ʻOku ʻIkai Ke u Fie ʻIlo Au ki he Siasí
Tanintoa Sexton, ʻOtu Motu Māsoló
ʻI he kole mai hoku uaifí pe ʻe lava ke akoʻi homa ngaahi fohá ʻe he ongo faifekaú, naʻe ʻikai ke u fie ʻilo au ki ha faʻahinga meʻa kau ki he Siasí. Ka naʻe ʻikai ke u ʻikai ange he naʻe ʻosi kau foki ia ki he Siasí.
ʻI he kamata pē ke ʻalu ange tuʻo ua e ongo faifekaú he uike ki homau ʻapí, naʻá ku ʻalu au ki he ʻapi hoku kaungāmeʻá ʻa ia naʻa mau kaungāʻapí. Naʻe mālohi hoku kaungāmeʻá ʻi ha siasi faka-Kalisitiane ia ʻe taha. Naʻá ne loto ke ma talanoa ki he Tohi Tapú he taimi kotoa pē ne ma talanoa ai. Ne u talaange naʻe ʻikai ke u saiʻia he talanoa ki he meʻa peheé pea naʻe ʻikai ke u fie ako ki he tui fakalotú. Ka naʻá ne kei feinga pē ke fakalotoʻi au, pea faifai peá u ʻio ange. Ko ia ne taimi lahi ʻema ako e Tohi Tapú mo hoku kaungāmeʻá lolotonga iá hono akoʻi hoku ngaahi fohá ʻe he ongo faifekaú.
ʻI he ʻaho ʻe taha ne hokosia e taimi ke haʻu ai e ongo faifekaú ki homau ʻapí. Naʻe ʻikai ke u ʻalu ka u pehē ke u nofo pē mei he loki hoko maí. ʻI he kamata akoʻi ʻe he ongo faifekaú hoku ngaahi fohá, ne u loto ke u fanongo ki ha meʻa lahi ange. Ne u ʻunuʻunu ofi atu ki he matapaá ke u lava ʻo fanongo lelei ange. Naʻá na akoʻi hoku ngaahi fohá fekauʻaki mo e kau ʻaposetoló pea mo e kau palōfitá.
Ne u toki fakatokangaʻi kimui ʻa eku fie maʻu ke u ʻilo lahi angé. Ne u talanoa mo e ongo faifekaú peá u pehē ke na akoʻi e ngaahi lēsoní kiate au—ʻo ʻoua ʻe toe kau ki ai ha taha. Naʻe ʻi ai maʻu pē hoku uaifí, ka ne ʻikai toe ʻilo ki ai ha taha.
Ko ia ko ʻene haʻu tuʻo ua ko ia ʻa e ongo faifekaú he uike ke akoʻi hoku ngaahi fohá, naʻá ku ʻalu au ki he ʻapi hoku kaungāmeʻá. Te na toki akoʻi ʻe kinaua au ʻi ha ʻaho kehe.
Ne lea kovi hoku kaungāmeʻá ʻi ha ʻaho ʻe taha ki he Siasí, pea naʻá ku hanga ʻo taukapoʻi e Siasí. Naʻá ne hangē pē ko e tokolahi ʻi he ʻOtu Motu Māsoló, ʻo siʻi ʻene ʻilo ki he Siasí peá ne maʻuhala e ngaahi meʻa ʻoku tui ki ai e Kāingalotú. ʻI heʻene lea ʻaki e ngaahi meʻa naʻe ʻikai leleí, ne u toe taukapoʻi pē ʻa e Siasí.
Ne fai ʻeni ʻi ha māhina ʻe fitu. Naʻá ku fakatokangaʻi ʻi he ʻaho ʻe taha ne fakamoʻoniʻi mai ʻe he Laumālie Māʻoniʻoní kiate au naʻe moʻoni ʻa e meʻa kotoa pē naʻe akoʻi mai ʻe he ongo faifekaú. Ne u ʻiloʻi naʻe fie maʻu ke u papitaiso, neongo naʻe kei siʻisiʻi ʻeku ʻilo ki he ongoongoleleí.
Naʻá ku fiefia he ʻosi hono papitaiso au ʻi he 2007. Naʻe kamata ke ma tātānaki leva ha paʻanga ke ma ō ki he temipale ʻi Hauaiʻí, ʻo silaʻi ai au mo hoku uaifí mo ʻema fānau ʻe toko tolú ʻi Tīsema 2008.
Naʻe ʻaonga lahi ki heʻeku moʻuí ʻeku kau ki he Siasí. Ne u pehē ke u nofo mei heʻeku ngāue hono uá, ʻeku fakafiefiaʻi e kakai ʻi ha falekai, he te u foki tōmui mai ki ʻapi kuo tau e nanamu tapaká ʻi hoku kāmení. Neongo ne mole e kiʻi paʻanga ko iá, ka naʻe tokangaʻi pē kimautolu ʻe he ʻEikí.
ʻOku ou ʻilo ʻoku moʻoni e Siasí pea ko Siosefa Sāmitá ko e palōfita ia ʻa e ʻOtuá koeʻuhí ko e Laumālie kuó u ongoʻí mo e ngaahi tāpuaki kuó u maʻú.