Ang Atong Katungdanan ngadto sa Dios: Ang Misyon sa mga Ginikanan ug mga Lider ngadto sa Bag-o nga Kaliwatan
Ato kining dili malikayan nga katungdanan sa pagtabang sa mga kabatan-onan nga makasabut ug motuo sa ebanghelyo sa hilabihan ka personal nga paagi.
Niining hapuna akong tinguha ang pag-awhag sa mga ginikanan ug sa tanang kinsa gitawag aron mangulo ug moserbisyo sa mga kabatan-onan niini nga kalibutan. Ang Ginoo mipadayag kang Joseph Smith nga kita adunay “usa ka dili malikayan nga katungdanan nga kita nakautang sa tanan nga nagtubo nga kaliwatan” (D&P 123:11).
Sa tibuok nakong kinabuhi isip usa ka amahan ug apohan, akong gipamalandongan ang pangutana, unsa man ang akong katungdanan ngadto sa Dios nga may kalabutan sa mga kabatan-onan? Mopakigbahin ako og pipila sa akong nakat-unan pinaagi sa personal nga pagpamalandong ug pagpamatuod.
Alang kanatong tanan, ang pagbuhat sa atong katungdanan ngadto sa Dios isip mga ginikanan ug mga lider magsugod sa paggiya pinaagi sa ehemplo—makanunayon ug makugihon nga pagsunod sa mga baruganan sa ebanghelyo diha sa panimalay. Kini nagkinahanglan og matag adlaw nga determinasyon ug kakugi.
Alang sa mga kabatan-onan, walay ikapuli alang sa pagkakita nga ang ebanghelyo gisunod sa matag adlaw sa atong mga kinabuhi. Ang batan-ong mga manggugubat wala na maghunahuna kon unsa ang gituohan sa ilang mga ginikanan. Sila miingon, “Kami wala magduhaduha ang among mga inahan nasayud niini” (tan-awa sa Alma 56:47–48). Nasayud ba ang atong mga anak sa atong nasayran?
Ako adunay apo nga lalaki kinsa sa makausa mihangyo nga magpakuyog kanako sa usa ka popular apan dili angay nga salida. Siya akong gisultihan nga dili pa igo ang akong katigulangon aron motan-aw niana nga salida. Naglibug siya hangtud nga ang iyang lola mipasabut kaniya sa buot nakong ipasabut. Miadto siya nako og balik ug miingon, “Nasabtan ko na, Lolo. Dili gayud moabut kanimo ang igong katigulangon aron motan-aw nianang salidaha, dili ba?” Ug husto gayud siya!
Gawas sa pagpakita sa mga kabatan-onan sa pamaagi pinaagi sa ehemplo, kita naggiya kanila pinaagi sa pagsabut sa ilang mga kasingkasing ug maglakaw tapad kanila diha sa dalan sa ebanghelyo. Aron tinud-anay nga makasabut sa ilang mga kasingkasing, kinahanglan gayud nga atong buhaton ang labaw pa kay sa anaa lamang sa sama nga kwarto o motambong sa mao gihapon nga mga kalihokan sa pamilya ug sa Simbahan. Kinahanglan gayud nga magplano kita ug mopahimulos sa mga kahigayunan sa pagtudlo nga makahimo og lawom ug mahangturon nga impresyon sa ilang mga hunahuna ug mga kasingkasing.
Sama pananglit, ang mga lider sa Simbahan regular nga magplano og mga kalihokan sa priesthood ug sa panagtigum sa Scouting ug mga kamping––apan kadto ba nga mga kalihokan kanunay nga makatuman sa labing importante nga katuyoan niini? Akong nakat-unan nga ang makahimo sa usa ka kalihokan sa priesthood o sa Scout nga labing makahuluganon sa usa ka batang lalaki dili lamang aron makakuha og merit badge kondili ang pagbaton og kahigayunan sa paglingkod ug sa pagpakigsulti uban sa lider kinsa interesado kaniya ug sa iyang kinabuhi.
Sa sama nga paagi, mga inahan ug mga amahan, samtang kamo magdrayb o maghatud sa mga anak ngadto sa eskwelahan o sa ilang nagkalainlain nga mga kalihokan, gamiton ba ninyo ang higayon sa pagpakigsulti kanila kalabut sa ilang mga paglaum ug mga pangandoy ug mga kahadlok ug hingpit nga mga kalipay? Mogahin ba kamo og oras nga ipapalong ang MP3 ug uban pa nga mga kahimanan aron makadungog sila kaninyo ug makabati sa inyong gugma? Sa gidugayon sa akong pagpakabuhi, mas akong naamgohan nga ang mga panahon nga natudloan ko atol sa akong kabatan-on, ilabi na kadtong gihatag sa akong mga ginikanan, nakaimpluwensya sa akong kinabuhi ug nakahulma kanako kon kinsa ako.
