Kon ang Ginoo Mosugo
Ang matinud-anon nga pagkamasulundon, bisan unsa pa ka dako sa buluhaton, makahatag og giya, panabang, ug kalinaw sa Ginoo.
Adunay istorya mahitungod sa duha ka lalaki nga ganahan kaayo nga maglingaw-lingaw sa gawas kinsa miabang og usa ka gamay nga eroplano aron modala kanila ngadto sa usa ka hilit nga lim-aw alang sa ilang tinuig nga biyahe sa pagpangisda. Human sa usa ka malampuson nga pagbiyahe, ang piloto mibalik aron kuhaon sila. Apan, siya daling mipahibalo sa mga mangingisda nga ang iyang gamay nga eroplano dili makadaog kanila, sa ilang mga ekipo, ug sa nadugang nga gibug-aton sa mga isda nga ilang nakuha. Ang ikaduha nga biyahe ang gikinahanglan.
Karon, ang mahilig sa sports nga mga lalaki dili interesado nga mobayad alang sa ikaduha ka pagbalik nga biyahe. Busa human ang mga lalaki misaad nga ang ilang mga gamit tarungon og impake ug mibayad sa piloto og sobra nga kwarta, ang piloto nagpanagana nga miuyon sa pagsulay og biyahe.
Ang mga mangingisda sabtunon nga mingisi samtang ang piloto mipugos og palupad sa eroplano. Hinoon, pipila ka mga segundo ang milabay ang eroplano mitiurok ug nahagsa ngadto sa lapad, lapukong dapit sa tumoy sa lim-aw.
Ang eroplano mitiurok samtang naglupad kini tungod sa usa ka nailhan nga panghitabo nga gitawag og “ground effect.” Ang ground effect mamugna kon ang hangin maduot tali sa pako sa eroplano ug sa ibabaw sa yuta—kon kini hilabihan ka duol. Sa niini nga kahimtang, samtang ang gamay nga eroplano hinayhinay nga misaka gikan sa ground effect kini gikinahanglan nga molupad sa kaugalingon niining kusog, diin dili gayud makahimo.
Maayo na lang kay wala gayuy naangol, ug human maulian sa ilang mga panimuot, ang usa sa mga mangingisda nangutana sa usa, “Unsay nahitabo?” Ang kauban mitubag; “Nahagsa ta paglupad gyud—mga usa ka gatus ka yarda (91 m) gikan sa atong gihagsaan sa miaging tuig!”
Sama sa duha ka mangingisda, usahay nagtuo kita nga adunay mas sayon nga paagi, usa ka shortcut o pag-usab sa mga sugo sa Ginoo nga mohaum sa atong tagsa-tagsa ka mga kahimtang. Ang mga hunahuna nga sama niini mapakyas sa pag-ila nga ang higpit nga pagkamasulundon ngadto sa mga balaod sa Dios nagdala sa Iyang mga panalangin ug ang kapakyas sa pagsunod sa Iyang mga balaod mosangput ngadto sa makita nang daan nga mga sangputanan.
Sa panahon nga siya gitawag isip Presidente sa Simbahan, si Harold B. Lee miingon: “Ang kaluwasan sa Simbahan nag-agad sa mga miyembro nga nagsunod sa mga sugo.… Samtang nagsunod sila sa mga sugo, ang mga panalangin moabut.”1
Kon kita mopili sa pagsupak sa usa ka sugo, sa kasagaran kini tungod kay (1) atong nakombinser ang atong kaugalingon nga ang sugo dili alang kanato; (2) wala kita motuo nga kini importante; o (3) sigurado kita nga kini lisud kaayong sundon.
