Uike Toetuʻú
Te ke lava ʻo teuteu ki he Toetuʻú ʻaki haʻo ako ki he meʻa naʻe hoko lolotonga e uike kimuʻa pea Tutuki mo Toetuʻu ʻa Sīsū Kalaisí. Kamata lau e ngaahi meʻa naʻe hokó mo e ngaahi veesi folofola ʻoku hiki atu ki he ʻaho takitaha, ʻi ha ʻaho ʻe valu kimuʻa he Pekiá.
Tokonakí
Naʻe toe pē ʻaho ʻe ono pea hoko ha ʻaho mālōlō mahuʻinga naʻe ui ko e Laka Atú. Naʻe haʻu ha kakai tokolahi ki Selusalema ke ʻoatu ʻenau ngaahi feilaulaú ʻi he temipalé he ʻaho ko iá. Naʻe fononga lalo ʻa Sīsū ki Pētani, ko ha kolo ofi ki Selusalema. Naʻá Ne nofo ai mo hono ngaahi kaungāmeʻa ko Lasolosi, Mele, mo Maʻatá ʻi ha pō ʻe nima. Naʻe tākai ʻaki ʻe Mele hono ongo vaʻé ha lolo.
Vakai, Sione 12:1–3.
Sāpaté
Naʻe fononga lalo ʻa Sīsū mei Pētani ki Selusalema. Naʻá ne heka ʻi ha ʻasi ki he loto koló, ʻo hangē ko ia ne pehē ʻi ha veesi he Fuakava Motuʻá ʻe hokó. Ne lau ʻe he kakaí ko honau Tuʻi Ia, ʻo nau kalanga “Hosana,” mo faliki e lauʻi pāmé ʻi muʻa he ʻasí ke ʻoua naʻa ʻalu hake e efú ki he Fakamoʻuí. Naʻe ʻaʻahi ʻa Sīsū ki he temipalé peá Ne foki ki Pētani.
Vakai, Sakalaia 9:9; Mātiu 21:1–11; Maʻake 11:1–11.
Mōnité
Naʻe mamata ʻa Sīsū ki he fefakatauʻaki ʻa e kakaí ʻi he temipalé. Naʻá Ne ʻai ke nau ʻalu mei ai he naʻá Ne fie maʻu ke hoko e temipalé ko ha “fale ʻo e lotu.” Naʻá Ne fakamoʻui leva e kakai naʻe heke pe kuí. Naʻe ʻita ʻa e kau taulaʻeiki loto meheká ʻiate Ia.
Vakai, Mātiu 21:12–17; Maʻake 11:15–19.
Tūsité
Naʻe akonaki ʻa Sīsū ki he kakaí ʻi he temipalé pea ʻi ha moʻunga ofi pē ai ko e Moʻunga ʻo e ʻŌlivé.
Naʻe fonofono e kau taulaʻeikí ke tāmateʻi ʻa Sīsū. Naʻe tali ʻe Siutasi ʻIsikaliote, ko e taha ʻo ʻEne kau ākongá, ke ne tukuatu ʻa Sīsū ki he kau taulaʻeikí ʻaki ha totongi ko e konga siliva ʻe 30.
Vakai, Mātiu 25:31–46; 26:14–16.
Pulelulú
ʻOku ʻikai hā he folofolá e meʻa naʻe fai ʻe Sīsū ʻi he ʻaho ko ʻení. Mahalo pē naʻá Ne ofo mo ʻEne kau ākongá he ʻaho ko iá. ʻE lava ke ke lau e talanoa fakatātā ʻo e kau tāupoʻou ʻe toko hongofulú, ko ha talanoa naʻe fai ʻe Sīsū ki Heʻene kau ʻākongá ke tokoni ke nau teuteu ki Heʻene Hāʻele ʻAngauá.
Vakai, Mātiu 25:1–13.
