tiko ena yalodina ki na ivakataotioti, sa na rawa kina ni da lesu tale ka bula vata kei na Tamada Vakalomalagi kei na Luvena, ko Jisu Karisito.
iKatolu: Ena Veisorovaki bibi oqo, sa vakarautaka kina na Kalou na sala me rawa kina ni da biuta na noda ivalavala ca ka yaco me taucoko tale na noda savasava. E rawa oqo ena lawa tawamudu ni loloma soli wale. Na loloma soli wale ena vakamamautaka na gagadre ni lewa dodonu ena noda veivutuni kei na kaukauwa ni Veisorovaki. Kevaka e sega na kaukauwa ni Veisorovaki kei na noda veivutuni e taucoko, eda sa na vauci ena lawa ni lewa dodonu.
E vakavuvulitaka o Alama ni ra na “lomani ko ira sa veivutuni”6 ka ni “na yaga walega na sala ni veivakabulai sa navuci tu, kevaka sa veivutuni na tamata.”7
E vakavuvulitaka na parofita cecere ko Amuleki, “Ia oqori sa rawa kina ki na loloma soli wale me sotava na gagadre ni lewa dodonu, ka mokoti ira ena liga ni veitaqomaki, ia ko ira sa sega ni cakacakataka na nodra vakabauta ena veivutuni era na sotava na lawa taucoko ni gagadre ni lewa dodonu; o koya oqo ena yaga walega kina na ituvatuva cecere ni veivueti vei ira era vakabauta ka veivutuni.”8
Koi rau na noda itubutubu taumada, ko Atama kei Ivi, erau a talaidredre ki na lawa ka rau vakatalai tani mai na Were totoka ko Iteni. A vakavulici vei rau ko Atama kei Ivi na ituvatuva cecere ni veivakabulai, me rau kunea kina na marau ena bula oqo.9
E kaya ko Atama, “Na noqu talaidredre sa rai rawa kina na mataqu, ia meu kila na marau ena bula oqo, ka raica tale na Kalou ena yagoqu ga oqo.”10
A cavuta ko Ivi e dua na mataqali itukutuku ni marau vakaoqo, “Kevaka keirau a sega ni talaidredre ke a sega na luvei keirau, ka keirau sega talega ni kila na ka vinaka mai na ka ca, io ke keirau a sega ni rekitaka na neirau vakabulai.”11
iKava: Na nodrau Lutu ko Atama kei Ivi sa kauta mai e rua na mate. Eda na mate kecega.
Na mate vakayago sai koya na tawasei ni yalo mai na yago. Ena vuku ni lutu nei Atama, ena mate kece kina na kawatamata.
Na ikarua ni mate e vakayalo. Sai koya na noda tawasei tani mai na iserau ni Kalou. Erau a veitalanoa vata kei na Kalou ena Were ko Iteni ko Atama kei Ivi. Ni rau sa talaidredre, sa yali vei rau na galala oqori. Me tekivu mai na gauna ko ya, sa dau yaco rawa ga na veitaratara mai vua na Kalou ena vakabauta kei na solibula, ka salavata kei na vakatakekere mai na yaloda dina.
Ena gauna oqo, eda sa tu kece ena itutu ni mate vakayalo. Eda sa tawasei mai vua na Kalou. E tiko mai lomalagi ko Koya; eda tiko e vuravura. Eda na vinakata me da lesu tale ki Vua. E savasava ka taucoko tu ko Koya. Eda sega ni savasava ka taucoko.
Na kaukauwa ni nona Veisorovaki na Karisito sa vakamalumalumutaka na mate ruarua.
Ni oti na Nona Vakamatei ena Kauveilatai ka bulu ena dua na ibulubulu kerei, a vakaturi cake tale na Karisito ena ikatolu ni siga. Na Tucaketale oqo e vakaduavatataka na Yagona kei na Yalona na Karisito.
Na Tucaketale mai na mate sa dua na tiki totoka ni Veisorovaki ka tiki dina sara ni ituvatuva ni marau; na Tucaketale e rabailevu ka baleta na kawatamata raraba. Eda na tucake kece tale. Au vakadinadinataka na dina oqori. Oqo e dua na isolisoli soli wale mai vua na Kalou.