1. Kini nga Sugo Dili Alang Kanako
Sulod sa katapusang mga tuig sa pagdumala ni Haring Solomon, ang Ginoo mipahibalo kaniya pinaagi sa Iyang propeta, “Gision ko … ang gingharian gikan kanimo, ug ihatag ko kana sa imong ulipon.”2
Wala madugay, human niana si propeta Ahias miila niana nga ulipon nga mao si Jeroboam, usa ka “kugihan” nga tawo kinsa gihimo ni Solomon nga maoy “magbuot sa tanang buhat sa balay ni Jose.”3 Ang mga katungdanan ni Jeroboam nagkinahanglan nga siya mobiyahe gikan sa kabukiran sa Ephraim, diin siya nagpuyo, ngadto sa kaulohan sa Jerusalem. Atol sa usa niadto nga mga biyahe, nahimamat niya si Ahias diha sa dalan. Pinaagi kang Ahias, ang Ginoo miingon, “Ako mohatag … og napulo ka mga banay kanimo.”4 Siya usab mipahimangno ni Jeroboam,“Kon ikaw … molakat sa akong mga dalan … sa pagbantay sa akong kabalaoran ug sa akong mga sugo, … ako magauban kanimo … ug ihatag ko ang Israel kanimo.”5
Human madungog ang panagna ni Ahias, si Solomon nagtinguha sa pagpatay kang Jeroboam, busa si Jeroboam milalin ngadto sa Ehipto.6 Human sa kamatayon ni Solomon si Jeroboam mibalik gikan sa Ehipto ngadto sa amihanang bahin sa Israel ug misugod sa pagpangulo sa amihanang napulo ka mga tribo.7
Hinoon, ang plano ni Jeroboam sa pagdumala sa gingharian gilangkuban og nagsagol nga kaayo ug kadautan. Iyang gitukod ang Shechem nga mao ang kaulohan sa nasud, usa ka siyudad nga may dakong relihiyusong kamahinungdanon ngadto sa iyang mga katawhan. Apan makapaguol lang kay siya mipaila og yawan-on nga mga ritwal ngadto sa ilang pagsimba.8
Si Jeroboam mikombinser sa iyang kaugalingon nga pipila sa mga sugo sa Dios dili alang kaniya. Isip resulta sa iyang mga binuhatan, ang tanan niyang kaliwatan gipatay, ug tungod sa dautan nga mga buhat nga iyang gipaila ngadto sa ilang sagrado nga mga ordinansa, ang napulo ka mga tribo sa Israel gipapahawa gikan sa ilang yuta nga panulundon.9
Sama sa paglupad pagawas sa ground affect nga may gibug-aton nga labaw pa sa madaog sa mga pako sa eroplano modala paingon ngadto sa makalaglag nga mga sangputanan, ang atong dili hingpit o pinili lang nga pagsunod sa mga balaod sa Dios makapakyas sa pagdala sa hingpit nga mga panalangin sa pagkamasulundon.
2. Kini nga Sugo Dili Importante
Mga dekada ang milabay si Naaman, usa ka Sirianhon nga bayani sa gubat, “usa ka gamhanang tawo sa kaisug,”10 mibiyahe gikan sa iyang lumad nga nasud ngadto sa Israel ug mihangyo sa hari, si Joram, nga ayohon sa sangla.11
Si Naaman gipaadto kang propeta Eliseo. “Ug si Eliseo nagpadala og usa ka sulugoon ngadto kaniya, nga nagaingon, Lakaw ug maghugas ka didto sa Jordan sa makapito, … ug ikaw mahinlo.”12
Bisan pa niining mapanagnaon nga saad nga mamaayo, si Naaman nasuko nga si Eliseo wala makigkita kaniya ug gani mas labaw nga nainsulto sa sugo sa propeta nga manghugas sa makapito didto sa gamay ug lapukon nga Suba sa Jordan. Ang iyang garbo nangayo og usa ka butang nga mas talagsaon ug halangdon, usa ka butang nga motukma sa iyang kahimtang ug nahimutangan diha sa komunidad ug sa nasud.
Maayo na lang kang Naaman, ang iyang mga sulugoon mikumbinsir kaniya nga bisan unsa pa man ang isugo sa propeta nga iyang buhaton, kon tumanon, kini magdala og mga panalangin sa Ginoo. Si Naaman mihugas sa iyang kaugalingon didto sa Suba sa Jordan sama sa gimando ug, isip resulta sa iyang pagkamasulundon, naayo sa iyang sangla.13
Ang pagkamasulundon sa mga sugo sa Ginoo, bisan kon unsa pa ka gamay o dili kaayo importante ang atong gituohan niini, sigurado gayud nga makadala sa Iyang gisaad nga mga panalangin.
