Ang Talagsaon nga Aaronic Priesthood
Adunay dinaliang panginahanglan alang kaninyo sa pagtuman sa inyong katungdanan ngadto sa Dios. Masaligon ako nga makahimo kamo.
Napasidunggan ako karong gabhiuna nga mamulong ngadto sa talagsaon nga batan-ong mga lalaki sa Simbahan. Napanalinginan ako nga ikahimamat ang kadaghanan kaninyo sa tibuok kalibutan. Ang inyong kadasig makatakud.
Inyong giatubang ang inyong mga hagit uban sa talagsaon nga kalig-on ug kaisug. Akong ipahayag ang akong gugma kaninyo ug sa akong pagsalig nganha kaninyo.
Gidasig ninyo ang mga tawo nga naglibut kaninyo labaw pa kaysa inyong mahunahuna. Paminawa ang mga pulong sa usa ka batan-ong lalaki kinsa dili sakop sa atong relihiyon, nga naningkamot sa paghulagway sa iyang higala kinsa naghupot sa Aaronic Priesthood: “May namatikdan ako nga lahi mahitungod ni Luis.… Kining tawhana pareho ra sa … ubang mga tawo. May pipila lang ka butang nga inyong mamatikdan kaniya.… Wala gani ako masayud kon unsa kini, apan lahi siya kay kanilang tanan. Butang kini nga inyo lang gayud nga mabatyagan; dili [butang] … nga makita sa inyong mga mata. Inyo lamang kini nga mabatyagan.”
Adunay butang nga importante kaayo nga nakapalahi ni Luis kay sa ubang batan-ong mga lalaki. Kamo nakadawat sa Aaronic Priesthood. Kini usa ka sagrado nga gasa, ug daghan ang wala gayud makasabut sa kamahinungdanon niini. Karong gabhiuna tabangan ko kamo nga makita kon unsaon sa pagdiskubre sa inyong kaugalingon ang katalagsaon sa Aaronic Priesthood.
I. Ang Dios Misalig Kaninyo
Sa diha nga ang Dios mitugyan kaninyo sa Iyang sagrado nga priesthood, Iyang gipakita og dakong pagsalig diha kaninyo. Siya nasayud nga Siya makasalig kaninyo sa paggamit sa priesthood sa pagserbisyo sa uban, sama nga siya misalig sa ubang batan-ong mga lalaki sa pagbuhat sa pipila sa Iyang pinaka-importante nga buluhaton.
Sama pananglit, ang kalibutan dili unta makabaton og gamhanang saksi ni Jesukristo sa Basahon ni Mormon kon dili pa tungod sa duha ka batan-ong mga lalaki kinsa gisaligan sa Dios. Si Mormon, ang propeta kinsa mihan-ay niining sagrado nga talaan, 10 anyos pa lamang sa dihang siya gitugyanan sa pagpaniid ug sa kadugayan mitala sa kasaysayan sa iyang mga katawhan. Sa edad nga 15, siya “giduaw sa Ginoo, ug nakatagamtam ug nasayud sa kaayo ni Jesus” (Mormon 1:15).
Ang Basahon ni Mormon gihubad ug gimantala pinaagi ni Joseph Smith, kinsa gitawag sa iyang mahinungdanon nga buhat sa edad nga 14, sa dihang gibisitahan siya sa Langitnong Amahan ug ni Jesukristo.
Si Presidente Thomas S. Monson miingon: “Dagkong butang ang gipaabut gikan kaninyo.… Sama sa tataw nga tawag moabut ang pulong sa Ginoo nganha kaninyo, ngari kanako, ug sa mga naghupot sa priesthood bisan asa: ‘Busa, karon himoa ang matag tawo nga makakat-on sa iyang katungdanan, ug pagbuhat sa buhatan diin siya natudlo, diha sa tanan nga kakugi’ (“Ang Tawag alang sa Kaisug,” Liahona, Mayo 2004, 54, 57).
II. Ang Bag-ong Programa sa Katungdanan ngadto sa Dios
Aron pagtabang kaninyo nga makatubag nianang dinalian nga tawag, ang Simbahan nagpaila sa bag-ong programa sa Katungdanan ngadto sa Dios, ingon sa gipahibalo ni Presidente Henry B. Eyring sa sayo pa karong adlawa. Mahinamon ako kabahin niini nga programa. Ang mga materyal ipadala ngadto sa inyong mga bishop ug sa mga presidente sa branch sugod sa Hunyo. Kinahanglan nga sugdan dayon ninyo ang paggamit niini sa pagkadawat ninyo niini.
Isip usa ka deacon, teacher, ug priest, moapil kamo sa mga kalihokan nga makatabang kaninyo sa pagtukod og espirituhanong kalig-on ug makat-on ug makatuman sa inyong mga katungdanan sa priesthood: Ang matag kalihokan nagsubay niining yano nga sundanan:
Una kamo makat-on kabahin sa baruganan sa ebanghelyo o sa katungdanan sa priesthood. Makadiskubre kamo kon unsay gusto sa Langitnong Amahan nga inyong buhaton, ug kamo maningkamot sa pagbaton og espirituhanon nga pagpamatuod kon nganong importante kini.
