Kita Nagsunod ni Jesukristo
Kita nagmaya sa tanang nabuhat sa Manluluwas alang kanato. Siya mihimo niini nga posible alang kanato aron pag-angkon sa atong kaluwasan ug kahimayaan.
Usa kini ka mahinungdanong responsibilidad sa pagpamulong niining Dominggo sa Pagkabanhaw ngadto sa mga Santos sa Ulahing mga Adlaw sa tibuok kalibutan, kinsa nahigugma sa atong Ginoo ug Manluluwas, nga si Jesukristo. Kita nagsaulog niining buntaga sa Iyang kadaugan batok sa kamatayon. Atong gihambin ang atong salabutan ug mibati og kinasingkasing nga pagpasalamat alang sa kaandam sa maulaong sakripisyo sa Manluluwas alang kanato. Ang Iyang pagsunod sa kabubut-on sa Iyang Amahan nakaangkon og langitnong kadaugan batok sa kamatayon ug mao ang talagsaon nga panghitabo sa kasaysayan sa katawhan. Akong gipasalamatan kini nga kahigayunan sa pagpamulong mahitungod sa pagsunod sa Manluluwas.
Ang katapusang duha ka adlaw sa mortal nga pangalagad sa Manluluwas sa wala pa ang Iyang pagkalansang hilabihan ka importante ug sa pipila ka mga paagi lisud kaayo nga masabtan. Daghan sa mga gikinahanglan alang sa atong mahangturon nga kapalaran nahitabo niana nga Huwebes ug dayon pagka Biyernes, sa adlaw nga si Kristo gilansang. Ang Katapusang Panihapon, usa ka Pagpalabay nga panihapon, ang “naestablisar na nga handumanan sa pagkalingkawas sa Israel gikan sa pagkaulipon,”1 nagsugod sa Huwebes sa gabii. Ang mga ordinansa ug mga doktrina nga hilabihan ka importante gipasiugdahan diha sa Katapusang Panihapon. Mohisgot lamang ako og tulo. Una, ang Manluluwas mipasiugda sa ordinansa sa sakrament. Mikuha Siya og pan, gipikas-pikas kini, giampoan kini, ug gipasa kini ngadto sa Iyang mga tinun-an, nag-ingon, “Kini mao ang akong lawas nga gihatag alang kaninyo: buhata ninyo kini sa paghandum kanako.”2 Niini nga paagi, iyang gipasiugdahan ang sakrament. Ikaduha, ang Iyang gihatagan gayud og gibug-aton mao ang kalabut sa mga doktrina sa pagtudlo og gugma isip nag-una nga mga baruganan. Siya nagtudlo, “Ang tanang mga tawo makaila nga kamo mga tinun-an ko pinaagi niini kon kamo maghigugmaay sa usa sa usa.”3 Ikatulo, pinaagi sa pagpangamuyo o pagdumala ni Kristo, “ang Espiritu Santo gisaad ngadto sa mga apostoles” isip lain nga Maghuhupay. 4
Ang Manluluwas pagkahuman niana mihingpit sa Pag-ula. Iyang giangkon sa Iyang kaugalingon ang “palas-anon sa mga sala sa katawhan” ug ang mga kalisang nga mapahamtang … ni Satanas.”5 Niini nga proseso giantus Niya ang malimbungon nga mga paghusay ug ang makahahadlok, subo nga mga panghitabo nga misangput sa Iyang Pagkalansang. Kini sa katapusan misangko sa madaugong Pagkabanhaw ni Kristo pagka Dominggo sa Pasko sa Pagkabanhaw. Si Kristo mituman sa Iyang sagrado nga misyon isip Manluluwas ug Manunubos. Kita mabanhaw gikan sa kamatayon ug mahiusa ang atong mga espiritu uban sa atong mga lawas. Gibase sa personal nga katakus, kita pinaagi sa Iyang grasya, makabaton og mahimayaong kahigayunan sa pagsulod og balik ngadto sa presensya sa Dios.6
Si Propeta Joseph Smith, sa paghisgot kabahin sa panghitabo niining Pasko sa Pagkabanhaw, miingon, “Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabutan sa atong relihiyon sumpay lamang niini.”7