Ia na noda tucaketale e sega ni sa vakamalumalumutaki kina na ikarua ni mate. Me da rawata na bula tawamudu ka laki bula ena kedrau iserau na Tamada kei na Luvena, sa dodonu me da veivutuni ka yaco me veiganiti kei keda na loloma soli wale, ka na sotava na lewa dodonu.
E vakavuvulitaka na ivakatakila:
“Me vakarautaki koya na tamata ena bula oqo me lesu tale vua na Kalou.”12
“Dou kakua ni lokuyarataka na gauna mo dou veivutuni kina.”13
“Na yalo ga ko a soli iko kina ena bula oqo, ena laki lewai iko tale ena bula sa bera mai.”14
iKalima: A sucu ko Jisu Karisito mai vei Meri, e dua na tina e vuravura. Mai vua, sa rawata kina ko Koya na bula vakayago ka yaco me rawa ni mate.
Ko Josefa na Nona dauvakasala vakavuravura. Na Tamana, na Kalou mai lomalagi. Mai Vua, sa rawata kina na tawa mate rawa, na kaukauwa me vakadruka na mate vakayago.
Me vaka ni a digitaki me vakataucokotaka na gagadre ni Veisorovaki, a siro sobu mai ki vuravura ko Jisu Karisito ka sucu mai vei Meri me vaka e dua na gonelailai. A siro sobu mai me temaki, vakatovolei, vakalialiai, vakalewai, ka vakamatei ena kauveilatai, e dina ga ni a tu Vua na kaukauwa kei na dodonu me tarova kina na ivalavala eso ko ya.
A vakamacalataka ko Peresitedi John Taylor na nona lako sobu mai na Karisito ena veivosa totoka oqo: “A gadrevi me siro sobu e ruku ni veika kecega, me rawa kina ni laveti ira na tamata kecega ena dela ni veika kecega; ni kevaka me a sega ni rawa ni laveti Koya cake ka vakacerecerei ena veivakavuvuli ka rawa mai na veisorovaki, ena sega talega ni rawa Vua me laveti ira cake na tani; ena sega ni rawa Vua me cakava vei ira na tani na veika e sega ni rawa ni cakava Vua.”15
Na nona vakila na rarawa na Karisito ena Were e Kecisemani e vakavotuya mai na ivakarau va Karisito, na Nona loloma uasivi sara. Eke eda raica kina ni sa lomani keda vakaidina sara ko Koya.
E dua na dau ni ivolatabu e Igiladi, ka dau volavola voli ena ikatinikaciwa ni senijiuri, e kaya vakaoqo: “Na veika rarawa kece e rawa ni sotava na tamata me sa na vakavuna me yago ca mai… . Na mosi ena kena bibi duadua, na madua ena kena levu kei na kena ca, na icolacola kece ni … ivalavala ca … oqo na veika me na sotava ena gauna oqo.”16
Ni vakamacalataka na Nona vakararawataki, e kaya kina na Turaga ena dua na ivakatakila ni gauna oqo: “Raica koi Au na Kalou sa kaukauwa sara; au sa sautaninini ena mosi ni veivakararawataki ko ya; au a bunotaka na dra ka sa yaluma sara kina na yagoqu kei na yaloqu.”17
Na Veisorovaki e rawa kina ni da veivinakati tale vata kei na Kalou. Na vosa veisorovaki, se “vei-soro-vaki,” e kena ibalebale me vakalesui se me lesu mai. Ena matavuvale, e kena ibalebale me da vakaduavatataki o keda vakataki keda ka vakakina vata kei na Kalou kei na Luvena, ko Jisu Karisito. E kena ibalebale na rarawa ni veitawasei ena yaco me marau ni duavata.
Meu tinia, au na wasea na vosa nei Peresitedi Boyd K. Packer:
“Kevaka ko na kila na ituvatuva cecere ni marau ka muria, ena sega ni vakatulewa ena nomu marau na veika e yaco tu e vuravura.”18
Au vakadinadinataka na dina oqori kei na loloma sa vakaraitaka me baleti keda na noda Turaga ka iVakabula ko Jisu Karisito ena nona Veisorovaki, na ituvatuva cecere ni veivakabulai, me baleti keda kece. Ena yaca i Jisu Karisito, emeni.