Pagkasunod paghimo kamo og mga plano sa “pagbuhat” sa inyong nakat-unan. Gidasig kamo sa pagbase sa inyong mga plano diha sa kaugalingon ninyong mga panginahanglan, mga kahimtang, ug mga kahigayunan aron sa pagserbisyo sa uban. Usa kini ka maanindot nga kahigayunan sa pagbaton og responsibilidad alang sa inyong kaugalingong pagtubo ug sa pagpalambo og usa ka espirituhanong paningkamot sa kaugalingon.
Dayon ipakigbahin ang inyong nakat-unan ug kasinatian ngadto sa uban. Sa inyong paghimo, mapalig-on ninyo ang inyong pagpamatuod ug makaugmad og hugot nga pagtuo niadtong naglibut kaninyo. Kamo makapalambo sa inyong abilidad sa pagpakigbahin sa ebanghelyo ngadto sa uban.
Mapasalamaton ako sa usa ka batan-ong lalaki kinsa mipakigbahin kanako sa mosunod nga kasinatian. Siya ug ang laing naghupot sa Aaronic Priesthood gi-assign sa pagpahigayon og sakrament sa usa ka tawo kinsa anaa na lang sa balay ug masakiton kaayo. Miabut sila sa iyang balay nga walay kalibutan nga ang bag-ohay pa lang nga medikal nga mga pag-atiman nagdili kaniya sa pagkaon og bisan unsang pagkaon––bisan sa piraso sa pan sa sakrament. Human sa pagpanalangin sa pan, ang batan-ong lalaki mipaambit sa sakrament ngadto sa maluyahon nga tawo. Siya mikuha og piraso sa gipanalanginan nga pan, mihulat og makadiyot, dayon gidaitol kini diha sa iyang mga ngabil. Ang batan-ong lalaki miingon nga sa iyang pagtan-aw niining matinud-anong brother nga nagpakita sa iyang balaang pagtahud sa sakrament, gibati niya nga daw siya nagtan-aw kaniya nga naghalok sa tiil sa Manluluwas. Siya makaingon gayud nga ang maong tawo nahigugma sa Manluluwas.
Ang kahulugan sa sakrament nasilsil diha sa batan-ong lalaki sa usa ka dili makalimtan nga paagi nianang adlawa. Kamo makabaton og sagrado nga mga kasinatian, sama sa nahimo niining batan-ong lalaki.
Ang inyong mga ginikanan, mga lider, ug mga miyembro sa korum makahatag og importante nga tahas diha sa programa sa Katungdanan ngadto sa Dios. Ang inyong mga miting sa korum ma-Dominggo makahatag og regular nga mga kahigayunan sa pagkat-on, sa pagbuhat, ug sa pagpakigbahin. Ang bag-ong programa nga Katungdanan ngadto sa Dios mogiya kaninyo sa inyong panaw sa pagtuman sa inyong katungdanan ngadto sa Dios ug makadiskubre sa katalagsaon sa Aaronic Priesthood.
III. Tumana ang Inyong Katungdanan ngadto sa Dios
Sa milabayng mga tuig nakabiyahe ako nga nakahimo sa hangtud sa hangtod nga kausaban kon unsa ang akong pagtan-aw kaninyo ug sa Aaronic Priesthood. Naghinamhinam ako alang kaninyo sa pagdiskubre sa inyong kaugalingon kon unsa ang akong nadiskubrehan. Inyong makat-unan kon ngano nga ang Aaronic Priesthood importante kaayo sa inyong kinabuhi ug unsa kamahinungdanon kini sa Simbahan. Makadayeg kamo kon ngano nga kini giila isip usa sa “labing taas nga mga pangulo” sa priesthood (tan-awa sa D&P 107:6). Mas masabtan ninyo ang kahulugan sa mga yawe sa priesthood, ang pagpangalagad sa mga anghel, ug ang ebanghelyo sa pagpangandam (tan-awa sa D&P 13; 84:26).
Si Satanas mobutang sa inyong hunahuna nga kamo batan-on pa kaayo o nga pipila lamang kaninyo ang mobuhat sa mahinungdanong mga butang gamit ang Aaronic Priesthood. Walay usa niana nga tinuod.
Ang mga pulong sa Dios ngadto ni Moises mga pulong alang kaninyo karon: “Tan-awa ikaw mao ang akong anak;… ug ako adunay usa ka buhat alang [kanimo]” (Moises 1:4, 6).