Samtang kita nagmaya sa langitnong kahulugan sa Getsemani ug sa Kalbaryo, ang atong tunong kanunay mao ang nabanhaw nga Ginoo. Si Frederic Farrar, ang English nga theologian ug tumutuo, mipamatuod nga ang pinakauna nga henerasyon sa mga tumutuo, sa unang Kristohanon nga Simbahan mitawag sa Manluluwas isip “ang Nabanhaw, ang Mahangturon, ang Gihimaya nga Kristo” ug “mihunahuna Kaniya, nga dili diha sa krus, kondili diha sa Trono.”8
Si Presidente Hinckley nagtudlo nga ang atong mensahe ngadto sa kalibutan mao nga Siya buhi! Ang simbolo ni Kristo alang sa mga Santos sa Ulahing mga Adlaw makita diha sa makahuluganon nga pagpahayag sa atong hugot nga pagtuo ug sa pamaagi sa atong pagsunod sa Iyang ebanghelyo.9
Samtang mamalandong kita kon unsay kahulugan sa pagkahimo nga mga Kristohanon karon, hunahunaa kon unsay gikinahanglan kanato sa atong pagkahimo nga disipulo. Akong isugyot nga kita maghunahuna ug sa tukma nga mga paagi magsunod sa gihimo sa Manluluwas niadtong katapusang duha ka adlaw sa Iyang mortal nga kinabuhi.
Una, hunahunaa ang gipasiugdahan sa Manluluwas nga sakrament. Ang Manluluwas nasayud kon unsay mahitabo Kaniya. Ang Iyang sagrado, maulaon nga misyon, nga nagsugod sa Gubat didto sa Langit sa kinabuhi sa wala pa dinhi sa yuta, maoy hapit na mahitabo nianang gabhiuna ug sa pagkasunod adlaw. Bisan pa man uban sa mga pagsulay pinaagi sa Iyang mga kaaway nga duol na kaayo Kaniya, walay bisan gamay kaayong ebidensya nga Siya nangandam sa pagpanalipud batok sa walay kamatuoran nga mga pasangil. Ang Manluluwas hinoon mipasiugda sa sagrado nga ordinansa sa sakrament ngadto sa Iyang mga tinun-an. Samtang namalandong ako nianang balaang panghitabo, ang akong mga pagbati natandog kaayo. Ang miting sa sakrament mao ang sagrado kaayo ug balaan sa tanang mga miting sa Simbahan. Human sa Iyang Pagkabanhaw, ang Manluluwas mihimo sa sakrament ngadto sa mga Nephite.10 Kon kita buot nga mahimo Niyang mga tinun-an ug mahimong mapasaligon nga mga miyembro sa Iyang Simbahan, kita kinahanglan nga mahinumdom ug mohatag og balaang pagtahud sa sakrament. Nagtugot kini sa matag usa kanato sa pagpahayag uban sa masulub-on nga mga kasingkasing ug mahinulsulon nga mga espiritu sa atong pagkaandam sa pagsunod sa Manluluwas, sa paghinulsol ug mahimong usa ka Santos pinaagi sa pag-ula ni Kristo.11 Ang sakrament nagtugot usab kanato sa pagsaksi ngadto sa Dios nga kita maghinumdom sa Iyang Anak ug maghupot sa Iyang mga sugo samtang magbag-o kita sa atong pakigsaad sa bunyag.12 Kini nagpalambo sa atong gugma ug pasalamat sa Amahan ug sa Anak.
Ang Manluluwas usab mipasabut sa gugma ug panaghiusa ug mipahayag nga kita mailhan isip Iyang tinun-an kon kita maghigugmaay. Kon atong ikonsiderar ang Pag-ula, diin adunay mahangturong sangputanan nga Iyang pagabuhaton, ang ingon nga sugo nagkinahanglan sa atong pagsunod. Kita nagpakita sa atong gugma sa Ginoo kon kita naghupot sa Iyang mga sugo ug nag-alagad sa Iyang mga anak. Kita wala kaayo makatugkad sa Pag-ula, apan kita makagahin sa atong kinabuhi sa paninguha nga magmahigugmaon ug maloloy-on bisan pa man sa kalisdanan nga atong gisinati.
