Ngaahi Ongoongo Nounou mei Māmani
Tali ʻe he Siasí ʻa e Ngaahi Tohi Kole ke Kau ʻi he Feʻauhi ʻAati Fakavahaʻapuleʻanga hono Hivá
ʻE tuku atu ʻe he Musiume Hisitōlia ʻo e Siasí ʻi he ʻInitaneti ʻa e ngaahi foomu lesisita ki he Feʻauhi ʻAati Fakavahaʻapuleʻanga hono Hiva ʻa e Siasí ʻi he ʻaho 4 ʻo ʻEpeleli 2011. Kuo pau ke fakahū mai ʻa e ngaahi lēsisita ki he feʻauhí he ʻInitanetí pe meili ʻo hā he sitapá kimuʻa he ʻaho 7 ʻo ʻOkatopa 2011. Ko e kaveinga ʻo e feʻauhi ʻoku teu fakahokó ko e “Fakahā ʻa ʻEne Ngaahi Ngāue Fakaofó” (T&F 65:4). Ke maʻu ha fakamatala lahi ange ʻi he lea faka-Pilitāniá pe ke sio ki he ngaahi ʻaati kuo filifili mei he ngaahi feʻauhi kuo ʻosí, hū ki he lds.org/churchhistory/museum/competition.
Lolotonga Fai e Ngāue ki he Ngaahi Talanoa mei he Fuakava Foʻoú
ʻOku lolotonga fai e ngāue ki he ʻū vitiō mei he tohi ko e Ngaahi Talanoa mei he Fuakava Foʻoú ke poupou ki he nāunau fakalēsoni ʻo e Fuakava Foʻoú ki he 2011, ʻo nau fakaʻaongaʻi ʻa e founga ʻoku ui ko e palaleki (parallax). ʻOku maʻu e ʻū vitiō ʻe 65 ʻi he lea faka-Pilitāniá mo hono hiki ʻi he MP3 ki he vitiō takitaha ʻi he ngaahi lea fakafonua ʻe 11 ʻi he LDS.org . ʻE maʻu e ngaahi vitiō palalekí ʻi he lea fakafonua takitaha lolotonga e 2011. Maʻu e ʻū vitioó ʻi he scripturestories.lds.org pea fili e New Testament Stories.
Tukupā ha Kau Talavou ʻi Pengikaloa ki he Fatongia ki he ʻOtuá
Naʻe fakatahataha hake ki he ngaahi ʻotu moʻunga Kanakapulá laka hake he kau talavou ʻe toko 30 nai mei he Vahefonua Pengikaloa ʻInitiá ke ako ki he polokalama Fatongia ki he ʻOtuá mo ako ha ngaahi lēsoni fakalaumālie mei he ngaahi ʻekitivitī fakatuʻasino faingataʻa. Naʻe fakaʻaongaʻi ʻe he kau talavoú ha maea mo ha meʻa ke ne fusi ke mafao e maeá ke nau kolosi ai ʻi ha kiʻi anovai. Naʻa nau lele pongipongia, kaka ʻi ha moʻunga, mo ako ki hono fakaʻaongaʻi ʻo e maeá he kaka moʻungá. Naʻe fakaʻosi ʻaki e ʻekitivitií ha houa fakamoʻoni.
Sio mo fanongo ʻi he ngaahi talanoa fungani mei he Fuakava Foʻoú ʻi hono ʻomi ke hangē ʻoku hoko moʻoní ʻi he lanu fakaʻofoʻofa pea fakaʻofoʻofa hono fakamatalaʻí ʻi he scripturestories.lds.org.