Imposibe nga masaypan sa paghukom ang impluwensya sa mga ginikanan kinsa nakasabut sa mga kasingkasing sa ilang mga anak. Ang pagsiksik nagpakita nga atol sa labing importante nga mga kausaban sa kinabuhi––lakip niadtong mga higayon sa dihang ang mga kabatan-onan sa kasagaran mopalayo sa Simbahan––ang labing mahinungdanon nga impluwensya dili maggikan sa usa ka interbyu sa bishop o sa uban nga mga lider kondili nagagikan sa kanunay, mainiton, mahigalaon, mapinanggaon nga pagpakigsuod sa mga ginikanan.
Uban niana diha sa hunahuna, kon manglingkod kita sa kan-anan nga lamesa, anaa ba ang atong tibuok pamilya? Akong nahinumduman isip usa ka batan-ong lalaki nga nananghid nga magdula og baseball panahon sa tingpanihapon. “Ibutang lang ang akong pagkaon sa oven,” giingnan nako ang akong mama. Siya mitubag, “Robert, gusto gayud nako nga mopahulay ka, mopauli sa balay, magdungan og panihapon sa pamilya, ug dayon makahimo ka na sa pagdula hangtud mongitngit.” Iya kaming gitudloan nga kon maghisgut man kabahin sa pagpangaon sa pamilya, dili ang pagkaon kondili ang pagpakigsuod sa pamilya ang mopakaon sa kalag. Ang akong inahan nagtudlo nga ang labing dako nga gugma nga atong mahatag anaa sa sulod sa atong mga panimalay.
Alang sa atong mga pakigsuod uban sa mga kabatan-onan aron tinud-anay nga matandog ang ilang mga kasingkasing, kinahanglan nga kita maminaw kanila sama nga kita maminaw sa usa ka gisaligan nga hamtong nga kauban o suod nga higala. Ang pinaka-importante mao ang pagpangutana kanila, tugutan sila nga mosulti, ug dayon andam nga maminaw—oo, maminaw ug maminaw pa—gani sa pagpatalinghug uban sa espirituhanon nga mga dalunggan! Pipila ka tuig na ang milabay nagbasa ako og mantalaan sa diha nga usa sa akong gamay pa nga apong lalaki mitapad og lingkod kanako. Samtang nagbasa ako, nahimuot ako sa pagkadungog sa iyang malumo nga tingog nga nagpatakag sulti diha sa luyo. Hunahunaa ang akong kakugang sa dihang, pipila ka mga gutlo sa wala madugay, misal-ut siya kanako ug sa mantalaan. Gihakop ang akong nawong sa iyang mga kamot ug giduot ang iyang ilong sa akong ilong, siya nangutana, “Lolo! Anaa ka ba diha?”
Inahan, Amahan, anaa ba kamo diha? Lolo, Lola, anaa ba kamo diha? Ang pagka anaa diha nangahulugan nga nakasabut sa mga kasingkasing sa atong mga kabatan-onan ug nagsumpay uban kanila. Ug ang pagkasumpay uban kanila nagpasabut nga dili lamang ang pagpakigsulti uban kanila kondili ang pagbuhat usab og mga butang nga kauban sila.
Bag-ohay pa lang akong nadungog ang usa ka inahan nga misaysay kon giunsa niya sa pagtabang ang iyang unang tulo ka anak nga mga babaye nga mahuman ang ilang mga kinahanglanon sa Personal nga Kauswagan pinaagi sa pagbuhat sa unsay gipaabut––ang paghulat nga pahibaloon ug ang pagpirma sa mga proyekto. Dayon sa malumo nga paagi siya mipasabut, ang mga luha midagayday sa iyang aping, “Bag-ohay pa lang nagtrabaho ako uban sa akong ikaupat nga anak nga babaye pinaagi sa pagbuhat gayud nga kauban ako sa iyang mga proyekto. Nakahimo kini og dakong kalainan sa among mga kinabuhi ug sa among relasyon. Apan ah, subo kaayong palandungon sa dihang akong naamgohan kon unsa ang nawala kanako tungod sa wala nako pagbuhat niini uban sa akong laing tulo ka anak nga mga babaye.” Ang labing makapaguol nga mga pulong nga masulti ug masulat mao kadtong nag-ingon nga, “Mao unta kadto!”1
Ang hingkod nga mga miyembro sa Simbahan kinahanglang makasabut nga ang mga gikinahanglan sa Personal nga Kauswagan ug Katungdanan ngadto sa Dios dili lamang tag-as nga mga lista sa mga butang nga tsekan. Kini personal nga mga tumong nga gihan-ay sa matag batan-ong lalaki ug batan-ong babaye aron sa pagtabang kanila nga mahimong takus nga modawat sa mga ordinansa sa templo, moserbisyo og mga misyon, mosulod ngadto sa mahangturon nga kaminyoon, ug motagamtam sa kahimayaan. Apan tugoti nga masabtan kini: ngadto sa batan-ong mga lalaki ug batan-ong mga babaye nga mosulay sa paghuman niini nga mga tumong nga mag-inusara mamahimo nga usa ka dakong kapildihan ug trahedya!
