Pagpangandam Nagdala og mga Panalangin
Hunahunaon nato ang atong mga calling, hinuktukan nato ang atong mga responsibilidad, ug sundon nato si Jesukristo.
Mga kaigsoonan, ang inyong pag-anhi sa Conference Center sa Siyudad sa Salt Lake makapadasig kaayo. Katingalahan nga makahibalo nga liboan ka mga chapel libut sa kalibutan, ang uban kaninyo—mga nanaghupot usab sa priesthood sa Dios—nagdawat niini nga sibya pinaagi sa satellite transmission. Managlahi ang inyong mga nasyonalidad, ug daghan ang inyong mga pinulongan, apan may usa ka komon nga higot ang nagbugkos kanato. Kita gitugyanan sa paghupot sa priesthood ug sa pagbuhat pinaagi sa ngalan sa Dios. Kita ang mga nagpakadawat sa usa ka sagrado nga pagsalig. Dako kaayo ang gipaabut gikan kanato.
Usa sa nindot kaayo nakong panumduman mao ang pagtambong sa miting sa priesthood isip bag-ong giordinahan nga deacon ug nagkanta sa pangbukas nga himno “Come, All Ye Sons of God.” Karong gabhiona akong ipaabut ang espiritu nianang espesyal nga himno ug moingon kaninyo, Duol kamong tanan nga mga anak sa Dios nga nakadawat sa priesthood.”1 Hunahunaon nato ang atong mga calling, hinuktukan nato ang atong mga responsibilidad, ug sundon nato si Jesukristo.
Baynte ka tuig na ang milabay mitambong ako og sakrament miting diin ang mga bata motubag ngadto sa tema nga, Ako Nasakop sa Ang Simbahan ni Jesukristo sa mga Santos sa Ulahing mga Adlaw. Kining batang mga lalaki ug babaye nagpakita nga sila nagbansay alang sa pagserbisyo sa Ginoo ug sa uban. Ang musika maanindot, ang pagsag-ulo maanindot sa pagkahimo, ug ang espiritu gipadala gikan sa langit. Usa sa akong mga apo, nag-edad og 11 anyos nianang higayuna, naghisgot mahitungod sa Unang Panan-awon samtang siya mipresentar sa iyang bahin sa programa. Pagkahuman, miduol siya sa iyang mga ginikanan ug sa mga apohan, miingon ako kaniya, “Tommy, sa akong pagtuo hapit ka na mahimong misyonaryo.”
Mitubag siya, “Dili pa, daghan pa ako og angay nga makat-unan.”
Sa katuigan nga miabut, si Tommy nakakat-on, salamat sa iyang mga ginikanan ug sa mga magtutudlo ug mga tigtambag diha sa simbahan, kinsa mahalaron ug maalamon. Sa dihang igo na ang iyang edad, gitawag siya og misyon. Gibuhat niya kini sa labing maayong pasidungog.
Batan-ong mga lalaki, motambag ako ninyo sa pag-andam sa pagserbisyo isip misyonaryo. Adunay daghang mga himan nga makatabang sa pagkat-on sa mga leksyon nga makaayo kaninyo, ingon man usab sa pagtabang kaninyo sa pagpakabuhi nga takus. Usa sa mga himan mao ang booklet nga giulohan og Alang sa Kalig-on sa mga Kabatan-onan, gimantala ubos sa direksyon sa Unang Kapangulohan ug sa Korum sa Napulog Duha ka mga Apostoles. Naglangkob kini og mga sumbanan gikan sa mga sinulat ug sa mga pagtulun-an sa mga lider sa Simbahan ug gikan sa kasulatan, ang pagsunod niini makahatag sa mga panalangin sa atong Langitnong Amahan ug sa giya sa Iyang Anak alang kanato. Dugang pa, adunay mga manwal sa leksyon, giandam pag-ayo human sa mainampoong paghunahuna. Ang mga panimalay adunay mga family home evening, diin gitudlo ang mga baruganan sa ebanghelyo. Hapit kamong tanan adunay kahigayunan sa pagtambong og mga klase sa seminary, gitudloan sa mahalaron nga mga magtutudlo kinsa adunay daghan nga ipakigbahin.
