Presidenti Monson Bën Thirrje për Misionarë dhe Njofton për Pesë Tempuj të Rinj

Presidenti Tomas S. Monson e hapi Konferencën e Përgjithshme Gjysmëvjetore të 180-të të Kishës, që u mbajt të shtunën dhe të dielën, më 2 dhe 3 tetor 2010, duke bërë thirrje që më shumë anëtarë të shërbejnë në misione dhe duke njoftuar për pesë tempuj të rinj.

Presidenti Monson përsëriti thirrjen që “çdo i ri i denjë dhe i aftë” të përgatitet për të shërbyer; ka mirëpritur të rejat që dëshirojnë të shërbejnë; dhe shprehu një nevojë të Kishës që të shërbejnë “shumë-shumë më tepër çifte në moshë”.

“Shërbimi misionar është një detyrë priftërie”, tha ai, “një detyrim që Zoti e pret prej nesh, të cilëve na është dhënë kaq shumë.”

Presidenti Monson njoftoi se pesë tempuj të rinj janë planifikuar për ndërtim në Hartford në Konetikat të SHBA-së, Indianapolis në Indiana të SHBA-së, Lisbonë në Portugali, Tihuana në Meksikë dhe Urdaneta në Filipine.

Tempujt e rinj e çojnë në 23 numrin e tempujve që janë njoftuar ose janë në ndërtim. Pasi të përfundohen, këta 23 tempuj do ta çojnë në 157 numrin e përgjithshëm të tempujve të Kishës në mbarë botën.

“Ne vazhdojmë të ndërtojmë tempuj”, tha Presidenti Monson. “… Vazhdofshim me besnikëri që të shkojmë në tempuj, që po ndërtohen gjithnjë e më afër anëtarëve tanë” (“Ndërsa Prapë Takohemi së Bashku”, Liahona dhe Ensign, nëntor 2010, f. 4).

Tempujt e rinj do të jenë të parët për Kishën në Portugali, Indiana dhe Konetikat. Tempulli i Urdanetës do të jetë tempulli i tretë i Kishës në Filipine dhe Tempulli i Tihuanas do të jetë tempulli i trembëdhjetë i Meksikës.

Gjatë gjashtë muajve ndërmjet konferencave të përgjithshme të prillit dhe të tetorit, Kisha përkushtoi katër tempuj të rinj: Tempullin e Gila-Vellit në Arizonë; e Vankuverit në Kolumbian Britanike, e Sebusë në Filipine dhe e Kievit në Ukrainë. Tempulli i Laies në Havai është programuar të ripërkushtohet më 21 nëntor 2010, pasi i është nënshtruar një restaurimi të gjerë.