Rosemary M. Wixom

Kinatibuk-ang Presidente sa Primary

Sa kalibutan nga puno sa kasaba ug walay kasiguradoan, ang mga bata kinahanglan nga makadiskobre unsaon sa pagpaminaw sa mga hung-hong sa Espiritu, miingon si Rosemary Mix Wixom, bag-ong gipaluyohan isip kinatibuk-ang presidente sa Primary.

“Ang mga bata makakaplag og kasiguradoan diha sa pag-ampo,” siya miingon. “Sila mahimong masayud nga sila wala mag-inusara, nga ang Manluluwas molakaw uban kanila, ug Siya nahigugma kanila—bisan kon sila makahimo og mga sayop.”

Natawo niadtong Disyembre 1948 kang Robert Wayne ug Mary Mix, si Sister Wixom nagtubo sa Siyudad sa Salt Lake, Utah, USA. Samtang nagtubo siya, ang kaluha niya nga igsoon mao ang iyang labing suod nga higala, ug ang iyang mga ginikanan nagtudlo kaniya sa paghatag uban sa malipayon nga kasingkasing “Kon ako molakaw pasulod diha sa pultahan sa among balay, ako mobati og kasigurado,” miingon si Sister Wixom.

Sa dihang 12 anyos na siya, ang iyang balatian sa pagkasigurado mas nagkalawom. Samtang naglingkod sa usa ka miting sa pagpamatuod, sa kalit lang siya mibati og kusog nga tinguha sa pagpahayag sa iyang mga pagbati kabahin sa Manluluwas. “Mibarug ako, ug ang akong gugma alang kang Jesus midagayday lang,” mihinumdom si Sister Wixom. Ang iyang inahan mitabang kaniya sa pagsabut nga kadto mao ang Espiritu Santo kinsa nagdasig sa iyang mga pagbati.

“Wala gayud ako nasayud sa Espiritu Santo sa ingon kagamhanan ug katinuod,” miingon si Sister Wixom. Mga tuig ang milabay ang Espritu Santo mihatag kaniya og usa ka malukopon nga pagbati sa kalinaw samtang siya nag- ampo kabahin sa usa sa iyang mga anak. Ang iyang paglaum karon mao nga ang mga ginikanan ug mga lider ug mga magtutudlo sa Primary makatabang sa mga bata sa pagkat-on sa pagpaminaw sa mga hung-hong sa Espiritu Santo.

Si Sister Wixom nakaangkon og bachelor’s degree in education gikan sa Utah State University. Siya ug ang iyang bana, si Blaine Jackson Wixom, naminyo sa Templo sa Salt Lake niadtong Agosto 18, 1970. Sila ginikanan sa unom ka anak.

Si Sister Wixom usa ka miyembro sa Primary general board sa wala pa nangalagad uban sa iyang bana sa dihang siya nagdumala sa Washington D.C. South Mission. Si Sister Wixom sa wala madugay nangalagad sa Young Women general board, diin siya nag-alagad hangtud sa iyang call isip kinatibuk-ang presidente sa Primary.