Sugod sa pag-andam alang sa kaminyoon sa templo ingon man usab alang sa misyon. Ang husto nga pagpakig-date usa ka bahin niana nga pagpangandam. Sa mga kultura diin ang pag-date dili angay, ayaw pagpakig- date hangtud kamo moabut sa edad nga 16. “Dili ang tanang tin-edyer kinahanglang mo-date o gusto.… Kon kamo magsugod og pakig-date, himoa sa grupo o double dates. Siguroha nga ang inyong mga ginikanan nakahimamat [ug nakaila] sa inyong ika-date. Tungod kay ang pakig-date usa ka pagpangandam alang sa kaminyoon, “pakig-date lamang niadtong adunay taas og mga sumbanan.”3
Pagmatngon aron maadto sa mga lugar diin adunay maayong palibut, diin dili kamo mag-atubang og mga tintasyon.
Usa ka maalamon nga amahan miingon ngadto sa iyang anak, “Kon inyong makita ang inyong kaugalingon nga anaa sa lugar nga dili ka angay nga anaa, pahawa!” Maayo nga tambag alang kanatong tanan.
Ang mga sulugoon sa Ginoo kanunay nga nagtambag nato sa pagsinina og tarung sa pagpakita og pagtahud alang sa atong Langitnong Amahan ug alang sa atong mga kaugalingon. Ang inyong pagsinina naghatag og mensahe mahitungod sa inyong kaugalingon ngadto sa uban ug makaimpluwensya sa inyong linihokan ug sa uban. Pagsinina sa paagi nga makita ang inyong labing maayong pagkatawo ug niadtong anaa sa inyong palibut. Likayi ang sobra nga pagsinina ug panagway, lakip sa mga patik ug pagpatusok.
Ang tanan nagkinahanglan og maayong mga higala. Ang inyong grupo sa mga higala makaimpluwensya pag-ayo sa inyong panghunahuna ug kinaiya, sama nga kamo ngadto kanila. Kon kamo adunay komon nga mga hiyas uban sa inyong mga higala, makapalig-on ug makaawhag kamo sa usag usa. Tagda ang tanan uban sa kamabination ug dignidad. Daghang dili mga miyembro moadto sa Simbahan pinaagi sa mga higala kinsa mipaapil nila sa mga kalihokan sa Simbahan.
Ang kanunay nga gibalik-balik nga panultihon nga kanunayng tinuod: “Ang pagkamatinuoron [mao] ang labing maayong lagda.”3 Ang usa ka batan-ong lalaki nga Santos sa Ulahing mga Adlaw nagsunod sa iyang gitudlo ug sa iyang gituohan. Matinuoron siya sa uban. Matinuoron siya sa iyang kaugalingon. Matinuoron siya sa Dios. Matinuoron siya sa batasan ug iya na gayud nga kinaiya. Kon ang usa ka malisud nga desisyon kinahanglang buhaton, dili siya mangutana sa iyang kaugalingon, “Unsay mahunahuna sa uban?” apan hinoon, “Unsay akong hunahuna sa akong kaugalingon?”
Alang sa uban, moabut ang tintasyon sa dili pagtahud sa personal nga sumbanan sa pagkamatinuoron. Sa usa ka klase sa business law sa unibersidad nga akong gieskwelahan, nahinumdom ako nga usa ka kauban sa klase wala gayud mag-andam alang sa mga panaghisgutan sa klase. Naghunahuna ko, “Unsaon man kaha niya sa pagkapasar sa katapusan nga eksamin?”
Akong nadiskobrehan ang tubag sa dihang miabut siya sa klasrom alang sa katapusan nga eksam sa usa ka tingtugnaw nga adlaw nagsul-ob lang og mga sandal. Nasurprisa ko ug nagtan-aw niya sa pagsugod sa klase. Ang tanan namong mga libro gibutang diha sa salog, nga maoy sugo. Iyang gihubo ang iyang mga sandal, ug dayon, ang mga kumagko nga nabansay na ug gipahiran og glycerine, hanas siyang mipakli sa mga pahina sa usa sa mga libro nga iyang gibutang sa salog, sa ingon nakita ang mga tubag sa mga pangutana sa eksamin.
