Ko e Meʻa ʻOku Tau Tui Ki Aí

Naʻe fai ʻe Sīsū Kalaisi ʻa e Fakaleleí maʻa ʻEtau Ngaahi Angahalá

Ko e taha ʻo e ngaahi ʻuhinga ʻoku tau ʻi heni ai ʻi māmaní ke ako ke talangofua ki he ngaahi fekau ʻa e ʻOtuá. Kuo faiangahala ʻa e kakai kotoa pē kuo moʻui ʻi he māmaní, tuku kehe pē ʻa Sīsū Kalaisi, ʻa ia naʻe haohaoa ʻEne moʻuí (vakai, Loma 3:23; 1 Sione 1:8). Ko e faiangahalá ʻa ʻetau maumauʻi e ngaahi fekau ʻa e ʻOtuá ʻi heʻetau loto fiemālie ki aí, pea ʻoku ʻi ai ʻa e tautea ki he ngaahi faiangahalá kotoa. ʻI heʻetau faiangahalá, ʻoku fie maʻu ʻe he fakamaau totonú ke hilifaki hatau tautea (vakai, ʻAlamā 42:16–22).

Ko e nunuʻa ʻo ha faiangahala pē ko e mavahe mei he ʻOtuá (vakai, 1 Nīfai 10:21). ʻOku fuʻu faingataʻa ʻaupito ʻa e mavahe ko ʻení he ʻoku ʻikai ke tau lava ke fakaleleiʻi ʻiate kitautolu pē.

Ke ikunaʻi ʻa e mavahe ko ʻení, kuo ʻomai ai ʻe heʻetau Tamai Hēvaní ha founga ke toʻo ai ʻe Sīsū Kalaisi ko Hono ʻAlo Tofu pē Taha Naʻe Fakatupú, ʻa e mamafa ʻo ʻetau ngaahi angahalá kiate Ia, ʻo lava ai ke tau maʻa fakalaumālie pea ke toe fakataha mo Ia. Ko e palani ʻeni ʻo e ʻaloʻofá.

Ne akonaki ʻa e Fakamoʻuí, “He vakai, ko au, ko e ʻOtuá, kuó u kātakiʻi ʻa e ngaahi meʻá ni maʻá e kakai kotoa pē, koeʻuhí ke ʻoua naʻa nau mamahi ʻo kapau te nau fakatomala; ka ʻo kapau ʻe ʻikai te nau fakatomala kuo pau ke nau mamahi ʻo hangē pē ko aú” (T&F 19:16–17).

Ko e konga ia ʻo ʻEne Fakaleleí, ʻa e mamahi ʻa Sīsū maʻa ʻetau ngaahi angahalá ʻi he Ngoue ko Ketisemaní pea ʻi he kolosí ʻi Kalevale. ʻI heʻetau fakatomala mei heʻetau ngaahi angahalá, ʻe lava ke tau ʻomi ʻa e mālohi ʻo ʻEne Fakaleleí ki heʻetau moʻuí.

Naʻe folofola ʻa Sīsū Kalaisi, ʻa ē naʻe loto fiemālie pē ke fai e fakalelei maʻa ʻetau ngaahi angahalá ʻo pehē;

“Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.

“Toʻo ʻeku haʻamongá kiate kimoutolu, pea mou ako ʻiate au; he ʻoku ou angavaivai mo angamalū: pea te mou ʻilo ai ʻa e fiemālié ki homou laumālié.

“He ʻoku faingofua pē ʻeku haʻamongá, pea ʻoku maʻamaʻa ʻeku kavengá” (Mātiu 11:28–30).

ʻOku ʻomi foki ʻe he Fakaleleí mo e ngaahi tāpuaki ko ʻení:

1. Toetuʻú maʻá e kakai kotoa pē ʻoku fāʻeleʻi mai ki māmani (vakai, ʻAlamā 11:42–45).

2. Moʻui taʻengata ʻi he ʻafioʻanga ʻo e ʻOtuá maʻá e fānau kotoa pē ʻoku mate kimuʻa pea nau aʻu ki he taʻu ʻe ala fakamāuʻi ai kinautolú, ʻa e taʻu valú (vakai, Mōsaia 3:16; 15:24–25; Molonai 8:8–12).

3. Malava ke maʻu ʻa e melinó ʻi he ngaahi taimi ʻo e ʻahiʻahí he naʻe toʻo ʻe Sīsū kiate Ia ʻa ʻetau mamahí mo e mahamahakí (vakai, Sione 14:27; ʻAlamā 7:11–12).

4. Fakaleleiʻi ki he kakai anga-māʻoniʻoní ʻa e ngaahi meʻa ʻoku taʻefakafiemālie ʻi he moʻui ní (vakai, Malangaʻaki ʻEku Ongoongoleleí [2004], 59).

Ke maʻu ha fakamatala lahi ange, vakai, Ngaahi Tefitoʻi Moʻoni ʻo e Ongoongoleleí (2009), 69–76; mo e Tuʻu Maʻu ʻi he Tuí (2004), 66–70.

“Vakai, kuó u haʻu ki he māmaní ke ʻomi ʻa e huhuʻí ki he māmaní ke fakamoʻui ʻa e māmaní mei he angahalá.

“Ko ia, ko ia ia ʻe fakatomala pea haʻu kiate au ʻo hangē ko ha tamasiʻi siʻí, te u tali ia, he ʻoku ʻo e faʻahinga peheé ʻa e puleʻanga ʻo e ʻOtuá. Vakai, koeʻuhí ko e faʻahinga peheé kuó u tuku hifo ʻa ʻeku moʻuí; pea kuó u toe toʻo hake ia; ko ia mou fakatomala pea haʻu kiate au ʻa kimoutolu ʻa e ngaahi ngataʻanga ʻo e māmaní, pea moʻui” (3 Nīfai 9:21–22).

“Ko Sīsū Kalaisi, ʻa e ʻAlo Pē Taha ʻo e ʻOtuá Naʻe Fakatupú, naʻe moʻui ʻi he māmaní taʻe ʻi ai haʻane angahala, ko ia tokotaha pē naʻe malava ke ne fakahoko ʻa e fakaleleí maʻá e faʻahinga ʻo e tangatá” (Bible Dictionary, “Atonement”).

ʻA ʻEku Tamai, tā ʻe Simon Dewey; Ko e ʻAʻahi ʻa Sīsū Kalaisi ki he Ongo ʻAmeliká, tā ʻe John Scott © IRI; tā fakatātaaʻi e laʻitā ʻo e pēpeé © Getty Images; tā fakatātaaʻi ʻo e ngaahi ʻata kehé ʻe Christina Smith