Iyang gihatag kaninyo ang Iyang gahum sa pagbuhat og mahinungdanong mga butang. Samtang nagtuman kamo sa inyong katungdanan ngadto sa Dios, inyong mapalig-on ug mapanalanginan ang inyong pamilya. Kini mao ang inyong labing dako nga katungdanan sa priesthood. Paminawa ang usa ka inahan nga naghulagway sa nahimo sa iyang anak nga lalaki diha sa iyang pamilya: “Si Leo adunay priesthood sa among pinuy-anan, ug dako kini nga panalangin. Usa siya ka maayong ehemplo sa iyang mga igsoon; … Iyang siguruhon nga kanunay sila nga mag-ampo. Siya mopaambit sa sakrament ma-Dominggo. Ang iyang manghod nga lalaki makakita kaniya. Siya nagtabang … uban sa pag-ampo sa pamilya. Nasayud ako nga siya padayon nga mahimong usa ka panalangin samtang siya magtubo. Makahimo siya sa pagbunyag sa iyang manghud nga lalaki. Kini usa ka kahupayan ug gasa kanamo”
Samtang nagtuman kamo sa inyong katungdanan ngadto sa Dios, kamo makatabang sa inyong mga higala kinsa dili sakop sa atong tinuohan ug makatabang sa pag-andam kanila nga mopasakop sa Simbahan. Sama sa usa ka tinuod nga igsoon, kamo mobantay kanila ug molig-on kanila. Kamo ang mangulo sa pagluwas sa ubang batan-ong mga lalaki kinsa nahisalaag sa ilang dalan.
Samtang kamo nagtuman sa inyong katungdanan ngadto sa Dios, kamo ang impluwensya alang sa kamaayo sa tanang panahon ug sa tanang kahimtang. Ang inyong matarung nga ehemplo ug ang inyong matinud-anong priesthood nga pagserbisyo mahimong usa ka gamhanang paagi sa pagdapit sa tanang kinsa nakaila kaninyo sa pagduol ngadto kang Kristo.
Sa ilang hilabihan ka lisud nga panahon, ang mga Nephite misalig sa usa ka batan-ong lalaki, si Mormon, alang sa pagpangulo ug inspirasyon (tan-awa sa Mormon 2:1–2). Karon, kami naglaum kaninyo nga mahimong usa ka mahinungdanon nga kalig-on sa Simbahan ug kusog alang sa kaayohan dinhi sa yuta. Kini mao ang gipaabut sa Ginoo.
IV. Magmahimo nga usa ka Tawo nga Matinud-anong Naghupot sa Priesthood
Ako nagpamatuod nga bation ninyo nga ang inyong kasingkasing magkausab samtang kamo mahimong usa ka tawo nga matinud-anong naghupot sa priesthood. Magtinguha kamo nga mahimong hingpit nga limpyo ug takus nga mopahigayon sa sakrament. Tagdon ninyo ang matag batan-ong mga babaye uban sa pagkamabination ug pagrespeto. Tahuron ninyo ang inyong mga ginikanan. Malikayan ninyo ang pagpasilo sa Espiritu sa inyong hunahuna, isulti o buhaton. Makaila kamo sa Ginoo, kinsa inyong silbihan, ug kamo sa kanunay maningkamot nga mahimong sama Kaniya.
Ako nagpamatuod nga ang inyong matinud-anong pagserbisyo diha sa Aaronic Priesthood makausab sa mga kinabuhi niadtong inyong gisilbihan. Adunay mga tawo kinsa nagkinahanglan sa inyong priesthood nga pagserbisyo. Ang inyong pamilya nagkinahanglan kaninyo. Ang inyong korum nagkinahanglan kaninyo. Ang Simbahan nagkinahanglan kaninyo. Ang kalibutan nagkinahanglan kaninyo.
Adunay dinaliang panginahanglan alang kaninyo sa pagtuman sa inyong katungdanan ngadto sa Dios. Masaligon ako nga makahimo kamo.
Sa usa ka tugnaw nga buntag pipila na ka semana ang milabay, nag-jogging ako buyon sa Suba sa Tagus dito sa Lisbon, Portugal. Naadto ako sa monumento nga gipahinungod sa mga Portuguese explorer gikan sa nanglabayng gatusan ka tuig. Mihunong ako samtang misubang ang adlaw ug misanag ang mainit nga kahayag niini ngadto sa maanindot nga monumento ug ngari kanako. Nadasig ako samtang nagtan-aw sa determinadong mga nawong sa mga estatuwa sa mga explorer nga nagtutok ibabaw sa tubig. Kini mao ang mga tawo kinsa andam sa pagbuhat og mga butang nga pipila lamang ang nakahimo. Gibiyaan nila ang inila ug haruhay nga kalibutan ug sa maisugon nga paagi migawas ngadto sa wala pa maadtoi nga dagkong kadagatan ug midiskubre og bag-ong mga yuta. Ilang nausab ang kalibutan.
Kamo akong makita kon ako maghunahuna nianang monumento sa maisug nga mga explorer. Kamo akong makita sa usa ka personal nga biyahe diin pipila sa kalibutan karon maoy gipili nga maoy subayon. Kamo akong makita nga nagtuman sa inyong katungdanan ngadto sa Dios.
Ako mag-ampo nga unta kitang tanan makasabut sa katalagsaon sa Aaronic Priesthood ug mosalig, sama sa gihimo sa Dios, niadtong naghupot niini. Sa pangalan ni Jesukristo, amen.