Iyang nadawat ang usa sa labing taas nga mga grado niana nga kurso sa business law. Apan ang adlaw sa panudya miabut. Sa wala madugay, samtang siya nag-andam sa kinatibuk-ang eksamin, sa unang higayon ang dean niining mao nga kurso miingon, “Karong tuiga dili na ako mogamit sa tradisyonal nga paagi ug mohimo na ako og oral nga eksam kay sa sinulat nga test.” Ang among hanas kaayo sa kumagko naulawan niana nga okasyon ug wala makapasar sa eksam.
Giunsa ninyo sa pagsulti ug kon unsa man ang mga pulong nga inyong gigamit nagsulti kini sa imahen nga inyong gipili nga ipakita. Gamita ang pinulongan sa pagpalig-on ug pagbayaw niadtong anaa sa inyong palibut. Ang walay tahud, bulgar, o bagis nga pulong ug dili angay o dili maayo nga mga komedya makapasilo sa Ginoo. Ayaw gayud gamita sa dili maayo ang pangalan sa Dios o ni Jesukristo. Ang Ginoo miingon, “Dili mo pagagamiton ang ngalan sa Ginoo nga imong Dios sa pasipala.”4
Ang atong Langitnong Amahan mitambag kanato sa pagpangita sa “mga butang nga mahiyason, matahum o maayo og dungog o dalaygon.”5 Unsay inyong basahon, paminawon o tan-awon makahatag og impresyon kinsa kamo.
Ang pornograpiya makuyaw kaayo ug makaadik. Ang kuryuso nga pagtan-aw sa pornograpiya mahimo nga mokontrolar nga kinaiya, mosangput ngadto sa dili maayo nga materyal ug ngadto sa sekswal nga kalapasan. Likayi gayud ang pornograpiya bisan unsa pay mahitabo.
Ayaw kahadlok sa paggawas gikan sa usa ka sine, pagpalong sa telebisyon, o pagbalhin sa estasyon sa radyo kon ang gipresentar niini wala makasunod sa mga sumbanan sa inyong Langitnong Amahan. Sa laktud, kon kamo nagduda kon ang usa ka sine, libro, o ubang matang sa kalingawan angay ba, ayaw pagtan-aw niini, ayaw pagbasa niini, ayaw pag-apil niini.
Si Apostol Pablo mipahayag, “Wala ba kamo masayud nga kamo templo sa Dios, ug nga ang Espiritu sa Dios nagapuyo diha sa sulod ninyo? … Kay ang templo sa Dios balaan, ug kana nga templo mao kamo.”6 Mga kaigsoonan, atong responsibilidad ang paghimo sa mga templo nga limpyo ug putli.
Dili maayo nga mga drugas, sayop nga paggamit sa giresita nga mga tambal, alkohol, kape, tsa, ug tabako makadaut sa inyong pisikal, mental, ug espiritwal nga pagkatawo. Ang bisan unsa nga matang sa alkohol makadaot sa inyong espiritu ug sa inyong lawas. Ang tabako makaulipon kaninyo, makadaot sa inyong baga, ug makamubo sa inyong kinabuhi.
Ang musika makatabang kaninyo nga maduol sa inyong Langitnong Amahan. Magamit kini sa pag-edukar, pagbalaan, pagdasig, ug paghiusa. Hinoon, ang musika, tungod sa tempo, tukar, ka kusog, ug sa mga pulong niini, makababag sa inyong espirituhanong pagkasensitibo. Ayaw kamo pagtugot sa pagpuno sa inyong mga hunahuna sa dili takus nga musika.
Tungod kay ang sekswal nga kasuod sagrado kaayo, ang Ginoo buot nga kontrolon ang kaugalingon ug kaputli sa dili pa ang kaminyoon ingon man usab sa hingpit nga kamaunungon human sa kaminyoon. Sa pagpakig-date, tahura ang inyong ka-date, ug paabuta nga ang inyong ka-date mopakita sa samang pagtahud diha kaninyo.” Ang mga luha mosunod gayud human sa kalapasan.