Mga amahan, mga inahan, ug mga lider sa mga kabatan-onan, kami moawhag kaninyo sa pagsalmot sa Personal nga Kauswagan ug sa Katungdanan ngadto sa Dios kauban sa inyong mga anak ug sa mga kabatan-onan. Dili lamang sila motubo, kamo usab motubo. Ug sama usab ka importante, kamo manag-uban nga motubo diha sa panagbugkos sa hugot nga pagtuo ug panaghigalaay nga motugot kaninyo sa paglig-on sa usag usa ug sa pagpabilin diha sa dalan sa ebanghelyo sa kahangturan, ngadto sa pagkahimo gayud nga usa ka mahangturong pamilya.
Ang kapareho nga importanteng bahin sa pagtuman sa atong pagkaginikanan nga katungdanan ngadto sa Dios mao ang pagtudlo sa atong mga anak sa ebanghelyo ug sa pag-andam kanila sa hingpit nga pag-apil sa gipahiuli nga Simbahan sa Manluluwas. Hinumdumi ang leksyon sa katawhan ni Haring Benjamin. Isip resulta sa iyang mga pagtulun-an, daghan sa mga hingkod nakabaton og dakong kausaban sa kasingkasing (tan-awa sa Mosiah 5:2). Apan dayon kini nag-ingon nga “adunay daghan sa mga bag-o nga kaliwatan nga dili makasabut sa mga pulong ni Haring Benjamin, ingon nga gagmay pa nga mga bata sa panahon nga siya namulong ngadto sa iyang mga katawhan; ug sila wala motuo.… Ug ang ilang mga kasingkasing mga tig-a” (Mosiah 26:1, 3).
Ato kining dili malikayan nga katungdanan sa pagtabang sa mga kabatan-onan nga makasabut ug motuo sa ebanghelyo sa hilabihan ka personal nga paagi. Makatudlo kita kanila sa paglakaw diha sa kahayag, apan kana nga kahayag dili mahulaman. Sila kinahanglan gayud nga makabaton niini sa ilang kaugalingon. Sila kinahanglan gayud nga makabaton sa ilang kaugalingong kahayag sa pagpamatuod direkta gikan sa tinubdan sa espirituhanon nga kahayag––ang Dios mismo sa Iyang kaugalingon––pinaagi sa pag-ampo ug pagtuon ug pagpamalandong. Sila kinahanglan gayud nga makasabut kon kinsa sila ug kon si kinsa sila sa umaabut nga maoy gusto sa Langitnong Amahan kanila. Unsaon man nato sila pagtabang?
Kon kita adunay family home evening, family council, o usa ka makahuluganong panaghisgut sa ebanghelyo uban sa atong mga anak, kita adunay kahigayunan sa pagtan-aw sa ilang mga mata ug sa pagsulti kanila nga kita nahigugma kanila ug nga ang Langitnong Amahan nahigugma kanila. Niining sagrado nga mga kahimtang, kita usab makatabang kanila nga makasabut, sulod sa ilang mga kasingkasing, kon kinsa sila ug unsa sila ka palaran nga sila nakaanhi dinhi sa yuta ug sa atong panimalay ug nakaapil sa mga pakigsaad nga atong gihimo sulod sa templo aron mahimong usa ka pamilya hangtud sa kahangturan. Sa matag pakigsuod nga atong gipakigbahin, atong gipakita ang mga baruganan ug mga panalangin sa ebanghelyo.
Niining walay kasigurohan nga mga panahon dili paigo alang sa atong mga kabatan-onan nga masayud lamang. Sila kinahanglan gayud nga mobuhat. Ang kinasingkasing nga pag-apil diha sa mga ordinansa, mga korum ug mga auxiliary, sa dinasig nga mga programa, ug makapalig-on nga mga kalihokan makatabang sa mga kabatan-onan nga mosul-ob sa tibuok hinagiban sa Dios. Makatabang ba kita kanila sa pagpasul-ob sa hinagiban aron sila makasugakod sa nagdilaab nga pana sa kaaway? Aron tinuod nga makapili sa pamaagi sa Ginoo, kinahanglan gayud nga sila masayud sa Iyang pamaagi. Ug aron tinuod nga masayud sa Iyang pamaagi, kinahanglan gayud nga kita motudlo ug mangulo kanila sa paglihok, sa pag-apil, sa paghimo.