Ang sugo sa Manluluwas ngadto sa Iyang mga tinun-an sa paghigugmaay—ug ang talagsaon ug gamhanang paagi sa Iyang pagtudlo niini nga baruganan sa Katapusang Panihapon—usa sa mahinuklugon ug maanindot nga mga yugto sa katapusang mga adlaw sa Iyang mortal nga kinabuhi.
Wala Siya magtudlo og yano nga klase sa matarung nga pamatasan. Kini ang Anak sa Dios nga nangamuyo uban sa Iyang mga Apostoles ug sa tanang tinun-an kinsa magsunod kanila sa paghinumdom ug sa pagtuman niining pinaka-importante sa Iyang mga pagtulun-an. Ang atong pakigrelasyon ngadto sa uban mao ang sukod sa atong pagkaandam nga mosunod ni Jesukristo.
Samtang kita maminaw sa mga mensahe niini nga komperensya, matandog ang atong kasingkasing ug mopasalig sa pagbuhat sa labing maayo. Apan inigka Lunes sa buntag mamalik na kita sa trabaho, eskwelahan, sa kasilinganan, ug sa kalibutan nga kadaghanan anaa ang kasamok. Kadaghanan niini nga kalibutan mahadlukon ug masuk-anon sa usag usa. Samtang nakasabut kita niini nga mga pagbati, kita kinahanglang magbaton og pamatasan sa atong pakigsulti ug matinahuron sa atong mga pakig-uban. Tinuod kini ilabi na kon dili kita magkauyonay. Ang Manluluwas nagtudlo kanato sa paghigugma bisan sa atong kaaway.13 Kinabag-an sa atong mga miyembro mituman niini nga tambag. Hinoon adunay pipila nga mobati nga ang pagpahungaw sa ilang personal nga kasuko o gihuptan nga opinyon mas importante kay sa pagpakita sa ilang mga kaugalingon sama sa gisunod ug gitudlo ni Kristo. Akong dapiton ang matag usa kanato, sa indibidwal nga paagi, sa pagkaila nga ang atong pagsupak maoy usa ka tinuod nga sukdanan kon kinsa kita ug kon tinuod ba kitang mosunod sa Manluluwas. Mahimo ra nga dili mouyon, apan dili maayo nga dili ka kauyunan. Ang pagpangisog ug pagpangguba dili tubag sa atong panagsumpaki. Kon kita magpakita og gugma ug pagtahud bisan sa mga malisud nga kahimtang, nahimo kitang mas labaw ka sama ni Kristo.
Ang saad sa Manluluwas kabahin sa Espiritu Santo ngadto sa Napulog Duha hilabihan ka importante sa pag-ila sa dili hitupngan nga tahas sa Espiritu Santo, ang ikatulong sakop sa Dios nga Kapangulohan. Ang Espiritu Santo usa ka personahe nga espiritu, ang Maghuhupay, kinsa nagpamatuod sa Amahan ug sa Anak, nagpadayag sa kamatuoran sa tanang butang, ug nagbalaan sa mga naghinulsol ug nabunyagan. Siya ang gipasabut isip ang Balaan nga Espiritu sa Saad ug sa ingon mopamatuod isip madawat sa Dios nga matarung nga buhat, mga ordinansa, ug mga pakigsaad sa matag usa kanato.14 Sila kinsa gibugkos sa Balaang Espiritu sa Saad makadawat sa tanang anaa sa Amahan.15
Kita nagpuyo sa samok, mabingkilon nga kalibutan diin posible nga makatan-aw o maminaw og kasayuran, musika, o bisan puro walay hinungdang mga sugyot matag adlaw. Kon gusto natong makabaton og pagdasig sa Espiritu Santo, kinahanglan nga mangita kita og higayon sa paghinay-hinay og pamalandong, pag-ampo, ug pagsunod aron kita takus nga modawat ug molihok sa Iyang mga pag-aghat. Malikayan nato ang dagkong mga sayop kon mopatalinghug kita sa Iyang mga pahimangno. Atong kahigayunan isip mga miyembro ang pagdawat sa kahayag ug sa kahibalo gikan Kaniya bisan sa tibuok adlaw.16