Si Presidente David O. McKay, ikasiyam nga Presidente sa Simbahan, mitambag, “Maghangyo ako kaninyo sa paghunahuna og limpyo nga mga hunahuna.” Dayon mihimo siya niining importante nga deklarasyon sa kamatuoran: “Ang tanang binuhatan giunhan sa usa ka hunahuna. Kon kita gusto nga mokontrol sa atong mga aksyon, kinahanglang atong kontrolon ang atong panghunahuna.” Mga kaigsoonan, pun-a ang inyong mga panghunahuna sa maayong mga hunahuna, ug ang inyong mga aksyon maayo ra. Hinaut nga ang matag usa kaninyo makasubli sa kamatuoran sa linya gikan ni Tennyson nga gipamulong ni Sir Galahad: “Ang akong kusog ingon og kusog sa napulo, kay ang akong kasingkasing putli.”7
Dili pa dugay ang tagsulat sa usa ka pamantalaan mahitungod sa sekswal panahon sa pagka tin-edyer mitingob sa iyang na-research pinaagi sa pag-ingon nga ang katilingban nagpadala og makapalibug nga mensahe ngadto sa mga tin-edyer: mga pahinumdom ug gipangsulti sa mass media “grabe nga mensahe nga ang sekswal nga kalihokan madawat ug gipaabut,” mga pag-awhag nga usahay mobaliwala sa mga pasidaan sa mga eksperto ug sa pangamuyo sa mga ginikanan. Ang Ginoo miputol sa tanang mga mensahe sa media uban sa klaro ug tukma nga pinulongan sa dihang Siya mipahayag ngari kanato, “Paglimpyo kamo.”8
Kon moabut ang tintasyon, hinumdumi ang maalamon nga tambag ni Apostol Pablo, kinsa mipahayag: “Kay kaninyo walay nakaabut nga bisan unsang pagtintal nga dili maantus sa tawo: apan ang Dios kasaligan, ug dili niya itugot nga kamo pagapanulayon labaw sa inyong kaarangan; uban sa pagpanulay siya magtagana sa lutsanan sa paglikay, aron kamo makahimo sa pag-antus niini.”9
Sa dihang gikumpirmahan kamo nga miyembro sa Simbahan, inyong nadawat ang katungod sa pakig-uban sa Espiritu Santo. Makatabang Siya kaninyo sa paghimo og maayo nga mga pagpili. Kon hagiton man o tintalon, dili kamo kinahanglan nga mobati nga nag-inusara. Hinumdumi nga ang pag-ampo mao ang pasaporte ngadto sa espirituhanong gahum.
Kon adunay nakasala sa iyang pagpanaw, adunay paagi sa pagbalik. Ang proseso gitawag og paghinulsol. Ang atong Manluluwas mohatag kaninyo ug kanako niana nga bulahan nga gasa. Bisan og ang dalan malisud, ang saad tinuod: “Bisan pa ang inyong mga sala mapula, sila pagapution ingon sa nieve”10
Ayaw ibutang sa risgo ang inyong kinabuhing dayon. Sunda ang mga kasugoan sa Dios. Kon nakasala kamo, ang labing sayo nga kamo magsugod sa pagbalik, sayo kamong makakita sa matam-is nga kalinaw ug kalipay nga moabut uban sa milagro sa kapasayloan. Ang kalipay moabut sa pagsunod sa paagi nga gusto sa Ginoo nga inyong sundon ug gikan sa pagserbisyo sa Dios ug sa uban.
Ang espiritwal nga kalig-on sa kasagaran maggikan pinaagi sa dili hinakog nga pagserbisyo. Pipila ka tuig na ang milabay mibisita ako sa gitawag kaniadto og California Mission, diin akong gi-interbyu ang usa ka batan-ong misyonaryo gikan sa Georgia. Nahinumdom ako nga miingon ngadto kaniya, “Magpadala ba ikaw og sulat sa imong mga ginikanan kada semana?”