3. Kini nga Sugo Lisud Gayud Kaayo
Human sa mando sa Ginoo, si propeta Lehi midala sa iyang pamilya ngadto sa kamingawan. Sulod sa unang pipila ka adlaw sa pagpanaw, si Lehi mipahimangno sa iyang anak nga lalaki nga si Lemuel nga mahimong “hugot ug makanunayon, ug dili matarug sa paghupot sa mga sugo sa Ginoo!”14
Hinoon, sa dihang miabut ang mapanagnaon nga panginahanglan sa pagbalik ngadto sa Jerusalem aron sa pagkuha sa mga palid nga tumbaga, nga naglangkob sa “talaan sa mga Judeo,”15 ang duha ka kinamagulangan nga mga lalaki misupak, nga nag-ingon, “Kini usa ka malisud nga butang.”16
Bisan pa man sa mga pagbagulbol sa iyang magulang nga igsoon, ang hugot nga pagtuo ug ang pagkamasulundon ni Nephi ngadto sa mga sugo sa Ginoo misangput ngadto sa pagkakuha niadtong mga palid nga tumbaga. Ang usa ka nasud natukod, usa ka pinulongan ang napreserbar, ug ang ebanghelyo ni Jesukristo natudlo sa daghang mga henerasyon nga moabut.
Usahay tingali mangatarungan kita nga ang Ginoo mosabut sa atong pagkamasinupakon tungod kay ang atong espesyal nga mga kahimtang nakapahimo sa pagsunod sa Iyang mga balaod nga malisud, makauulaw, o gani sakit kaayo. Hinoon, ang matinud-anon nga pagkamasulundon, bisan unsa pa ka dako sa buluhaton, makahatag og giya, panabang, ug kalinaw sa Ginoo
Si Propeta Joseph Smith mihangyo sa Ginoo sa duha ka higayon, nangutana kon ang usa ka inila nga higala, si Martin Harris, makadala ba sa unang 116 ka sinulat sa kamot nga mga pahina sa gihubad nga materyal gikan sa basahon ni Lehi gikan sa Harmony, Pennsylvania, balik ngadto sa Palmyra. Matag higayon, ang Ginoo mitambag ni Joseph nga dili isalig ang manuskrito ngadto ni Mr. Harris.
Si Martin nagtinguha sa paggamit sa gihubad nga materyal isip ebidensya aron sa pagpahunong sa iyang mga kauban sa pagpakatap sa mga tabi-tabi mahitungod sa iyang pakighigala ni Joseph Smith. Sa ikatulo nga paghangyo ang Ginoo misugot sa gihangyo ni Joseph.17
Nawala ni Martin ang manuskrito, ug isip resulta ang mga palid gikuha gikan ni Propeta Joseph Smith sulod sa taas nga panahon. Kining usa ka sakit nga leksyon alang kang Propeta Joseph, kinsa miingon, “Ako kining gihimo nga lagda: Kon ang Ginoo mosugo, buhata kini.”18 Kini mao gyud ug mahimo usab nga atong lagda.
Ang tubag sa Ginoo kon kita mosunod sa Iyang mga sugo sigurado. Siya misaad kanato, “Kon ikaw maghupot sa akong mga sugo ug molahutay ngadto sa katapusan ikaw makaangkon og kinabuhi nga dayon.”19
Agig dugang Siya mitambag kanato, “Ako, ang Ginoo, maloloy-on ug mabination ngadto niadto kinsa mahadlok kanako, ug mahimuot sa pagpasidungog niadto kinsa nag-alagad kanako sa pagkamatarung ug diha sa kamatuoran ngadto sa katapusan.”20
Ang pagkamasulundon sa mga sugo sa Ginoo naghatag kanato og pagsalig diha sa atong gipili nga dalan, mopasarang kanato sa Iyang paggiya ug direksyon samtang kita nagpadayon sa atong mga paningkamot, ug nagtanyag kanato og potensyal nga mamahimong sama sa atong Manluluwas, si Jesukristo, ug mobalik ngadto sa presensya sa Amahan.
Kini mao ang akong pag-ampo nga matag adlaw makakita kita nga naningkamot nga mahimong mas masulundon sa mga balaod, mga ordinansa, ug mga sugo sa ebanghelyo ni Jesukristo aron Siya mas makapanalangin sa hingpit sa atong kinabuhi.
Mopamatuod ako nga ang pagkamasulundon sa mga sugo sa Dios nagdala og mga panalangin sa langit; nga ang atong Langitnong Amahan ug ang Iyang Anak, si Jesukristo, buhi; nga ang Basahon ni Mormon mao ang pulong sa Dios; ug si Presidente Thomas S. Monson mao ang propeta sa Ginoo alang sa atong panahon karon, sa pangalan ni Jesukristo, amen.