Ang maulaong mga pagsulay nga giatubang sa Manluluwas didto sa Getsemani ug sa krus maoy mahinungdanong ehemplo ngari kanato. Siya nakasinati og mental, pisikal, ug espirituhanong mga kasakit nga lisud natong masabtan. Sa tanaman Siya nag-ampo sa Iyang Amahan nga nag-ingon, “Amahan ko, kon mahimo man, isaylo lang kanako kining kopa: gani, dili sumala sa akong pagbuot, kondili sa imo.”17 Isip Iyang mga disipulo, may mga higayon nga kita sulayan ug gukuron sa dili makatarungan nga paagi ug biay-biayon sa dili makiangayong paagi ug magsinati og temporal ug espirituhanong mga pagsulay sa gidak-on nga ingon og dili nato madaog ug makasinati og pait nga mga kopa nga kita mag-ampo nga kini isaylo gikan kanato. Walay usa nga makalikay sa mga kalisdanan sa kinabuhi.
Kita nangandam alang sa Ikaduhang Pag-anhi sa Manluluwas. Ang mga kasulatan nagklaro nga walay usa nga nasayud kon kanus-a kini mahitabo. Ang mga kasulatan nagsulti kanato nga sa katapusang adlaw, uban sa mga malisud nga pagsulay nga atong masinati, adunay “mga linog sa nagkalainlaing dapit”18 ug ang “mga balud sa dagat mobanlas sa ilang kaugalingon lapas sa ilang naandan nga gilay-on.”19
Makalaglag nga mga linog ug mga tsunami bag-uhay pa lang nahitabo sa nagkalainlaing mga dapit lakip sa Chile, Haiti, ug sa mga isla sa Pasipiko. Pipila ka semana ang milabay si Presiding Bishop H. David Burton, Elder Tad R. Callister, ug ako nakahimamat sa mga Santos nga nawad-an og mga sakop sa pamilya nga resulta sa tsunami nga miigo sa silangang bahin sa Samoa niadtong Septyembre. Ang simbahan napuno, ug kini nahimong mahinuklugon nga miting. Kami nakahimo sa pagpasalig niining takus nga mga miyembro nga tungod sa pag-ula ni Jesukristo, sila magkauban pag-usab uban sa mga minahal nga nawala kanila.
Ang stake president, nga si Sonny Purcell, nagdrayb sa iyang sakyanan sa dihang iyang nakita ang dagko kaayo nga balud nga nagsingabut gikan sa lawud. Siya mibusina ug gipahunong ang mga bata diha sa karsada nga naglakaw paingon sa eskwelahan ug gipahimangnoan sila sa pas-pas nga pagpalayo kutob sa mahimo ngadto sa mas taas nga dapit ug sa kaluwasan. Ang mga bata misunod sa iyang mando. Nalisang siya nga nadrayb, gikuha ang iyang 4 ka tuig nga anak ug gipasakay sa sakyanan, ug dayon naninguha sa pagkuha sa iyang inahan. Sa wala pa siya makaabut sa iyang mama, ang dakong tubig mihapak sa iyang sakyanan ug gianud kini og labaw pa sa 90 ka metros diin nasang-at sa usa ka kahoy. Dali siya nga milihok aron sa pagsiguro sa iyang anak sa ibabaw sa sakyanan ug dayon milangoy aron sa pagluwas sa iyang inahan nga nagkapyot sa sanga sa laing kahoy nga duol sa ilang balay. Uban sa dakong paningkamot milangoy sila ngadto sa sakyanan ug sa kaluwasan. Daghan ang dili ingon ka swerte. Sila walay igong higayon sa pag-adto sa mas taas nga dapit ug sa kaluwasan. Daghan ang nakabsan sa ilang kinabuhi, ilabi na mga batan-on ug tigulang.