Mitubag siya, “Oo, Brother Monson.”
Dayon nangutana ko, “malipay ba ikaw nga makadawat og sulat gikan sa inyo?”
Wala siya motubag. Sa kadugayan nangutana ko, “Kanus-a ang katapusang higayon nga ikaw nakadawat og sulat gikan sa inyo?”
Nagkurog ang tingog, mitubag siya, “Wala gayud ako makadawat og sulat gikan sa amo. Si Papa usa lang ka deacon, ug si Mama dili miyembro sa Simbahan. Nanghangyo sila nako nga dili magmisyon. Miingon sila nga kon ako magmisyon, dili sila mosulat kanako. Unsay akong buhaton, Brother Monson?”
Hilom akong nag-ampo sa akong Langitnong Amahan: “Unsay akong isulti niining Imong batan-ong sulugoon, nga misakripisyo sa tanan sa pagserbisyo kanimo?” Ug ang inspirasyon miabut. Miingon ko, “Elder, pagpadala og sulat ngadto sa imong inahan ug amahan kada semana sa imong misyon. Sultihi sila unsay imong gibuhat. Sultihi sila kon unsa nimo sila ka mahal ug dayon ihatag ang imong pagpamatuod ngadto kanila.”
Nangutana siya, “Mosulat sab kaha sila kanako?”
Mitubag ko, “Mosulat sila kanimo.”
Nagbulag kami ug ako milakaw. Paglabay sa pipila ka bulan mitambong ako sa usa ka komperensya sa stake sa Southern California sa dihang usa ka batan-ong misyonaryo miduol kanako ug miingon, “Brother Monson, nahinumdom ka pa ba nako? Ako ang misyonaryo nga wala makadawat og sulat gikan sa akong inahan o sa akong amahan atol sa akong unang siyam ka bulan sa misyon. Miingon ka kanako, ‘Pagpadala og sulat sa inyo kada semana, Elder, ug ang imong mga ginikanan mosulat ra kanimo.’” Dayon siya nangutana, “Nahinumdom ba ikaw niana nga saad, Elder Monson?”
Ako nakahinumdom. Nangutana ko, “Misulat ba ang imong mga ginikanan?”
Mikuot siya sa iyang bulsa ug mikuha og binugkos nga mga sulat nga gihigtan og lastiko, mikuha og usa ka sulat sa ibabaw sa binugkos, ug miingon, “Nakadawat ba ako og sulat gikan sa akong mga ginikanan! Paminawa kining sulat gikan sa akong inahan: ‘Anak, nalingaw kaayo kami sa imong mga sulat. Mapasigarbuhon kami kanimo, nga among misyonaryo. Tag-ana kon unsa? Si Papa giordinahan nga usa ka priest. Nangandam siya sa pagbunyag kanako. Nakigkita ako sa mga misyonaryo; ug usa ka tuig gikan karon gusto kaming moadto sa California sa imong paghuman sa imong misyon, kay kami, uban nimo, gusto nga mahimong mahangturong pamilya pinaagi sa pagsulod sa templo sa Ginoo. ‘“Kining batan-ong misyonaryo nangutana, “Brother Monson, ang Langitnong Amahan ba motubag kanunay sa mga pag-ampo ug motuman sa saad sa Apostol?”
Mitubag ko, “Kon ang usa ka tawo adunay hugot nga pagtuo sama sa imong gipakita, ang atong Langitnong Amahan maminaw sa mao nga pag-ampo ug motubag sa Iyang kaugalingon nga paagi.”
Ang limpyo nga mga kamot, putli nga kasingkasing, ug andam nga hunahuna mihikap sa langit. Usa ka panalangin, pinadala sa langit, mitubag sa mainiton nga pag-ampo sa mapainubsanong kasingkasing sa usa ka misyonaryo.
Mga kaigsoonan, akong pag-ampo nga kita magpuyo aron nga kita usab makahikap sa langit ug mapanalanginan sa susama nga paagi. Sa pangalan ni Jesukristo, Amen.