Elder Jairo Mazzagardi

Sa Seventy

Si Elder Jairo Mazzagardi nasayud unsa ang kahulugan sa paghimo og mga sakripisyo sa pagserbisyo sa Ginoo. Niadtong 1990, si Elder Mazzagardi nakadawat og tawag sa telepono gikan ni Presidente Thomas S. Monson, kaniadto usa pa ka magtatambag sa Unang Kapangulohan, kinsa mitawag kaniya sa pagdumala sa Salvador Brazil Mission.

“Wala gayud ako nagdamgo nga ako mahimong usa ka mission president,” miingon si Elder Mazzagardi. “Nahimo akong stake president nga wala pay lima ka tuig. Ang mga butang busy gayud—ug maayo—uban sa among negosyo. Ang pagdawat niini nga call nagpasabut nga biyaan ang tanang butang.”

Sa pagtapos sa tawag sa telepono, si Presidente Monson mitanyag kang Elder Mazzagardi og panahon sa paghunahuna sa calling. Apan si Elder Mazzagardi ug ang iyang asawa nakahukom nang daan sa sayong katuigan nga ang ilang kinabuhi ipahinungod ngadto sa Ginoo, busa iyang gidawat ang call diha-diha dayon. “Bisan asa ang Ginoo nagkinahanglan kanamo, kami andam nga moadto,” siya miingon.

Sa wala pa ang iyang call sa Ikaduhang Korum sa Seventy, si Elder Mazzagardi mialagad isip magtatambag sa bishop, high councilor, counselor sa stake presidency, stake president, regional representative, Area Seventy, counselor sa kapangulohan sa Templo sa Campinas Brazil, ug presidente sa Templo sa São Paulo Brazil.

Si Elder Mazzagardi, usa ka negosyante, migahin sa iyang panginabuhi sa industriya sa karne ug sa wala madugay nakapanag-iya og kompanya sa real estate. Siya usab mialagad sa kasundalohan sa Brazil isip artillery sergeant gikan 1965 hangtud 1966. Siya natawo ngadto kang Antonio ug Margarida Mazzagardi niadtong Abril 1947 sa Itú, Brazil. Siya nagtubo didto ug diha sa Jundiaí, Brazil. Siya ug ang iyang asawa, si Elizabeth Ienne, nagkaila sa bata pa ug naminyo sa Hoboken, New Jersey, niadtong Hulyo 1970.

Hinoon sulod sa daghang tuig sila dili interesado sa Simbahan, human nga mibalik ang mga Mazzagardi sa Brazil, usa ka higala midapit kanila sa pagtambong sa open house Templo sa São Paulo Brazil. Didto, silang duha adunay gamhanang espiritwal nga mga kasinatian. Sila nabunyagan niadtong Oktubre 31, 1978, ug na-sealed isip usa ka pamilya niadtong Nobyembre 1979. Ang mga Mazzagardi adunay tulo ka anak.