Ang labing mahinungdanon nga misyonaryo nga buhat nga sukad atong mahimo mao ang diha sa atong kaugalingon nga mga panimalay. Ang atong mga panimalay, mga korum, ug mga klase parte sa nataran sa misyon. Ang atong mga anak ug mga apo mao ang atong labing importante nga mga investigator.
Ang labing mahinungdanon nga buhat sa family history nga atong mahimo mao ang diha sa atong kaugalingon nga mga panimalay. Kini mao ang espirituhanon nga pagpangandam sa atong mga anak sa bag-o nga kaliwatan nga, pinaagi sa ilang pagkamasulundon, mopaniguro sa mahangturon nga pagpreserbar ug pagpabilin sa atong mga pamilya sa umaabut nga mga kaliwatan.
Ang labing mahinungdanon nga pagluwas, ang labing mahinungdanon nga pagpaaktibo mao ang diha sa atong mga panimalay. Kon adunay usa ka tawo sa inyong pamilya nga mipili og lahi nga agianan, kamo usa ka tigluwas, nagbuhat sa labing mahinungdanong paningkamot sa pagluwas nga sukad nahibaloan sa Simbahan. Ako mopamatuod gikan sa akong kaugalingong kasinatian: Walay kapakyasan gawas kon kamo mohunong. Walay sayo ra kaayo o ulahi na kaayo sa pagsugod. Ayaw kabalaka kon unsay nahitabo sa nanglabay. Punita ang telepono. Paghimo og mubo nga sulat. Pamisita. Buhata ang pagdapit sa pagpabalik. Ayaw kahadlok o kaulaw. Ang inyong anak mao ang anak sa Langitnong Amahan. Kamo nagbuhat sa Iyang buluhaton. Siya misaad nga pundukon ang Iyang mga anak, ug Siya magauban kaninyo.
Ang labing mahinungdanon nga pagtuo nga atong naangkon mao ang diha sa sulod sa atong mga panimalay samtang nagpabilin kita nga lig-on diha sa mga pagsulay ug mga kasakit sa pagkaginikanan. Ngadto sa gamayng pundok sa mga inahan, si Presidente Monson bag-ohay pa lang nga miingon, “Usahay dali ra natong husgahan ang epekto sa atong mga kalampusan ug mga kapakyasan.” Mahimo ba nga ako modugang, ayaw tan-awa ang mga pagsulay karon nga mahangturon. Ang Langitnong Amahan naghimo sa Iyang buhat sa taas nga tagal sa panahon. “Aduna pay daghan nga umaabut,” si Propeta Joseph Smith miingon. “Busa, … kita magmalipayon sa pagbuhat sa tanan nga mga butang nga ubos sa atong gahum; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag” (D&P 123:15, 17).
Niining Dominggo sa Pagkabanhaw manghinaut ako nga kita adunay oportunidad sa paghatag sa atong mga pagpamatuod nga kita nasayud nga ang Dios buhi ug si Jesus mao ang Kristo. Manghinaut ako nga kita mohatag sa atong mga pagpamatuod aron ang atong mga anak masayud kon asa ang atong mga kasingkasing ug nga kita nahigugma kanila. Ang labing dako nga gugma ug labing mahinungdanon nga mga pagpanudlo kinahanglang anaa diha sa atong mga panimalay.
Akong gipangamuyo nga ang mga panalangin sa Ginoo maanaa sa mga ginikanan ug sa mga kabatan-onan nga nagdako diha sa matinud-anon nga mga panimalay, nga sila makasabut nga kini hingpit nga kalipay nga maanaa sa usa ka panimalay ug pamilya diin sila higugmaon, ug giyahan. Kini mao ang akong pag-ampo nga kita unta adunay mahangturon nga mga pamilya ug manag-uban hangtud sa kahangturan didto sa presensya sa Dios nga Amahan ug sa Iyang Anak, si Jesukristo.
Akong ihatag ang akong espesyal nga pagsaksi nga si Jesukristo buhi. Siya ang magbalantay sa nangawalang karnero, ang tigluwas sa nasalaag nga kalag, ang tig-ayo sa magul-anon nga kasingkasing, ang paglaum sa tanang katawhan. Uban Kaniya isip atong Manluluwas, atong tumanon ang atong katungdanan ngadto sa Dios uban sa hugot nga pagtuo Kaniya ug sa Iyang mahangturon nga gugma alang sa matag usa kanato, ako nag-ampo sa pangalan ni Jesukristo, amen.