Among gisultihan ang mga pamilya sa Samoa nga ang mga miyembro sa tibuok kalibutan nahigugma ug nabalaka ug nag-ampo alang kanila ug mihatag og halad sa puasa ug tawhanong hinabang alang sa mga miyembro ug sa ilang mga silingan. Mao usab sa mga miyembro ug sa ilang mga silingan sa Chile ug sa Haiti. Kini atong gibuhat tungod kay kita nagsunod ni Jesukristo.
Samtang kami nakighimamat sa mga pamilya sa Samoa, ang kamahinungdanon sa pagtinguha sa mas taas nga espirituhanong kahimtang, sa pagpuyo og mas maayong kinabuhi, ug pagpabilin diha sa makaluwas nga mga ordinansa klaro kaayo. Ang ehemplo ug kinabuhi sa Manluluwas nagtudlo kanato nga likayan sa espirituhanong paagi ang kubos nga dalan, diin ang mga butang niining kalibutan nagpasulabi. Samtang nakiglamano ako sa mga miyembro human sa miting, usa ka sister misulti kanako nga ang iyang pamilya wala makaadto sa templo ug nawad-an silag usa ka anak. Siya naghilak nga miingon nga ang ilang tumong karon mao ang pag-andam sa ilang kaugalingon alang sa sagradong mga ordinansa sa templo aron sila magkauban sa kahangturan.
Samtang ako namalandong sa giingon sa sister ug sa kahimtang karon sa kalibutan, gibati nako ang kadinalian sa pagtambag kaninyo sa pagtinguha og mas taas nga dapit—ang dangpanan ug mahangturong panalipud sa templo.
Niadtong Dominggo sa Pasko sa Pagkabanhaw, Abril 3, 1836, usa ka semana human sa pagpahinungod sa Templo sa Kirtland, ang Napulog Duha mipahigayon sa pagpang-apud-apod sa sakrament sa Panihapon sa Ginoo ngadto sa mga miyembro. Human sa miting, sunod sa ligdong ug hilum nga pag-ampo, ang Manluluwas mipakita diha sa kahalangdon ngadto ni Propeta Joseph ug Oliver Cowdery ug pinaagi ni Moises, Elias, ug Elijah mipahibalo sa pagpahiuli sa dugang nga mga yawe sa priesthood lakip ang sagradong gahum sa pagbugkos nga maghiusa sa mga pamilya sa kahangturan.20
Karong buntaga sa Pasko sa Pagkabanhaw kita nagmaya sa tanang nabuhat sa Manluluwas kanato. Siya mihimo niining posible alang nato sa pag-angkon sa atong kaluwasan ug kahimayaan. Apan kita, sama sa kabataan sa Samoa, angay nga modagan og kusog kutob sa mahimo ngadto sa taas nga dapit nga Iyang gihatag kanato alang sa kasiguroan ug kalinaw.
Usa sa mga paagi aron kini atong mahimo mao ang pagsunod sa pagtulun-an sa atong buhing propeta, si Presidente Thomas S. Monson. Siya ang labing maayo nga ehemplo sa tawo nga nagsunod sa Manluluwas.
Niining mahimayaong buntag sa Pasko sa Pagkabanhaw akong sublion ang mga gibahandi nga pulong gikan sa himno nga gisulat ni Eliza R. Snow, usa ka matinud-anong sulugoon sa Pagpahiuli:
“Unsa ka talagsaon, unsa ka mahimayaon, unsa ka hingpit,
Ang dakong plano sa katubsanan,
Diin ang kaangayan, gugma, ug kalooy nagkahiusa
Sa balaanong panag-uyon!”21
Ako mohatag sa apostolikanhon nakong pagpamatuod nga si Jesukristo buhi ug mao ang Manluluwas ug Manunubos sa kalibutan. Siya mihatag og agianan sa tinuod nga kalipay. Niini ako magpamatuod sa pangalan ni Jesukristo, amen.