Ko Sīsū Kalaisi Hoku Fakamoʻuí & Huhuʻí

Fai ʻe Ana Maria Coburn mo Cristina Franco

ʻE lava ke ke fakaʻaongaʻi ʻa e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí ki he māhina ní.

“ ʻOku mau tui ʻe lava ʻo fakamoʻui ʻa e faʻahinga ʻo e tangata kotoa pē ʻi he Fakalelei ʻa Kalaisí, tuʻunga ʻi he talangofua ki he ngaahi fono mo e ngaahi ouau ʻo e Ongoongoleleí.” (Ngaahi Tefito ʻo e Tui 1:3).

Ko e hā ha meʻa te ke fie foaki ki ha taha ʻokú ke fuʻu ʻofa lahi ai? Naʻe fuʻu ʻofa lahi ʻa hotau Fakamoʻui ko Sīsū Kalaisí ʻiate kitautolu naʻá Ne foaki ai ʻEne moʻuí maʻatautolu.

Naʻe ʻafioʻi ʻe he Tamai Hēvaní kapau te tau faiangahala mo fai ha ngaahi fehālaaki, he ʻikai ke tau toe lava ʻo nofo fakataha mo Ia. Ko ia naʻe loto fiemālie Hono ʻAlo ko Sīsū Kalaisí ke hoko ko hotau Fakamoʻuí. Naʻe fili Ia ʻe he Tamai Hēvaní ke Ne fakahaofi kitautolu he ko Ia toko taha pē naʻe lava ke moʻui taʻe ʻi ai Haʻane angahala.

Naʻe mamahi pea pekia ʻa Sīsū ke fakahaofi kitautolu mei he maté mo ʻetau ngaahi angahalá. ʻOku ui ʻa e ngāue ko ʻeni naʻe fai ʻi he ʻofá ko e Fakaleleí. ʻE lava ke tau fakatomala mei heʻetau ngaahi angahalá, fakamolemoleʻi kitautolu, pea tau maʻa mo haohaoa ʻo hangē ko Sīsuú koeʻuhí ko e Fakaleleí.

Naʻe tutuki ʻa Sīsū peá Ne pekia, ka naʻá Ne toetuʻu hili ha ʻaho ʻe tolu. Naʻá Ne toe moʻui! Koeʻuhí ko ʻEne toetuʻú, te tau toetuʻu mo kitautolu foki. ʻOku ʻuhinga ʻeni ʻe toe fakatahaʻi hotau sinó mo e laumālié ʻo taʻengata.

Ko e moʻoni ko Sīsū Kalaisí hotau Fakamoʻuí mo e Huhuʻí. Ko e sīpinga haohaoá Ia maʻatautolu hono kotoa. Naʻá Ne akonekina kitautolu ʻi he founga ke tau feangaleleiʻaki aí. Naʻá Ne akonekina kitautolu ʻi he founga ke tau fetauhiʻaki aí. Naʻá Ne akonekina kitautolu ʻi he founga ke tau hoko ʻo lelei ange aí. He ʻikai ke tau lava ʻo moʻui haohaoa hangē ko iá, ka ʻe lava ke tau foki ʻo nofo fakataha mo Sīsū mo e Tamai Hēvaní ʻaki ʻetau talangofua ki he ngaahi fekaú mo fai hotau lelei tahá. ʻOku fie maʻu ke tau muimui ʻia Sīsū Kalaisi ʻi he ʻaho kotoa pē.