Tuʻapulelulú
Naʻe teuteu ʻa e kau ākonga ʻa Sīsuú ki he kai ʻo e Laka Atú. Lolotonga ʻenau kaí, naʻe talaange ʻe Sīsū ki he kau ākongá ʻe lavakiʻi Ia ʻe hanau taha. Peá Ne toki ʻoange kiate kinautolu ʻa e sākalamēnití ko hono fuofua taimí ia, ke tokoni ke nau manatuʻi Ia. Naʻe hāʻele ʻa Sīsū ki he Ngoue ko Ketisemaní ke mamahi koeʻuhí ko ʻetau ngaahi angahalá pea ke lotu ki he ʻOtuá. Ne ō mai ha kakai mo ha ngaahi heletā ʻo nau puke Ia. Naʻe ilifia ʻa e kau ākongá ʻo nau hola.
Vakai, Mātiu 26:17–29, 36–56.
Falaité
Naʻe ʻave ʻa Sīsū kia Kaiafasi, ko e taulaʻeiki lahí. Naʻe fakaʻikaiʻi ʻe he ākonga ʻa Sīsū ko Pitá ʻokú ne ʻiloʻi Ia. Naʻe fakafehuʻi ʻa Sīsū ʻe Pailato, ko e kōvaná, mo Hēlota. Naʻe tautea ia ke mate ʻi he kolosí. Naʻe tutuki ʻa Sīsū. Naʻe tuku ʻe ha tangata koloaʻia ko Siosefa ʻa Sīsū ʻi hono fonualotó. Naʻe ʻaʻahi ʻa Mele ko e faʻē ʻa Sīsuú, mo Mele Makitaline ki he fonualotó.
Vakai, Mātiu 26:57–72; 27:1–2, 27–37; Luke 23:44–46, 50–56.
Tokonakí
Naʻe fakatokoto e sino ʻo Sīsuú ʻi he fonualotó. Naʻe tuku ha fuʻu maka lahi ʻi muʻa he hūʻangá. Naʻe kole e kau taulaʻeiki angakoví kia Pailato ke tuʻu ha kau leʻo ʻi tuʻa he fonualotó ke fakapapauʻi he ʻikai hū ha taha ki loto.
Vakai, Mātiu 27:57–66.
Sāpate Toetuʻú
Naʻe toetuʻu ʻa Sīsū! Kuó Ne toe tuʻu mei he fonualotó. Naʻe ʻalu hifo ha ʻāngelo mei he langí ʻo tekeʻi e fuʻu maká ki he tafaʻakí.
Naʻe fakahā ʻe Sīsū ki Heʻene kau ākongá ke akoʻi mo papitaiso ʻa e niʻihi kehé mo palōmesi ange te Ne ʻiate kinautolu maʻu ai pē.
Vakai, Mātiu 28.)
Faitaaʻi ʻe Matthew Reier; taupotu taha ki ʻolungá, mei toʻohema: Ko e Hāʻele ʻa Sīsū ki Pētani he Efiafí, tā ʻe James Tissot; Ko e Hū Ikuna ʻa Sīsū ki Selusalemá, tā ʻe Harry Anderson © IRI; Ko Hono Fakaʻā ʻo e Tangata Kuí, tā ʻe Harry Anderson, ʻi he angalelei ʻa e Pacific Press Publishing, Inc., ʻoua naʻa hiki hano tatau; Ko e Leʻo mei he Langí, tā ʻe James Tissot; konga naʻe toʻo mei he Naʻe Poto Honau Toko Nima, tā ʻe Walter Rane, ʻi he angalelei ʻa e Musiume Hisitōlia ʻo e Siasí; Ko Kalaisi ʻi Ketisemani, tā ʻe Harry Anderson © IRI; konga naʻe toʻo mei he Ko e Tutukí, tā ʻe Harry Anderson © IRI; Ko e Telio ʻo Kalaisí, tā ʻe Carl Heinrich Bloch, fakaʻaongaʻi ʻi hono fakangofua ʻe he Musiume Hisitōlia Fakafonua ʻi Feletilikisipōkí ʻi Hileloti, ʻi Tenimaʻake, ʻoua naʻa hiki hano tatau; taupotu ki laló: Kuó Ne Toe Tuʻu, tā ʻe Del Parson